༄༅། །མདོ་སྔགས་ཟུང་དུ་འཇུག་པའི་སྤྱོད་ཡུལ་ལམ་ཁྱེར་སངས་རྒྱས་ལམ་ཞུགས་ཞེས་བྱ་བ་བཞུགས་སོ། །

༄༅། །ཐམས་ཅད་མཁྱེན་པ་ལ་ཕྱག་འཚལ་ལོ། །འདི་ལྟར་ཐར་པ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་གང་ཟག་དེས་ཚོགས་བསག་སྒྲིབ་སྦྱོང་ཐབས་དུ་མའི་སྒོ་ནས་བྱ་དགོས་ལ། དེའི་བྱ་ཐབས་ནི་ཐམས་ཅད་མཁྱེན་པ་ཐབས་མཁས་ལ་ཐུགས་རྗེ་ཆེ་བའི་ཕྱིར་སྤྱོད་ལམ་གྱི་ཞོར་ཙམ་ལའང་དགེ་བ་དཔག་ཏུ་མེད་པ་བསག་ཐབས་བསྟན་པས་འདིར་འདུམས་ཏེ་བློ་དམན་ལ་ཕན་པའི་ཕྱིར་བསྟན་པར་བྱའོ། །དེ་ལ་དང་པོར་སྔ་ཞོགས་གཉིད་ཁྲ་ལྷག་གིས་སད་ཙ་ན་སེམས་ཅན་ཐམས་ཅད་མ་རིག་པ་ལས་སད་པར་གྱུར་ཅིག་སྙམ་དུ་སེམས་བསྐྱེད། མལ་ནས་ལྡང་པ་ན་སེམས་ཅན་ཐམས་ཅད་སངས་རྒྱས་ཀྱི་སྐུ་ཐོབ་པར་ཤོག་ཅིག་སྙམ་པ་དང་། གོས་གྱོན་པའི་ཚེ་སེམས་ཅན་ཐམས་ཅད་ངོ་ཚ་དང་ཁྲེལ་ཡོད་ཀྱི་གོས་གྱོན་པར་ཤོག་ཅིག །སྐ་རག་འཆིང་བ་ན་དགེ་བའི་རྩ་བ་ཟུང་དུ་འབྲེལ་བར་ཤོག་ཅིག །སྟན་ལ་འདུག་པ་ན་རྡོ་རྗེའི་སྟན་ཐོབ་པར་ཤོག །ཁང་པའི་ནང་དུ་འདུག་པ་ན་སེམས་ཅན་ཐམས་ཅད་ཐར་པའི་གྲོང་ཁྱེར་དུ་འཇུག་པར་ཤོག་ཅིག །ཉལ་བའི་ཚེ་སེམས་ཅན་ཐམས་ཅད་སངས་རྒྱས་ཆོས་སྐུ་ཐོབ་པར་ཤོག་ཅིག །རྨི་ལམ་རྨིས་པ་ན་ཆོས་ཐམས་ཅད་རྨི་ལམ་ལྟ་བུར་བདེན་མེད་དུ་རྟོགས་པར་ཤོག་ཅིག །སྐྱོ་ཚ་གཡོ་སྐོལ་གྱི་ཚེ་མེ་ལྷབ་ཀྱིས་འབར་བ་དང་། མེ་དེ་ཉིད་གདོད་ནས་ཡུམ་གོས་དཀར་མོའི་ངོ་བོ་ཡིན་པར་ངེས་ཤེས་བསྐྱེད། དེའི་ཀློང་དུ་རྣམ་པ་ཧཱུྃ་ལས་ཟ་བྱེད་རྡོ་རྗེ་མཁའ་འགྲོ་སྐུ་མདོག་ནག་པོ་ཞལ་གཅིག་ཕྱག་གཉིས་ཧཱུྃ་མཛད་ཀྱི་ཕྱག་རྒྱས་རྡོར་དྲིལ་འཛིན་པ། ཞབས་གཡས་བསྐུམས་གཡོན་བརྐྱངས་པ་རིན་པོ་ཆེའི་རྒྱན་སྣ་ཚོགས་སྤྲས་ཤིང་ཞལ་གདངས་པའི་ལྗགས་རཾ་ཡིག་གིས་མཚན་པ་ལ་དུས་གསུམ་བདེ་གཤེགས་ཐམས་ཅད་ཀྱི་ལྗགས་ཀྱང་འདུས་པའི་ངོ་བོར་བསམ། མདུན་དུ་ཏིལ་ཅུང་ཟད་འདུ་བགྱིས་པ་དེར་རང་གི་སྙིང་ཁར་སྡིག་སྒྲིབ་རྣམས་པཾ་ཡིག་ནག་པོའི་རྣམ་པར་གནས་པ་ལ་སྒོ་གསུམ་གྱི་སྡིག་སྒྲིབ་ཐམས་ཅད་འདུས་པར་གསལ་གདབ། དེ་བཞིན་དུ་ལྟེ་བར་རཾ་དང་རྐང་མཐིལ་དུ་ཡཾ་ལས་རླུང་དཀྱིལ་གསལ་བས་རླུང་གཡོས་ལྟེ་བའི་མེ་འབར་གྱེན་ལ་སོང་ནས་སྙིང་ཁའི་པཾ་ཡིག་རྔོན་པས་རི་དྭགས་དེད་པ་ལྟར་སྣ་བུག་ནས་ཐོན་མདུན་གྱི་ཏིལ་ལ་སྡིག་པ་རྭ་ཅན་གྱི་རྣམ་པས་ཐིམ་པར་བསམ་ལ། ཨོཾ་ཨཱཿཧཱུྃ་ལན་ཅི་རིགས་ཀྱིས་བདུད་རྩིར་བསྒྱུར། དེ་ནས་ཨོཾ་བཛྲ་ཊཱ་ཀ་ཁ་ཁ་ཁཱ་ཧི་ཁཱ་ཧི། སརྦ་པཱ་པཾ་ད་ཧ་ན་བྷསྨི་ཀུ་རུ་ཡེ་སྭཱཧཱ། ཞེས་བཟླ་བ་དང་སྦྲགས་མཐེབ་མཛུབ་ཀྱིས་ཏིལ་ཐབ་ནང་དུ་འབུལ། རྫས་རྫོགས་པ་དང་ཡི་གེ་བརྒྱ་པ་ཚར་གསུམ་བརྗོད་ནས་ནོངས་པ་བཤགས། བཛྲ་མུས་ཡེ་ཤེས་པ་རང་གནས་སུ་གཤེགས། དམ་ཚིག་པ་མེ་དང་དབྱེར་མེད་དུ་འདྲེས་པར་བསམ་ལ། དགེ་བ་སེམས་ཅན་ཐམས་ཅད་ལ་བསྔོ། འགྲོ་བའི་ཚེ་རྒྱས་ཀྱི་ཞིང་ཁམས་རྡུལ་ཕྲ་རབ་ལ་བསྐོར་བ་བྱེད་པར་བསམ། གོས་གསར་པ་ལྟ་བུ་གྱོན་རྒྱུ་བྱུང་ན་གོས་དེ་སྭཱ་བྷཱའི་སྔགས་ཀྱིས་སྟོང་པར་སྦྱངས། སྟོང་པའི་ངང་ལས་ཏྲཾ་ལས་ལྷའི་གོས་རིན་ཐང་དང་བྲལ་བར་བསམ་ལ། རང་གི་རྩ་བའི་བླ་མ་བཞུགས་ཕྱོགས་སུ་འབུལ་བའི་འདུ་ཤེས་ཀྱི་དེང་ཙམ་བྱ། དེ་ནས་རང་ཡི་དམ་གང་བྱེད་དུ་གསལ་ལ་གྱོན། ཁྲུས་བྱེད་པ་དང་ཆུ་ལ་འཇུག་པ་སོགས་ཀྱི་ཚེ་ཆུ་དེ་ཡང་གདོད་མ་ཉིད་ནས་མཱ་མ་ཀིའི་ངོ་བོ་ཡིན་ལ་ཡིན་པའི་ངེས་ཤེས་བསྐྱེད། རྣམ་པ་བཾ་ལས་ཆུའི་ལྷ་མོ་རྡོ་རྗེའི་ཌཱཀྐིའི་སྐུར་གསལ་བཛྲ་ཌཱཀྐི་ཤནྟིཾ་ཀུ་རུ་སྭཱཧཱ། ཞེས་བཟླ་ཞིང་ནད་གདོན་སྡིག་སྒྲིབ་ཞི་བའི་གསོལ་བ་གདབ། མཐར་དེ་ཉིད་འོད་དུ་ཞུ་ནས་བདུད་རྩིའི་རང་བཞིན་དུ་གྱུར་པར་བསམ་ལ་ཁྲུས་དང་ཆུ་བརྒལ་བ་ལ་སོགས་པ་བྱ། གུང་ཚིགས་ཟ་བ་ན། ཡོ་བྱད་རྣམས་མདུན་དུ་བརྡར་ལ་དེ་ཡང་ཇི་ལྟར་འདོད་པའི་ཡོན་ཏན་ལམ་དུ་འཁྱེར་བ་གསང་སྔགས་ཀྱི་འཕགས་ཆོས་ཡིན་ཀྱང་། ཇི་སྲིད་བསྐྱེད་རྫོགས་ཀྱི་ནུས་པ་མངོན་དུ་གྱུར་པའམ། དྲོད་ཐོབ་པ་ཙམ་མ་བྱུང་བར་ལ་ལྟ་བའི་ཕྱོགས་སུ་སྤྱོད་པ་ཤོར་བའི་དགེ་སྟོང་སྡིག་སྟོང་དང་། སྤྱོད་པའི་ཕྱོགས་སུ་ལྟ་བ་ཤོར་བའི་ཨ་འཐས་མངོན་ཞེན་དུ་གོལ་བའི་ལས་མི་བྱེད་པ་ཨོ་རྒྱན་སངས་རྒྱས་གཉིས་པའི་དགོངས་པ་ཐུན་མོང་མ་ཡིན་པས་འདི་ལྟར་ཤ་ཆང་ལ་སོགས་པ་ཟ་རྒྱུ་ཡོད་ན། ག་རེ་སྟོན་པ་སངས་རྒྱས་ཀྱི་བཀའ་ལས། ངས་ཤའི་ཟས་ནི་སུ་ལའང་མ་གནང་མི་གནང་གནང་བར་མི་འགྱུར་རོ། །ཞེས་དང་། དེང་ཕྱིན་ཆད་ངའི་ཉན་ཐོས་རྣམས་ཤ་བཟའ་བར་མི་རུང་ངོ་། །ཞེས་ཁྲིམས་བསྒྲགས་པ་ཡིན་ནོ། །རྡོ་རྗེ་ཐེག་པའི་སྐབས་སུའང་ཏིང་ངེ་འཛིན་གྱི་ནུས་པ་མངོན་དུ་གྱུར་ནས་རང་ལ་སྒྲིབ་པས་མི་གོས་ཤིང་། སེམས་ཅན་དེ་ལ་ཤ་ཁྲག་གི་འབྲེལ་བས་ཕན་ཐོགས་ནུས་པ་ཡིན་ན་དང་གོ་བཅད། བདག་ལ་དེ་ལྟར་གྱི་གདེང་མི་འདུག །སེམས་ཅན་ཐམས་ཅད་ཀྱིས་ཕ་མ་མ་བྱས་པ་མེད། ཤ་འདིའི་བདག་པོ་སྲོག་ཆགས་དེ་འཕགས་པ་ཀཱ་ཏྱཱ་ཡ་ནས་བསོད་སྙོམས་ལ་གཤེགས་པའི་ལོ་རྒྱུས་ལྟར་སྐྱེ་བ་སྔ་མའི་ཕ་མ་ཡིན་ངེས་དེ་ཡིན་ན་ད་ལྟའི་ཕ་མ་ལ་ཤན་པས་སྲོག་ལས་བྱས་པའི་ཤ་བྱིན་ན་བཟའ་བར་འདོད་དམ་སྙིང་རེ་རྗེ་སྙམ་དུ་བསམ་མནོ་ཞིག་བཏང་ན་བློ་གཟུར་གནས་ཤིག་ཡིན་ཕྱིན་ཆད་སྙིང་རྩི་ཤུམ་ཤུམ་པ་དང་སེམས་ཅན་དེ་ལ་སྙིང་རྗེ་དབང་མེད་དུ་མི་སྐྱེ་བའི་ཐབས་མེད། དེའི་ཚེ་བྱང་ཆུབ་ཀྱི་སེམས་མཚན་ཉིད་དང་ལྡན་པ་མ་བྱུང་ཡང་རྗེས་མཐུན་ཞིག་ངེས་པར་སྐྱེ་བས་དེ་ཁའི་ཤེས་པ་ངར་མ་ཉམས་པས་ཀཾ་ཀ་ནི་དང་། གཙུག་ཏོར་མའི་གཟུངས། བཏགས་གྲོལ་གྱི་ཡང་སྙིང་སོགས་ཅི་ནུས་བཟླ། ཤ་ལ་ཕུས་འདེབས། དེ་ལ་དམིགས་ནས་སྨོན་ལམ་དྲག་པོ་གདབ། འདི་ལ་སྟོང་ཉིད་ལས་འབྲས་སུ་ཤར་བ་ཟེར། དེ་མ་གོ་ན་སྔགས་པར་ཁས་བླངས་ནས་ཤ་ཆང་བག་མེད་དུ་ཟ་བ་དག །ཁྲ་སྤྱང་ལས་ཁྱད་པར་ག་ལ་ཡོད། དེ་བཞིན་དུ་ཆང་ལ་རྡོ་རྗེ་ཐེག་པའི་དམ་ཚིག་ཙམ་དུ་རོལ་པ་ལའང་། ཨོ་ཨཱཿཧཱུྃ་ཧ་ཧོ་ཧྲཱིཿཞེས་པས་བྱིན་གྱིས་མ་བརླབས་པར་སྐྱེ་བོ་མི་ནག་པ་ལྟར་འཐུངས་ན་དམ་ཚིག་དང་དངོས་གྲུབ་གཉིས་ཀ་ཉམས་པར་བཤད་དེ་སྡོམ་བྱུང་ལས། ཧ་གསུམ་ལ་སོགས་དང་བྲལ་བར། །ཅི་སྟེ་དམ་ཚིག་ཅན་གྱིས་འཐུངས། །དེ་ནི་དུག་འགྱུར་ཐེ་ཚོམ་མེད། །སྔགས་ཀྱི་དངོས་གྲུབ་མི་འབྱུང་ངོ་། །ཞེས་གསུངས། མང་ཉུང་ཡང་ཐོད་གང་ལས་མང་བར་མི་འཐུངས། གལ་ཏེ་དེ་ལས་མང་བ་འཐུངས་ནས་མྱོས་ན་དམྱལ་བ་ངུ་འབོད་ཀྱི་གནས་སུ་སྐྱེས་ཏེ། རྒྱུས་ལས། སུ་ཞིག་ཆང་གི་མྱོས་གྱུར་པ། །དེ་ལ་གེགས་ནི་མང་པོ་འབྱུང་། །སྔགས་པ་ཆང་གིས་མྱོས་འགྱུར་གང་། །ངུ་འབོད་གནས་སུ་འཚོད་པར་འགྱུར། །ཞེས་སོ། །འོ་ན་སློབ་དཔོན་པདྨ་དང་གྲུབ་ཐོབ་བིརྺ་པ་སོགས་ཀྱིས་ཆང་ཁལ་ལྔ་བརྒྱ་དུས་གཅིག་ལ་བཞེས་པ་མ་ཡིན་ནམ་སྙམ་ན། དེ་དག་ཆང་ཁལ་ལྔ་བརྒྱས་བཟི་བ་དང་ལྟ་ཅི་ངོམ་པ་ཙམ་ཡང་མ་བྱུང་བས་ཆང་རིན་མ་འཁྱོངས་པར་ཉི་མ་སྟོང་ལ་མནན་པའི་ལོ་རྒྱུས་འདུག་པ་ལྟར་ཁྱེད་ཀྱང་དུག་ལ་རྗེན་ཟས་གྱིས། ཉི་ཟླ་བཙོན་དུ་བཟུང་། རི་བོ་ཕན་ཚུན་བརྗེས། ནམ་མཁར་འཕུར་ནས་སོང་། སྤྱིར་བསྟན་པ་ལ་ཕན། སྒོས་རྡོ་རྗེ་ཐེག་པ་ལ་ཕན། དད་ལོག་སྣང་བ་བསྒྱུར་ནུས་པ་ཞིག་འོང་བར་གདའ་སྟེ་བཀའ་དྲིན་ཆེ། དེ་ལྟ་མ་ཡིན་པར་སྐད་ཅིག་ལ་འདུ་ཤེས་འཁྲུལ། སྲོག་རྩ་ལ་རླུང་ཞུགས་པའི་སྨྱོན་པ་ལྟར་ཅི་ཟེར་མེད། ཅི་བྱེད་མེད་པ་དེ་འདྲ་གྲུབ་རྟགས་ཡིན་ན་ངོ་མཚར་ཆེའོ། །དེ་སྐད་དུ་ལུང་ལས། སྙིགས་མ་ལྔ་བདོར་གྱུར་པའི་དུས། །གསང་སྔགས་དམ་རྫས་ཤ་ཆང་ལ། །སྤྱོད་དུ་རུང་བའི་ཁུངས་སྨོས་ཏེ། །ཏིང་འཛིན་ཉམས་ཀྱི་དྲོད་མེད་པར། །ཤ་ཁྲག་ཆང་ལ་ཐམས་ཅད་སྦྱོར། །འདི་ཡང་དམ་ཚིག་མེད་དོ་ཞེས། །ཆོས་བཞིན་སྤྱོད་རྣམས་ཐབས་ཀྱིས་སྨོད། །དེ་འདྲ་བསྟན་པའི་མཐའ་རུ་འབྱུང་། །ཀྱེ་མ་ཀྱི་ཧུད་དམྱལ་བ་ལས། །འགྲོ་ས་མེད་དོ་སྙིང་རེ་རྗེ། །ཞེས་བཤད་དོ། །དེའི་ཕྱིར་བླང་དོར་དེ་དག་ངེས་པར་བྱས་ལ་བྱང་ཆུབ་བསྒྲུབ་པའི་ལུས་རྟེན་ཆུད་མི་ཟ་བ་དང་རྡོ་རྗེ་ཐེག་པའི་དམ་ཚིག་ཚོགས་ཀྱི་འཁོར་ལོས་ལུས་དཀྱིལ་གྱི་འཁོར་ལོར་མཆོད་པའི་འདུན་པ་ལས་རྒྱགས་པ་དང་གཟི་བརྗིད་འཕེལ་བ་ལ་སོགས་པའི་ཆེད་དུ་མ་ཡིན་པར་དཀྱིལ་འཁོར་གསུམ་ལྡན་གྱི་ངང་། ཧོ། བཟའ་བཅའ་བཏུང་བ་ཡང་དག་རྫས། །གདོད་ནས་ཚོགས་ཀྱི་འཁོར་ལོ་ཆེ། །ཨོཾ་ཨཱཿཧཱུྃ་དང་ཧ་ཧོ་ཧྲཱིཿས། །ཟག་མེད་བདེ་ཆེན་བདུད་རྩིར་གྱུར། །བདག་ལུས་ཕུང་ཁམས་སྐྱེ་མཆེད་ནི། །གདན་གསུམ་ཚང་བའི་ངོ་བོ་སྟེ། །དམ་པ་རིགས་བརྒྱའི་དཀྱིལ་འཁོར་ལྷ། །འགུལ་བསྐྱོད་ཐམས་ཅད་བདེ་བ་ཆེ། །རྡོ་རྗེའི་དམ་ཚིག་བླ་ན་མེད། །བྱང་ཆུབ་སེམས་ཀྱི་སྤྲིན་ཆེན་པོར། །གཉིས་མེད་མཉམ་པའི་ངང་དུ་རོལ། །རྣམ་འབྱོར་ལམ་གྱི་ཚོགས་རྫོགས་ནས། །ཟས་ཀྱི་སྒྲིབ་པར་མི་འགྱུར་ཞིང་། །གཏན་པ་མེད་པའི་སྦྱིན་བདག་ཀྱང་། །ཐེག་ཆེན་འབྲས་བུར་སྤྱོད་པར་ཤོག །ཅེས་བརྗོད་ནས་རྡོ་རྗེ་ལུས་ཀྱི་ངག་དྲན་འདི་ལྟར་ངེས་པར་བྱ་སྟེ། རྐང་མཐིལ་རླུང་། སུམ་མདོ་མེ། ལྟོ་བ་ཆུ། སྙིང་ཁ་ས། སྒལ་ཚིགས་རི་རབ། མགོ་བོ་རི་རབ་ཀྱི་སྟོད་ཆ། ལུས་ཀྱི་དཀྱིལ་འཁོར་མི་མཉམ་པ་མེད་པ་གྲུ་བཞི། རྐང་བརྒྱད་ཀ་པ་བརྒྱད། མིག་པཉྩ་ར་བ། སྣ་ཕ་གུ། སོ་དྲ་བ་དྲ་ཕྱེད། ལྕེ་མཆུ་འདོད་སྣམ། རྣ་བ་རྟ་བབས། སྙིང་གའི་རླུང་རྒྱུ་བའི་རྩ་བཞི་སྒོ་བཞི། རྣམ་པར་ཤེས་པ་ཧེ་རུ་ཀ །ཚོགས་བརྒྱད་ཀེའུ་རི་མ་བརྒྱད། ཡུལ་བརྒྱད་ཕྲ་མེན་མ་བརྒྱད། རྟག་ཆད་མུ་བཞི་སྒོ་མ་བཞི། སྒལ་ཚིགས་ཉེར་བརྒྱད་དབང་ཕྱུག་ཉི་ཤུ་རྩ་བརྒྱད། མི་དགེ་བ་བཅུ་ཁྲོ་བོ་བཅུ། དགེ་བ་བཅུ་ཁྲོ་མོ་བཅུ། རྩིབ་མ་བཅོ་བརྒྱད་གིང་ཆེན་བཅོ་བརྒྱད། རུས་མགོ་སུམ་བརྒྱ་དྲུག་ཅུ་ཕོ་ཉ་སུམ་བརྒྱ་དྲུག་ཅུ། དབང་པོའི་སྒོ་བདུན་མ་མོ་བདུན། ལྷུ་ཚིགས་བཅུ་གཉིས་བསྟན་མ་བཅུ་གཉིས། མདོར་ན་ལུས་རྩའི་དཀྱིལ་འཁོར། རྩ་ཡི་གེའི་དཀྱིལ་འཁོར་། ཁམས་བདུད་རྩིའི་དཀྱིལ་འཁོར། རླུང་ཡེ་ཤེས་ཀྱི་དཀྱིལ་འཁོར། རིག་པ་བྱང་ཆུབ་སེམས་ཀྱི་དཀྱིལ་འཁོར་ཏེ་དཀྱིལ་འཁོར་རྣམ་པ་ལྔའི་རང་བཞིན་དུ་ཡེ་ནས་ལྷུན་གྲུབ་ཏུ་མཆིས་པ་ལ། ལག་པའི་སོར་མོ་ལྔ་འདོད་ཡོན་གྱི་ལྷ་མོ་ལྔར་ཤེས་པས་བཟའ་བཏུང་རྣམས་དབང་བཞིའི་དམ་ཚིག་དང་བསྟུན་པའམ། ཡང་ན་ཐབས་ལམ་པ་ཡིན་ན་བདེ་སྟོང་གི་བདུད་རྩི། གྲོལ་ལམ་པ་ཡིན་ན་ཟག་མེད་ཀྱི་བདུད་རྩིར་བསམས་ལ་མཆོད་པ་འབུལ་བའི་ཚུལ་དུ་སྐད་ཅིག་ཀྱང་མ་ཡེངས་པར་ལོངས་སྤྱོད་པར་བྱ་ཞིང་། རོ་ལ་ཁ་མངར་གྱི་རྟོག་པའང་མེད་པར་སྟོང་ཉིད་གསལ་ཁྱབ་ཅན་དུ་ཤེས་པར་བྱ། ཚུལ་འདིའི་རིགས་པ་ནི་བཟའ་བཏུང་ཐམས་ཅད་ལ་བརྩི་བར་བྱའོ། །འོན་ཏེ་དེ་ཙམ་གོ་བའི་སྐལ་བ་དང་མི་ལྡན་པའམ། གལ་ཏེ་ལྡན་ཀྱང་སྡེ་སྣོད་འཛིན་པ་དང་བསྟུན་ནས་ཕུན་སུམ་ཚོགས་པའི་ཡན་ལག་ཏུ་གུང་ཚིགས་ཀྱི་སྔ་རོལ་དུ་ཕུད་མཆོད་བྱེད་པར་སྤྲོ་ན། ཁ་ཟས་དེ་ཉིད་ཨོཾ་ཨཱཿཧཱུྃ་གིས་བདུད་རྩིར་བྱིན་གྱིས་བརླབ། ཕུད་དང་པོ་བཤོས་བུའི་ཚུལ་དུ་བྱས་ལ་གུ་རུ་བཛྲ་ནཻ་ཝིཏྱ་ཨཱཿ ཧཱུྃ། ཞེས་བླ་མ་ལ་དབུལ། རཏྣ་བཛྲ་ནཻ་ཝིཏྱ་ཨཱཿ ཧཱུྃ། དཀོན་མཆོག་སྤྱི་ལ་དབུལ། ལོ་ཀེ་ཤྭ་ར་བཛྲ་ནཻ་ཝིཏྱ་ཨཱཿ ཧཱུྃ། ཐུགས་རྗེ་ཆེན་པོ་ལ་དབུལ། ཨོཾ་ཨཱཿཧཱུྃ་བཛྲ་གུ་རུ་དེ་ཝ་ཌཱཀྐི་ནི་བཛྲ་ནཻ་ཝིཏྱ་ཨཱཿ ཧཱུྃ་གིས་རྩ་བ་གསུམ་སྤྱི་ལ་དབུལ། ཨོཾ་ཧ་རི་ཏི་པཎྚི་ཨ་ཁཾ་སྭཱཧཱ། ཞེས་པས་འཕྲོག་མ་ལ་ཆངས་བུ་གཅིག་བྱིན། ཨོཾ་ཧ་རི་ཏི་པཎྚི་ནི་ཁཾ་སྭཱཧཱ། ཞེས་འཕྲོག་མའི་བུ་ལྔ་བརྒྱ་ལ་ཆངས་བུ་གཅིག་བྱིན། ཨོཾ་ཨ་གྲ་པཎྚི་ཨ་སིབྷྱ་སྭཱཧཱ། ཞེས་འབྱུང་པོ་ཕུད་ལ་དབང་བ་དག་ལ་ཆངས་བུ་གཅིག