༄༅། །དིལ་མགོ་མཁྱེན་བརྩེ་རིན་པོ་ཆེ་རབ་གསལ་ཟླ་བའི་ལོ་རྒྱུས་རགས་བཀོད་བཞུགས་སོ། །

༧དིལ་མགོ་མཁྱེན་བརྩེ་རིན་པོ་ཆེ་རབ་གསལ་ཟླ་བ་ཞབས།

མཁན་ཆེན་གཞན་ཕན་སྣང་བ་དང་མཁྱེན་བརྩེ་ཆོས་ཀྱི་བློ་གྲོས་རྣམ་གཉིས་ཀྱི་ཐུགས་སྲས་སྐྱབས་རྗེ་དིལ་མགོ་མཁྱེན་བརྩེ་རབ་གསལ་ཟླ་བ་རིན་པོ་ཆེ་ནི། ཇི་སྐད་དུ། གཏེར་ཆེན་མཆོག་གྱུར་གླིང་པའི་ཟབ་གཏེར་ཡུམ་ཀའི་སྲོག་ཐིག་ལས། མངའ་བདག་འཇམ་དཔལ་དབྱངས་ཆེན་པོ༔ ཁྲག་འཐུང་གར་དབང་མདོ་སྔགས་གླིང་༔ ཨོ་རྒྱན་བདག་གིས་རྗེས་བཟུང་བའི༔ སྐལ་ལྡན་གཅིག་ཆར་རིགས་ཅན་ཞིག༔ ལྕགས་ཁམས་བྱ་ཁྱི་ལོ་རུ་སྐྱེས༔ ཟབ་རྒྱས་གསང་བ་དུ་མའི་སྒོ༔ རང་གིས་སྤྱོད་ཅིང་གཞན་ལ་སྤེལ༔ ཞེས་དང་། རྗེ་རང་གི་གཏེར་བྱོན་པདྨའི་ཚེ་རྒྱུད་ལས། པཎ་ཆེན་བི་མ་མི་ཏྲ་དང་༔ མངའ་བདག་ཁུ་དབོན་ཡེ་ཤེས་གཟུགས༔ རང་བྱུང་དགོངས་པའི་རྩལ་རྫོགས་པའི༔ དཔའ་བོ་གར་གྱི་དབང་ཕྱུག་རྩལ༔ མདོ་སྔགས་གླིང་པ་ཆོས་ཀྱི་རྗེ༔ འོད་གསལ་སྤྲུལ་པའི་རྡོ་རྗེ་ཞེས༔ ལྕགས་ཁམས་དཔའ་བོའི་མཚན་དང་ལྡན༔ ཞེས་སླུ་མེད་རྡོ་རྗེའི་ལུང་གིས་ཡང་ཡང་བསྔགས་པ་ལྟར། བོད་ཆེན་པོའི་ལྗོངས་ཀྱི་མདོ་སྨད་ཆུ་བཞི་སྒང་དྲུག་ལས་གསེར་ལྡན་འབྲི་ཀླུང་དལ་འབབ་པའི་འགྲམ་ངོགས། མཐའ་འདུལ་གྱི་གཙུག་ལག་ཁང་ཀློང་ཐང་སྒྲོལ་མ་ལྷ་ཁང་བཞུགས་པའི་ས་ཕྱོགས། མི་འགྱུར་ནམ་མཁའི་རྡོ་རྗེ་དང་། འབྲི་གུང་སྐྱོབ་པ་འཇིག་རྟེན་གསུམ་མགོན། ཀརྨ་པ་རིག་པའི་རྡོ་རྗེ་སོགས་སྐྱེས་ཆེན་དམ་པ་བརྒྱུད་མར་འཁྲུངས་པའི་གནས་མཆོག་ལྡན་ཡུལ་དུ་གྲགས་པའི་སའི་ཆར། ལྷ་རིགས་གཉོས་ཀྱི་གདུང་རྒྱུད་ས་སྐྱོང་སྡེ་དགེའི་གཉེར་ཆེན་དིལ་མགོ་ཞེས་པའི་ཁྱིམ་དུ་ཡབ་དིལ་མགོ་བཀྲ་ཤིས་ཚེ་རིང་དང་། ཡུམ་དབེན་ཐོག་ལྷ་མཚོ་གཉིས་ཀྱི་སྲས་སུ་སྤྱི་ལོ་༡༩༡༠སྟེ་རབ་བྱུང་བཅོ་ལྔ་པའི་ལྕགས་ཁྱི་ཟླ་བ་བཞི་པའི་ཚེས་སུམ་ཅུ་ཟླ་བ་གྲོ་བཞིན་གྱི་འགྲུབ་སྦྱོར་བཟང་པོ། འཇམ་མགོན་མི་ཕམ་རིན་པོ་ཆེས་དཔལ་དུས་ཀྱི་འཁོར་ལོ་བསྡུས་རྒྱུད་ཀྱི་འགྲེལ་ཆེན་བཤད་ཁྲིད་གྲུབ་ནས་དགའ་སྟོན་ཚོགས་ཀྱི་འཁོར་ལོ་སྐོར་བའི་ཉིན་སྐུ་འཁྲུངས། འཇམ་མགོན་བླ་མས་འཇམ་དབྱངས་དང་དབྱངས་ཅན་རིལ་བུ་བསྩལ་ནས་མ་ཡི་འོ་མ་ཁར་མ་མིད་པའི་སྔ་ལོག་ཏུ་ལྕེ་ལ་ཧྲཱིཿདྷཱིས་རྒྱས་ཐོབ་ཅེས་གསུངས་པ་ལྟར་བྱས། ཟླ་བ་གཅིག་གི་རྗེས་འཇམ་མགོན་བླ་མའི་གསེར་ཞལ་མཇལ་བས་འཇམ་དཔལ་ཡེ་ཤེས་སེམས་དཔའི་དཀྱིལ་འཁོར་དུ་སྨིན་པར་མཛད་ཅིང་། རྒྱ་གར་ལུགས་ཀྱི་བཙས་སྟོན་ཡིན་ཞེས་བཟང་གོས་དང་བུམ་པ་བཅུད་ལྡན་གནང་ནས་བཀྲ་ཤིས་དཔལ་འབྱོར་ཞེས་མཚན་གསོལ། སྔ་ཕྱིར་རྗེ་འདི་ཉིད་ལས་སྒྱུ་འཕྲུལ་ཞི་ཁྲོ། ཚོགས་ཆེན་འདུས་པ། དོང་སྤྲུགས། ཡང་དག་སོགས་དང་། གཏེར་མ་སྒྲུབ་ཐབས་འདོད་འཇོ་དང་། ཉང་གཏེར་བཀའ་བརྒྱད། སྙིང་ཐིག་ཡ་བཞིའི་ལུང་ཁྲིད་བཅས་དང་། མི་ཕམ་བཀའ་འབུམ་དང་གདམས་ངག་མཛོད་བཅས་ཀྱི་ལུང་རྣམས་གསན། མཁྱེན་བརྩེའི་དབང་པོའི་རྣམ་རོལ་དུ་ངོས་འཛིན་མཛད་ནས་འགྱུར་མེད་ཐེག་མཆོག་བསྟན་པའི་རྒྱལ་མཚན་ཞེས་མཚན་གྱི་ཅོད་པཎ་གསོལ་ཞིང་ཐུན་མིན་བཀའ་དྲིན་ཅན་གྱི་བླ་མ་གཅིག་ཡིན་གསུངས། སྐུ་ནར་ཅུང་སོན་སྐབས་རྫོགས་ཆེན་གཞན་དགའ་རིན་པོ་ཆེ་རྒྱ་བོ་རི་ཁྲོད་དུ་བཞུགས་པ་ཡོངས་འཛིན་ལྟ་བུའི་ཚུལ་དུ་བསྟེན་ཏེ་ལོ་གྲངས་དུ་མར་སྐུ་དྲུང་དུ་རྒྱུན་བཞུགས་མཛད་ཅིང་། སྤྱོད་འཇུག་དབུ་མ་འཇུག་པ་དབུ་མ་རྩ་བ་ཤེས་རབ་གཞན་པའི་རིག་ཚོགས་བཞི་བརྒྱ་པ་སོགས་ཉིད་མཛད་གཞུང་ཆེན་བཅུ་གསུམ་གྱི་མཆན་འགྲེལ་རྣམས་ཀྱིས་གཙོས་མདོ་སྔགས་ཀྱི་ཆོས་ཚུལ་མཐའ་ཡས་པར་གསན་ཞིང་རབ་གསལ་ཟླ་བ་ཞེས་མཚན་གནང་། དེ་མཚུངས་རྫོགས་ཆེན་མཁན་རིན་པོ་ཆེ་པདྨ་བློ་གསལ་ལམ་ཨ་བུ་བློ་ཁོ་ལས་སྙིང་ཐིག་རྩ་པོད་གཉིས་ཀྱི་ལུང་ཁྲིད་དང་། རང་གྲོལ་སྐོར་གསུམ་གྱི་ཁྲིད་ལུང་གསན། མུ་ར་པདྨ་བདེ་ཆེན་བཟང་པོ་ལས་ཀར་གླིང་ཞི་ཁྲོའི་རྫོགས་རིམ་བར་དོ་དྲུག་ཁྲིད་དང་། ཨ་འཛོམས་འབྲུག་པ་སྣ་ཚོགས་རང་གྲོལ་ལས་སྙིང་ཐིག་སྔོན་འགྲོའི་ཟབ་ཁྲིད་གསན། ལྕང་མ་བཱ་ཐུར་མཁན་ཆེན་ཐུབ་དགའ་ལས་བྱམས་ཆོས་སྡེ་ལྔ་དང་། གསང་སྙིང་འགྲེལ་པ་ཕྱོགས་བཅུའི་མུན་སེལ་གྱི་ཞིབ་ཁྲིད་ཚར་གསུམ་རྣམས་གསན། ཐུན་མིན་རིགས་བདག་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ལས་རིན་ཆེན་གཏེར་མཛོད་ཆེན་མོའི་དབང་ལུང་། སྒྲུབ་ཐབས་ཀུན་བཏུས་ཀྱི་དབང་ལུང་ཁྲིད་བཅས། ས་སྐྱའི་ལམ་འབྲས་སློབ་བཤད་ཀྱི་དབང་ཁྲིད་ཡོངས་རྫོགས། ངོར་ལུགས་ཀྱི་དཀྱིལ་འཁོར་གྱི་དབང་ཆེན། ཞྭ་ལུ་ལུགས་དང་ཇོ་ལུགས་ཀྱི་དུས་འཁོར་དབང་ཆེན། ཤེས་བྱ་ཀུན་ཁྱབ་ཀྱི་རྩ་བའི་བཤད་ཁྲིད། སྙིང་ཐིག་ཡ་བཞི་ཆ་ཚང་། ཀློང་ཆེན་སྙིང་ཐིག་པོད་གཉིས་ཀྱི་དབང་ལུང་ཁྲིད་གསུམ་སོགས་རྫོགས་ཆེན་སྙིང་ཐིག་ཆེན་མོའི་རྒྱུད་ལུང་མན་ངག་ཐམས་ཅད་ཀྱི་བཀའ་གཏད་ནས་དོན་གྱི་བརྒྱུད་འཛིན་དུ་མངའ་གསོལ། དེ་བཞིན་དགེ་བའི་བཤེས་གཉེན་བཅུ་ཕྲག་དུ་མ་ལས་སྒྲུབ་བརྒྱུད་ཤིང་རྟ་བརྒྱད་དང་བཤད་པའི་བཀའ་ཆེན་བཅུ་ལས་