༄༅། །ཨོ་རྒྱན་སྨན་གྱི་བླ་མ་མཆོད་ཅིང་ཐུགས་དམ་བསྐུལ་བའི་ཆོ་ག་བདུད་རྩིའི་བུམ་བཟང་ཞེས་བྱ་བ་བཞུགས་སོ། །

༄༅། །ན་མོ་པདྨ་ཀ་ར་ཡེ། ཨོ་རྒྱན་སྨན་གྱི་བླ་མ་མཆོད་ཅིང་ཐུགས་དམ་བསྐུལ་བའི་ཕྲིན་ལས་ལ་འཇུག་པར་འདོད་པས་བཀྲ་ཤིས་པའི་སྟེགས་བུ་ཨོ་རྒྱན་སྨན་བླའི་སྣང་བརྙན་བྱིན་རླབས་ཅན་བྲིས་འབུར་གང་ཡང་རུང་བ་བསོད་ནམས་ཀྱི་ཞིང་དུ་བཞུགས་སུ་གསོལ་བའི་སྤྱན་སྔར་ཕྱི་ནང་གི་མཆོད་པ་ཇི་ལྟར་འབྱོར་པ་གཙང་ཞིང་བཀོད་པས་མཛེས་པར་བཤམས། གལ་ཏེ་རྟེན་མ་འཛོམས་ན་མཎྜལ་ལ་འབྲུ་དཀར་དྲི་བཟང་གི་གཤེར་བས་ཚོམ་བུ་འགོད་པ་དང་། རྒྱུན་གྱི་ཉམས་ལེན་ལྟ་བུར་རྟེན་ཡིད་ཀྱིས་བསྒོམས་པས་ཀྱང་རུང་ངོ་། །དེ་ནས་ཐོག་མར་སྐྱབས་སུ་འགྲོ་བ་ནི། ན་མོ༔ བླ་མ་བདེ་གཤེགས་འདུས་པའི་སྐུ༔ དཀོན་མཆོག་གསུམ་གྱི་རང་བཞིན་ལ༔ བདག་དང་འགྲོ་དྲུག་སེམས་ཅན་རྣམས༔ བྱང་ཆུབ་བར་དུ་སྐྱབས་སུ་མཆི༔ ལན་གསུམ། སེམས་བསྐྱེད་པ་ནི། སེམས་བསྐྱེད་འགྲོ་བ་ཀུན་དོན་དུ༔ བླ་མ་སངས་རྒྱས་བསྒྲུབ་ནས་ནི༔ གང་ལ་གང་འདུལ་ཕྲིན་ལས་ཀྱིས༔ འགྲོ་བ་བསྒྲལ་པར་དམ་བཅའ་འོ༔ ལན་གསུམ། ཚོགས་བསགས་པ་ནི། བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔        ཉམས་ཆག་སྡིག་སྒྲུབ་མཐོལ་ཞིང་བཤགས༔ གསང་སྔགས་བསྒྲུབས་ལ་རྗེས་ཡི་རང༔ སྨིན་གྲོལ་གསང་སྔགས་ཆོས་འཁོར་བསྐོར༔ མྱ་ངན་མི་འདའ་བཞུགས་སུ་གསོལ༔ སྙིང་པོ་སེམས་ཅན་དོན་དུ་བསྔོ༔ ཡང་དག་རྡོ་རྗེའི་དོན་རྟོགས་ཤོག༔ མཆོད་རྫས་བྱིན་བརླབ་པ་ནི། ཧྲཱིཿ རཾ་ཡཾ་ཁཾ་གིས་མ་དག་དངོས་ཀུན་སྦྱངས། །སྟོང་པའི་ངང་ལས་རིན་ཆེན་སྣོད་ཡངས་པར། །ཕྱི་ནང་གསང་བའི་མཆོད་པའི་ལོངས་སྤྱོད་ཚོགས། །བསམ་གྱིས་མི་ཁྱབ་མཁའ་དབྱིངས་གང་བར་གྱུར། །ཨོཾ་ཨཱཿཧཱུྃ། བཛྲ་སྥ་ར་ཎ་ཁཾ། རྟེན་བསྐྱེད་པ་ནི། ཤཱུནྱ་ཏས་བསང་སྦྱང་། ཆོས་རྣམས་མི་དམིགས་སྟོང་པའི་ངང་ཉིད་ལས། །གནས་ཡུལ་བདེ་ཆེན་ལྟ་ན་སྡུག་གི་ཞིང་། །ཡིད་འཕྲོག་རཏྣའི་གཞལ་མེད་ཁང་ཆེན་པོ། །ངོ་མཚར་ཀུན་བཟང་མཆོད་སྤྲིན་གཏིབས་པའི་དབུས། །སྣ་ཚོགས་པདྨ་ཉི་ཟླའི་གདན་གྱི་སྟེང་། །བླ་མ་ཨོ་རྒྱན་སྨན་པའི་རྒྱལ་པོ་ནི། །རབ་མཛེས་ནོར་བུ་བཻཌཱུར་ཞུན་མའི་མདངས། །སྒེག་འཛུམ་བརྗིད་ཆགས་མཚན་དཔེའི་ལང་ཚོ་ཅན། །ཕྱག་གཡས་མཆོག་སྦྱིན་རྣམ་རྒྱལ་ཨ་རུ་ར། །གཡོན་པས་མཉམ་གཞག་བྷནྡྷ་ཚེ་བུམ་བསྣམས། །མཆན་གཡོན་ཁ་ཊྭཱཾ་རྒྱན་ལྡན་མཛེས་པར་བསྒྲེང་། །སྐུ་ལ་གསང་ཕོད་ཆོས་གོས་བེར་ཕྱམ་དང་། །དབུ་ལ་འདབ་ལྡན་ཤེའུའི་སྙན་ཞུས་བརྗིད། །སྙན་ཆ་མགུལ་རྒྱན་རིན་ཆེན་དོ་ཤལ་གཡོ། །ཞབས་གཉིས་རོལ་སྟབས་འཇའ་ཟེར་ཀློང་དུ་བཞུགས། །སྐུ་ལ་རྩ་གསུམ་རྒྱལ་བའི་དཀྱིལ་འཁོར་རྫོགས། །རབ་འབྱམས་སྨན་སྲུང་མཁའ་འགྲོའི་སྤྲིན་ཕུང་འཕྲོ། །དྲན་པ་ཙམ་གྱིས་སྡུག་བསྔལ་འཇིགས་འཕྲོག་པ། །ཟུང་འཇུག་སྒྱུ་འཕྲུལ་རྡོ་རྗེའི་རོལ་པར་ཤར། །དེ་ལྟར་གསལ་བའི་གནས་གསུམ་འབྲུ་གསུམ་ལས། །འཕྲོས་པའི་འོད་ཀྱིས་ཡེ་ཤེས་སྤྱན་དྲངས་གྱུར། ། སྤྱན་འདྲེན་པ་ནི། ཧྲཱིཿ སྔོན་གྱི་བསྐལ་པའི་དང་པོ་ལ། །ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱི། །བྱིན་གྱིས་བརླབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་སྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །བཛྲ་ས་མ་ཡ་ཛ་ཛ༔ བཞུགས་གསོལ་ནི། ཧྲཱིཿ རིན་ཆེན་ཕོ་བྲང་ཉམས་རེ་དགའ། །བཞུགས་པའི་གནས་སུ་དྭངས་རེ་སྤྲོ། །ཨོ་རྒྱན་སྨན་གྱི་བླ་མའི་ཚོགས། །དགྱེས་ཤིང་བྱིན་གྱིས་རློབ་ཕྱིར་བཞུགས། །ས་མ་ཡ་ཏིཥྛ་ལྷན། ཕྱག་འཚལ་ནི། ན་མོ། སྐྱེ་འགགས་འགྱུར་མེད་ཕྲིན་ལས་རྫོགས། །རང་བྱུང་ཐུགས་རྗེས་འགྲོ་རྣམས་སྒྲོལ། །ཡིད་བཞིན་དངོས་གྲུབ་ཆར་འབེབས་པའི། །སྨན་གྱི་བླ་མར་ཕྱག་འཚལ་ལོ། །ཨ་ཏི་པཱུ་ཧོ༔ པྲ་ཏཱི་ཙྪ་ཧོཿ  མཆོད་པ་ནི། ཧྲཱིཿ ཨོ་རྒྱན་སྨན་གྱི་བླ་མའི་ཚོགས། །གདུང་བ་དྲག་པོས་གསོལ་འདེབས་ཀྱི། །ལྷ་རྫས་ཕྱི་ཡི་མཆོད་པ་འབུལ། །འདོད་ཡོན་ནང་གི་མཆོད་པ་འབུལ། །གཉིས་མེད་གསང་བའི་མཆོད་པ་འབུལ། །ཏིང་འཛིན་རྩེ་གཅིག་མཆོད་པ་འབུལ། །མ་ཧཱ་སརྦ་པཱུ་ཛ་ཧོཿ བསྟོད་པ་ནི། ཧྲཱི༔ མ་བཅོས་སྤྲོས་བྲལ་བླ་མ་ཆོས་ཀྱི་སྐུ། །བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ། །པད་སྡོང་ལས་འཁྲུངས་བླ་མ་སྤྲུལ་པའི་སྐུ། །སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད། །ཛཔྲ་བཟླས་ནི། ཐུགས་ཀར་ཟླ་སྟེང་རྡོ་རྗེའི་ནང་ཁོངས་ལྟེར། །ཧྲཱིཿམཐར་སྔགས་ཕྲེང་མཐིང་མདོག་འབར་བས་བསྐོར། །དེ་ལས་འོད་འཕྲོས་འགྲོ་བའི་ནད་རྣམས་བསལ། །ཚུར་འདུས་བདག་ཐིམ་བྱིན་རླབས་མཆོག་ཐོབ་གྱུར། །ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱཿ ཞེས་རྩ་སྔགས་དང་། ན་མོ་བྷ་ག་ཝ་ཏེ་བྷཻ་ཥཛྱེ་གུ་རུ་བཻཌཱུརྱ་པྲ་བྷ་རཱ་ཛ་ཡ༔ ཏ་ཐཱ་ག་ཏ་ཡ༔ ཨརྷ་ཏེ་སམྱཀྶཾ་བུདྡྷ་ཡ༔ ཏདྱ་ཐཱ༔  ཨོཾ་བྷཻ་ཥཛྱེ་བྷཻ་ཥཛྱེ་མཧཱ་བྷེ་ཥ་ཛྱ༔ རཱ་ཛ་ས་མུཏྒ་ཏེ་སྭཱཧཱ༔ ཞེས་གཟུངས་སྔགས་ཅི་འགྲུབ་བཟླ། གསོལ་བ་འདེབས་པ་ནི། སེམས་ཅན་སྒྱུ་ལུས་འཇིགས་པའི་ནད་བྱུང་ཚེ༔ མི་བཟོད་སྡུག་བསྔལ་ནད་ཀྱིས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་སྨན་གྱི་བླ་དང་དབྱེར་མེད་པས༔ ཚེ་ཟད་མ་ཡིན་བར་ཆད་ངེས་པར་སེལ༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཞེས་ཚར་གྲངས་གང་འོས་མཐར། ཨོ་རྒྱན་སྨན་གྱི་བླ་མ་དགོངས་སུ་གསོལ། །ཁྱེད་ལ་མཆོད་བསྟོད་གསོལ་བ་བཏབ་པའི་མཐུས། །རྒྱལ་བསྟན་དར་ཞིང་བསྟན་འཛིན་མངའ་ཐང་རྒྱས། །འཇིག་རྟེན་བདེ་ཞིང་ནད་མུག་མཚོན་འཁྲུགས་ཞི། །དུག་གསུམ་རྒྱུ་འབྲས་ཉེས་པ་རྩད་ནས་བཅོམ། །ཁྱད་པར་བདེ་གཤེགས་རྣམས་ཀྱི་སྨོན་ལམ་དང་། །ཐུགས་དམ་ཞལ་བཞེས་བདག་སོགས་སེམས་ཅན་གྱིས། །མྱུར་དུ་འགྲུབ་པར་བྱིན་གྱིས་བརླབ་ཏུ་གསོལ། །ཞེས་འདོད་དོན་གསོལ། མདུན་གྱི་བླ་མ་སྨན་གྱི་བླ། །དགྱེས་པས་འོད་ཞུ་རང་ལ་ཐིམ། །སྐུ་གསུང་ཐུགས་ཡོན་ཕྲིན་ལས་དང་། །དབྱེར་མེད་ཆེན་པོར་བྱིན་བརླབ་གྱུར། །ཅེས་མདུན་རྟེན་རང་ལ་བསྡུས་ཏེ་མཉམ་པར་བཞག །དགེ་བ་འདི་ཡིས་མྱུར་དུ་བདག །སྨན་པའི་རྒྱལ་པོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་དགེ་བ་བསྔོ། ལྷ་མིའི་སྟོན་པ་སྨན་པའི་རྒྱལ་པོ་སྟེ། །བཅོམ་ལྡན་འཇིག་རྟེན་གསུམ་ན་སྐྱབས་མཛད་པ། །དུག་གསུམ་ནད་སེལ་ཨོ་རྒྱན་སྨན་གྱི་བླ། །བཻཌཱུརྱ་ཡི་འོད་ཀྱི་བཀྲ་ཤིས་ཤོག །ཅེས་སོགས་བཀྲ་ཤིས་རྒྱ་ཆེར་སྤེལ་བས་བདེ་ལེགས་སུ་བྱའོ། །ཞེས་པའང་རང་གཞན་རྣམས་འབྱུང་བ་འཁྲུགས་པའི་ཉེས་པ་སོགས་གནས་སྐབས་དང་མཐར་ཐུག་གི་རྒུད་པ་ཐམས་ཅད་སེལ་བའི་ཆ་རྐྱེན་དུ། འཇིགས་བྲལ་ཡེ་ཤེས་རྡོ་རྗེས་ལྷ་ལྡན་ར་ས་འཕྲུལ་སྣང་གི་ཤར་ཕྱོགས་ང་ཕོད་ལྟ་ན་སྡུག་གི་གཞལ་མེད་ཁང་དུ་གྲོ་བཞིན་ཟླ་བའི་ཡར་ངོའི་རྒྱལ་བ་གསུམ་པའི་དུས་ཚེས་བཟང་པོར་ཤར་མར་སྤེལ་བ་སིདྡྷཱི་རསྟུ། །

47.2K