༄༅། །ཀརྨ་པ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༥

ཡང་རྒྱུད་དེ་དག་བརྩམས་རྒྱུད་མ་ཡིན་པའི་སྒྲུབ་བྱེད་སྨྲ་ན་ཡང་། རྒྱུད་རང་གི་ངོ་བོས་ཀྱང་རྒྱུད་ཀྱི་མཚན་ཉིད་མི་ལྡན་ཏེ། རྒྱུད་ཡིན་ན་ཐམས་ཅད་མཁྱེན་པ་སངས་རྒྱས་ཀྱི་གསུང་ཡིན་པས། སྒྲ་སྐྱོན་དང་། དོན་སྐྱོན་དང་། འགལ་སྐྱོན་དང་། མ་འབྲེལ་བའི་སྐྱོན་སོགས་འབྱུང་མི་སྲིད་ལ། ཁྱོད་ཀྱི་རྒྱུད་ཀྱི་དེ་ཉིད་ཀྱི་གཞུང་དོན་ལེགས་པར་བརྟགས་ན་སྐྱོན་དེ་དག་དང་ལྡན་པ་ཁོ་ན་འདུག་ཀྱང་ཡི་གེ་མང་པོར་འགྲོ་ཕྱིར་རེ་རེ་ནས་བྲི་མ་ནུས། བརྡའ་ཙམ་མཚོན་ན་ཀླད་དོན་མཚན་གྱི་སྐབས་ན་ཡང་། ཀུན་འདུས་རིག་པའི་མདོ་ཞེས་བྱ་བའི་རྒྱུད། ཅེས་དང་། དུར་ཁྲོད་ཁུ་བྱུག་རོལ་པའི་མདོ་ཞེས་བྱ་བའི་རྒྱུད། ཅེས་སོགས་འགལ་དང་མ་འབྲེལ་བའི་སྐྱོན་ཅན་གྱི་མིང་ཆགས་པ་དང་། གཏེར་མར་གྲགས་པའི་རྒྱུད་འགའ་ཞིག་ན། མན་ངག་སྙིང་གི་དགོངས་པ་རྒྱལ་བའི་བཀའ་ཞེས་བྱ་བའི་རྒྱུད། ཅེས་རྒྱལ་བའི་བཀའ་མིན་ཞེས་གླེང་དོགས་ཀྱི་མཐའ་འགེགས་པའི་ཚིག་མིང་ལ་བཀོད་པ་དང་། དེར་མ་ཟད་རྒྱུད་རྣམས་མཐའ་དྲུག་ཚུལ་བཞིས་རྒྱས་བཏབ་པའི་དོན། རྒྱ་བོད་མཁས་པའི་འགྲེལ་དེ་དག་གི་རྣམ་པར་དབྱེ་བ་བྱས་པ་ན། སྨིན་པར་བྱེད་པ་དབང་ནས་གྲོལ་བར་བྱེད་པ་དབང་དོན་ཉམས་སུ་བླང་བའི་གདམས་པའི་བར་ལམ་ཆ་ལག་དང་བཅས་པ་རྫོགས་པར་སྟོན་པ་ཞིག་རྒྱུད་རྣམ་དག་གི་མཚན་ཉིད་ཡིན་པ་ལ། རྙིང་མའི་རྒྱུད་དེར་དཀྱིལ་ཆོག་གྱེར་ཆོག་སོགས་ཀྱང་རྒྱུད་ཉིད་ཀྱི་སྟོན་པའི་གསལ་གསལ་མོར་བྱེད་པ་ཞིག་ལས་རྒྱུད་རྣམ་དག་གི་རྣམ་པ་འདྲ་བ་ཡང་ལྟ་སྨོས་ཀྱང་ཅི་དགོས་ཏེ། གང་ཟག་མཁས་པས་བརྩམས་པའི་ཚིག་སྦྱོར་ཙམ་ཡང་མི་སྣང་བའི་ཕྱིར་དང་། རྒྱུད་གཞན་རྣམས་ཀྱི་གཞུང་གི་རྫོགས་ཚིག་ཏུ་ཞེས་བྱ་བའི་རྒྱུད་རྫོགས་སོ་ཞེས་བཤད་འོང་བ་ལ། རྙིང་མ་ལ་ལར་ཞེས་བྱ་བ་འཁོར་བ་མ་སྟོང་གི་བར་དུ་མ་རྫོགས་སོ། །ཞེས་རྣལ་འབྱོར་པས་ལྟ་བ་ལ་རྒྱབ་གཡར་ཏེ་རྩིང་ཆོས་སུ་སྨྲ་བ་ཁྱད་ཆོས་སུ་འོང་རེ་བཀོད་པ་ལོག་སྐྱོན་ཅན་གྱི་ཚིག་སྦྱོར་འདི་དག་ལུང་རིགས་ཀྱི་ལམ་དུ་གཞལ་བ་ན་རྒྱུད་ཀྱི་མཚན་ཉིད་གཏན་ནས་མེད་པས་བརྩམས་རྒྱུད་དུ་རིག་པར་བྱའོ། །འདི་དག་བྱུང་བའི་དུས་ཀྱང་འགའ་ཞིག་ནི་གོང་དུ་བསྟན་པ་ལྟར་ཁྲི་སྲོང་གི་དུས་ན་བྱུང་ལ། ཕལ་ཆེར་ནི་དར་མས་བསྟན་པ་བསྣུབས་རྗེས་མི་དྲུག་ལ་སོགས་ས་མཐར་འཁྱར་བ་ན། དབུས་གཙང་འདིར་རབ་ཏུ་བྱུང་བ་ནི་མེད། ཁྱིམ་པའི་ཆ་བྱད་ཀྱི་སྔགས་པ་རྣམས་བདེ་བར་རྒྱུ་སྟེ་དེ་དག་གི་ཉིན་རེ་བཞིན་ཁ་ཟེར་བ་ན་ཡང་། དེ་རིང་ཉི་མ་རིང་བར་སྣང་། ཇོ་མོ་ཆང་ཞིག་གནང་དང་། ཕ་ཇོས་རྒྱུད་ཅིག་རྩོམ་པ་ལགས་ཟེར་བར་གྲགས་པས་དུས་དེར་བརྩམས་པ་ཡིན་ནོ། །ཞེས་གསུངས་པ་ལ།

འདིའི་རྒྱུད་རྣམས་ཕུར་པ་ལ་སོགས་པ་ཕྱོགས་མ་ཧཱ་ཡོ་གར་གཏོགས་པ་རྣམས་དང་། ཕྱི་སེམས་སྡེ། ནང་ཀློང་སྡེ། གསང་བ་མན་ངག་གི་སྡེ་གསུམ་སྟེ་བཞིར་སྣང་བ་ལས། མ་ཧཱ་ཡོ་ག་དང་། སེམས་སྡེ་དང་། ཀློང་སྡེར་གཏོགས་པ་རྣམས་ནི་ཚིག་ཟབ་ལ་འབྲེལ་ཆགས་པ་སྡེབ་སྦྱོར་ལེགས་པར་གསུངས་པས་ན་དོན་བཟང་པོ་ཚིག་འབྲུ་བཟང་པོ་ཤ་སྟག་ཡོད་པས་མི་ལེགས་པའི་སྐྱོན་གང་ཡང་མེད། མན་ངག་གི་སྡེ་རྣམས་ནི་སྟོན་པས་གོ་བདེ་བ་མན་ངག་གི་ཚུལ་དུ་བཤད་པས་རྒྱུད་ཉིད་ཐོས་པའམ་བལྟས་པ་ཁོ་ནས་དོན་བདེ་བླག་ཏུ་རྟོགས་པ་ཡིན་ལ། དེ་དག་གི་དགོངས་འགྲེལ་མཁན་པོ་ཨུ་རྒྱན་ཆེན་པོ་དང་། བི་མཱ་ལ་དང་། བཻ་རོ་ཙ་ན་ལ་སོགས་པ་མཁས་པ་འགྲན་ཟླ་མ་མཆིས་པ་རྣམས་ཀྱིས་ཀྱང་སྡེབ་སྦྱོར་སྤངས་ཏེ་ལྷུག་པ་གོ་བདེ་བ་ཉིད་དུ་བཀྲལ་བ་ཡིན་ཏེ། དེའི་ཚུལ་ཡང་། པཎ་ཆེན་བི་མཱ་ལའི་མཚན་མཚན་བརྗོད་ཀྱི་འགྲེལ་བ་ལས། ཆོས་སྐད་དབྱིངས་ལ་མ་བསྟེན་བོད་ཀྱི་མིས། །གོ་བ་བདེ་ཕྱིར་སོ་སོའི་སྐད་ཀྱིས་བཀྲོལ། །དེ་ཕྱིར་མཁས་པས་ཚིག་སྐྱོན་གདགས་མི་རིགས། །འོན་ཀྱང་རྒྱལ་བའི་ལུང་ལ་སྐུར་འདེབས་ན། །བདག་འདྲའི་གཞུང་ལ་ཅི་ཕྱིར་སྨད་མི་རིགས། །ཞེས་གསུངས་ཤིང་། གཞན་ཡང་ཚིག་སྡེབ་སྦྱོར་ལེགས་མི་ལེགས་དང་སྒྲ་བཟང་ངན་ལ་རྟོན་པར་མ་གསུངས་ཏེ། བདེ་མཆོག་སྟོད་འགྲེལ་དོན་ལས། དོན་ལ་རྟོན་པར་བྱ་ཡི་ཚིག་ལ་རྟོན་པར་བྱ་བ་མ་ཡིན་པ་དང་། ངེས་དོན་ལ་རྟོན་པར་བྱ་ཡི་དྲང་དོན་ལ་རྟོན་པར་བྱ་བ་མ་ཡིན་པ་དང་། ཡེ་ཤེས་ལ་རྟོན་པར་བྱ་ཡི་རྣམ་ཤེས་ལ་རྟོན་པར་བྱ་བ་མ་ཡིན་པ་དང་། ཆོས་ལ་རྟོན་པར་བྱ་ཡི་གང་ཟག་ལ་བརྟོན་པར་བྱ་བ་མ་ཡིན་པའོ། །བཅོམ་ལྡན་འདས་ཀྱི་གསུང་འདིའི་ཕྱིར། ཚིག་འབྲུ་ལ་རབ་ཏུ་རྟོན་པ་ནི་ཐེག་པ་གང་དུ་ཡང་བཅོམ་ལྡན་འདས་ཀྱིས་མ་གསུངས་སོ། །ཞེས་དང་། དྲི་མེད་འོད་ལས། ཀུན་མཁྱེན་ལམ་དོན་གཉེར་པ་རྣམས་ལ་སྒྲ་དང་སྒྲ་མིན་རྣམ་དཔྱོད་ཆེན་པོ་མེད། །སྣ་ཚོགས་ཡུལ་སྐད་ངན་པ་ཡིས་ཀྱང་ཆེན་པོ་རྣམས་ཀྱི་ལམ་ལ་རྟག་ཏུ་འཇུག།།སེམས་ཅན་རྣམས་ཀྱི་མོས་པའི་སེམས་ཀྱི་དབང་གི་ཐམས་ཅད་མཁྱེན་པའི་གསུང་མཆོག་ལ། །བརྡའ་སྤྲོད་པ་ལ་ལྷ་ཀླུས་བཀོད་པའི་སྒྲ་སོགས་རྩོད་པ་དོན་གཉེར་རྣམས་ཀྱི་དེ་ལས་གཞན། །སྒྲ་ཉམས་པ་དང་ཡུལ་གྱི་སྐད་ལས་ཀྱང་། །རྣལ་འབྱོར་ལྡན་པས་དོན་ནི་འཛིན་བྱེད་དེ། །ཆུ་ལ་འོ་མ་ངེས་པར་ཞུགས་པ་དེ། །ངང་པས་རབ་ཏུ་ཕྱུང་ནས་འཐུང་བར་བྱེད། །དོན་དམ་དེ་ཉིད་ཡུལ་ལ་རྟག་ཏུ་ནི། །ཆེན་པོ་རྣམ་དག་ཚིག་ལ་རྟོན་པ་མིན། །ཡུལ་གྱི་མིང་རྣམས་ཀྱི་ནི་དོན་ཤེས་ན། །བསྟན་བཅོས་སྒྲ་དག་གིས་ནི་ཅི་ཞིག་བྱ། །གང་ཞིག་ཟུར་ཆག་སྒྲ་དང་སྒྲར་གྱུར་པ། །བརྗོད་པ་དེ་ཉིད་ཡེ་ཤེས་མ་ཡིན་ཞིང་། །གང་ཞིག་འགྲོ་བ་དག་ལ་ཉི་ཚེ་བ། །དེ་ནི་ཐམས་ཅད་མཁྱེན་པའི་གསུང་མ་ཡིན། །ཞེས་པས། ཚིག་མ་ལེགས་པ་དང་། འགལ་བ་དང་མ་འབྲེལ་བ་དང་བཟློས་པ་དང་མ་ཚང་བ་སོགས་མེད་པས་སངས་རྒྱས་ཀྱི་བཀའ་ཡིན་པར་མ་ངེས་ཏེ། དེ་ལྟ་ན་སྙན་ངག་དང་སྡེབ་སྦྱོར་ལ་སོགས་པའི་བསྟན་བཅོས་དང་། ཚངས་པ་དང་ཁྱབ་འཇུག་དང་དབང་ཕྱུག་ལ་སོགས་པས་བྱས་པའི་མུ་སྟེགས་བྱེད་ཀྱི་གཞུང་རྣམས་དང་། སྒྲ་ཚད་ལ་མཁས་པའི་མུ་སྟེགས་རྣམས་ཀྱིས་བྱས་པའི་བསྟན་བཅོས་རྣམས་ཚིག་བཟང་ཞིང་འགལ་བ་དང་མ་འབྲེལ་བ་ལ་སོགས་པའི་སྐྱོན་གང་ཡང་མེད་པས། དེ་དག་ཐམས་ཅད་མཁྱེན་པ་སངས་རྒྱས་ཀྱི་གསུང་དུ་འདོད་པ་ལགས་སམ། དེའི་ཕྱིར་དྲི་མེད་འོད་ལས། སྒྲ་བཟང་པོ་སྨྲ་བ་རྣམས་ཀྱི་སྒྲ་བཟང་པོ་ལ་ཞེན་པ་སྤངས་པའི་སླད་དུ་དོན་ལ་རྟོན་པ་ཉིད་ལ་བརྟེན་ནས་ཚིགས་སུ་བཅད་པ་ཁ་ཅིག་སྒྲ་ཉམས་པ་དང་། ཁ་ཅིག་གཅོད་མཚམས་ཉམས་པ་དང་། ཁ་ཅིག་ཏུ་རྣམ་དབྱེ་མེད་པའི་ཚིག་དང་། ཁ་ཅིག་དབྱངས་དང་གསལ་བྱེད་ཕྱིས་པ་དང་། ཁ་ཅིག་ཏུ་རིང་པོ་ལ་ཐུང་ངུ་དང་། ཐུང་ངུ་ལ་རིང་པོ་དང་། ཁ་ཅིག་ཏུ་ལྔ་པའི་དོན་ལ་བདུན་པ་དང་། བཞི་པའི་དོན་ལ་དྲུག་པ་དང་། གཞན་གྱི་ཚིག་ལ་བདག་ཉིད་ཀྱི་ཚིག་དང་། བདག་ཉིད་ཀྱི་ཚིག་ལ་གཞན་གྱི་ཚིག་དང་། ཁ་ཅིག་ཏུ་གཅིག་གི་ཚིག་ལ་མང་པོའི་ཚིག་དང་། མང་པོ་ལ་གཅིག་གི་ཚིག་དང་། ཁ་ཅིག་ཏུ་ཕོའི་རྟགས་ཅན་ལ་མ་ནིང་གི་རྟགས་དང་། མ་ནིང་ལ་མོའི་རྟགས་དང་། ཁ་ཅིག་ཏུ་རྐན་ལས་བྱུང་བ་ལ་སོ་དང་སྤྱི་བོ་ལས་བྱུང་བ་དང་། ཁ་ཅིག་ཏུ་སྤྱི་བོ་ལས་བྱུང་བ་ལ་སོ་དང་རྐན་ལས་བྱུང་བ་སྟེ། གཞན་ཡང་རྗེས་སུ་རྟོགས་པར་བྱའོ། །ཞེས་དང་། སྒྲ་བཟང་པོའི་མངོན་པའི་ང་རྒྱལ་ཉམས་པར་བྱ་བའི་སླད་དུ་བདག་གི་དོན་ལ་རྟོན་པ་ཉིད་ལ་བརྟེན་ཏེ་བྲི་བར་བྱའོ། །ཞེས་གསུངས་པས་སྒྲ་སྐྱོན་དང་འགལ་སྐྱོན་དང་མ་འབྲེལ་བ་སོགས་བྱུང་ཡང་དོན་ལ་སྐྱོན་དང་ལྡན་པ་མ་ཡིན་ནོ། །མདོ་ཞེས་བྱ་བའི་རྒྱུད་ཅེས་པ། གསང་སྔགས་ནི་མདོ་སྡེའི་སྡེ་སྣོད་དུ་བཤད་པ་ཡིན་ཏེ། དཔུང་བཟང་ལས། གསང་སྔགས་མདོ་སྡེའི་ཚུལ་དུ་བཤད་ཀྱི་ཉོན། །ཞེས་པ་དང་། དེ་ཉིད་འདུས་པའི་རྒྱུད་ལས། མདོ་སྡེ་འདི་ནི་ལེགས་པར་བཤད། །ཅེས་དང་། རྡོ་རྗེ་རྣམ་འཇོམས་ལས། རྒྱུད་དོ་ཅོག་གི་རྩ་བ་སྟེ། །ཞེས་པའི་མཇུག་ཏུ། མདོ་སྡེ་འདི་ཡི་གཟི་བརྗིད་ཀྱི། །ཞེས་པ་ལ་སོགས་པ་མང་དུ་གསུངས་ཤིང་། སློབ་དཔོན་སངས་རྒྱས་གསང་བས་ཀྱང་། རྒྱུད་ཆེན་དེ་ཡི་དོན་རྣམས་ཀུན། །མདོར་བསྡུས་ཟབ་མོར་སྟོན་པས་ན། །མདོ་སྡེར་བདེ་བར་གཤེགས་པས་གསུངས། །ཞེས་རྒྱུད་སྡེ་རྣམས་ཤིན་ཏུ་རྒྱས་པའི་སྡེར་བཤད་ཅིང་མདོ་སྡེའི་སྣོད་དུ་འདུས་པར་བཞེད་ཅིང་། སློབ་དཔོན་ཤཱནྟི་པ་ནི། དེ་ལ་གསང་སྔགས་ནི་གསུང་རབ་ཡན་ལག་བཅུ་གཉིས་ལས་གང་ཞེ་ན་ཟབ་མོའི་དོན་བསྡུས་ཏེ་སྟོན་པའི་ཕྱིར་མདོའི་སྡེའོ། །ཞེས་བཞེད་པས། གང་ལྟར་ཡང་གསང་སྔགས་རྣམས་མདོའི་སྡེར་བཤད་དོ། །མན་ངག་སྙིང་གི་དགོངས་པ་རྒྱལ་བའི་བཀའ་ཞེས་བྱ་བའི་རྒྱུད་ཀྱི་མཚན་ནི། མཐའ་འགེགས་པའི་ཚིག་མ་ཡིན་ཏེ། ཆོས་ཐམས་ཅད་དོན་ལ་མཚན་དུ་གསོལ་བའི་ཕྱིར་ཡིན་ནོ། །དེ་ཡང་སྔོན་ཇོ་བོ་ཆེན་པོ་རྗེས་བྱང་ཆུབ་ལམ་སྒྲོན་མཛད་པའི་ཚེ་ཁྱེད་བོད་ལ་མཚན་གྱི་འདོགས་ལུགས་ཇི་ལྟ་བུ་ཡོད་གསུངས། བོད་སྟོན་རྣམས་ཀྱིས། དོན་ལ་མཚན་དུ་གསོལ་བ་དང་། དཔེ་ལ་མཚན་དུ་གསོལ་བ་དང་། ཡུལ་དང་ཞུ་བ་པོ་ལ་མཚན་དུ་གསོལ་བ་ལ་སོགས་པ་དུ་མ་བདོག་ཞུས་པས། ཨ་ཡེ། བོད་ན་རྒྱ་གར་ན་མེད་པའི་གཏམ་མང་པོ་འདུག་གསུངས་ཏེ། རོལ་སྙེད་མ་ཕྲོགས་པ་དང་། གནོད་སྦྱིན་མཁར་བ་བསད་པའི་གཏམ་རྒྱུད་གསུངས་ནས། ཆོས་ཐམས་ཅད་དོན་ལ་མཚན་དུ་གསོལ་བ་ཡིན་ཞེས་གསུངས་པ་ཉིད་ཀྱིས་ཤེས་སོ། །སྨིན་གྲོལ་གྱི་ལམ་ཆ་ལག་དང་བཅས་པ་ནི་འདི་པའི་རྒྱུད་དང་གདམས་པ་རྣམས་ན་ཟབ་ལ་རྒྱ་ཆེ་ཞིང་མྱུར་བ་ལས་ཀྱང་ཆེས་མྱུར་བ་ལོ་དང་ཟླ་བའི་ཆ་ཤས་ཀྱི་སངས་རྒྱས་ཀྱི་ས་ལ་སྦྱོར་ནུས་པ་ཡོད་དོ། །ཞེས་བྱ་བའི་རྒྱུད་མ་རྫོགས་སོ་ཞེས་ཞི་ཁྲོ་དགོངས་པ་རང་གྲོལ་དུ་འབྱུང་བ་ཡང་། འདི་ཉིད་ཆོས་ཀྱི་སྐུ་དང་ལོངས་སྤྱོད་རྫོགས་པའི་སྐུའི་བསྟན་པ་ཡིན་པས་སྟོན་པ་མྱ་ངན་ལས་མི་འདའ་བ་དང་། དེའི་བསྟན་པ་ཡང་འོག་མིན་ལ་སོགས་པ་རྣམས་སུ་རྟག་པ་རྒྱུན་གྱི་ཁོར་མོར་གནས་པས་ཆོས་ཀྱི་རྫོགས་མཐའ་མི་མངོན་པ་ལ་དགོངས་པ་ཡིན་ནོ། །ལུགས་འདི་ནི་གསར་མའི་ཤིང་རྟ་ཆེན་པོ་རྣམས་ལ་ཡང་གྲགས་ཏེ། སློབ་དཔོན་རྒྱལ་བ་བཟང་པོས་མཛད་པའི་བདེ་མཆོག་གི་འགྲེལ་བ་ལས། འདིར་ནི་བཅོམ་ལྡན་འདས་མི་གནས་པའི་མྱ་ངན་ལས་འདས་པ་བརྙེས་པས་རྟག་པར་བཞུགས་ནས་ཆོས་སྟོན་པས་དེའི་ཕྱིར་ཆོས་ཀྱི་རྫོགས་པའི་མཐའ་ནམ་ཡང་མངོན་པ་མ་ཡིན་ནོ། །ཞེས་གསུངས་སོ། །འོ་ན་ཁྱེད་རང་ཆོས་སྐུའི་བསྟན་པར་འདོད་པའི་རྒྱུད་བཅུ་བདུན་ལ་སོགས་པ་རྣམས་སུ་ཞེས་བྱ་བའི་རྒྱུད་རྫོགས་སོ་ཞེས་འབྱུང་བ་ཅི་སྙམ་ན། དེ་ནི་སྡུད་པ་པོ་དང་། ལོ་པཎ་རྣམས་ཀྱི་སྤྱི་དང་མཐུན་པར་བཤད་པ་ཡིན་གྱི། དོན་ལ་ཟབ་མོའི་ཆོས་ལ་རྫོགས་མཐའ་མངོན་པར་འདོད་པ་མ་ཡིན་ནོ། །ཁྱིམ་པའི་ཆ་བྱད་ཀྱི་སྔགས་པ་རྣམས་ཉི་མ་རིང་བ་ནས་ཆང་རེ་འཐུངས་ནས་རྒྱུད་བརྩམས་ཞེས་གསུངས་པ་ཡང་མི་འཐད་དེ། དེའི་དུས་སུ་རྒྱལ་པོ་དར་མས་བསྟན་པ་བསྣུབས་ནས་འཆད་རྩོད་རྩོམ་པ་ལ་སོགས་པའི་མིང་ཙམ་ཡང་མེད་པའི་ཕྱིར་རོ། །དེ་བས་ན་པཎ་ཆེན་ཡིད་བཟང་རྩེ་པས། སྤྱིར་ན་དར་མས་བསྟན་པ་བསྣུབས་ནས་ལོ་བདུན་ཅུ་ལྷག་ཅིག་གི་བར་ན་དབུས་གཙང་དུ་རབ་ཏུ་བྱུང་བ་ནི་མེད། རྙིང་མ་པའི་སྔགས་འཆང་མང་དུ་ཡོད་པ་རྣམས་ཀྱིས་ཡུལ་སོ་སོར་སྒྲུབ་པ་ཁྱད་པར་ཅན་གྱི་བཀྲ་ཤིས་པར་མཛད། ཁྱིམ་པ་རྣམས་ཀྱང་དེ་དག་ལ་དད་ཅིང་བུམ་དབང་ཙམ་རེ་བླངས་ནས་ཟས་གོས་ལ་སོགས་པས་མཉེས་པར་བྱས། ཀླུ་མེས་ལ་སོགས་པའི་དབུས་གཙང་གི་མི་དྲུག་གམ་བརྒྱད་དུ་གྲགས་པ་རྣམས་བྱོན་པའི་ཚེ་ཡུལ་དང་ཡུལ་ལྗོངས་རྣམས་སུ་དགེ་འདུན་གྱི་སྡེ་གྲངས་མེད་པ་འཕེལ། སྔོན་བསྒྱུར་བའི་བཀའ་དང་བསྟན་བཅོས་ལ་མ་ཉམས་པར་ལོངས་སྤྱོད་དུ་ཆོག་པ་བྱུང་། ཞེས་གསུངས་པ་ལྟར་དོན་ལ་གནས་པ་ཡིན་ལ། གྲུབ་ཆེན་ཨུ་རྒྱན་པས་ཆག་ལོ་ཙཱ་བ་ང་རང་གི་དབང་ཞུས་པའི་བླ་མ་ཡིན་ཀྱང་། རྙིང་མའི་མདོ་དགོངས་པ་འདུས་པ་བོད་ཀྱི་སྔགས་རྒན་རྣམས་ཀྱིས་བརྩམས་ཞེས་གསུངས་པ་མི་འཐད། དེ་ཡིན་ན་ངེད་རང་རྣམས་ཀྱིས་ཀྱང་བརྩམས་དང་སངས་རྒྱས་ཀྱི་གསུང་ལ་ཡང་དེ་བས་ལྷག་པ་ནི་མི་འདུག །ཅེས་གསུངས་ཤིང་། འདིར་གྲུབ་མཐའ་དང་ལྟ་དགོངས་མཐོས་པ་ལ་ཐུགས་སུ་མི་ཤོང་བ་མི་འཚལ་ཏེ། ཐེག་པ་རྣམས་ཀྱི་མཐོ་དམན་ལྟ་དགོངས་ཀྱིས་ཕྱེ་བ་ཡིན་པས་ན་སློབ་དཔོན་ཞི་བའི་ལྷས། རྣལ་འབྱོར་པ་ཡང་བློ་ཁྱད་ཀྱི། །གོང་མ་གོང་མ་རྣམས་ཀྱིས་གནོད། །ཅེས་སོ། །གཞན་ཡང་འཕགས་པ་ཤེས་རབ་ཁྲི་པ་ལས། ཆོས་འདི་ནི་ཐེག་པ་ལ་གསར་དུ་ཞུགས་པ་དང་། ཉན་ཐོས་དང་རང་སངས་རྒྱས་ཀྱི་རིགས་ཅན་རྣམས་ཀྱི་མདུན་དུ་བརྗོད་པར་མི་བྱའོ། །དེ་ཅིའི་ཕྱིར་ན། སྐྲག་ཅིང་སྔངས་ལ་སྤུ་ཟིང་བྱེད་པས་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་སྤོང་བར་འགྱུར་བའི་ཕྱིར་རོ། །ཞེས་པ་དང་། དབུ་མ་རིན་ཆེན་ཕྲེང་བ་ལས། ངེས་པར་ལེགས་པའི་ཆོས་རྣམས་ཀྱང་། །ཕྲ་ཞིང་ཟབ་པར་སྣང་བས་ན། །བྱིས་པ་ཐོས་པ་མི་ལྡན་ལ། །སྐྲག་པར་བྱེད་པར་རྒྱལ་བས་གསུངས། །ཞེས་པ་ལྟར་ལགས་མོད།  (མུ་འགོད།)

47.2K