སྲིད་པའི་ཟུག་རྔུ་དྲུངས་འབྱིན་པའི། །མཆོག་གི་སྨན་པ་ཐམས་ཅད་མཁྱེན། །དེས་གསུངས་འགོག་ལམ་དམ་པའི་ཆོས། །རིག་གྲོལ་ཉིས་ལྡན་ཚོགས་ལ་འདུད། །ཁྱེད་ཁམས་སྒོམ་གནས་སྐོར་ལ་གདུང་བ་ཆེ། །ཡུལ་རྐྱེན་གྱིས་དགེ་སྦྱོར་བཅོམ་ཏ་རེ། །ལས་ངན་གྱི་རླུང་འཚུབ་ལངས་ནས་ཡོང་། །གནས་མཐོང་བས་སངས་རྒྱས་ཐོབ་གྱུར་ན། །དུས་ད་ལྟ་རྒྱ་གར་རྡོ་རྗེ་གདན། །མུ་སྟེགས་དང་ཀླ་ཀློས་བཟུང་སྟེ་མཆི། །དེ་དག་ལ་མོས་པ་མེད་ཟེར་ན། །ཇོ་ཤཱཀ་རྣམ་གཉིས་ཀྱི་སྐུ་མདུན་ན། །གནས་བཤད་དང་རྟེན་བཤད་འདོན་པ་རྣམས། །ཡི་དྭགས་སུ་སྐྱེས་པ་མ་མཐོང་ངམ། །དེ་བསམ་པ་དང་སྦྱོར་བ་མ་མཐུན་པས་ལན། །གནས་ལ་སྙིང་ནས་དད་པ་དང་། །ལྟད་མོའི་འདུ་ཤེས་ཀྱང་ནོར་ཉེན་ཆེ། །འབངས་ལ་ལོངས་སྤྱོད་བྱེད་རྣམས་ནི། །གནས་སྐོར་མ་ཡིན་སྡིག་སྐོར་ཡིན། །ཁྱད་པར་ཨ་ཁུ་ཁམས་པ་དང་། །སྒོམ་ཆེན་ས་མཐའ་འགྲིམ་པ་རྣམས། །ཤུལ་རིང་ལམ་དུ་ཞུགས་ཙ་ན། །རྐང་འོག་ཏུ་བསད་པས་མ་ཆོག་པར། །གྲོ་གའི་དོན་དུ་སེམས་ཅན་གསོད། །ཨར་ཇག་དང་གཡུལ་སྤྲོད་ཞེ་སྡང་འབར། །བཟོད་པའི་གོ་ཆ་རླུང་ལ་བསྐུར། །རྐུ་འཕྲོག་དང་གཞོགས་སློང་མ་བྱིན་ལེན། །སྦྱིན་པའི་མི་མཐུན་ཕྱོགས་ལ་བསྙེན། །ལམ་གྲོགས་སྣ་ཚོགས་པས་སྲུང་སྡོམ་སྐྱེལ། །ཚུལ་ཁྲིམས་ཐལ་བ་བཞིན་དུ་གཏོང་། །ལུས་ཀྱི་ལས་གསུམ་པང་དུ་བླངས། །ཕྱག་དང་སྐོར་བའི་རྒྱུན་ལམ་གཅོད། །རྙེད་པ་འཚོལ་ཕྱིར་རྫུན་ཚིག་སྨྲ། །ཤོ་སྣ་སྔ་ཕྱིར་ཕྲ་མ་འཛུད། །ལམ་འཕྲང་ཡངས་དོག་ལ་ཚིག་རྩུབ་འཕེལ། །ཤུལ་རིང་གི་ངལ་དུབ་ངག་འཁྱལ་གྱིས་བསྒྲིབ། །ངག་གི་ལས་ལམ་བཞིར་བསྙེན་སྒྲུབ་བྱེད། །བཟླས་བརྗོད་དང་ཆོས་སྤྱོད་འབག་འབུག་ཆག །བརྩོན་འགྲུས་ལོག་ལམ་གྱི་ཕྱོགས་ལ་འཁྱོག །ལྷ་ཁང་དང་རྟེན་གསུམ་མཐོང་ཙ་ན། །ཕྲ་རྒྱན་དང་མཆོད་རྫས་ལ་བརྣབ་སེམས་དང་། །དཀོན་གཉེར་གྱི་ཚིག་རྩུབ་ལ་གནོད་སེམས་འཕེལ། །བགྲོད་ལམ་གྱི་ཁ་ཆར་བུ་ཡུག་དང་། །དགྲ་གྱོད་དང་ནད་གདོན་ཆོམ་རྐུན་སོགས། །ལས་ངན་གྱི་རླུང་འཚུབ་ལངས་ཙ་ན། །དཀོན་མཆོག་དང་ཆོས་སྐྱོང་ལ་ཡི་ཆད་དང་། །ལོག་ལྟའི་གཡང་སར་གོམ་པ་འཇོག །ཡིད་ཀྱི་ལས་ལམ་རྣམ་པ་གསུམ། །ལ་སོགས་རྣམ་རྟོག་གི་ཆོམ་རྐུན་རྣམས། །བསམ་གཏན་དང་ཤེས་རབ་ཀྱི་འགལ་ཟླར་སླེབས། །དེ་ལྟར་ཕྱིན་དྲུག་སྨ་འབེབས་ཤིང་། །མི་དགེའི་ལས་ལམ་རྣམ་པ་བཅུ། །བལྟར་མི་མངོན་པར་འདུ་བྱེད་པ། །སྡོམ་མིན་རྒྱུན་ལྡན་གྱི་རྒྱལ་བློན་དང་། ཁེ་འདོད་ཀྱི་ཚོང་པ་གཡོན་ཅན་དང་། །ཁམས་པ་གནས་སྐོར་ལ་གདུང་བ་དང་། །སྒོམ་ཆེན་སྒྲུབ་ཚུགས་མ་ཟིན་པ། །ཐམས་ཅད་ཀུན་གྱི་འབུག་པ་ཡིན། །གཉན་ས་འགྲིམ་པ་སྐད་རྣམས་ཀྱང་། །སྔོན་འགྲོས་རང་རྒྱུད་མ་སྦྱངས་ཤིང་། །བསྐྱེད་དང་རྫོགས་པའི་གཞུང་ལམ་ལ། །གཡོ་ཐོབ་གོམས་བརྟན་མཐར་ཕྱིན་ལྔའི། །དྲོད་རྟགས་ཀྱི་སྣེ་ཡང་མ་ཟིན་པར། །བཟའ་བཏུང་རྐང་གླིང་དང་ཌ་རུས་འཚོལ། །ཐོགས་བཅས་བདུད་ལ་སྐྲག་ཅིང་འདར། །ཐོགས་མེད་བདུད་ཀྱིས་ཀུན་ནས་དཀྲིས། །དགའ་བྲོད་བདུད་ལ་མངོན་པར་རློམ། །སྙེམས་བྱེད་བདུད་ལ་འཁུམས་བཞིན་དུ། །ཆང་དང་ལམ་ཟན་འཚོལ་བཞིན་པར། །ཤ་ཁྱེར་ཁྲག་ཁྱེར་ཟེར་བ་མཚར། །ཞི་གནས་ཀྱི་མྱོང་བ་མཐར་ཕྱིན་ནས། །ལྷག་མཐོང་ལ་ཉམས་སད་བྱེད་པ་དང་། །རོ་སྙོམས་ཀྱི་འཕྲང་ལ་བཤར་ནུས་པའི། །གཅོད་མཁན་དེང་སང་ཡོད་མི་འདྲ། །དུར་ཁྲོད་དུ་ཉལ་བས་སངས་རྒྱ་ན། །མི་ཚེར་རི་སྟོངས་སུ་ཉལ་བྱེད་པའི། །རྫི་བོ་རྣམས་འཇའ་ལུས་འགྲུབ་ལ་ཉེ། །དེ་ཀུན་གླེན་པའི་བརྟུལ་ཞུགས་ཡིན། །གདོན་བགེགས་རང་གི་སེམས་ལ་ཚང་། །དུར་ཁྲོད་མལ་ས་ལས་གཉན་པ་མེད། །འཇིག་རྟེན་ཆོས་བརྒྱད་ཀྱི་རོ་ལངས་དང་། །འདུ་འབྲལ་མེད་པ་མ་ཤེས་སམ། །འདི་ཉིད་ལ་གཅོད་ན་གཅོད་མཁན་ཡིན། །བརྟུལ་ཞུགས་གྲུབ་པའི་ནང་ན་མཆོག །དེ་བས་གནས་སྐོར་དང་ས་སྐོར་ལ། །རྒྱུ་བ་རྣམས་བག་ཡོད་ཀྱིས་དྲན་པ་བརྟན། །ཁྱད་པར་ཆོས་ལྡན་གྱི་གང་ཟག་དང་། །སྒོམ་ཆེན་གནས་སྐོར་ལ་འགྲོ་བའི་མཚམས། །བྱང་ཆུབ་སེམས་གཉིས་ལ་རང་དབང་ཐོབ། །རོ་སྙོམས་ཀྱི་སྐྱིད་སྡུག་ལ་འདམ་ག་བྲལ། །བཟོད་པའི་གོ་ཆས་ཡུལ་རྐྱེན་ཐུབ། །ཉིན་གཅིག་ལ་བརྡུངས་བཏགས་བརྒྱ་བྱུང་ཡང་། །འབྱུང་བཞི་ལ་དབྱུག་པས་བསྣུན་པ་ལྟར། །ཅི་མི་སྙམ་པའི་བརྟུལ་ཞུགས་ཀྱི། །སྤོབས་པ་གདེང་དུ་གྱུར་པའི་ཚེ། །ཡུལ་ཆེན་ཉི་ཤུ་རྩ་བཞི་སོགས། །བགྲོད་པར་སྔགས་ཀྱི་གཞུང་ནས་བཤད། །ཚོགས་ལམ་གྱི་སྣེ་ཡང་མ་ཟིན་ཅིང་། །སྤྲེའུ་ལས་བཟོད་བསྲན་ཆུང་བ་ཡི། །དགེ་སློང་རྡོ་རྗེ་འཛིན་པ་དང་། །སྨྱོ་སྤྱོད་ལ་གྲུབ་ཐོབ་ཏུ་རློམ་པ་ཡི། །ངོ་ཚའི་གདོང་པགས་རལ་བ་རྣམས། །གནས་སྐོར་གྱིས་ངན་སོང་སྒྲུབ་ཉེན་ཆེ། །བར་དོར་ཟུང་འཇུག་ཐོབ་ངེས་པའི། །ནག་པོ་སྤྱོད་པ་ལྟ་བུ་ཡང་། །གནས་སྐོར་གྱིས་སྐུ་སྲོག་བསྐྱལ་གྱུར་ན། །ཕྱོགས་ལས་རྣམ་རྒྱལ་དང་ཁ་འགྱངས་པས། །ཁྱེད་ཅག་གི་རྒྱུད་ཚོད་རིག་སྟེ་མཆི། །ཟས་གོས་ཀྱི་ཞེན་པ་མ་ཆོད་པས། །ཁལ་མ་དང་ཚོང་ཟོག་ལམ་ཡིག་ལ་གདུང་། །བརྟུལ་ཞུགས་ཀྱི་སྤྱོད་པས་གནས་ཉུལ་བ། །ཨོ་རྒྱན་པ་རང་བྱུང་དཔལ་སོགས་ཡིན། །དེ་དག་གིས་དེ་འདྲ་ཨེ་མཛད་ལྟོས། །བྱིས་པས་ཉེར་སྤྱོད་ཀྱི་བསམ་གཏན་ལ། །རླུང་རྐྱེན་དང་མངོན་ཤེས་གྱལ་གྱོལ་སོགས། །ལྷའི་བུའི་བདུད་ཀྱི་འཕྲང་དམ་པས། །ཀུན་ཏུ་བཟང་པོའི་སྤྱོད་པ་ལྔར། །བག་ཡོད་བསྟེན་ན་མི་ལེགས་སམ། །དེ་ལ་དག་པ་ལྔ་ཡོད་དེ། །གནས་དག་དགོན་པ་བས་མཐའ་བཟུང་། །ལོག་འཚོས་མ་གོས་འཚོ་བ་དག །གྲོགས་དག་ཚངས་པར་མཚུངས་སྤྱོད་ལྡན། །སྡོམ་པ་དག་པ་བྱང་སེམས་དང་། །རིག་འཛིན་ཟུང་དུ་སྦྲེལ་བ་བསྲུང་། །ཆོས་དག་སྦྱང་གཞི་སྦྱོང་བྱེད་ཀྱི། །གནད་དོན་གོ་བའི་བསྐྱེད་རིམ་དང་། །ས་བཅུའི་སྤངས་རྟོགས་ལ་རེག་པའི། །རྫོགས་རིམ་ཟུང་དུ་འབྲེལ་གྱུར་ན། །སངས་རྒྱས་རང་ལ་ཡོད་པའི་ཕྱིར། །བྱང་ཆུབ་མལ་གྱི་ནང་ནས་ཐོབ། །འདི་ལྟར་མི་ཤེས་རྨོངས་ཆེན་རྣམས། །འཁོར་བའི་རྒྱུ་འབྲས་མིང་གཟུགས་ལ། །ཆགས་ནས་གཟུང་འཛིན་ཡུལ་ལ་བགྲོད། །ཡུལ་ནི་གཟུགས་ཡིན་གནས་ཀྱང་དེ། །མིང་ནི་རྣམ་ཤེས་ལ་སོགས་བཞི། །གནས་ཀྱི་མིང་ཐོས་ཚོར་བ་སྟེ། །འགྲོ་བར་འདོད་པ་འདུ་ཤེས་དང་། །རྒྱུ་འབྲས་སྣ་ཚོགས་འདུ་བྱེད་དེ། །རྣམ་ཤེས་ལས་སུ་མི་རུང་བའི། །བློ་ལྷག་གནས་སྐོར་བདུད་ཀྱི་ལས། །ཅིས་ཀྱང་སྡོད་དུ་མ་ཚུགས་ན། །གནས་ཆེན་གསུམ་དང་མཐའ་ཡང་འདུལ། །རུ་གནོན་གཙུག་ལག་ཁང་རྣམས་ལ། །ཕྱག་སྐོར་སྨོན་ལམ་རྒྱ་ཆེན་མཛོད། །ལམ་མ་ཞུགས་ཀྱི་སྐྱེ་བོ་ལའང་། །བག་ཡོད་ཤུགས་ལ་བསྟེན་དགོས་པའི། །ཚོགས་གསོག་སྒྲིབ་སྦྱོང་འདི་ཉིད་ཟབ། །དགེ་བའི་ཆོས་རྣམས་སྡུད་པ་ལ། །ཡན་ལག་བདུན་དང་ཕར་ཕྱིན་དྲུག །ཆོས་སྤྱོད་བཅུ་སོགས་གསུངས་པ་ལས། །གཅན་གཟན་དང་ནི་ཆོམ་རྐུན་གྱི། །བརྟུལ་ཞུགས་བསྟན་པ་མེད་པའི་ཕྱིར། །ཕན་པའི་སེམས་ཀྱིས་སྨྲས་པ་ཡིན། །ཞེས་ཀཿསྒོམ་རྩྭ་མཆོག་གྲོང་ལ་འགྲོ་ཟེར་བ་ལ་གདམས་པ་རང་བྱུང་རྡོ་རྗེས་སོ། །
རྩོམ་སྒྲིག་པ། དྲི་མེད་དབང་མོ།