འགྲོ་ན་འགྲོ་ན་དབེན་པར་སོང་།

ཀུན་གྱིས་གཙུག་ཏུ་བཀུར་ན་ཡང་། །ཁེངས་པ་དོར་ནས་ཞི་དུལ་གྱི། །མཛད་པས་འགྲོ་ཀུན་ཡིད་འཕྲོག་པ། །འདྲེན་མཆོག་ཆོས་རྒྱལ་ཞབས་ལ་འདུད། །འཁོར་བ་རྒྱལ་པོའི་བཙོན་ར་འདྲ། །འཁྲུལ་སྣང་སྡུག་བསྔལ་དཔག་ཏུ་མེད། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །ཚེ་འདི་མདང་གི་རྨི་ལམ་འདྲ། །ཟང་ཟིང་འཁྲུལ་བས་རང་ཉིད་བསླུ། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །རྣམ་གཡེང་ཚོང་འདུས་ལྟད་མོ་འདྲ། །འདུ་འཛིའི་ངང་ལ་མི་ཚེ་འཆོར། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །འཆི་བདག་དགོང་ཁའི་གྲིབ་མ་འདྲ། །སྐད་ཅིག་མི་སྡོད་ཚུར་ཚུར་འོང་། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །བཟའ་ཚང་ཚོང་འདུས་མགྲོན་པོ་འདྲ། །ད་ལྟ་འཚོགས་ཀྱང་མྱུར་དུ་འབྲལ། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །མཛའ་བཤེས་ཤིང་ཁའི་བྱེའུ་ཆུང་འདྲ། །མཐུན་པར་འགྲོགས་ཀྱང་སོ་སོར་འབྲལ། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །སྙན་གྲགས་ནམ་མཁའི་འབྲུག་དང་འདྲ། །དར་ཅིག་གྲགས་པས་རང་ཉིད་བསླུ། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །ནོར་རྫས་སྦྲང་མའི་སྦྲང་རྩི་འདྲ། །མང་པོ་བསགས་ཀྱང་གཞན་གྱིས་སྤྱོད། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །ཤེས་བྱ་ནམ་མཁའི་གཟའ་སྐར་འདྲ། །བསླབ་དགོས་གནས་ལ་ཟད་པ་མེད། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །ཆོས་བརྒྱད་ནད་པའི་སྔས་སྟན་འདྲ། །ཇི་ལྟར་བྱས་ཀྱང་བདེ་བ་མེད། །འགྲོ་ན་འགྲོ་ན་དབེན་པར་སོང་། །བྱེད་ན་བྱེད་ན་ལྷ་ཆོས་གྱིས། །གང་ཡང་འགྲོ་བས་མ་འབད་པར། །བདག་གི་དགེ་བ་ཡོངས་གྲོལ་ནས། །འཁོར་བའི་རྒྱ་མཚོ་སྟོངས་ནས་ཀྱང་། །ཞི་བའི་གྲོང་ཁྱེར་འགེངས་པར་ཤོག །ཅེས་པ་འདི་ནི་བྱ་བཏང་ཚོགས་དྲུག་རང་གྲོལ་གྱིས་རང་གཞན་ལ་ཕན་ཕྱིར་བླངས་པའོ། །

47.2K