༄༅། །མཁའ་འགྲོ་ཡེ་ཤེས་མཚོ་རྒྱལ་ལྷོ་ནུབ་རྔ་ཡབ་གླིང་དུ་གཤེགས་ཁར་གསུངས་པའི་ཞལ་གདམས་བཞུགས་སོ། །

ཀྱེ་མ་ཧོ༔ ཀྱེ་མ་ཉོན་དང་དད་ལྡན་བོད་འབངས་རྣམས༔ བདག་ཉིད་ཆེན་མོ་ཡེ་ཤེས་མཚོ་རྒྱལ་ང་༔ ཟག་བཅས་ཕུང་པོ་ཟག་མེད་དབྱིངས་སུ་སྡུད༔ ཆོས་དབྱིངས་པདྨ་འོད་དུ་སངས་རྒྱས་པས༔ ཁྱེད་རྣམས་མྱ་ངན་མ་བྱེད་བདེ་བར་སོམས༔ སྡུག་བསྔལ་མཐའ་མེད་བོད་ཀྱི་སེམས་ཅན་རྣམས༔ ལས་ངན་སྣ་ཚོགས་བྱ་བ་མང་སྐྱོན་གྱིས༔ རང་སྡུག་རང་གིས་བསྒྲུབས་པ་མཐོང་ལགས་ན༔ སྡུག་བསྔལ་སྐྱབས་གནས་དཀོན་མཆོག་གསུམ་པོ་ཡིན༔ རེ་ལྟོས་གཅིག་ཏུ་དྲིལ་ལ་གསོལ་བ་ཐོབ༔ བདག་ཉིད་ཆེན་མོ་ཡེ་ཤེས་མཚོ་རྒྱལ་མ༔ འབྱུང་བའི་སྙིགས་མ་དག་ནས་མཁའ་ལ་གཤེགས༔ རྫུ་འཕྲུལ་སྤྲུལ་པས་འགྲོ་དོན་བྱེད་པ་ལ༔ ཁྱེད་རྣམས་མྱ་ངན་མ་བྱེད་སྤྲོ་བར་སོམས༔ མ་དག་རྣམ་སྨིན་ལྗིད་པའི་ཕུང་པོ་འདི༔ ཉོན་མོངས་ཚོགས་རྟེན་ལས་ངན་རྒྱུར་མཐོང་ན༔ རྣམ་སྨིན་ཟད་ཐབས་དམ་པའི་ཆོས་ཡིན་པས༔ དགེ་བཅུ་མན་ངག་བརྩོན་འགྲུས་ཉམས་ལེན་འབུངས༔ བདག་ཉིད་ཆེན་མོ་ཡེ་ཤེས་མཚོ་རྒྱལ་ང་༔ རྣམ་སྨིན་འབྲས་བུ་དཀར་པོའི་དབྱིངས་སུ་གཤེགས༔ བྱ་བ་བསྟན་དོན་ཟད་མེད་རྗེས་སུ་བཞག༔ ཁྱེད་རྣམས་མྱ་ངན་མ་བྱེད་དགའ་བར་སོམས༔ རྣམ་པ་མང་པོའི་བྱ་བ་ལས་ངན་གྱིས༔ རྣམ་སྨིན་དམྱལ་བའི་རྒྱུ་རུ་མཐོང་གྱུར་ན༔ ངན་སོང་སྦྱངས་ཐབས་ལུས་ངག་དགེ་ལ་སྦྱོར༔ སྒོ་གསུམ་གཅིག་དྲིལ་དགེ་བའི་ཆོས་ལ་འབུངས༔ བདག་ཉིད་ཆེན་མོ་ཡེ་ཤེས་མཚོ་རྒྱལ་ང་༔ རྡུལ་བྲལ་བདེ་བ་ཆེན་པོའི་ཞིང་དུ་གཤེགས༔ གང་འབྲེལ་ཕྱིར་མི་ལྡོག་པའི་ཐབས་བསྟན་པས༔ ཁྱེད་རྣམས་མྱ་ངན་མ་བྱེད་སྐྱིད་གླུ་ལོངས༔ འཁོར་བ་སྡུག་བསྔལ་རྒྱ་མཚོ་མཐའ་མེད་འདི༔ འཇིགས་མཐོང་སྡུག་བསྔལ་རང་མཚང་རིག་གྱུར་ན༔ འཁོར་བ་བསྒྲལ་ཐབས་བླ་མ་དམ་པ་ཡིན༔ མཚན་ལྡན་མ་ནོར་ཚོལ་ལ་གང་གསུངས་སྒྲུབས༔ བདག་ཉིད་ཆེན་མོ་ཡེ་ཤེས་མཚོ་རྒྱལ་མ༔ མཁའ་དབྱིངས་པདྨ་འོད་ཀྱི་ཞིང་དུ་གཤེགས༔ རྣམ་དག་པདྨའི་སྦུབས་སུ་འཁྲུངས་པ་ལ༔ ཁྱེད་རྣམས་མྱ་ངན་མ་བྱེད་དད་པར་གྱིས༔ མཐའ་འཁོབ་བོད་ཡུལ་སྡུག་བསྔལ་འཁྲུག་རྩོད་ཞིང་༔ གཅོང་རོང་གནས་ལ་ཞེན་པ་ལོག་གྱུར་ན༔ དགོས་མེད་བྱ་བ་ཐོང་ལ་དབེན་པ་བརྟེན༔ རྩ་རླུང་ཐིག་ལེ་ཕྱག་རྫོགས་ཉམས་སུ་ལོངས༔ བདག་ཉིད་ཆེན་མོ་ཡེ་ཤེས་མཚོ་རྒྱལ་མ༔ མོས་པས་གྲུབ་ནས་ཐུགས་རྗེས་རྗེས་སུ་བཟུང་༔ བླ་མ་པད་འབྱུང་དྲུང་དུ་གཤེགས་པ་ལ༔ ཁྱེད་རྣམས་མྱ་ངན་མ་བྱེད་གསོལ་བ་ཐོབ༔ མགོན་མེད་ཆུ་བུར་ལྟ་བུའི་ལས་ལུས་དེ༔ ནམ་འཆི་ཆ་མེད་མི་རྟག་མཐོང་གྱུར་ན༔ རྟག་འཛིན་བོར་ལ་ཚེ་དང་སྒྲུབ་པ་སྙོམས༔ ཨ་ཏི་ཟད་སར་སྐྱོལ་བའི་ཉམས་ལེན་མཛོད༔ ཀྱེ་ཧོ་ཉོན་དང་སྨྲེ་སྔགས་མ་འདོན་ཅིག༔ ང་ཡི་ཐུགས་རྗེ་ནམ་ཡང་འཕོ་འགྱུར་མེད༔ ཚུལ་འདི་རྟག་འཛིན་ཅན་གྱི་མཐོང་ཚུལ་ཙམ༔ ཁོ་མོ་མ་ཤི་མ་བོར་གར་མ་སོང་༔ གསོལ་བ་ཐོབ་དང་ཞལ་དངོས་མི་སྟོན་རེ༔ རྩེ་གཅིག་མོས་ལ་གང་འདོད་དངོས་གྲུབ་སྦྱིན༔ འདི་ནས་ཕྱི་རབས་མཐར་ཐུག་བར་དུའོ༔ བོད་ཡུལ་ཐུགས་རྗེ་ཆེན་པོའི་ཞིང་ཁམས་ལ༔ གུ་རུ་པདྨའི་གདུལ་བྱར་གྱུར་ནས་སྨིན༔ འཕགས་པ་འཇམ་དཔལ་བསྟན་པའི་བདག་མཛད་ནས༔ གསང་བདག་ཕྱག་རྡོར་མཐུ་སྟོབས་གཟི་བྱིན་གྱིས༔ ནམ་ཡང་བསྟན་པ་རྒྱ་མཚོ་གཡོ་མེད་ཅིང་༔ མུ་སྟེགས་ཕྱི་ལོག་ཀུན་གྱིས་འཚེ་བ་བྲལ༔ བདུད་དང་བདུད་ཀྱི་སྟོབས་ཀུན་རབ་ཞི་ནས༔ མདོ་སྡེའི་ཆོས་འཁོར་བསྟན་པ་འཛིན་བྱེད་ཅིང་༔ གསང་སྔགས་གྲུབ་པས་ནུས་པ་ཐོབ་གྱུར་ནས༔ རྒྱལ་ཁམས་ཀུན་ཏུ་སྒྲུབ་པའི་སྡེས་ཁྱབ་ཤོག༔ བོད་ཡུལ་དབུས་སུ་གནས་པའི་གང་ཟག་རྣམས༔ འདི་ཕྱིའི་བདེ་སྡུག་དཔང་པོར་དཀོན་མཆོག་ཞོག༔ དགེ་བཅུ་བརྩོན་ནས་མི་དགེ་བཅུ་བོ་དོར༔ ཕྱི་ནང་བྱ་བ་འཕགས་པའི་བཀའ་ལ་དྲིས༔ ལེགས་ཉེས་བྱ་གཞག་པདྨས་གང་གསུངས་སྒྲུབས༔ མི་ཆོས་སྡེ་ཆོས་ཆོས་རྒྱལ་སྲོལ་དང་བསྟུན༔ བོད་ཁམས་རུ་བཞི་རྒྱལ་ཁྲིམས་ཆོས་ཀྱིས་འཚོལ༔ མཐའ་བཞིའི་དགྲ་ལ་མཐུ་དང་ནུས་པས་ཐུལ༔ ལྷ་དང་དཀོན་མཆོག་ཐུགས་རྗེས་ངེས་པར་བཟློག༔ ཆོས་བྱེད་གྲྭ་སྡེ་གཞུང་ལུགས་ཚུལ་མཐུན་སྒྲུབས༔ སྐྱེ་བོ་ཕོ་མོ་དག་སྣང་ཆོས་ལ་སྦྱོངས༔ མོས་གུས་ཚད་མེད་གོང་མ་ཡོངས་ལ་གྱིས༔ སྦྱིན་གཏོང་གང་ཡོད་འོག་མ་འགྲོ་ལ་འགྱེད༔ ཀུན་གྱིས་རང་དོན་ཡི་གེ་དྲུག་མ་སྒྲོངས༔ གསོལ་འདེབས་བློ་གཏད་པད་འབྱུང་རྗེ་ལ་གྱིས༔ འདིར་འདུས་གདུང་བས་མོས་གུས་དབང་བཞི་ལོངས༔ གསོལ་འདེབས་འུར་ཏིར་མཚོ་རྒྱལ་མཚན་ནས་བོས༔ དབང་བཞི་ཞུས་ལ་སེམས་དང་དབྱེར་མེད་སྲེས༔ ཅི་ཡང་མ་སེམས་མཉམ་གཞག་ཐུན་དུ་ཆོད༔ སྤྱིར་ཡང་མ་འོངས་བོད་ཡུལ་སེམས་ཅན་རྣམས༔ བླ་མའི་སྐལ་བ་པདྨ་འབྱུང་གནས་ཡིན༔ གང་ཟག་ཡོངས་ཀྱིས་བླ་མ་སྒྲུབ་ལ་བརྩོན༔ རང་རང་བླ་མ་པདྨའི་རྣམ་པར་སྒྱུར༔ བྱིན་རླབས་ཐུགས་རྗེ་ལྷག་ཏུ་ཆེ་བ་འབྱུང་༔ ཐུགས་སྒྲུབ་རྒྱས་བསྡུས་ཡོངས་ཀྱི་གཞུང་ལྟར་སྒྲུབས༔ ཚེ་གཅིག་སངས་རྒྱས་མ་གྲུབ་ཁོ་མོས་གན༔ སྙིང་པོའི་ཡང་སྙིང་གུ་རུ་སིདྡྷི་སྒྲོངས༔ ཡར་མར་ཚེས་བཅུ་བརྒྱད་དང་བཅོ་ལྔའི་དུས༔ ཚོགས་ཀྱི་འཁོར་ལོ་སྐོར་ལ་མཆོད་པ་ཕུལ༔ ཚོགས་འཁོར་གཅིག་གིས་ངན་སོང་སྐྱེ་སྒོ་ཆོད༔ ཕྱིར་མི་ལྡོག་པའི་ས་རུ་མི་སྐྱོལ་རི༔ ངེས་པའི་གཏན་ཚིགས་ཡིན་ནོ་གོ་བ་ལོངས༔ བླ་མའི་སྙིང་པོ་གུ་རུ་སིདྡྷི་འདི༔ དུས་གསུམ་སངས་རྒྱས་ཀུན་གྱི་སྤྱི་སྲོག་ཧཱུྃ༔ ཡི་དམ་རྒྱལ་བ་ཀུན་གྱི་དངོས་གྲུབ་དྷཱི༔ མཁའ་འགྲོ་དམ་ཅན་ཡོངས་ཀྱི་ཕྲིན་ལས་སིད༔ མ་གྱུར་འགྲོ་བའི་འཁྲུལ་གཅོད་ཡི་གེ་མ༔ དུས་གསུམ་སངས་རྒྱས་ཞིང་མཆོག་ཡི་གེ་པད༔ ལས་རླུང་སྒོ་མོ་གཅོད་པའི་ཡི་གེ་རུ༔ ཡེ་ཤེས་ཐུགས་རྗེའི་དབང་བསྐུར་ཡི་གེ་གུ༔ མི་ཤིགས་སྟོང་ཉིད་ཕྱག་ཆེན་ཡེ་གེ་ཛར༔ མཚན་མ་དབྱིངས་ཡེས་ཕྱག་མཚན་ཡི་གེ་བ༔ སྤྲུལ་པས་འགྲོ་འདུལ་གཟུགས་སྐུ་ཡི་གེ་ཧཱུྃ༔ དམ་ཆོས་ལོངས་སྤྱོད་རྫོགས་འདུས་ཡི་གེ་ཨཱ༔ ཀུན་བཟང་ཀ་དག་ཆོས་སྐུ་ཡི་གེ་ཨོཾ༔ པདྨ་འབྱུང་གནས་ཡང་སྙིང་འབྲུ་བཅུ་གཉིས༔ ལུགས་བཟློག་ལྕེ་ཡི་དབང་པོས་ཀློག་གྱུར་ན༔ འབུམ་ཕྲག་གཅིག་གིས་སྒོ་གསུམ་སྡིག་པ་དག༔ གཉིས་ཀྱིས་དེ་བཞིན་དུས་གསུམ་ལས་ངན་ཟད༔ གསུམ་གྱིས་ཕྱིར་མི་ལྡོག་པའི་ས་ལ་འཁོད༔ བདུན་འབུམ་ཚེ་འདིར་པདྨ་འབྱུང་གནས་མཇལ༔ འབུམ་ཕྲག་བཅུ་ཡིས་ལས་བཞིའི་ཕྲིན་ལས་འགྲུབ༔ འབུམ་ཕྲག་དྲུག་ཅུས་འཁོར་བ་དོང་ནས་སྤྲུག༔ འབུམ་ཕྲག་བརྒྱ་ཡིས་སྣང་མཐའ་ཉིད་དང་མཉམ༔ ཅི་འདོད་དངོས་གྲུབ་ཐོབ་པར་གདོན་མི་ཟ༔ དེ་བཞིན་གྲངས་འདས་ཕན་ཡོན་འདྲེས་ཀྱིས་ཤེས༔ ལུགས་འབྱུང་མྱ་ངན་འདས་ཐབས་བཟློག་ཚུལ་ནི༔ ཨོཾ་ཉིད་སྐུ་ལྔ་བདེ་གཤེགས་ཀུན་འདུས་ཡིན༔ ཨཱ་ནི་གསུང་ལྔ་སྙིང་པོ་ཀུན་འདུས་ཡིན༔ ཧཱུྃ་ཉིད་ཐུགས་ལྔ་ངོ་བོ་ཉིད་སྐུ་སྟེ༔ བ་ནི་མི་འཇིགས་ཕྱག་རྒྱས་མཚན་པའོ༔ ཛར་ནི་རྡོ་རྗེའི་ཐུགས་རྗེའི་ཕྲིན་ལས་ཡིན༔ གུ་ནི་དུས་གསུམ་བླ་མ་ཧེ་རུ་ཀ༔ རུ་ནི་སྨིན་གྲོལ་བཅུད་ཀྱི་ཐིག་པ་སྟེ༔ པད་ནི་བདེ་བའི་ཞིང་ཁམས་དབྱེ་བའོ༔ མ་ནི་བདེ་བའི་ལྷུམ་ཞུགས་གཡོ་མེད་པ༔ སིད་ནི་ཐུགས་རྗེའི་རྩལ་སྤྲུག་ཆེན་པོ་སྟེ༔ དྷི་ནི་ཅི་འདོད་སྦྱིན་པའི་དངོས་གྲུབ་བོ༔ ཧཱུྃ་ནི་གཞི་ཐོག་གཏན་སྲིད་ཟིན་གྱུར་པས༔ ཡིད་བཞིན་ནོར་བུ་ལྟ་བུའི་གཟུངས་ཡིན་ནོ༔ ཡང་ན་རྟེན་འབྲེལ་བཅུ་གཉིས་དག་བྱེད་ནས༔ ཕ་རོལ་ཕྱིན་བཅུའི་བདག་ཉིད་ཡུམ་ཆེན་ལགས༔ དེ་བཞིན་གང་ལྟར་བསམ་པ་དེས་འགྲུབ་ན༔ འདི་རུ་ཡོད་དང་མ་འོངས་འགྲོ་བ་རྣམས༔ སྙིང་པོ་འདི་ལ་ནན་ཏན་སྒྲུབ་པར་གྱིས༔ ད་ནི་རེ་ཞིག་གཉིས་བློ་མ་ཞིག་བར༔ ང་དང་འབྲལ་འབྲལ་འདྲ་བས་བདེ་བར་བྱོས༔ གཉིས་བློ་ཞིག་ནས་ང་དང་གཉིས་མེད་འགྱུར༔ བཀྲ་ཤིས་བདེ་ལེགས་ནམ་མཁའི་མཐའ་ཁྱབ་ཤོག༔ ཅེས་གསུངས་ནས་འོད་ཙེ་རེ་རེ༔ ཁྲ་མེར་མེར་བྱིན་ཐིབ་ཐིབ་བྱས་ནས་ལྷོ་ནུབ་རྔ་ཡབ་ཀྱི་ཕྱོགས་སུ་སྒ་ར་ར་བྱོན་ནས་མི་སྣང་བར་གྱུར་ཏོ༔

(འདི་ནི་བོད་ཀྱི་ཇོ་མོ་ཡེ་ཤེས་མཚོ་རྒྱལ་གྱི་མཛད་ཚུལ་རྣམ་པར་ཐར་པ་གབ་པ་མངོན་ཕྱུང་རྒྱུད་མང་དྲི་ཟའི་གླུ་ཕྲེང་ཞེས་པ་ལས་ཁོལ་དུ་ཕྱུང་བ་ཡིན།)

47.2K