༧བདུད་འཇོམས་འཇིགས་བྲལ་ཡེ་ཤེས་རྡོ་རྗེས་དགུང་ལོ་བཅུ་དགུ་པར་གསུངས་པའི་སྙན་མགུར་ཞིག

༄༅། །ཨ་ཧོ་ཡེ། འོག་མིན་ཟངས་མདོག་དཔལ་རིའི་ཕོ་བྲང་གི་དབུས་ན། །རིག་འཛིན་དཔའ་བོ་མཁའ་འགྲོ་འདུས་པ་ཡི་ཚོགས་ཀྱི། །བདེ་ཆེན་ཉམས་བརྒྱས་སྒེག་པའི་རྩེད་འཇོ་དེ་བསམ་ཞིང་། །ཕ་གཅིག་མཚོ་སྐྱེས་རྡོ་རྗེ་སྙིང་དབུས་ནས་དྲན་བྱུང་། །སྣང་སྲིད་ཟིལ་གནོན་མཚན་དཔེའི་གཟུགས་སྐུ་རུ་ལྷང་ངེ་། །གསང་ཆེན་ནཱ་དའི་གསུང་དབྱངས་རྒྱུད་མང་གི་སྙན་འགྱུར། །ཐུགས་མཆོག་ཟག་མེད་འོད་གསལ་ཡེ་ཤེས་ཀྱི་རང་བཞིན། །གུ་རུའི་དགྱེས་ཞལ་ལྟ་བའི་དགའ་སྟོན་ལ་སུས་འགྲན། །འཛུམ་འཛུམ་དགའ་བའི་ཟུར་མིག་གཡོ་བ་ཡི་ངང་ནས། །སྙན་སྙན་ཌཱ་ཀིའི་གསང་གཏམ་བརྡ་གླུ་དེ་ཉན་ཅིང་། །ཁྱུག་ཁྱུག་གར་སྟབས་བསྒྱུར་བ་ཡ་མཚན་གྱི་ལྟད་མོར། །ཡང་ཡང་བལྟ་བའི་རེ་བ་བཟོད་མེད་དུ་ཡོད་རུང་། །ཉམ་ཐག་བུ་ཆུང་གཞོན་ནུའི་ཆུ་བུར་གྱི་མིག་ལ། །གཉིས་རྟོག་དྲི་མ་འཐུག་པོའི་ལིང་ཏོག་དེས་བཀབ་ནས། །གཟིགས་མོ་བྱེད་སྐལ་མི་འདུག་འགྱོད་སེམས་ཀྱི་གདུང་ཡུས། །སྨྲེ་སྔགས་འོ་དོད་འབོད་འདི་པད་འབྱུང་གིས་ཨེ་གསན། །གསན་ན་ཡེ་ཤེས་ཐུགས་རྗེའི་གསེར་ཐུར་དེ་ཕྱུངས་ནས། །མ་རིག་སྒྲིབ་གཡོགས་འཐུག་པོའི་ཤུན་པ་འདི་སོལ་ལ། །མངོན་སུམ་བདག་གི་ལག་པའི་མཛུབ་མོ་ནས་བཟུང་སྟེ། །ཕ་གཅིག་བཞུགས་ཡུལ་ཉམས་དགའི་སྐྱེད་ཚལ་དུ་ཁྲིད་རོགས། །ད་ལྟ་ཉིད་དུ་ཁྲིད་པའི་སྐལ་བ་རང་དབེན་ན། །རིག་འཛིན་དཔའ་བོ་མཁའ་འགྲོ་སྐྱོ་གྲོགས་ལ་ཐོངས་དང་། །ཟག་མེད་བདེ་བ་ཆེན་པོའི་དགའ་སྟོན་གྱི་དཔལ་ལ། །དགའ་མགུར་སྤྱོད་བཞིན་རིམ་པར་ཕ་རྗེས་སུ་བསྙེགས་ཡོང་། །དད་གསུམ་ལང་ཚོ་རྒྱས་པའི་ཐང་དཀར་གྱི་ལུས་ལ། །ལྟ་སྤྱོད་ཟུང་དུ་འབྲེལ་བའི་གཤོག་པ་དང་ལྡན་ཅིང་། །དམ་ཚིག་རྣམ་པར་དག་པའི་རྩལ་དྲུག་ཅིག་རྫོགས་ན། །པདྨ་འོད་ཀྱི་གྲོང་ཁྱེར་ཐག་རིང་ན་མི་འདུག །ལས་སྐལ་མཐུན་པའི་ལྷ་གྲོགས་ཕོ་མོ་ཡི་ཚོགས་རྣམས། །རིག་པ་འཛིན་པའི་གྲལ་དུ་སྨོན་ལམ་ཞིག་མཛོད་དང་། །ལྷག་ལྷག་ཉམས་ཀྱིས་དགྱེས་པའི་གད་མོ་དང་བཅས་ཏེ། །མི་འབྲལ་ལྷན་ཅིག་ས་སྤྱོད་ཞིང་ཁམས་ལ་ཆས་འགྲོ། །འདི་ལྟར་གདུང་གླུ་ཁུ་བྱུག་གཞོན་ནུ་ཡི་ངག་དབྱངས། །ཤུགས་འབྱུང་ལོངས་སྤྱོད་འཁོར་ལོའི་རོལ་རྩེད་ཀྱིས་བླངས་པས། །གུ་རུའི་ཐུགས་རྒྱུད་བསྐུལ་བའི་ཕོ་ཉ་རུ་གྱུར་ནས། །བྱིན་རླབས་བདུད་རྩིའི་སྦྲང་ཆར་ད་ལྟ་རང་ཕོབ་ཅིག །ཅེས་པའང་པདྨོ་རྣམ་པར་བཀོད་པའི་ལྗོངས་སུ་སྐྱེས་པའི་བྱིས་པ་སྐལ་བཟང་ཅན་འཇིགས་བྲལ་ཡེ་ཤེས་རྡོ་རྗེས་རང་ལོ་བཅུ་དགུ་པ་རྔ་ཆེན་མགོ་ཟླའི་ཡར་ངོའི་ཚེས་བཅུའི་ཉིན་ཐོལ་བྱུང་དུ་སྨྲས་པའོ། །  ། །

47.2K