་བྱིན། དེ་ནས་བཟའ་བའི་རྣལ་འབྱོར་དང་ལྡན་པས་ལོངས་སྤྱོད་པའམ། མི་ནུས་ན་རང་ལུས་ལ་གནས་པའི་སྲིན་བུ་རྣམས་ལ་སྙིང་རྗེའི་བསམ་པས་ད་ལྟ་ཟས་ཀྱིས་བསྐྱངས། མཐར་སངས་རྒྱས་ནས་ཆོས་ཀྱིས་སྐྱོང་བའི་འདུན་པས་རོལ་རྗེས། ཨོཾ་ཨུཙྪིཥྚ་པཎྚི་ཨ་ཤིབྷྱ་སྭཱཧཱ། ཞེས་འབྱུང་པོ་ལྷག་མ་ལ་དབང་བ་རྣམས་ལ་ཆངས་བུ་གཅིག་བྱིན་པར་བྱའོ། །དེ་ནས་ཁ་བཤལ་ཏེ་ཡོན་ཡོངས་སུ་སྦྱོང་བའི་གཟུངས་འདོན་པ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ནས་འོད་ཀྱི་རྒྱལ་པོ་མེ་འོད་རབ་ཏུ་གསལ་བ་ལ་ཕྱག་འཚལ་ལོ། །ན་མཿས་མནྟ་པྲ་བྷ་རཱ་ཛ་ཡ་ཏ་ཐཱ་ག་ཏ་ཡ་ཨརྷ་ཏེ་སཾམྱཀ་སཾ་བུ་དྡྷ་ཡ། ཏཏྱ་ཐཱ། ན་མོ་མཉྫུ་ཤྲཱི་ཡེ་ཀུ་མ་ར་བྷུ་ཏ་ཡ་བོདྷ་སཏྭ་ཡ་མཧྭ་སཏཱ་ཡ། མཧཱ་ཀ་རུ་ཎི་ཀ་ཡ་ཏདྱ་ཐཱ་ཨོཾ་ནི་ར་ལཾ་བེ་ནི་ར་བྷ་སེ་ཛ་ཡ་ཛ་ཡ་ལ་བ་དྷེ། མཧཱ་མ་ཏེ། དཀྵཻ་དཀྵཻ་ཎི་པ་རི་ཤཱ་དྷ་ཡ་སྭཱཧཱ། གང་གིས་སྦྱིན་པ་གང་ལ་བཏང་། །སྦྱིན་པ་ཇི་ལྟར་མི་རྟོག་པ། །སྦྱིན་པ་མཉམ་པ་དེ་ཉིད་ཀྱིས། །སྦྱིན་བདག་དེ་ལ་ཡོངས་རྫོགས་ཤོག །ཅེས་དང་། ཤ་ཟོས་པའི་ཉེས་པ་བསལ་ཕྱིར་འཇམ་དཔལ་རྩ་རྒྱུད་ལས་བཤད་པའི་རིགས་སྔགས་ཨོཾ་ཨཱཿབྷི་ར་ཧཱུྃ་ཁེ་ཙ་ར་མཾ། ཞེས་ཚར་བརྒྱ་ཙམ་བརྗོད་ཅིང་རུས་པ་ལ་ཧུས་གདབ། ངན་སོང་སྡུག་བསྔལ་མི་འབྱུང་ཞིང་། །དཀའ་བ་སྤྱད་པ་མེད་པར་ཡང་། །ལྷ་ལས་ལྷག་པའི་ལུས་ཐོབ་ནས། །དེ་ཡང་སངས་རྒྱས་མྱུར་ཐོབ་ཤོག །ཅེས་སྨོན་ལམ་གདབ། ཟག་པ་འདོར་བའི་ཚེ་མི་གཡོ་བ་དཀར་པོའི་རྒྱུད་ནས་གསུངས་པའི་ཟག་པ་ལུས་སྦྱིན་བྱ་བ་ནི། མཆིལ་མ་ལ་ཨོཾ་ཨཱ་ཤུ་ཨ་ཧ་རི་བྷྱ་སྭཱཧཱ། སྣབས་ལ་ཨོཾ་སིང་ག་ན་ཧ་ར་བྷྱ་སྭཱཧཱ། ལུས་ཀྱི་དྲི་མ་སྤྱིར་ཨོཾ་མ་ལ་ཨ་ཧ་རི་བྷྱ་སྭཱཧཱ། དྲི་ཆེན་ལ་ཨོཾ་བྷི་ཏ་ཧ་རི་བྷྱ་སྭཱཧཱ། དྲི་ཆུ་ལ་ཨོཾ་ནུཉྩ་ཨོཾ་ཧ་རི་བྷྱ་སྭཱཧཱ། ལྷག་མའི་རིགས་སྤྱི་ལ། ཨོཾ་ཨུཙྪིཥྚ་ཨ་ཧ་