༄༅། །ཀུན་མཁྱེན་མི་ཕམ་རྒྱ་མཚོ་ལ་བསྟོད་པ་དད་པའི་གསོས་སྨན་ཞེས་བྱ་བ་བཞུགས་སོ། །

༄༅། །རབ་འབྱམས་ཞིང་བཞུགས་སྲས་བཅས་རྒྱལ་ཀུན་གྱི། །གསང་གསུམ་ཡོན་ཏན་གཅིག་ཏུ་སྤུངས་པའི་དཔྱིད། །ཞིང་འདིའི་འགྲོ་ངོར་བཤེས་གཉེན་སྐུར་སྣང་བ། །མི་ཕམ་རྒྱ་མཚོ་གཏན་གྱི་སྐྱབས་སུ་བསྙེན། །གང་གི་ཡོན་ཏན་ཟབ་ཡངས་ཆུ་གཏེར་ཁྱོན། །ཚུར་མཐོང་ཀརྚའི་འདོམ་གྱིས་གཞལ་དཀའ་ཡང་། །བདག་བློ་སྐྲ་རྩེའི་ཁྱོན་ལ་མཛའ་བའི་ཆབ། །དད་གསུམ་ཆུ་སྐྱེས་གསོས་སུ་དེང་འདིར་ལེན། །ཉིད་སྐུ་ཕན་བདེ་བྱེ་བའི་ཟེར་འཕྲེང་ཅན། །ལེགས་སྨོན་རྟ་བདུན་ཁྱོགས་ཀྱིས་ཉེར་དྲངས་ཚེ། །འགྲོ་ཀུན་མོས་བློའི་རྫིང་བུ་དང་འཚམ་པར། །འགོག་མེད་སྣང་ཡང་ཀུན་རྟོག་ཟུག་རྔུས་དབེན། །ནམ་མཁའ་སྲིད་དུ་དཔག་ཡས་ཞིང་རྣམས་སུ། །འཕགས་དང་སོ་སྐྱེའི་གཟུགས་སུ་ཡོངས་བསྒྱུར་ཏེ། །འགྲོ་མང་བྱང་ཆུབ་གསུམ་ལ་བཀྲི་མཛད་ཀྱང་། །མི་ཁེངས་མི་ཞུམ་དམ་པ་སྤྱི་ཡི་ཚུལ། །རྡུལ་ཕྲན་ཁྱོན་ལ་རྡུལ་སྙེད་ཞིང་བཀོད་དེ། །བསྐལ་མང་མཛད་པ་སྐད་ཅིག་ལ་སྟོན་ཡང་། །ཞིང་དང་བསྐལ་པ་ཕྲ་བར་འཕོས་མིན་ཏེ། །དབང་བསྒྱུར་སྟོབས་ལ་དབང་བའི་ཁྱད་ཆོས་ལགས། །མདོ་སྔགས་རིག་གཞུང་རྒྱ་མཚོའི་ཚིག་དོན་ལ། །སྡུག་འབད་བརྩོན་པའི་ཁུར་གྱིས་ནོན་མིན་པར། །སྙིང་དབུས་མི་ཤིགས་གཞོན་ནུའི་སྒོ་ཕྱེ་ཚེ། །སྤོབས་པའི་གཏེར་ཆེན་བརྒྱད་ལ་མངའ་དབང་འབྱོར། །ཆུང་ངུའི་དུས་ནས་མཁྱེན་པའི་རྩལ་རྫོགས་ཏེ། །རྩོད་འཆད་རྩོམ་པས་ཐུབ་བསྟན་གསལ་ནུས་པ། །འཕགས་པའི་ཡུལ་ན་ཙནྚ་གོ་མི་དང་། །བསིལ་ལྗོངས་ཁྱོན་ན་འཇམ་མགོན་བླ་མ་ཙམ། །ཕས་རྒོལ་ལོག་རྟོག་བྲག་རི་དཔངས་མཐོ་བ། །ལུང་རིགས་ཐོག་ཟེར་དབལ་གྱི་ཟུར་ཙམ་ཞིག །ཕོག་པའི་མོད་ལ་འཕྲལ་དུ་གཏོར་མཛད་པ། །འདྲེན་མཆོག་ཁྱོད་ནི་ཕྱོགས་གླང་ཡབ་སྲས་དངོས། །སྤྲོས་བྲལ་རིག་པའི་གནད་གསང་སྟོན་པ་ལ། །གཞན་དྲིང་མི་འཇོག་སྨྲ་བའི་མཛད་ཚུལ་འདི། །སྐྱབས་གཅིག་ཁྱེད་དང་འཕགས་མཆོག་ཀླུ་དབང་ལ། །མཉམ་པར་དབང་བའི་སྤྱི་ནོར་ཡིན་ནོ་སྙམ། །རྒྱས་འབྲིང་བསྡུས་གསུམ་ཡུམ་གྱི་སྦས་དོན་གནད། །དངོས་དོན་བརྒྱད་དང་བདུན་ཅུས་བཀྲལ་བ་ན། །དགའ་ལྡན་ཞིང་བཞུགས་བྱམས་པ་མགོན་པོ་དང་། །མགོན་ཁྱོད་སོ་སོར་འབྱེད་པའི་སྤུ་རིས་སྟོར། །འདུལ་མངོན་འདབ་སྟོང་གཞོན་ནུའི་སྦྲང་རྩིའི་བཅུད། །རྣམ་དཔྱོད་རྐང་དྲུག་ཧུབ་ཀྱིས་གཞིབ་མཁས་པ། །ཐོགས་མེད་སྐུ་མཆེད་ཡོན་ཤཱཀ་རྣམ་གཉིས་ཀྱི། །གཙང་མའི་རྣམ་ཐར་ཁྱོད་ལ་དུས་གཅིག་དབང་། །མིག་མི་འཛུམ་པ་མཐུ་སྟོབས་བདག་པོ་ཟུང་། །བསམ་བཞིན་ཞིང་འདིར་བྱོན་པའི་མཁས་དབང་གིས། །ཁྱེད་གསུང་ནོར་བུའི་བྱི་དོར་ཁུར་བཞེས་ཚེ། །སྙན་པའི་གཏམ་གྱིས་སྲིད་གསུམ་དོག་པོར་བྱས། །བཀའ་དང་བསྟན་བཅོས་ཇི་སྙེད་བཞུགས་ཀུན་གྱི། །དགོངས་པའི་གནད་གསང་ཚང་ལ་མ་ནོར་བ། །ཉུང་ངུའི་ངག་གིས་བདེ་བླག་སྟོན་པ་འདི། །རླབས་ཆེན་ཐུགས་བསྐྱེད་སྨོན་པའི་རང་གཟུགས་ལགས། །ཟབ་རྒྱས་གསང་ཆེན་རྒྱུད་ལུང་འགྲེལ་བ་ལ། །རྣམ་འདྲེན་བཞི་པས་བསྔགས་བརྗོད་མེ་ཏོག་འཐོར། །རྒྱལ་ཀུན་བཀའ་ཡི་སྡུད་པོ་གསང་བའི་བདག །བཤེས་གཉེན་ཟོལ་དུ་བསྒྱུར་བར་གོར་མ་ཆག །རིག་འཛིན་རྣམ་བརྒྱད་དགོངས་པའི་དབྱིག་འཛིན་གཞིར། །ཟླུམ་པོར་འཁྱིལ་པ་སྨིན་གྲོལ་སྒྲུབ་སྡེའི་མཚོ། །ཐར་འདོད་བློ་ཡི་ཞིང་སར་འདྲེན་མཁས་པ། །མགོན་འདིའི་ཡོན་ཏན་བསམ་བཞིན་སྙིང་ནས་དད། །ནང་རྒྱུད་སྐོར་གསུམ་ཀཻ་ལ་ཤ་ཡི་མདངས། །དྲི་བྲལ་ལུང་རིགས་ཉིན་བྱེད་སྣང་བ་ཡིས། །གསལ་བྱེད་མཛེས་པའི་རྒྱན་གཅིག་འདི་འདྲ་བ། །ད་སྔོན་ནོར