༄༅།།རང་རྣམ་དྲིས་ལན་དྲང་སྲོང་མ་བཞུགས་སོ། །

༄༅། །ན་མོ་གུ་རུ། རྗེ་བླ་མ་མཆོག་ལ་ཕྱག་འཚལ་ལོ། །བདག་མཆིས་ཀྱི་རྣལ་འབྱོར་འདུག་པ་འདི། །སྐྱེ་ས་དེ་རི་བོའི་ཕྱོགས་སུ་བྱས། །འཚར་ས་དེ་ཆབ་མདོའི་ཕྱོགས་སུ་བྱས། །ལོ་བཅུ་ངོ་ཙམ་ནས་ཡི་གེ་བསླབ། །ཆུང་ནས་རབ་བྱུང་ཆ་ལུགས་བྱས། །མཚན་ལྡན་བླ་མ་དམ་པ་བསྟེན། །བརྩེ་བའི་ཐུགས་ཀྱིས་བུ་བཞིན་བསྐྱངས། །དབང་ལུང་གདམས་པ་བཅས་པ་ཞུས། །བདག་མི་ལུས་དོན་ལྡན་ཁོང་གི་དྲིན། །རྗེ་ཁོང་ལ་གསོལ་བ་བཏབ་ནས་ཀྱང་། །ལོ་ཁ་ཤས་བཀའ་བརྒྱུད་ཀྱི་རྣམ་ཐར་བཟུང་། །རང་སྒྲུབ་པའི་ཉམས་ལེན་བརྩོན་པར་བྱས། །དུས་དེ་ཚེ་བླ་མའི་བྱིན་རླབས་ཀྱིས། །རང་ཉམས་མྱོང་ངེས་ཤེས་བག་ཙམ་སྐྱེས། །ཕྱི་སྣང་བ་ཡུལ་གྱི་དཀར་དམར་རྣམས། །གནས་ལྷུན་གྲུབ་དཀྱིལ་འཁོར་ཤེས་པ་བྱུང་། །བཅུད་སེམས་ཅན་ཐ་དད་སྣ་ཚོགས་རྣམས། །རྣམ་དག་ལྷ་རུ་ཤེས་པ་བྱུང་། །སྣང་སྲིད་གཞིར་བཞེངས་ཀྱི་དཀྱིལ་འཁོར་བསྒོམས། །བདག་མ་ཧཱའི་རྣལ་འབྱོར་ཡིན་ནམ་སྙམ། །ཕུང་ཁམས་སྐྱེ་མཆེད་ལ་སོགས་རྣམས། །གདོད་ནས་ལྷུན་གྲུབ་ཡི་དམ་གྱི། །དཀྱིལ་འཁོར་ཚོམ་བུའི་ངོ་བོར་ཤེས། །ནང་གསལ་སྟོང་ལུས་ཀྱི་དཀྱིལ་འཁོར་བསྒོམས། །བདག་ཨ་ནུའི་རྣལ་འབྱོར་ཡིན་ནམ་སྙམ། །མཆོག་གསང་བ་སེམས་ཉིད་རིག་པའི་གཤིས། །ཀ་དག་བརྗོད་བྲལ་དུ་ཤེས་པ་བྱུང་། །ཡིད་བྱེད་དང་བྲལ་བའི་གཉུག་མ་བསྒོམ། །བདག་ཨ་ཏིའི་རྣལ་འབྱོར་ཡིན་ནམ་སྙམ། །ཕྱི་སོ་ཐར་ངུར་སྨྲིག་རྒྱལ་མཚན་བཟུང་། །དུག་གསུམ་ཉོན་མོངས་ཀྱི་མགོ་བོ་མནན། །གཞན་ལ་འཚེ་བའི་བསམ་པ་སྤངས། །བདག་ཤཱཀྱའི་དགེ་སྦྱོང་ཡིན་ནམ་སྙམ། །ནང་བྱང་སེམས་བསླབ་པའི་ཕན་ཡོན་བཟུང་། །རྒྱལ་སྲས་རླབས་ཆེན་གྱི་རྗེས་སུ་བསླབ། །གཞན་འགྲོ་བ་ཀུན་ལ་གང་ཕན་བསྒྲུབས། །བདག་འདོད་རང་མནོག་གི་བསམ་པ་སྤངས། །བདག་བརྩེ་ལྡན་བྱང་སེམས་ཡིན་ནམ་སྙམ། །གནད་གསང་བ་རིག་འཛིན་གྱི་དམ་ཚིག་བཟུང་། །ཀུན་ཨ་འཐས་འཁྲུལ་བའི་མགོ་བོ་མནན། །དཀྱིལ་འཁོར་གསུམ་ལྡན་གྱི་ངང་དུ་གནས། །བདག་དམ་ལྡན་རིག་འཛིན་ཡིན་ནམ་སྙམ། །དངོས་འཁྲུལ་བའི་བག་ཆགས་རང་གཟུགས་རྣམས། །དམིགས་མེད་སྤྲོས་བྲལ་གྱི་ཀློང་དུ་བསྒྲལ། །བདག་འཛིན་གྱི་དགྲ་བོ་ཕམ་པར་བྱས། །བདག་གསང་ཆེན་སྔགས་པ་ཡིན་ནམ་སྙམ། །གནད་ཕྱག་རྒྱ་བཞི་ཡི་དོན་བཟུང་ནས། །ཉམས་རྣམ་པ་བཞི་ཡི་གནད་དུས་རྣམས། །བདེ་སྟོང་ལྷན་སྐྱེས་སུ་སྦྱོར་བས་བཞག །ཆགས་ཞེན་གྱི་དྲི་མ་བྲལ་བར་བྱས། །བདག་ཆགས་བྲལ་གྱི་རྣལ་འབྱོར་ཡིན་ནམ་སྙམ། །གནད་སྒོ་གསུམ་དབེན་པའི་རྣལ་འབྱོར་བཟུང་། །འཁྲུལ་རྟོག་གི་གཡེང་ལས་རྒྱལ་བར་བྱས། །སེམས་གཏད་མེད་ཀྱི་གཉུག་མའི་ངང་ལ་བཞག །བདག་སྤྲོས་མེད་ཀྱི་སྒོམ་ཆེན་གཅིག་ཡིན་ནམ་སྙམ། །ཚེ་འདིར་ཕྱོགས་ཀྱི་བདེ་སྐྱིད་ཡང་ཆེར་མ་སྒྲུབ། །བཟང་འདོད་ཀྱི་བསམ་པ་ཡང་བོར་ནས་བཞག །ཚུལ་འཆོས་ཀྱི་བྱ་སྤྱོད་གཏོར་བར་བྱས། །བདག་མདོ་མེད་ཀྱི་སྨྱོན་པ་གཅིག་ཡིན་ནམ་སྙམ། །ཞེས་པ་འདི་དབེན་གནས་ནམ་མཁའ་མཛོད་དུ་མི་རྣམས་ཀྱིས་ལོ་རྒྱུས་དྲིས་པའི་ལན་དུ་རྫོགས་ཆེན་གྱི་རྣལ་འབྱོར་པ་པདྨ་རིག་འཛིན་གྱིས་སྦྱར་པའོ། །

47.2K