༄༅། །རྣལ་འབྱོར་པས་སྔགས་བཟླ་བའི་མན་ངག་བཞུགས་སོ། །

རྩོམ་སྒྲིག་པ།  ཀློང་གསལ།

༄༅། །རྒྱ་གར་སྐད་དུ། ཡོ་ག་མནྟྲོ་ཨུ་པ་དེ་ཤ། བོད་སྐད་དུ། རྣལ་འབྱོར་པས་སྔགས་བཟླ་བའི་མན་ངག །རྡོ་རྗེ་འཛིན་ལ་ཕྱག་འཚལ་ལོ། །གང་ཞིག་རྣལ་འབྱོར་པ་རྣམས་ཀྱིས། །སྔགས་ཀྱི་ནུས་པ་བསྐྱེད་འདོད་པས། །སྔགས་ཀྱི་སྤྱོད་ལམ་ཤེས་བྱ་སྟེ། །རྣལ་འབྱོར་སྔགས་པས་སྔགས་བགྲང་ཚེ། །དམ་ཚིག་ཉམས་པའི་མི་དག་དང༌། །ནམ་ཡང་ཁ་འཕྲོ་མི་བསྲེ་ཞིང༌། །སྡིག་པ་ཅན་གྱི་གོས་མི་གྱོན། །ཁམས་མི་བདེ་བའི་སྐབས་སུ་ནི། །ངལ་གསོ་ཁམས་བསང་ཆོས་ཉིད་བསྒོམ། །དད་པ་མེད་དང་ལེ་ལོ་སྡང་༌། །མི་མོས་ཉལ་སྔགས་བཟླ་བ་དང་༌། །བཟའ་བ་ཟ་ཞིང་སྔགས་ཟློས་སྤང་༌། །བཏུང་བ་འཐུང་ཞིང་སྔགས་ཟློས་སྤང་༌། །ཁ་མ་བཤལ་བར་སྔགས་ཟློས་སྤང་༌། །བསམ་པ་མེད་པར་སྔགས་ཟློས་སྤང་༌། །ལྷ་མ་གསལ་བར་སྔགས་ཟློས་སྤང་༌། །གཉིད་ཀྱི་དབང་དུ་གྱུར་བ་སྤང་༌། །གསལ་ཞིང་སྔགས་སྒྲ་ཆེ་བ་སྤང་༌། །ཞི་བའི་དུས་སུ་དྲག་པོ་སྤང་༌། །དྲག་པོའི་དུས་སུ་ཞི་བ་སྤང༌། །དབང་གི་དུས་སུ་ཞི་བ་སྤང་༌། །སྔགས་བཟླས་གཞན་དུ་སྤེལ་བ་སྤང་༌། །སྒྲུབ་སྔགས་འཇོམས་ཤིང་བཟླ་བ་སྤང་༌། །རླུང་ཁ་ཆེན་པོ་ཆུ་ཆེན་འགྲམ། །དྲག་སྔགས་ཟབ་མོ་མི་བཟླའོ། །སྔགས་ཀྱི་ཡིག་འབྲུ་འཕྱར་བ་སྤང༌་། །སྒྲ་དོན་ནད་ལ་སོགས་པ་ལ། །ནུས་པ་ཡོངས་རྫོགས་དམིགས་པ་ཡང་༌། །སྣོད་མིན་དག་ལ་སྤེལ་མི་བྱ། །གསང་སྔགས་གྲོང་ཡུལ་དག་ཏུ་སྤང་༌། །ཀྲི་ཡ་ལ་སོགས་སྔགས་རྣམས་དང་༌། །འབྲས་བུ་དམན་པའི་སྔགས་ལ་སོགས། །ཕ་མ་གཉིས་མེད་མ་གཏོགས་རྒྱུད། །གཞན་ལ་ཤ་ཆང་བུད་མེད་དང༌་། །སྒོག་པ་སོགས་སྤང་གཙང་སྦྲ་བྱ། །འཕྲལ་གྱི་ནུས་པ་འདོད་པ་ལ། །སྨྲ་བཅད་གྲངས་དང་བཅས་པ་འདོན། །བླ་མེད་དངོས་གྲུབ་འདོད་པ་ལ། །གཞུང་བཞིན་རྟགས་རྫོགས་བར་དུ་འདོན། །ཕྱག་རྒྱ་ཆེན་པོ་འདོད་པ་ལ། །དེ་ཉིད་གསུམ་གསལ་ཡུན་དུ་འདོན། །ནུས་པ་མྱུར་དུ་སྐྱེ་འདོད་པ། །སྨྲ་བ་བཅད་པས་དངོས་གྲུབ་འཕེལ། །ལོ་གཅིག་རང་གར་བཟླས་པ་བས། །ཟླ་གཅིག་སྨྲ་བཅད་ནུས་པ་ཆེ། །ཡུལ་དུ་ལོ་གཅིག་བསྒྲུབས་པ་བས། །དབེན་པར་ཞག་གཅིག་བསྟེན་པ་ལེགས། །སྒྲུབ་པ་སྔགས་ཀྱི་རྣལ་འབྱོར་པས། །གདམས་པ་ཉེར་གཅིག་འདི་ལྡན་ན། །ཚེ་དང་མཆོག་དང་ཐུན་མོང་འགྲུབ། །སྔགས་བཟླ་བའི་མན་ངག་སློབ་དཔོན་ཆེན་པོ་ནཱ་རོ་པས་མཛད་པ་རྫོགས་སོ།། །།

47.2K