༄༅། །སྤྲུལ་པའི་གཏེར་ཆེན་འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་རྣམ་ཐར་གསོལ་འདེབས་དད་གསུམ་ས་བོན་ཞེས་བྱ་བ་བཞུགས་སོ། །

རྣམ་ཀུན་མཆོག་ལྡན་བདེ་ཆེན་རྡོ་རྗེའི་གར།  །ཚངས་པ་རྔ་སྒྲ་འོད་གསལ་སྙིང་པོའི་ཞིང་། །རབ་འབྱམས་རྒྱ་མཚོར་སྤྲོ་བསྡུ་བྱེད་པོ་ནི། །ཁྱབ་བདག་དཔལ་ལྡན་བླ་མར་གསོལ་བ་འདེབས། །ཤཱཀྱའི་བསྟན་ལ་སྤྲུལ་པའི་དགྲ་བཅོམ་དང་། །པཎ་གྲུབ་རིག་འཛིན་ཐ་མལ་སྦས་ཚུལ་སོགས། །མ་ངེས་འཕྲུལ་གྱི་རོལ་མོ་རིམ་ཅིག་ཅར།  །དུས་གསུམ་ཀུན་ཏུ་སྟོན་ལ་གསོལ་བ་འདེབས། །ཁྱད་པར་པད་འབྱུང་རྗེ་དང་འདུད་འཇོམས་པའི། །འཁྲུལ་མེད་འབྱུང་འགྱུར་ལུང་བསྟན་དོན་མངོན་གྱུར།  །སྦས་ཡུལ་རྒྱལ་པོ་པདྨ་བཀོད་ཞིང་དུ། །བཙད་པོའི་རིགས་སུ་བལྟམས་ལ་གསོལ་བ་འདེབས།  །གཞོན་ནུ་ཉིད་ནས་བཟང་པོའི་བག་ཆགས་སད།   །གུ་རུའི་ཞལ་གཟིགས་འགྲོ་འདུལ་གླིང་པ་ཞེས།  །མཚན་གྱིས་དབང་བསྐུར་ཟབ་གཏེར་བདག་པོ་རུ།   །ལུང་བསྟན་དབུགས་འབྱུང་ཐོབ་ལ་གསོལ་བ་འདེབས།   །གྲུབ་མཆོག་འགྱུར་མེད་ངེས་དོན་དབང་པོ་སོགས།   །བཤེས་གཉེན་མང་བསྟེན་སྨིན་གྲོལ་རྒྱབ་བརྟེན་བཅས།   །བུམ་པ་གང་བྱོས་གསན་བསམ་སྒོམ་པ་ཡིས།  །ཐུགས་རྒྱུད་ཡོངས་སུ་ཕྱུག་ལ་གསོབ་བ་འདེབས།   །རྒྱུ་འབྲས་ཐེག་པའི་ལྟ་སྒོམ་གྲུབ་མཐའི་གནད།   །མ་འདྲེས་འབྱེད་ལ་གཞན་དྲིང་མི་འཇོག་པའི།  །སྐྱེས་སྟོབས་ཤེས་རབ་ཀློང་རྡོལ་ཟླ་བྲལ་གྱི།   །མཁས་པའི་དབང་པོར་བསྔགས་ལ་གསོལ་བ་འདེབས།   །ཞི་བདེ་དམན་པའི་མཐའ་ལ་མི་ཞན་པར།    །ཕྱིན་དྲུག་བསྡུ་དངོས་བཞི་ཡིས་ཚད་མེད་འགྲོ།     །མངོན་མཐོ་ངེས་ལེགས་བྱང་ཆུབ་གོ་འཕང་ལ།    །བཀྲི་བའི་སེམས་དཔའ་ཆེན་པོར་གསོལ་བ་འདེབས།   །དྲང་དོན་དཀའ་ཐུབ་ངལ་བས་དུབ་མིན་པར།   །བདེ་མྱུར་ཨ་ཏི་བླ་མེད་གསང་ལམ་ནས།    །གྲུབ་པའི་ས་མཐོར་གཤེགས་པའི་མངོན་རྟོགས་ཀྱི།    །ཡོན་ཏན་ཅིག་ཅར་འབར་ལ་གསོལ་བ་འདེབས།    །ཡེ་ཤེས་མཁའ་འགྲོས་ཁ་བྱང་དངོས་སུ་སྤྲད།   །ཆོས་སྐྱོང་སྲུང་མས་བུ་བཞིན་མེལ་ཚེ་མཛད།   །འབར་བ་གསུམ་དང་འདུ་བ་རྣམ་གསུམ་དབང་། །ཀུན་གྱིས་གཙུག་ཏུ་བཀུར་ལ་གསོལ་བ་འདེབས།  །དུས་ཀྱི་མཐར་ཡང་སྔ་འགྱུར་བཤད་སྒྲུབ་བསྟན།  །མི་ནུབ་ཕྱོགས་བརྒྱར་སྤེལ་བའི་ཐུགས་བསྐྱེད་ཀྱིས།  །སྦས་ལྗོངས་ཨེ་ཝཾ་བདེ་ཆེན་ཆོས་འཁོར་སོགས། །དགེ་འདུན་འདུས་སྡེ་བཏབ་ལ་གསོལ་བ་འདེབས། །དོན་ཆེན་ལ་དགོངས་རང་སྐལ་ས་ཡི་གཏེར།  །འདོན་པའི་རྩོལ་བཏང་བཀའ་རྙིང་བསྟན་སྐྱོང་ཕྱིར། །མཛོད་ཆེན་ལྔ་སོགས་བརྒྱུད་སྲོལ་ཀུན་འདུས་ཀྱི།  །བསྟན་པའི་རྒྱལ་མཚན་བསྒྲེངས་ལ་གསོལ་བ་འདེབས།  །རྩོད་དུས་སྙིགས་མའི་སྐྱེ་འགྲོའི་མཆོད་སྡོང་དུ།  །རྔ་ཡབ་དཔལ་རིའི་ཕོ་བྲང་རྟེན་བརྟེན་པ།  །སྒྲུབ་པའི་སྡེ་བཅས་སྔོན་མེད་རབ་བསྐྲུན་པས།  །བསྟན་འགྲོའི་རྒུད་སེལ་མཛད་ལ་གསོལ་བ་འདེབས།  །གཞན་ཡང་གླེགས་བམ་ཕྱི་མོས་ལེགས་མཚོན་པའི།  །རྟེན་གསུམ་རྣམ་མང་བསྟན་པའི་བཙས་སུ་བཞེངས།  །བོད་ཁམས་ཕན་བདེའི་རྩ་ལག་གཉེན་གཅིག་པུར།  །པདྨས་མངགས་པའི་ཕོ་ཉར་གསོལ་བ་འདེབས།  །ལྷོ་འབྲུག་བལ་བོད་མདོ་ཁམས་རྒྱ་དཀར་ནག  །མ་ལུས་ཞབས་བཅགས་ཆོས་དང་དམ་རྫས་སོགས།  །ཞལ་མཇལ་གསུང་ཐོས་གཏམ་གྱིས་འབྲེལ་བ་ཚུན།  །པདྨ་འོད་དུ་འཁྲིད་ལ་གསོལ་བ་འདེབས།  །སྐྱེས་ཆེན་རྒྱལ་བློན་དྲྭ་མའི་ཚོགས་རྣམས་ཀྱིས།  །ཞབས་ལ་བཏུད་ཀྱང་ཁེངས་དྲེགས་མི་མངའ་ཞིང་།  །ཆོས་བརྒྱད་རོ་སྙོམས་ཐ་མལ་སྦས་ཚུལ་གྱི།  །བརྟུལ་ཞུགས་ཁོ་ན་སྐྱོང་ལ་གསོལ་བ་འདེབས།  །ཞིང་ཁམས་བགྲོད་དང་བླ་མ་ལྷས་རྗེས་བཟུང་།  །མཁའ་འགྲོས་ལུང་བསྟན་དག་སྣང་འབྱམས་ཀླས་གཟིགས།  །དེ་ལྟ་ནའང་གསང་བ་བསྲུང་ལ་དགྱེས།  །བདག་བསྟོད་མཆོག་འཛིན་སྤངས་ལ་གསོལ་བ་འདེབས།  །དུས་བབས་དགོངས་གཏེར་མཁའ་འགྲོའི་སྙིང་ཁྲག་བཅུད།  །འདུས་བསལ་སྙིང་པོ་གང་འབྲེལ་འཚེང་བའི་ཆོས།  །གཏན་ལ་ཕབ་ཅིང་ལས་ཅན་བུ་ལ་སྩལ།  །གཏེར་འབྱིན་ཆོས་ཀྱི་རྒྱལ་པོར་གསོལ་བ་འདེབས།  །བླ་རྫོགས་ཐུགས་གསུམ་བཀའ་དགོངས་ཕུར་པ་སོགས།  །གཏེར་རྙིང་དུ་མ་འཁྲུགས་བསྡེབས་གབ་ཕྱུངས་ནས།  །ཀུན་གྱིས་འཇུག་བདེའི་ཆོག་ཁྲིགས་མན་ངག་གིས།  །གསང་བསྟན་གསལ་བར་མཛད་ལ་གསོལ་བ་འདེབས། །མ་འོངས་ཀླ་ཀློའི་དཔུང་འཇོམས་རིགས་ལྡན་སྐུར།  །བཞེངས་ནས་འབྲས་བུའི་བསྟན་པ་སྤེལ་བའི་མཐར།  །རྣམ་འདྲེན་སྟོང་རྩའི་ཕྲིན་ལས་དང་མཉམ་པའི།  །སངས་རྒྱས་མོས་པར་གྱུར་ལ་གསོལ་བ་འདེབས། །མདོར་ན་མཁྱེན་རྩལ་ནུས་པའི་རྩལ་འབར་བས།  །སྲིད་ན་རྩོད་མེད་འགྲན་བྲལ་སྤྲུལ་པའི་སྐུར།  །ཡོངས་སུ་གྲགས་པ་དོན་ལྡན་མགོན་ཁྱོད་ཀྱི།  །གསང་གསུམ་ཡོན་ཏན་དྲན་པས་གསོལ་བ་འདེབས།  །མཚུངས་མེད་རྗེ་བཙུན་བླ་མའི་རྣམ་པར་ཐར།  །རྗེས་སུ་དྲན་པས་གསོལ་བ་བཏབ་པའི་མཐུས།  །སྐྱེ་ནས་སྐྱེ་བར་ཁྱོད་ཞབས་འབྲལ་མེད་བསྙེན།  །དོན་བརྒྱུད་དགོངས་པ་སྙིང་ལ་འཕོ་བར་ཤོག  །མཐའ་བྲལ་རིག་སྟོང་་གཉུག་མའི་ལྟ་བ་རྟོགས། །འོད་གསལ་ཁོར་ཡུག་སྒོམ་པ་ཚད་དུ་འཁྱོལ། །སྐྱེས་གྲོལ་སྤྱོད་པས་བོགས་དབྱུང་གདིང་འཆོས་ནས།  །ཚེ་གཅིག་ཡེ་ཤེས་བླ་མར་སངས་རྒྱས་ཤོག  །ཅེས་པའང་མཆེད་གྲོགས་རྣལ་འབྱོར་དམ་པ་རིག་བཟང་རྡོ་རྗེས་ནན་བསྐུལ་མ་ལྡོག་པར་གར་སྐྱིད་ཀྱི་སྤྲང་འཁྱམས་སྙོམས་ལས་པ་སངས་རྒྱས་རྡོ་རྗེས་རྗེ་བླ་མ་མཆོག་གི་གསང་བ་གསུམ་གྱི་ཡོན་ཏན་རང་ཉིད་ཀྱིས་མཐོང་ཚོད་དང་གཏེར་ལུང་སྔ་ཕྱི་ལ་ཁུངས་སུ་བྱས་ནས་སྒྲོ་སྐུར་བྲལ་བར་དཔལ་ལྕགས་པོ་རིའི་ཆོས་གྲྭར་སྦྱར་བ་དགེ་ལེགས་འཕེལ།  །སརྦ་མངྒ་ལཾ། །

རྩོམ་སྒྲིག་པ། གསང་སྔགས་ཐེག་མཆོག་རྡོ་རྗེ།

47.2K