༄༅། །ཚེ་མི་རྟག་པ་སྟོན་པའི་སྐྱོ་གླུ་ལྷུང་ལྷུང་འབབ་པའི་ཕུ་ཆུའི་དབྱངས་སྙན་ཞེས་བྱ་བ་བཞུགས་སོ། །

མཁན་ཆེན་འཇིགས་མེད་ཕུན་ཚོགས།

༄༅། །ལྷ་དཀྱིལ་འཁོར་རབ་འབྱམས་སྤྲོ་བསྡུ་ཡི་བྱེད་པོ། །རྗེ་བཀའ་དྲིན་འགྲན་བྲལ་མི་ཕམ་ནི་ཆོས་རྗེ། །སྙིང་ཆུ་སྐྱེས་འཛུམ་པའི་གདན་བཟང་ལ་བཞུགས་དང་། །ངག་མ་བཅོས་ཉམས་གླུ་ཐར་ཐོར་དུ་སྨྲའོ།༡།དབྱར་དྭངས་གཞུང་རྩི་ཤིང་མེ་ཏོག་གི་འཇོ་སྒེག །ཉམས་དགའ་བ་ལྷ་ཡི་ཡུལ་ལྗོངས་ལྟར་ཡོད་ཀྱང་། །དགུན་སེར་བུ་སྐྱ་བོ་བསུ་མ་ལ་ཐོན་དུས། །སེམས་སྐྱོ་ཤས་སྐྱེ་བའི་སྣོན་མ་རུ་ཤར་འདུག༢།བཀོད་ལེགས་པ་མེ་ཏོག་སྣ་ཚོགས་ཀྱི་ཚལ་ན། །ངག་སྙན་འགྱུར་འགྲན་པ་མཛེས་སྡུག་གི་རྐང་དྲུག །ཁོ་ཡུན་རིང་ཉམས་དགའི་རྩེད་འཇོ་ལ་སྤྲོ་ཡང་། །ཚེ་སྔོན་མའི་ལས་སྣང་བཟློག་ཐབས་རང་མི་འདུག༣།ནགས་ལྗོན་པའི་ཁྲོད་ནས་ཁུ་བྱུག་གི་སྐད་སྙན། །ཡིད་དབང་མེད་འགུགས་པའི་མཆོད་རྫས་ཤིག་ཡོད་དེ། །སྟོན་འགོ་མ་ཚེས་དུས་བསམ་མནོ་ཞིག་ཐོངས་དང་། །ཚེ་མི་རྟག་སྟོན་པའི་བཤེས་གཉེན་དེ་མིན་ནམ།༤།ཆར་ཟིམ་བུས་བསྐྱེད་བསྲིངས་འཇའ་ཚོན་གྱི་ལང་ཚོ། །དགུང་ཆུ་འཛིན་མདུན་ན་མཛེས་མཛེས་ལྟར་སྣང་ཡང་། །དེ་འཕྲལ་དུ་གར་སོང་ཆ་མེད་དུ་གྱུར་ལ། །བསམ་ཤེས་ན་མི་རྟག་མངོན་སུམ་དུ་གསལ་འདུག༥།སྟོན་སྤྲིན་དཀར་ཕུང་པོ་གངས་རི་བཞིན་བརྩེགས་པ། །ཁོ་མི་བརྟན་མཁའ་ལ་རྗེས་མེད་དུ་ཡལ་འདིས། །ཚེ་འདི་སྣང་བདེ་ལ་ཡིད་རྟོན་ནི་མེད་ཅེས། །ཡིད་སྐྱོ་ཤས་ཅན་ལ་འདོམས་པ་རང་ཡིན་སྙམ།༦།གཏོས་རྒྱ་ཆེ་སྲ་བརྟན་སྟོང་གསུམ་གྱི་བཀོད་པ། །མཐར་མི་རྟག་མེ་ཆུ་རླུང་གསུམ་གྱིས་འཇིག་ན། །མི་རེ་ཟུང་གིས་བསྒྲུབས་ཁང་ཁྱིམ་དང་ར་བ། །དོན་འདི་ལ་ཡིད་རྟོན་མེད་ངེས་སུ་ལོས་ཤེས།༧།ཚེ་བསྐལ་པར་ཐུབ་པ་རྫུ་འཕྲུལ་གྱི་བདག་པོ། །ཟས་ཏིང་འཛིན་སྤྱོད་པའི་ལྷ་མཆོག་དང་དྲང་སྲོང་། །དགྲ་འཆི་བདག་གནས་ལས་གཟུར་ཐབས་ཤིག་མེད་ན། །རང་འཆི་སྙམ་མེད་འདི་འདང་ལོག་རང་ལོས་ཡིན།༨།སྔོན་གླིང་བཞིའི་ཕུན་ཚོགས་མཐའ་དག་ལ་དབང་བའི། །རྗེ་འཁོར་སྒྱུར་ཟེར་བའི་གྲགས་ཆེན་འགའ་ཡོད་ཚོད། །དུས་དེང་སང་བསམ་ཚེ་མིང་ཙམ་ལས་མེད་ན། །བདག་ཉམ་ཆུང་ལུས་ལ་སྙིང་པོ་རང་མེད་ངེས།༩།དོན་སྤངས་རྟོགས་མཐར་སོན་རྒྱལ་བ་དང་སྲས་བཅས། །གྲངས་མང་བ་ལྷ་ལམ་སྐར་ཚོགས་ལྟར་བྱོན་ཀྱང་། །ཚུལ་མི་རྟག་མྱ་ངན་འདའ་ཚུལ་རང་བསྟན་པའི། །དཔེ་འདི་ཡང་མི་རྟག་གསལ་འདེབས་སུ་གོ་བྱུང་།༡༠།ཞིང་དག་པ་བསམ་ཡས་དབུ་རྩེ་ཡི་གླིང་དུ། །མགོན་མཁན་སློབ་ཆོས་རྒྱལ་སྟོན་འཁོར་གྱི་སྣང་བ། །སྐབས་དེ་དུས་བསམ་ན་སྤྲོ་མོ་ཞིག་ཡོད་དེ། །དུས་ད་ལྟ་བསམ་ན་སྐྱོ་ཤས་ལས་ཅི་ཡོད།༡༡།གཞུང་དཔྱད་གསུམ་དག་ལ་ཐོས་བསམ་ཞིག་མེད་ན། །སེམས་ཚོད་འཇོག་ཙམ་གྱིས་འཁོར་རྩ་ནི་མི་ཆོད། །སྐུ་བགྲེས་དུས་གཟའ་དགུའི་མགོ་འཛིན་དུ་གྱུར་ཏེ། །འཆི་རན་དུས་ཨ་ཁུ་ཆོས་མེད་དུ་འཁྱམ་འགྲོ།༡༢།ཆོས་མདོ་སྒྱུ་སེམས་གསུམ་ཉམས་བཞེས་དེ་བོར་ནས། །དབྱངས་འབུད་རྡུང་དཀྲོལ་སོགས་ཟབ་ཆོས་སུ་རློམ་སྟེ། །དཀོར་ནག་པོའི་ཟས་ལ་ངོམས་མེད་དུ་སྤྱོད་ན། །ལུས་ཐིམ་རིམ་ཐོན་དུས་རང་སྐྱོན་དེ་ངོམ་ཡོང་།༡༣།ཐུགས་རྣམ་དཔྱོད་རབ་ཡངས་གྲྭ་ས་ཡི་བཙུན་ཆུང་། །འཆད་རྩོད་པའི་གྲགས་སྙན་ཐུགས་དབུས་ལ་མཛའ་ཡང་། །དབུ་དུང་ལྟར་དཀར་དུས་དགེ་བཤེས་ཐོབ་སྲིད་མོད། །ཁྱེད་འདི་སྣང་བདེ་བ་ཡུན་ཐུང་ལས་མི་གདའ།༡༤།ལམ་བསླབ་གསུམ་ཡོན་ཏན་རྩིས་ཆུང་ལ་བཞག་ནས། །ཚེ་འདི་དོན་གཉེར་བ་བན་གཟུགས་ཀྱི་ཁྲམ་པ། །འཆིའི་ནངས་པར་ཞེ་འདོད་མཐར་འཁྱོལ་ཞིག་མིན་ཡང་། །དགྲ་གཤིན་རྗེའི་ཁྲིམས་ལ་ཕྱིར་བསྣུར་ནི་མི་ཡོང་།༡༥།མགོའི་སྐྲ་དཀར་སྒྱུ་ལུས་གོག་པོ་ཡི་རྒན་པོས། །ལོ་མང་པོའི་འདུག་ཆུས་ཡིད་ཡུལ་ལ་བཀོད་མོད། །ཁྱོད་སྣུམ་ཟད་མར་མེའི་དཔེ་ཟླ་ལ་འགྲིག་ཕྱིར། །ཤི་བར་དོའི་ལམ་རྒྱགས་སྒྲུབ་རན་ནི་མིན་ནམ།༡༦།གཟུགས་ལང་ཚོས་ཁེངས་པའི་ན་ཆུང་ནི་ཕོ་མོ། །འཆི་སྙམ་པ་ཡིད་ལ་འཆར་ཚོད