་འཛིན་ཁྱོན་ན་དཀོན་མིན་ནམ། །ཟབ་གསལ་གཉིས་མེད་སྟོན་པའི་རྒྱུད་ཀྱི་དོན། །གྲུབ་བརྒྱའི་སྤྱི་མེས་མཆོག་གི་མན་ངག་བཞིན། །ཡང་གསང་སྙིང་ཐིག་ལམ་དུ་བཀྲལ་བའི་གཞུང་། །ཐོས་པ་ཙམ་གྱིས་སྲིད་རྩ་ཧྲུལ་པོར་བྱེད། །གཟུངས་མཆོག་བརྒྱད་ལ་དབང་བ་རྗེ་ཁྱེད་ཀྱིས། །ཚིག་གཅིག་དོན་ཡང་བསྐལ་མང་བརྗོད་བྱས་ཀྱང་། །མི་བཟློག་ཟད་པ་མེད་པའི་རྣམ་ཐར་སྒོ། །རིས་མེད་འགྲོ་བའི་མངོན་སུམ་དཔལ་དུ་བཞག །འཕགས་བོད་རྒྱ་ནག་ཤམ་བྷ་ལ་སོགས་ཀྱི། །སྒྲ་རིག་མཐའ་དག་ཐུགས་དབུས་འཆང་ཁྱེད་ལ། །ཀ་ཙན་དབྱངས་ཀྱི་རི་མོས་སེམས་ཁེངས་པའི། །མཁས་རློམ་སྟོང་གི་འགྲན་པའི་ཡུལ་ལས་འདས། །ཡན་ལག་བརྒྱད་ཀྱིས་བཅིངས་པའི་གསོ་རིག་མཚོ། །རྣམ་དཔྱོད་ཧུབ་ཀྱིས་ལྷག་མེད་དྲངས་བའི་མཐར། །སྔོན་མེད་འཆི་གསོ་རོ་བརྒྱའི་ཞལ་ཆབ་རྒྱུན། །སྐལ་བཟང་བློ་ཡི་ཡོལ་གོར་ལྷུང་ལྷུང་འབེབས། །བཟོ་དང་སྒྱུ་རྩལ་རྩེད་མོའི་ཐབས་ཚུལ་འབུམ། །ཁྱོད་ཐུགས་རྩལ་ལས་ཤར་བ་འདི་འདྲ་བ། །མཐའ་བཞིའི་རྒྱལ་ཁམས་གང་ནའང་མེད་ངེས་ཕྱིར། །ཐབས་མཁས་མཛད་པའི་ཕ་མཐའ་སུ་ཡིས་གཞལ། །བཅུ་གཉིས་ཁྱིམ་ལ་རྒྱུ་བ་གཟའ་དགུའི་འགྲོས། །སྒྱུར་བགོད་རི་མོས་འཇལ་བ་ཙམ་མིན་པར། །ལས་རླུང་དབུ་མར་སོན་པའི་ཨཱ་དར་ཤར། །ཞག་གསུམ་ཡུལ་དུས་སྣང་བརྙན་འབུམ་གྱིས་འཁྱུད། །སྭོ་རོ་དོ་ཡི་རྒྱུད་གཞུང་གཟའ་སྐར་འབུམ། །གང་ཐུགས་མཁའ་དབྱིངས་ལྟོ་བར་སྦྲུམ་པ་དང་། །ཆབས་གཅིག་ཚར་གཅོད་རྗེས་འཛིན་ཟེར་འཕྲེང་ཚོགས། །མ་འབད་གླིང་བཞི་གསལ་བའི་དཔྱིད་དུ་སྨིན། །སྡེབ་སྦྱོར་རྒྱན་གྱིས་སྤུད་པའི་སྙན་འཇེབས་ངག །བྱ་དཀའ་མཁས་མང་ལོ་ཟླར་བསྒྲིག་དགོས་གནས། །མཉམ་པར་བཞག་པ་ཁོ་ནའི་ལག་རྗེས་སུ། །མིག་འཕྲུལ་བཞིན་དུ་སྐད་ཅིག་ཡུན་ལ་བསྐྲུན། །སྐད་ཅིག་རེར་ཡང་ཕྱོགས་བཅུའི་ཡིད་ཅན་ལ། །རང་རང་སྐད་དང་སྤྱོད་པའི་ཆོས་སྟོན་ཕྱིར། །མངོན་བརྗོད་ཟློས་གར་གཏམ་གྱི་རྣམ་འགྱུར་ཀུན། །གང་གི་ཞལ་ལས་འོངས་མོད་ངོ་མཚར་ཅི། །དཔྱད་གསུམ་དག་པ་ཉིད་ཀྱི་ལེགས་བཤད་ཀུན། །ཀུན་རྟོག་བློ་ཡིས་ཆེད་དུ་བསྒྲིགས་མིན་པར། །འཁྲུལ་མེད་དགོངས་པའི་གཏེར་ལ་དབང་བའི་ཚུལ། །བདེན་གསུང་དྲི་བྲལ་ཕྱི་རབས་དཔལ་དུ་བཞག །གང་གི་སྡོམ་གསུམ་གཙང་མའི་སྤྱོད་ཚུལ་གྱིས། །མཁན་ཆེན་པདྨའི་མཚན་ཡང་ཐུགས་འཕྲོགས་ནས། །མགོན་འདི་གངས་རིའི་ཁྲོད་ཀྱི་རྟ་ཐུལ་ཞེས། །བསྔགས་བརྗོད་མེ་ཏོག་སིལ་མ་གཅལ་དུ་བཀྲམ། །སྔོན་ཞིག་འཇམ་དཔལ་གཞོན་ནུའི་སྐུར་བཞེངས་དུས། །གང་གི་མཛད་སྤྱོད་དྲི་བྲལ་ནམ་མཁའི་ཁྱོན། །བསྟན་པའི་བདག་པོ་འོད་སྲུང་ཆེན་པོས་ཀྱང་། །གཞལ་དཀའི་གནས་སུ་མཐོང་ནས་ཡིད་སྣང་གཡོས། །སྒྲིབ་གཉིས་ཟད་པར་སྤངས་པའི་སེམས་དཔའ་ཁྱོད། །སྒྲིམ་པོའི་སྤྱོད་ལ་དགྱེས་ཚུལ་མི་དགོས་ཀྱང་། །དོན་མཐུན་སྤྱོད་པའི་ཚུལ་འདི་བསམས་བྱས་ཚེ། །ཟ་ཧོར་མཁན་པོ་རྣམ་གཉིས་ཡིད་ལ་འཁོར། །གསང་ཆེན་སྔ་འགྱུར་བསྟན་པའི་ཉིན་བྱེད་འོད། །ལྔ་བདོའི་སྤྲིན་ནག་རུམ་དུ་གཟིམས་པའི་ཚེ། །གང་གི་ཐུགས་བསྐྱེད་དྲི་བཞོན་ཕོ་ཉ་ཡིས། །སླར་ཡང་སྣང་བའི་སྒོ་འཕར་བརྒྱ་ཕྲག་ཕྱེ། །བཀའ་བབ་བདུན་ལྡན་མདོ་སྔགས་གླིང་པ་ཡིས། །ཐུབ་བསྟན་ཡོངས་ཀྱི་བདག་པོར་མངའ་གསོལ་ཚེ། །སྒྲུབ་བརྒྱུད་བརྒྱད་ཀྱི་ཟབ་གནད་མཐའ་དག་ཀུན། །འཆད་སྤེལ་རྩོམ་པའི་བཀའ་དྲིན་ཕ་མཐའ་ཡས། །སྣོད་བཅུད་རྒུད་པའི་གདུང་བ་གཞོམ་པའི་ཕྱིར། །ཡུལ་ཕྱོགས་ཀུན་ཏུ་གཏེར་གྱིས་ཕྱུར་བུར་གཏམས། །དགེ་ལེགས་སྲིད་གསུམ་ཁྱབ་པའི་ཐུགས་སྨོན་མཆོག །པདྨའི་སྲས་མཆོག་ཁྱོད་མིན་སུ་ལ་དབང་། །རྫས་སྔགས་ཏིང་འཛིན་དམིགས་པའི་འཕྲུལ་འཁོར་གྱིས། །བཟོད་དཀའི་ནད་གདོན་གཞོམ་པའི་མན་ངག་ཚོགས། །རིས་མེད་འགྲོ་བའི་མདུན་སར་བརྡལ་བ་ཡི། །བཀའ་དྲིན་ལན་དེ་བསབ་པར་དཀའ་མིན་ནམ། །ཐུབ་པ་མཆོག་དང་ཉེ་སྲས་རྣམ་བརྒྱད་ཀྱི། །སྐྱེས་རབས་རྟོགས་བརྗོད་གཏམ་གྱི་གླེང་མོ་ཡིས། །དཔག་ཡས་ལུས་ཅན་ཐར་ལམ་བཀོད་པ་ཡི། །བཟང་པོའི་རྣམ་ཐར་ཙམ་ཡང་སུ་ཡིས་དཔོག །སྡིག་ལྟུང་མེ་དཔུང་མཁའ་ལམ་འགེངས་པ་ལ། །སྲས་བཅས་རྒྱལ་བའི་མཚན་སྔགས་ཆར་ཟིམ་རྒྱུན། །བར་མེད་བསྙིལ་བའི་མཛད་ཚུལ་རྨད་བྱུང་འདི། །ས་མཆོག་སེམས་དཔའ་ཁྱོད་ཀྱི་བཀའ་དྲིན་ལགས། །དེང་སང་གངས་རིའི་ཀློང་འདིའི་མཁས་བླུན་ཀུན། །སྡེ་གསུམ་སྐོར་བཞིའི་མན་ངག་དྲི་མེད་ལ། །སྡང་ཞུགས་ལོག་ལྟའི་གདོན་ཆེན་སྤངས་པ་འདི། །དམ་པའི་དབང་པོ་ཁྱེད་ཀྱི་དྲིན་ལས་བྱུང་། །དུས་གསུམ་ཀུན་མཁྱེན་པདྨ་སམ་བྷ་ཝས། །སྤངས་རྟོགས་མཐར་སོན་ཁྱེད་ཀྱི་བསྟོད་བསྔགས་ཚོགས། །ལན་བརྒྱར་བརྗོད་པའི་དྲི་བྲལ་ལུང་བྱང་རྣམས། །རྗེ་འབངས་གྲོགས་ལ་གཅེས་ནོར་ཚུལ་དུ་གདམས། །སྲན་མ་མ་ཤའི་སྦྱོར་བ་ཉམས་བཞེས་ཚེ། །སྔོ་ལྗང་མྱུ་གུས་ཞལ་དཀྱིལ་ཁེབས་པ་ཡི། །ངོ་མཚར་གྲུབ་པའི་རྒྱལ་མཚན་བསྒྲེངས་པ་ན། །བདུད་སྡེའི་དཔུང་རྣམས་ཞུམ་པའི་གནས་ལ་བཀོད། །བོད་འདིར་ཇི་སྙེད་བཞུགས་པའི་རྒྱལ་གསུང་ཀུན། །ཉིན་ཞག་གསུམ་གྱི་ཁོངས་སུ་ཐུགས་ལ་ཟིན། །འཇམ་དཔལ་གཞོན་ནུས་ཕྱག་གི་རལ་གྲི་ཡིས། །མངོན་སུམ་དབང་བསྐུར་བསྟན་པའི་མཛོད་ཀུན་གཏད། །འདོད་ཁམས་དབང་ཕྱུག་སྙིང་ལ་ཞུགས་པ་ཡི། །དགྲ་སྡེ་མང་པོས་མཚོན་ཆར་ཕབ་ཚད་ཀུན། །མཁྱེན་རབ་བདག་པོའི་སྐུ་གཟུགས་དངོས་སུ་གྱུར། །སྒྱུ་རྩལ་སྟོབས་ཀྱིས་ཕ་རོལ་ཟིལ་གྱིས་མནན། །སྡེ་གསུམ་ཆོས་ཀྱི་སྲུང་མ་ཇི་སྙེད་ཀུན། །ཁྱི་བཟང་རྗེ་ལ་འདུན་པའི་སྤྱོད་ཚུལ་གྱིས། །གུས་བཅས་ཕྱག་གིས་བསྙེན་པའི་དེ་མ་ཐག །གང་བཅོལ་ལས་ཀུན་སྒྲུབ་པ་ཀུན་གྱིས་མཐོང་། །ཞེ་སྡང་གཟུགས་སུ་ཤར་བའི་འབྱུང་པོ་ཡང་། ཁྱོད་ཞལ་བདུད་རྩིས་བྲན་པའི་དེ་མ་ཐག །བྱམས་པའི་སེམས་ཀྱིས་རང་གཟུགས་དངོས་བསྟན་ནས། །མངགས་གཞུག་བྱ་བ་བསྒྲུབས་པ་མཐུན་སྣང་ཡུལ། །བསྟན་ཞབས་སྡུད་པ་ཀླ་ཀློའི་གཤེད་པོ་རུ། །ཁྲོ་ཆེན་ཡ་མན་ཏ་ཀའི་སྐུར་བཞེངས་ཚེ། །གཟའ་སྐར་ཚོགས་ཀྱིས་རྔམས་ཟིལ་མ་བཟོད་དེ། །འདར་བཞིན་བྲོས་པ་བསིལ་ལྗོངས་སྤྱི་ལ་སྣང་། །ཚེ་མཐའ་ཡས་པའི་དཀྱིལ་འཁོར་ཞལ་ཕྱེ་ཚེ། །འཆི་མེད་བདུད་རྩི་ཐུགས་དབུས་སིམ་པའི་མོད། །ལྷ་དང་སྐལ་བ་མཉམ་པའི་ངོ་མཚར་འབུམ། །སྐལ་ལྡན་བུ་ལ་མངོན་སུམ་སྣང་བར་མཛད། །གང་གི་དགོངས་པ་གཏད་པ་ཙམ་གྱིས་ཀྱང་། །ཞགས་པས་འཁྱུད་བཞིན་རླུང་ཡང་འགྲོ་དབང་བྲལ། །འབབ་ཆུའི་ཚོགས་ཀྱང་ཕྱིར་ལ་ལོག་གྱུར་ཅིང་། །མདའ་དར་མཛེས་པས་ཆུ་དཀྱིལ་བྲོ་གར་འཁྲབ། །འཇག་མས་བསྟར་བའི་སྒྱོགས་རྡོའི་འཕྲུལ་འཁོར་གྱིས། །མཁའ་ལ་བསྙེགས་པའི་རྡུལ་ཕུང་བརླགས་བྱས་ཏེ། །མ་འོངས་རིགས་ལྡན་དམག་དཔོན་སྐུར་བཞེངས་དུས། །མཐུ་སྟོབས་མཁའ་དང་མཉམ་པའི་ཆེ་བ་བསྟན། །ཤྭ་རྡེལ་ས་སྟེང་བོར་དང་ཆབས་གཅིག་ཏུ། །རྒྱང་གནས་ཁང་ཁྱིམ་མང་པོ་གཏོར་བྱས་ཏེ། །འདི་བཞིན་གླིང་བཞི་དུས་གཅིག་བཤིག་དགོས་ཀྱང་། །དཀའ་བ་མེད་ཅེས་མི་འཇིགས་གསུང་དབྱངས་བསྒྲགས། །རི་དབང་བཤིག་ལའང་ནུས་མཐུ་ཐོགས་མེད་པའི། །རིགས་སྔགས་འཆང་བ་སྟོང་ཕྲག་ཉེར་གསུམ་གྱིས། །དུས་གཅིག་དམོད་པའི་འཕྲུལ་འཁོར་བསྐོར་བྱས་ཀྱང་། །ཁྱེད་ལ་གནོད་མེད་ཕན་པའི་དཔལ་དུ་གྱུར། །བསྲེག་པའི་ལས་མཐའ་གང་དང་གང་བྱེད་ཀྱང་། །ཐ་མལ་མེ་ཡི་སྟོབས་ལ་ལྟོས་མིན་པར། །གཏུམ་མོའི་ཨ་ཤད་སྦར་