༄༅། །ཀརྨ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༦

གཞན་ཡང་དགེ་སློང་ཁྲིམས་ཉམས་པ་ལས་དྲེགས་པར་སྐྱེས་པ་པེ་ཧར་དང་། བན་དྷེ་དཀོན་གཉེར་ལས་མཐའ་ལོག་པ་ལས་དྲེགས་པར་སྐྱེས་པ་རྡོར་ལེགས་དང་། གང་ཟག་ས་ཐོབ་པ་ལས་མཐའ་ལོག་པ་ཁྱབ་འཇུག་སོགས་ཡུལ་གྲུ་ཐ་དད་ཀྱི་ལྷ་འདྲེ་དྲེགས་པ་ཅན་རྣམས་ལ་ཡང་རྒྱུད་རེ་འོང་བར་སྣང་བ་འདི། སྤྱིར་ན་རྒྱུད་ཀྱི་སྐད་དོན་ཏནྟྲ་སྟེ། རྒྱུན་ཆགས་དང་། འབྲེལ་བ་དང་། མ་ཚང་བ་མེད་པ་སོགས་ལ་འཇུག་ན། དྲེགས་པ་ཅན་འདི་དག་ལས་མཐའ་མ་ལོག་པའི་གོང་དུ་ནི་དེ་དག་གི་རྒྱུད་འོང་དོན་མེད་ལ། དེས་ན་རྒྱུན་ཆགས་ཀྱི་དོན་མ་ཚང་། དབང་དང་ལྷ་སྒྲུབ་རྒྱུན་ཆགས་སུ་སྟོན་པ་མི་འདུག་པས་འབྲེལ་བའི་དོན་མ་ཚང་། རྒྱུད་དེ་དག་ནས་གང་ཟག་གཅིག་འཚང་རྒྱ་བའི་ལམ་ཆ་ལག་རྫོགས་པར་མི་སྟོན་པས་མ་ཚང་བ་མེད་པའི་དོན་མ་ཚང་། དེས་ན་གཏན་ཚིག་གསུམ་གྱི་རྒྱུད་མིན་པར་རིགས་པར་བྱ་སྟེ། རྫས་སྔགས་ལ་བརྟེན་པའི་ལྷ་འདྲེའི་སྒྲུབ་ཐབས་ཡིན་པར་རིགས་པར་བྱའོ། །འདི་དག་དང་། བོན་རྒྱུད་རྣམས་དང་། ཀོང་ཙེ་དང་། བྲུ་ཤ་དང་། ཁམས་པ་ཕྲ་མོ་སོགས་ཀྱི་ཕན་བྱ་གནོད་བྱའི་རྒྱུད་མང་པོ་དང་། རྩིས་དང་སྨན་གྱི་རྒྱུད་འདུག་པ་དག་མཚུངས་ཏེ། དོན་ལ་རྒྱུད་མ་ཡིན་ཏེ་བསྟན་བཅོས་ཡིན་ནོ། །ཡང་རྒྱུད་མཚན་ཉིད་པ་ཡིན་ན་དེ་དག་གི་སྒྲུབ་བྱེད་གསལ་བར་སྨྲ་བར་བྱོས་ཤིག།

ཅེས་གསུངས་པ་ལ། དྲེགས་པ་ཅན་འདི་དག་ལ་རྒྱུད་འོང་བའི་རྒྱུ་མཚན་ནི་སློབ་དཔོན་སངས་རྒྱས་གཉིས་པ་པདྨ་འབྱུང་གནས་ཀྱིས། དྲེགས་པ་ཅན་འདི་དག་སངས་རྒྱས་ཀྱིས་ཀྱང་བྲིད་ཅིང་དམ་ལ་བཏགས་པ་ལས་སྒྲོལ་ནུས་པ་མ་ཡིན་ནོ། །ཕོ་རྒྱུད་མོ་རྒྱུད་འཇིག་རྟེན་གྱི་མཐུ་ཆེན་འདི་རྣམས་འདུལ་བའི་དོན་དུ་དཔལ་ཆེན་པོ་ཁྲོས་ནས་སྐུ་གཏུམ་པའི་ཆ་བྱད་དུ་བསྟན་ཏེ། ཕོ་ཚོགས་འདུལ་བའི་དོན་དུ་གཤིན་རྗེ་གཤེད་པོར་བསྟན། མོ་ཚོགས