་ཅིག་མིན་ཡང་། །དུས་ནམ་ཡོད་མི་ཤེས་གཤེན་རྗེ་ཡི་ཕོ་ཉས། །སྐེ་ཞགས་པས་སྡོམ་དུས་འགྱོད་ཆེན་ཞིག་ཡོད་གྲགས།༡༧།སེམས་ཕན་ཚུན་མཛའ་བ་ན་མཉམ་གྱི་གཞོན་ནུས། །ཚིག་གསང་གཏམ་རི་མོ་སྙིང་དབུས་སུ་འབྲི་བཞིན། །འབྲལ་མི་ཕོད་ཚེ་གང་འགྲོགས་འདོད་ཅིག་ཡོད་དེ། །ཚེ་རིང་ཐུང་ཇི་འདྲ་རང་རེས་ནི་མི་ཤེས།༡༨།དཔེ་ན་ཉིན་རྒྱུ་ནོར་རིགས་རྒྱུད་ཀྱིས་འབྱོར་རྣམས། །དུས་ད་ལོར་མང་པོ་ཉམ་ཐག་ཏུ་གྱུར་པའི། །ཚུལ་འདི་ཀོ་ཡིད་ཀྱི་མེ་ལོང་དུ་ཤར་ཚེ། །ཡོངས་ཟག་བཅས་ཆོས་ལ་སུན་པ་ཞིག་སྐྱེས་བྱུང་།༡༩།སོ་སུམ་ཅུའི་དུང་ཕྲེང་སོ་སོ་རུ་གྱེས་ཏེ། །ལུས་པགས་པའི་གཉེར་མ་ལམ་འཕྲང་བཞིན་ངོམ་འདིས། །ཁྱོད་མི་འགྱང་འཆི་ཞེས་བརྡ་ཆོས་ཤིག་སྟོན་ཀྱང་། །དེ་མི་གོ་རང་རེ་བ་གླང་དངོས་མིན་ནམ།༢༠།ལོ་གཅིག་སོང་སང་ཕོད་ད་ཚོད་ཀྱི་བར་ལ། །མི་མང་པོས་གཤིན་ལམ་འགྲིམ་ངེས་ཤིག་ཡིན་ན། །རང་དེའི་ནང་མེད་ཅེས་བརྗོད་ཐག་ནི་མི་ཆོད། །དོན་དེ་ཕྱིར་ཕྱི་མ་ཐག་རིང་ཞིག་མ་རེད།༢༡།ད་ལོ་བརྒྱ་སོང་དུས་ས་སྟེང་གི་སྐྱེ་དགུ། །མི་གཅིག་ཀྱང་མི་ལྷག་འཆི་ངེས་ཤིག་ཡིན་ན། །ཡུན་ཐུང་བ་རྨི་ལམ་ལྟ་བུ་ཡི་འཁྲུལ་སྣང་། །ཚེ་འདི་དོན་གཉེར་ལ་སྙིང་པོ་ཞིག་འདུག་གམ།༢༢།རང་ཆུང་ངུའི་དུས་ཀྱི་ན་མཉམ་གྱི་སྙིང་གྲོགས། །དེ་ཕལ་ཆེར་ཡུལ་གཞན་ངེས་མེད་དུ་འཁྱམས་ཐལ། །མང་ཆེ་བས་བར་དོ་འགྲིམ་དགོས་ཤིག་བྱུང་ན། །བདག་གཅིག་པུ་མི་ལྷག་ཁོ་ཐག་དེ་ཆོད་བྱུང་།༢༣།ཁྲིམས་བཟོད་དཀའི་འཆི་བདག་བང་ཆེན་དེ་ཐོན་དུས། །རྫོང་མི་ཤིགས་ལྕགས་མཁར་སྒོ་མེད་དུ་གབ་ནས། །དཔའ་འགྲན་མེད་མཚོན་ཐོགས་འབུམ་ཕྲག་གིས་བསྲུངས་ཀྱང་། །ཡུན་ཆུ་ཚོད་ཙམ་ལ་སྡོད་ཐབས་ནི་མེད་འདྲ།༢༤།ཁྱོན་སྲིད་གསུམ་འགེངས་པའི་ནོར་རྫས་ཤིག་བདོག་ཀྱང་། །གཤིན་ལས་མཁན་ཚོགས་ཀྱིས་ལྐོག་འབུལ་ནི་མི་ལེན། །སྟོང་གསུམ་ལ་དབང་བའི་ཚངས་དབང་ཀུན་ཚོགས་ཀྱང་། །འཆི་མི་དགོས་བློ་ཐབས་རྡུལ་ཆ་ཙམ་མེད་ངེས།༢༥།གཟུགས་མཛེས་པ་མཁའ་དབྱིངས་འཇའ་ཚོན་བཞིན་བཀྲ་ཞིང་། །སེམས་འགུགས་པའི་སྒྱུ་རྩལ་བརྒྱ་ཕྲག་ལ་མཁས་ཀྱང་། །སྲོག་འཕྲོག་པ་གཤིན་རྗེའི་སྡེ་ཆེན་གྱི་དམག་གི། །ལུས་བ་སྤུ་ཙམ་ཡང་གཡོ་ཐབས་ནི་མི་འདུག༢༦།ནད་ཡོད་མེད་སྐྱེ་བོ་མང་པོ་ཞིག་ཤི་ལ། །སེམས་རྣལ་དུ་ཕོབ་ལ་བསམ་མནོ་ཞིག་ཐོངས་དང་། །རང་ངེས་པར་འཆི་བའི་སྐུལ་མ་དངོས་ལགས་ན། །བློ་ཕྱི་ཐག་མ་རིང་ཐར་ལམ་ལ་བརྩོན་རན།༢༧།སྡེ་ཁྲི་སྐོར་མང་པོའི་མགོ་འཛིན་གྱི་དཔོན་ཡང་། །འཆི་རན་དུས་མི་གཅིག་ཁྲིད་དབང་ནི་ལྟ་ཅི། །ཟས་ཁམ་གཅིག་འཁྱེར་བའི་དབང་ཆ་ནི་མེད་ཕྱིར། །ཕན་ངེས་པའི་དམ་ཆོས་ཕྱི་བཤོལ་དུ་མ་འཇོག༢༨།ཚེ་འདི་སྣང་ཟད་པའི་ལས་སྣང་གི་དུཿཁ། །གཉེན་མཛའ་གྲོགས་མང་ཡང་བགོ་སྐལ་ནི་མི་ལེན། །མིག་མཆི་མས་བཀང་ཡང་བྱ་ཐབས་དང་བྲལ་ཕྱིར། །ད་མ་འདུག་འཆི་ཆོས་བསྒྲུབ་པ་ལ་འབད་རན།༢༩།བསམ་ཤེས་ན་སྣང་ཞིང་སྲིད་པ་ཡི་ཆོས་ཀུན། །ཚེ་མི་རྟག་སྟོན་པའི་དཔེ་ཆ་རང་ཡིན་ཕྱིར། །ངག་མ་བཅོས་གཏམ་ལ་ཟད་མཐའ་ནི་མེད་མོད། །གླུ་མཆོད་སྤྲིན་དེ་ཙམ་གྲོགས་ཁྱེད་ལ་འབུལ་ལོ།༣༠།ཡང་གསོན་དང་ཡིད་མཐུན་སྙིང་སྡུག་གི་གྲོགས་པོ། །སྤྱིར་འཁོར་བའི་ཆོས་ལ་ཡིད་རྟོན་ཞིག་མེད་ཕྱིར། །དུས་ནམ་ཡང་མི་འགྱུར་ཟག་མེད་ཀྱི་བདེ་འབྱོར། །ད་མ་གཡེལ་སྒྲུབ་ལ་གོ་ཆ་དེ་བགོ་རན།༣༡།བདག་ད་ནས་ནམ་མཁའ་ཇི་སྲིད་ཀྱི་བར་ལ། །ཕ་འཇམ་མགོན་བླ་མ་སྤྱི་བོ་རུ་མཆོད་བཞིན། །མ་ཉམ་ཐག་འགྲོ་ལ་ཟབ་ཆོས་ཤིག་འདོམས་པའི། །མགོན་འཇམ་དཔལ་དཔའ་བོའི་སྙིང་སྟོབས་ལ་སྨོན་ནོ།༣༢།
ཞེས་ཚིགས་བཅད་མཚན་བཟང་སོ་གཉིས་གྱི་གྲངས་ལྡན་འདི་ནི་སྙིང་གྲོགས་ཨོ་ཌི་ཡ་ནས་ཡང་ཡང་བསྐུལ་བའི་ལྷན་ཅིག་བྱེད་པའི་རྐྱེན་དང་རང་སེམས་ཧ་ཅང་སྐྱོ་བའི་ཉེར་ལེན་གྱི་རྒྱུ་ཚོགས་ཟུང་དུ་ཚོགས་ཚེ་ཡིད་ལ་ཤར་བ་བཞིན་རབ་རྒྱལ་ཤིང་འབྲུག་ཟླ༡ཚེས༢༧ལ་ངག་དབང་བློ་གྲོས་མཚུངས་མེད་ཀྱིས་སྤེལ་བ་དགེ་ལེགས་འཕེལ། ། ། །

རྩོམ་སྒྲིག་པ། ཨ་ནུ།

47.2K