རི་བྷྱ་སྭཱཧཱ། ཞེས་སོ་སོའི་དུས་གནད་དང་མཐུན་པར་བརྗོད་པས་ཡི་དྭགས་རྣམས་ལ་ཞར་བྱུང་གི་སྦྱིན་པ་རྒྱ་ཆེན་པོར་འགྱུར་རོ། །གཞན་ཡང་འགྱུར་སྔགས་ཁྱད་པར་ཅན་ནི་མཆོད་རྟེན་ལ་སོགས་པར་སྐོར་བ་བྱེད་པའི་ཚེ། ན་མོ་བྷ་ག་ཝ་ཏེ་རཏྣ་ཀེ་ཏུ་རཱ་ཛ་ཡ། ཏ་ཐཱ་ག་ཏ་ཡ་ཨརྷ་ཏེ་སཾ་མྱཀ་སཾ་བྷུདྡྷ་ཡ། ཏདྱ་ཐཱ། ཨོཾ་རཏྣེ་རཏྣེ་མཧཱ་རཏྣེ་རཏྣ་བྷི་ཛ་ཡ་སྭཱཧཱ། ཞེས་བརྗོད་པས་སྐོར་བ་གཅིག་བྱེ་བའི་གྲངས་སུ་འགྱུར། གལ་ཏེ་ཉི་ཟླའི་བགྲོད་སྟོབས་ཀྱིས་མཆོད་རྟེན་ལ་སོགས་པའི་གྲིབ་མར་འགོམ་དགོས་ན་གྲིབ་མའི་འོག་ཏུ་འཛུལ་ནས་དེ་ཉིད་བཏེག་པར་བསམ་ཞིང་། བཛྲ་བེ་ག་ཨ་ཀྲ་མ་ཧཱུྃ། ཞེས་བརྗོད་པས་ཉེས་པ་སེལ་ལོ། །ཕྱག་བྱེད་པའི་ཚེ། ཨོཾ་ན་མོ་མཉྫུ་ཤྲི་ཡེ། ན་མཿསུ་ཤྲཱི་ཡེ། ན་མཿཨུཏྟ་མ་ཤྲཱི་ཡེ་སྭཱཧཱ། ཞེས་བརྗོད་ནས་འགྱུར་སྔགས་གོང་དང་འདྲ། དེ་བཞིན་དུ་མེ་ཏོག་འབུལ་ན། ཨོཾ་ན་མོ་བྷ་ག་ཝ་ཏེ་པུཥྤེ་ཀེ་ཏུ་ར་ཛ་ཡ་ཏ་ཐཱ་ག་ཏ་ཡ་ཨརྷ་ཏེ་སཾ་མྱཀ་སཾ་བྷུདྡྷ་ཡ་ཏདྱ་ཐཱ། ཨོཾ་པུཥྤེ་པུཥྤེ་མཧཱ་པུཥྤེ་པུཥྤེ་སུ་པུཥྤེ་ཨུརྦྷ་ཝེ་པུཥྤེ་སཾ་བྷ་ཝེ། པུཥྤེ་ཨ་ཝ་ཀི་ར་ཎི་སྭཱཧཱ། ཞེས་བདུན་བཟླས་ཏེ་བསྔགས་ནས་ཕུལ་ན་མེ་ཏོག་ཇི་སྙེད་ཕུལ་བ་དེ་སྙེད་ཀྱི་མེ་ཏོག་བྱེ་བ་ཕུལ་བར་འགྱུར་རོ། །གཞན་ཡང་སྐུ་གཉེར་བ་ལྟར་ལྷ་བཤོས་ལ་འབག་དགོས་ན་ཨོཾ་དེ་ཝ་ཡ་ན་མ་ནི་དྷ་ས་སྭཱཧཱ། ཞེས་བརྗོད་པས་ཉེས་པ་མི་འབྱུང་ཞིང་། དངོས་གྲུབ་ཏུ་འགྱུར་བར་བཤད་དོ། །དགེ་སྦྱོར་སྤྱིའི་འགྱུར་སྔགས། ཨོཾ་སཾ་བྷ་ར་སཾ་བྷ་ར་བི་མ་ན་ས་ར་མཧཱ་ཛཾ་བྷ་ཧཱུྃ་ཕཊ། ཅེས་དང་། ཨོཾ་རུ་ཙི་ར་མ་ཎི་པྲ་ཝརྟ་ཡེ་སྭཱཧཱ། ཞེས་བརྗོད་ཅིང་དེ་ཐམས་ཅད་ལ་དམིགས་པ་མེད་པའི་སེམས་བསྐྱེད་དང་། རྗེས་བསྔོ་བ་སྨོན་ལམ་གྱི་རྩིས་ཟིན་པར་གཅེས་སོ། །ཞེས་པའང་རྫོགས་ཆེན་པ་རང་བྱུང་རྡོ་རྗེས་གོ་བདེ་བར་བརྗོད་པའོ། །

47.2K