བའི་བྱེད་པ་ཡིས། །བསྲེག་རྫས་ལྷ་ལ་འབུལ་བའི་ཆོ་འཕྲུལ་བསྟན། །འཆད་རྩོད་རྩོམ་པའི་དོན་ལ་ཐུགས་གཞོལ་ཚེ། །མཁས་གྲུབ་མང་པོས་འཇམ་དཔལ་དངོས་སུ་མཐོང་། །ལ་ལས་སྐུ་གཟུགས་འོད་ཀྱིས་འཁྱུད་སྣང་སོགས། །སྐལ་བར་འཚམ་པའི་མཐོང་སྣང་མང་དུ་བྱུང་། །གཏེར་རིགས་བཅོ་བརྒྱད་འབྱེད་པའི་དན་རྟགས་སུ། །འཇམ་དཔལ་ཡབ་ཡུམ་ས་བོན་འཕྲུལ་གྱི་གཟུགས། །མཐོ་བརྗིད་བྲག་རིའི་དབུས་ནས་བཏོན་པ་སོགས། །འདུས་པའི་འཁོར་ལ་དཔག་མེད་སྣང་བར་བྱས། །འཁོར་དུ་འདུས་པའི་སྐྱེ་བོ་མཐའ་དག་གི། །ཡིད་ལ་ཇི་ལྟར་ཤར་བའི་བྱེ་བྲག་རྣམས། །མ་འདྲེས་གསལ་བར་གསུང་ཚུལ་དྲང་པོའི་གཏམ། །ཞལ་སློབ་དུ་མའི་མགྲིན་པའི་རྒྱན་དུ་བྱས། །སྒྲིབ་མེད་དུས་གསུམ་མཁྱེན་པའི་ལུང་བྱང་རྣམས། །མཁས་དབང་སྲས་ཀྱི་དཔལ་དུ་བསྩལ་བ་ལས། །ཇི་ལྟར་དཔྱད་ཀྱང་ནོར་བའི་སྐབས་མེད་ཕྱིར། །བསམ་ཞིང་བསམས་ཚེ་ཐམས་ཅད་མཁྱེན་པར་ངེས། །མཛད་པ་ཐ་མའི་ཚུལ་ལ་དགྱེས་དགོངས་ཚེ། །དབང་བཅུ་མཐའ་རུ་ཕྱིན་པའི་འབྲས་རྟགས་འབུམ། །དད་ལྡན་འགྲོ་ལ་སྣང་བའི་རྣམ་ཐར་འདི། །ཇི་ལྟར་བསམས་ཀྱང་སངས་རྒྱས་དངོས་དང་མཉམ། །རང་སྣང་མངོན་པར་དགའ་བའི་ཞིང་ཁམས་སུ། །རྫོགས་སྨིན་སྦྱངས་པ་རྒྱ་མཚོ་མངོན་བྱས་ནས། །ནམ་མཁའ་སྲིད་དུ་དཔག་ཡས་སྤྲུལ་པ་ཡིས། །འགྲོ་རྣམས་འདྲེན་པའི་ཞལ་ཆེམས་དགྱེས་བཞིན་བསྩལ། །ཉིད་ལ་འབྲེལ་བ་ཐོགས་པ་ཇི་སྙེད་ཀུན། །མི་རིང་འཇམ་དཔལ་དཔའ་བོའི་ངོ་བོ་རུ། །མངོན་འཚང་རྒྱ་ཞེས་དྲི་མེད་སེངྒེའི་སྒྲ། །སྐལ་བཟང་ཡིད་ཀྱི་དཔལ་དུ་ཡང་ཡང་གནང་། །དམག་དཔོན་སེངྒེ་འབུམ་པའི་སྐུར་བཞེངས་ཏེ། །རིགས་ལྡན་ཕྲིན་ལས་སྤེལ་བའི་དུས་སྐབས་སུ། །ཉིད་ཀྱི་ཆོས་བརྒྱུད་འཛིན་པ་མཐའ་དག་ཀུན། །ཚོམ་བུ་གཅིག་ཏུ་འདུ་བར་བསླུ་མེད་གསུངས། །གཟུགས་སྐུའི་བཀོད་པ་དབྱིངས་སུ་བསྡུས་པའི་ཚེ། །སྐུ་གདུང་འཇའ་འོད་རིང་བསྲེལ་ལ་སོགས་པ། །གསང་ཆེན་གཞུང་ལས་བཤད་པའི་གྲོལ་རྟགས་ཀུན། །མ་ཚང་མེད་པ་འགྲོ་ཀུན་དཔལ་དུ་ཤར། །རྩོད་མེད་རིག་འཛིན་རྣམ་བཞིའི་རྣམ་ཐར་བཞིན། །འཕོ་མེད་འཇའ་ལུས་མཆོག་གི་སྐུར་བཟུང་སྟེ། །འདས་རྗེས་གདམས་པ་རྒྱུད་ལུང་མན་ངག་གནད། །ཐུགས་སྲས་མཆོག་གི་ཕྱག་ཏུ་མངོན་སུམ་གནང་། །དགྱེས་ཞལ་འཛུམ་པའི་དཀྱིལ་འཁོར་ངོམ་བཞིན་དུ། །ཟབ་རྒྱས་གདམས་པ་དངོས་སུ་གནང་བྱས་ཏེ། །དོན་བརྒྱུད་ཕ་ཕོག་ཐུགས་ལ་སོན་གྱུར་པའི། །རིག་འཛིན་མཁས་དབང་བར་མ་ཆད་དུ་བྱུང་། །དེ་སྐད་ལེགས་བཤད་སྤྲིན་གྱི་ཆར་ཟིམ་རྒྱུན། །རིས་མེད་འགྲོ་བློའི་ཞིང་སར་ཉེར་སོན་ཏེ། །དད་པའི་འདབ་སྟོང་འཛུམ་པའི་གེ་སར་ཁྱོན། །ཡོན་ཏན་སྦྲང་རྩིའི་བཅུད་ཀྱིས་འགེངས་པར་ཤོག །སངས་རྒྱས་བསྟན་པའི་ཉི་འོད་ཕྱོགས་བཅུར་གསལ། །ཕན་བདེའི་སྣང་བ་འགོག་མེད་འགྲོ་ལ་སྣང་། །ཀུན་ཀྱང་རྒྱལ་སྲས་སྤྱོད་པ་མཐར་སོན་ཏེ། །བྲལ་སྨིན་དྲུག་ཅུའི་དཔལ་ལ་སྤྱོད་གྱུར་ཅིག །བདག་ནི་འདི་ནས་སྐྱེ་བ་ཇི་སྲིད་དུ། །མཐའ་ཀླས་ཞིང་དུ་འཇམ་མགོན་བླ་མ་ཡིས། །སྣ་ཚོགས་གཟུགས་ཀྱིས་འགྲོ་བའི་དོན་མཛད་པའི། །བྲན་དུ་གྱུར་ནས་དད་པས་བསྟེན་པར་ཤོག །བཀྲ་ཤིས་གང་ཞིག་མཁྱེན་བརྩེ་ནུས་པའི་གཏེར། །འཕགས་པ་རིགས་གསུམ་མགོན་གྱི་དཔལ་ཡོན་ཀུན། །ས་གསུམ་སྐྱེ་དགུའི་སྙིང་ལ་རབ་ཞུགས་ནས། །ཕུན་ཚོགས་དགེ་ལེགས་ངང་གིས་རྒྱས་གྱུར་ཅིག །ཅེས་ཚིགས་སུ་བཅད་པ་བྲལ་སྨིན་གྱི་ཡོན་ཏན་དྲུག་ཅུ་རྩ་བཞིའི་གྲངས་ལྡན་འདི་ནི། རབ་རྒྱལ་ཤིང་འབྲུག་ཟླ་ཚེས་ལ་ངག་དབང་བློ་གྲོས་མཚུངས་མེད་ཀྱིས་སྤེལ་བ་དགེ་ལེགས་འཕེལ་མངྒ་ལཾ།། །།

རྩོམ་སྒྲིག་པ། ཀ་དག

47.2K