བྱུང་བའི་ཆོས་ཚུལ་མ་ལུས་པ་གསན་པས་མདོ་རྒྱུད་ཀུན་ལ་ཆགས་ཐོགས་མེད་པའི་མཁས་པའི་དབང་པོ་ཆེན་པོར་གྱུར། སྒྲུབ་པའི་ཉམས་བཞེས་མི་ལོ་ཉི་ཤུ་ཙམ་ཐུགས་དམ་བཅད་རྒྱར་བཞུགས་པས་གུ་རུ་པདྨ་འབྱུང་གནས་དང་པཎ་ཆེན་བི་མ་མི་ཏྲ། འཕགས་ཡུལ་གྱི་སློབ་དཔོན་ཆེན་པོ་ཛཱེ་ཏ་རི་སོགས་ལྷག་པའི་ལྷའི་ཡེ་ཤེས་ཀྱི་སྐུས་རྗེས་སུ་བཟུང་བས་བླ་རྫོགས་ཐུགས་གསུམ་གྱིས་མཚོན་ཟབ་མོ་གཏེར་གྱི་བཀའ་བབ་ཚུལ་རང་གཏེར་ལས། རབ་བྱུང་བཅུ་དྲུག་པའི་མེ་ཕག་དབོ་ཟླའི་ཚེས་སྐོར་ལ་རྫོང་གསར་དུ་བཞུགས་སྐབས། ལྔ་བརྒྱ་སྤྱོད་པའི་གདུལ་བྱའི་ཕྱིར༔ གཉིས་མེད་ཡེ་ཤེས་རོལ་བའི་གར༔ ཡབ་གཅིག་བཙད་པོའི་སྐྱེ་བ་ནི༔ འོད་གསལ་སྤྱོད་པའི་རིག་པ་འཛིན༔ བོད་ཁམས་སྐྱོབ་པའི་མེས་པོ་ཞིག༔ མདོ་ཁམས་བར་དེར་ནོར་སྐྱོང་ལོར༔ བསམ་བཞིན་སྐྱེ་བའི་རོལ་རྩེད་ཅན༔ ཡང་དག་ནང་གི་རྣལ་འབྱོར་གྱི༔ སྔོན་ནས་སྦྱངས་པའི་འཕྲོ་སད་དེ༔ ཞེས་དང་། དེ་ཚེ་དེ་ཡི་སྐལ་བ་རུ༔ དྭངས་པའི་རྩ་ཁམས་ཡེ་ཤེས་ཀྱི༔ རླུང་གིས་བསྐུལ་ཏེ་དབང་མེད་དུ༔ རྡོ་རྗེའི་གསང་ཚིག་འདི་ཡང་རྙེད༔ ཟབ་མོའི་དགོངས་གཏེར་རྡོལ་བ་ཡིན༔ ཞེས་དང་། ཞལ་གསུང་ལས། དེ་དུས་རང་ཉིད་ན་ཚོད་གཞོན༔ རླུང་རིག་དར། སེམས་རྩ་སྤྲོ་བས་གཏེར་ཆོས་ཀྱི་མིང་བཏགས་པའི་ཐོག་མ་འཇམ་དཔལ་ཐུགས་ཐིག་རྒྱུད་སྡེ་བཞིའི་སྒྲུབ་དབང་བསྐྱེད་རྫོགས་བཅས་ཡོད་པ་རིགས་བདག་ཆོས་ཀྱི་བློ་གྲོས་དང་། ཀཿཐོག་སི་ཏུ་བྱམས་ཆེན་ཆོས་ཀྱི་ཉི་མ། ཞེ་ཆེན་རྒྱལ་ཚབ་རྣམས་ལ་ཕུལ་བས་ཐོག་མའི་རྟེན་འབྱུང་དགེ་བ་བྱུང་། ཞེས་གསུངས་པ་ལྟར། རྗེ་གོང་མའི་གཟིམས་སྤྱིལ་དུ་གཟིགས་པ་ལྔ་ཡི་ཞལ་ཐང་དང་ཧེ་རུ་ཀ་འདུས་པའི་རྩ་ཐོ་མཇལ་བའི་རྐྱེན་བྱས་ཏེ། ཤྲཱི་ཧེ་རུ་ཀའི་སྙིང་ཐིག་ཅེས་པའང་རིག་ཐོག་ནས་སད། ཡང་གནས་མཆོག་པདྨ་ཤྲཱིའི་གནས་ཞལ་འབྱེད་པའི་ཚེ་མདུན་གྱི་སྲེ་འོ་མཚོ་ཞེས་པར་ཚེ་སྒྲུབ་མཛད་སྐབས་མཚོ་གཞི་དཀར་པོར་རི་མོ་ལྗང་སྔོན་གྱི་དཀྱིལ་འཁོར་གྲུ་བཞི་སྒོ་བཞི་པ་མཆོག་དམན་ཀུན་གྱིས་མཐོང་། དུས་དེར་རང་གི་སེམས་ལ་པདྨ་ཚེ་སྙིང་གི་སྒྲུབ་ཐབས་ཤར། ནུབ་གཅིག་མཚོ་རྒྱལ་ཡིན་སྙམ་པ་ཞིག་གིས་ཤོག་སེར་སྤྲད་པ་བལྟས་པའི་རྐྱེན་གྱིས་ཆོས་སྐོར་ཡོངས་རྫོགས་བབ། རྒྱལ་དབང་ཀརྨ་པ། སྨིན་གླིང་མཁན་གཅུང་། ས་སྐྱ་ཕུན་ཚོགས་ཕོ་བྲང་གདུང་སྲས་རྣམས་ལ་ཕུལ་ཞིང་རང་གིས་ཀྱང་ཉམས་ལེན་བྱས་པས་ཞལ་དྲོ་བ་ལྟ་བུར་གྱུར་སྙམ། གོང་ས་སྐྱབས་མགོན་ཆེན་པོ་མཆོག་ལ་ཕྱི་ནང་གསང་བ་དྲིལ་སྒྲུབ་ཀྱི་དབང་ལུང་ཕུལ་བས་དགྱེས་པའི་བཀའ་བསྩལ། ཞེས་གསུངས། རྗེ་ཉིད་ཀྱི་དགོངས་གཏེར་གཙོ་བོ་ཐུགས་ཐིག་རང་བྱུང་པདྨའི་སྙིང་ཐིག་དང་། དཔལ་ཆེན་ཡེ་ཤེས་མགོན་པོའི་ཤོག་དྲིལ་དངོས་སུ་ཕུལ་བའི་ཟབ་གཏེར་གཉགས་ལུགས་རྡོ་རྗེ་ཕུར་པ་ཐལ་འབྱིན་རྣམ་བཞིའི་དགོངས་པ་དང་འབྲེལ་བའི་སྒྲུབ་ཐབས་སོགས་ཟབ་མོ་གཏེར་གྱི་ཕྱོགས་དང་། དག་སྣང་ཆོས་སྡེ་ཐུན་མིན་དང་། ཐུན་མོང་གི་བཀའ་རྩོམ་བཅས་གླེགས་བམ་ཉེར་ལྔ་ལས་བརྒལ་བ་བཞུགས་སོ། །

ཟབ་ཆོས་བདུད་རྩི་ཞེས་པའི་སློབ་ཚོགས་དང་ཕན་ཚུན་ཆོས་ཀྱི་བདུད་རྩི་གནང་རེས་མཛད་པས། ས་དགེ་བཀའ་རྙིང་གི་གྲུབ་མཐའ་འཛིན་པའི་སྐྱེས་བུ་མཁན་སྤྲུལ་དགེ་སློབ་བསམ་གྱིས་མི་ཁྱབ་པས་འཛམ་གླིང་ཐ་གྲུ་ཀུན་ཏུ་ཁྱབ་པ་བྱུང་། དུས་དང་གནས་སྐབས་རྣམས་སུ་དབང་ལུང་ཁྲིད་ཀྱི་ཆོས་འཁོར་བསྐོར་བས་དུས་འདའ་བ་ལས་སོས་དལ་དུ་སྐད་ཅིག་ཙམ་ཡང་མི་བཞུགས་ཤིང་། སྔ་ཕྱིར་འཆད་སྤེལ་གནང་བའི་ཆོས་ཀྱི་རྣམ་གྲངས་རགས་ཙམ་སྨོས་ན་རྒྱལ་བཀའ་རིན་པོ་ཆེ་ལན་གཉིས། རྙིང་རྒྱུད་ལན་འགའ། རྙིང་མ་བཀའ་མ་ལན་གསུམ། རིན་ཆེན་གཏེར་མཛོད་ལན་ལྔ། གདམས་ངག་མཛོད་ལན་བཞི། སྒྲུབ་ཐབས་ཀུན་བཏུས་ལན་གསུམ། མཛོད་བདུན། རང་གྲོལ་སྐོར་གསུམ། ངལ་གསོ་སྐོར་གསུམ་ལན་འགའ། འཇིགས་གླིང་པོད་དགུ་ལན་འགའ། རྒྱ་ཆེན་མཛོད་ལན་གཅིག དཔལ་སྤྲུལ་བཀའ་འབུམ་ལན་འགའ། མི་ཕམ་བཀའ་འབུམ་ལན་གསུམ། མཁྱེན་བརྩེའི་བཀའ་འབུམ་ལན་གཅིག བཀའ་རྒྱུད་སྔགས་མཛོད་ལན་གསུམ། ཤེས་བྱ་མཛོད་ལན་འགའ། པད་གླིང་དང་མཆོག་གླིང་གཏེར་གསར་ལན་འགའ། རྒྱལ་ཚབ་བཀའ་འབུམ་ལན་གཅིག གསང་སྙིང་བཤད་ཁྲིད་ཚར་དྲུག་ཅུ་ལྷག  སྙིང་ཐིག་ཡ་བཞི་དང་ཀློང་སྙིང་རྩ་པོད་ཚར་ཉི་ཤུ་ལྷག བཀའ་བརྒྱད་དབང་ཆེན་ལན་འགའ། ཡོན་ཏན་མཛོད་བཤད་ཁྲིད་ལན་མང་སོགས་འཆད་སྤེལ་རྒྱ་ཆེར་བསྐྱངས། བྱ་བ་ལས་ཀྱི་འཁོར་ལོ་སྐུ་གསུང་ཐུགས་ཀྱི་རྟེན་དང་བརྟེན་པ་རྒྱ་ཆེན་བཞེངས་སྐྲུན་མཛད་པའི་ཚུལ་ནི། བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འདབས་སུ་ཞེ་ཆེན་བསྟན་གཉིས་དར་རྒྱས་གླིང་རྟེན་དང་བརྟེན་པར་བཅས་པ་གསར་བཞེངས་དང་། འབྲུག་ཡུལ་དུ་ཞེ་ཆེན་ཨོ་རྒྱན་ཆོས་རྫོང་ཞེས་པའི་སྒྲུབ་སྡེ་གསར་དུ་བཏབ། དེ་བཞིན་བོད་ཡུལ་ཞེ་ཆེན་བསྟན་དགོན་སླར་གསོ་ལ་གང་ཅིའི་རྒྱབ་སྐྱོར་ཐུགས་ཁུར་དཔག་མེད་མཛད་པས་མཚོན། ཕྱི་མའི་དུས་འདིར་དཔལ་ཞེ་ཆེན་བསྟན་པ་གཞིར་བཞེངས་སུ་བསླང་པར་མཛད་པས་གདན་ས་འདི་ལ་རྗེ་ཉིད་བཀའ་དྲིན་ཁྱད་པར་དུ་ཆེ་བ་ཉིད་དོ། །དེ་བཞིན་སྔ་ཕྱིར་བོད་ཡུལ་དུ་ལན་གསུམ་ཕེབས་ནས་བསམ་ཡས་སོགས་དབུས་གཙང་ཁམས་གསུམ་གྱི་དགོན་སྡེ་བརྒྱ་ཕྲག་དུ་མར་ཞབས་ཀྱིས་བཅགས་ཤིང་། ཉམས་གསོ་དང་རབ་གནས་བྱིན་རླབས་མཛད། མཐར་དགུང་གྲངས་བརྒྱད་བཅུ་གྱ་གཉིས་པ་ལྕགས་ལུག་ཟླ་བ་བརྒྱད་པར་འབྲུག་ཡུལ་དུ་སྙུན་ཚུལ་བཞེས། ཚེས་བཅུ་དྲུག་ལ་ཕྱག་བྲིས་གནང་བར་ཚེས་བཅུ་དགུ་ལས་མི་སྡོད་ཅེས་བསྩལ་ཅིང་སྐབས་དེར་བཞེངས་ནས་ཤར་ཕྱོགས་སུ་གོམ་འགའ་འདོར་བར་མཛད། སྒྲུབ་བུམ་ལས་དབང་ལེན་མཛད་ཅིང་ཞབས་ཞུ་པ་རྣམས་ལ་གསོལ་ཀ་ཐོན་གསུངས་ནས་ཆོས་སྐྱོང་གི་རྟེན་གཏོར་རྣམས་གཤེགས་གསོལ་མཛད། ཚེས་བཅུ་དགུའི་མཚན་གུང་ཡོལ་སྐབས་ཞིང་འདིའི་གདུལ་བྱ་རེ་ཞིག་རྫོགས་པའི་ཚུལ་གྱིས་སྐུ་ཀྲོང་ངེ་ཞབས་གཉིས་རྒྱལ་པོ་རོལ་སྟབས། དབུ་གཡས་སུ་ཅུང་ཟད་ཕབ་པ་སེང་གེ་འགྱིང་ཚུལ། ཕྱག་གཡས་སེམས་ཉིད་ངལ་གསོ། གཡོན་ས་གནོན་གྱི་ཕྱག་རྒྱའི་རྣམ་པ། སྐུའི་གཟི་མདངས་ལྷག་པར་རྒྱས་བཞིན་ནང་གསལ་ཀ་དག་ཆོས་སྐུའི་དབྱིངས་སུ་མངོན་པར་གཤེགས་པའི་ཚུལ་བསྟན། གཤེགས་རྗེས་ཀྱི་བྱ་བ་རྣམས་ཞལ་སློབ་གཙོ་བོ་འཁྲུལ་ཞིག་རིན་པོ་ཆེ་སོགས་ཀྱི་རྗེ་ཉིད་ཀྱི་ཞལ་ཆེམས་བཞིན་སྤ་གྲོ་སྟག་ཚང་མདུན་གདན་ས་ཐེག་མཆོག་དགའ་ཚལ་དུ་ཞུགས་འབུལ་ཞུས་པས་ནམ་མཁའ་དྭངས་ཤིང་སླད་བྱེད་ཀྱི་སྐྱོན་དང་བྲལ་བ་སོགས་ཕྱི་ནང་གི་མཚན་མ་ངོ་མཚར་མཐའ་ཡས་པ་བྱུང་ངོ་། ། ། །(རྩོམ་ཡིག་འདི་ནི་ཁམས་སྤྲུལ་བསོད་ནམས་དོན་གྲུབ་ཀྱིས་བརྩམས་པའི་སྔ་འགྱུར་རྙིང་མའི་བྱུང་བ་མདོ་ཙམ་བརྗོད་པ་ཞེས་པའི་དེབ་ལས་ཁོལ་དུ་ཕྱུང་བ་ཡིན།)

47.2K