་འདུལ་བའི་དོན་དུ་ཆེ་མཆོག་ཏུ་བསྟན། ཀླུ་འདུལ་བ་ལ་དཔལ་རྟ་མགྲིན་དུ་བསྟན། དེ་ལས་ཀྱང་སྟོབས་ཅན་གསུམ་དུ་བསྟན། ཕོ་ཚོགས་འདུལ་བའི་དོན་དུ་འཇིག་པའི་སྟོབས་ཅན་དུ་བསྟན། མོ་ཚོགས་འདུལ་བའི་དོན་དུ་བརྗིད་པའི་སྟོབས་ཅན་དུ་བསྟན། ཀླུ་འདུལ་བའི་ཕྱིར་དུ་གྱད་ཀྱི་སྟོབས་ཅན་དུ་བསྟན། མཐུན་པའི་རྫས་ཀྱིས་བྲིད་ནས་དམ་ལ་བཏགས། ཤ་ཁྲག་སྲོག་དབུགས་ལ་དབང་བྱེད་པར་བསྐོས་ནས་སངས་རྒྱས་ཀྱི་བསྟན་པ་བསྲུང་བའི་རྣལ་འབྱོར་པ་རྣམས་ཀྱི་སྲུང་མར་བཞག་གོ། །ཞེས་གསུངས་པ་ལྟར། བདེ་བར་གཤེགས་པས་ཀྱང་། ཐབས་མཁས་པས་བྲིད་ཅིང་དབང་དུ་བསྡུས་པ་ཙམ་ལས་ཐབས་གཞན་གྱིས་མ་ཐུལ་བ་ཡིན་པས། འཇིག་རྟེན་ལས་འདས་པའི་ལྷ་རྣམས་ཀྱི་རྒྱུད་ལྟར་དབང་བཞི་དང་སྦྱང་གཞི་སྦྱོང་བྱེད་ལ་སོགས་པ་སྨིན་གྲོལ་གྱི་ལམ་སྟོན་པའི་རྒྱུད་མེད་ཀྱང་འདི་དག་ཏུ་ཞི་རྒྱས་དབང་དྲག་ལས་སོགས་པ་ཕྲིན་ལས་སྣ་ཚོགས་སྒྲུབ་པའི་ཐབས་ལས་རྒྱལ་མཆོག་གི་རིམ་པ་དུ་མ་གསུངས་པས་ན་རྒྱུད་ཀྱི་བྱེ་བྲག་ཡིན་ནོ། །དེ་ལ་འདིར་རྒྱུན་ཆགས་དང་། འབྲེལ་བ་དང་། མ་ཚང་བ་མེད་པའི་དོན་གསུམ་ཀ་ཚང་སྟེ། ལོ་ཆེན་རིན་ཆེན་བཟང་པོའི་རྒྱུད་སྡེ་སྤྱི་རྣམ་ལས། ཅིའི་ཕྱིར་འདི་ལ་རྒྱུད་ཅེས་བྱ་ཞེ་ན། རྒྱུད་ལ་ལེགས་སྦྱར་གྱི་སྒྲ་ལས། ཏནྟྲ་ཞེས་བྱ་སྟེ། ཏའི་སྒྲ་ལས། ནི་རན་ཏནྟྲ་ཞེས་འབྲེལ་ཞིང་བྲེང་ཆགས་པས་ན་རྒྱུད་དེ། དེ་ཡང་གཞི་སེམས་ཅན་གྱི་དུས། ལམ་རྣལ་འབྱོར་གྱི་དུས། འབྲས་བུ་སངས་རྒྱས་ཀྱི་དུས་གསུམ་གྱི་སེམས་རྒྱུད་འབྲེལ་བས་ན་རྒྱུད་དོ། །དེ་ལ་སྒྱུ་འཕྲུལ་དྲ་བ་ལས། རྒྱུད་ཅེས་བྱ་བ་འབྲེལ་བའི་དོན། །དོན་ནི་རྣམ་པ་གསུམ་ཡིན་ཏེ། །ཞེས་སོ། །ཞེས་པ་དང་། ཡང་དེ་ཉིད་ལས། ཡང་ན་སེམས་རྒྱུད་གསུམ་འབྲེལ་ཅིང་བྲེང་ཆགས་པ་དེ་ཡང་མ་ཚང་བ་མེད་པར་ཕུན་སུམ་ཚོགས་པའི་ཚུལ་གྱི་བདེ་བླག་ཏུ་སྒྲུབ་པར་ནུས་པའི་བརྗོད་བྱ་དང་རྗོད་བྱེད་དུ་འབྲེལ་བ་ལ་བྱ་སྟེ། དཔལ་དམ་ཚིག་གསུམ་བཀོད་པའི་རྒྱུད་ལས། འབྲེལ་དང་མ་ཚང་མེད་པ་དང་། །ཕུན་སུམ་ཚོགས་པས་རྒྱུད་ཅེས་བྱ། །ཞེས་སོ། །ཞེས་པ་དང་། ཡང་། ས་ལ་ཀྵ་ཏནྟྲ་ཞེས་རང་གི་མཚན་ཉིད་འཛིན་པས་ན་རྒྱུད་དེ། ཞེས་གསུངས་པ་རྣམས་ཚང་བའི་ཕྱིར་དང་། དོན་བསྡུ་ན། རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བ་རྒྱུད་དུ་འདོད་པ་ཡིན། །ཞེས་པས་རྒྱུན་ཆགས་ཀྱི་དོན་ནི་གཞི་སེམས་ཅན་གྱི་དུས་ཡིན་པས་ཚང་། སེམས་དེས་འཁོར་འདས་ཐམས་ཅད་ལ་ཁྱབ་པས་འབྲེལ་བའི་དོན་ཚང་། སེམས་དེ་ལ་ཆོས་ཐམས་ཅད་རྫོགས་པས་མ་ཚང་བ་མེད་པའི་དོན་ཚང་བ་ཡིན་ཏེ། རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པ། །སངས་རྒྱས་མེད་ཅིང་སེམས་ཅན་མེད། །ཅེས་གསུངས་སོ། །དེ་བས་ན་འདི་དག་གི་རྒྱུད་ལ་མཚན་ཉིད་མི་ལྡན་པ་མེད་པ་ཡིན་ལ། སྔགས་གསར་མ་ལ་ཡང་འདི་དག་དང་མཚུངས་པའི་འཇིག་རྟེན་པ་དག་གི་རྒྱུད་ཡོད་དེ། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པར། ཀྱོ་བ་ཏང་གི་སྒྲུབ་པ་དང་། ལྷ་དང་། ཀླུ་དང་། གནོད་སྦྱིན་དང་། མ་མོ་དང་། མཚོ་དབྱངས་མ་དང་། སཱ་ལ་བྷཉྩི་ཀ་དང་། གནོད་སྦྱིན་མོ་དང་། ཤ་ཟ་མོ་དང་། ཅི་བགྱི་མ་ལ་སོགས་པ་འཇིག་རྟེན་པའི་ལྷ་མང་པོའི་སྒྲུབ་ཐབས་གསུངས་ཤིང་། བདེ་མཆོག་རྡོ་རྗེ་མཁའ་འགྲོའི་རྒྱུད་ཀྱི་ལེའུ་བཅུ་དགུ་པར། མ་མོའི་སྒྲུབས། གཟའི་སྒྲུབ་ཐབས། འབྱུང་པོ་ཐམས་ཅད་ཀྱི་སྒྲུབ་ཐབས་རྣམས་ཡོད་པས་ཁྱད་པར་མེད་པ་ཡིན་ནོ། །དྲེགས་པ་སོ་སོའི་རྒྱུད་དང་མན་ངག་ལས་དྲེགས་པའི་སྲོག་དབང་ཞེས་བཀའ་གཏད་རྗེས་གནང་ལ་དབང་དུ་བཏགས་པ་རྙིང་མ་པ་དག་མཛད་པ་དང་མཐུན་པར། གསར་མ་ལ་ཡང་ཡོད་པ་ཡིན་ཏེ། གསང་བ་སྤྱི་རྒྱུད་ལས། ཕྱག་ན་རྡོ་རྗེ་གཟི་བྱིན་གྱི། །དཀྱིལ་འཁོར་དུ་ནི་དབང་བསྐུར་བ། །དེ་ནི་རྡོ་རྗེའི་རིགས་གཅིག་གི། །དཀྱིལ་འཁོར་གྱི་ནི་སློབ་དཔོན་འགྱུར། །མ་མོ་གནོད་སྦྱིན་དྲག་པ་ཡི། །དཀྱིལ་འཁོར་གང་དག་ཅི་བཤད་པ། །ཐམས་ཅད་དེ་དག་ཀུན་ཀྱང་ནི། །དོགས་པ་མེད་པར་བྲི་བར་བྱ། །ཞེས་གསུངས་པས་སོ། །ཡང་རྡོར་ལེགས་ལ་སོགས་པ་འདི་དག་ལྷ་འདྲེ་རང་རྒྱུད་པར་བཟུང་བར་ཡང་མི་རིགས་ཏེ། འབྱུང་པོ་འགའ་ཞིག་རང་རང་གི་གཟུགས་ཀྱིས་འདུལ་བའི་སླད་དུ། སངས་རྒྱས་ཐབས་མཁས་པས་དེ་དག་གི་ཚུལ་བཟུང་བ་ཡོད་དེ། རྡོར་ལེགས་རྟ་མགྲིན་ཡིན་པར་ཐམས་ཅད་མཁྱེན་པ་རང་བྱུང་རྡོ་རྗེས། དམ་ཅན་སྐྱེས་བུ་ཆེན་པོ་གིང་གི་བདག།།དཔལ་ལྡན་དྲེགས་པ་རྟ་མགྲིན་ཐུགས་ལས་སྤྲུལ། །ཞེས་གསུངས་ཤིང་། པེ་ཧར་གུར་གྱི་མགོན་པོ་དང་ཐུགས་རྒྱུད་གཅིག་སྟེ། སྡེ་བརྒྱད་སྤྱི་འདུལ་ཕྱིར་རྒྱལ་པོའི་ཚུལ་བསྟན། དེའི་འཁོར་རྣམས་ཀྱང་པུ་ཏྲ་མིང་སྲིང་རུ་འདྲེན་སྡེ་བཞི་སོགས་ཀྱང་ཁྱད་པར་མེད། མགོན་པོ་ལེགས་ལྡན་ནག་པོ་ས་ཐོབ་པའི་བྱང་ཆུབ་སེམས་དཔའ་ཡང་དཀར་པོ་ནག་པོའི་ཚུལ་གྱི་འཁོར་དུ་ཡོད་ལ། ཁྱབ་འཇུག་ནི་བཅོམ་ལྡན་འདས་རྣམ་པར་སྣང་མཛད་དང་རྡོ་རྗེ་འཆང་གི་སྤྲུལ་པར་བཤད། རྣམ་སྲས་ཀྱི་སྲས་སུ་བཤད་པ་སོགས་ཀྱི་རྒྱུ་མཚན་གྱིས་ན། སངས་རྒྱས་ཀྱི་རྣམ་པར་འཕྲུལ་བ་བསམ་གྱིས་མི་ཁྱབ་པ་ལ་ཕྱོགས་རེ་བར་མི་བསམ་སྟེ། སངས་རྒྱས་མཉམ་སྦྱོར་ལས། རེས་འགའ་ཞི་ལ་རེས་འགའ་ཁྲོ། །རེས་འགའ་བགེགས་ཆེན་གདོན་མཛད་ཅིང་། །སྐྱེ་དང་རི་བོ་ཐམས་ཅད་དོ། །ཞེས་དང་། གུར་ལས། གང་དུ་སྣང་ནས་ཀྱང་སེམས་ཅན་གྱི་དོན་མཛད་དོ། །ཞེས་གསུངས་པའི་དོན་ཁོངས་སུ་ཆུད་པར་བྱའོ། །ཡང་འདི་དག་སངས་རྒྱས་ཀྱི་རྣམ་པར་སྤྲུལ་པ་མ་ཡིན་ཀྱང་། རྡོ་རྗེ་འཆང་ཆེན་པོ་ལ་དངོས་སུ་དབང་ཐོབ་པ་ཡང་ཡིན་ལ། སངས་རྒྱས་ཀྱི་བསྟན་པའི་སྲུང་མ་ཡིན་པས་རྒྱུད་དང་སྒྲུབ་ཐབས་འབྱུང་བ་མི་འགལ་བ་ཡིན་ནོ། །ཁམས་པ་ཕྲ་མོ་ལ་སོགས་པའི་རྒྱུད་རྣམས་དང་མཚུངས་པ་མ་ཡིན་ཏེ། དེ་དག་ནི་རྒྱུད་ཀྱི་མིང་ཙམ་དུ་ཟད་ལ། འདིར་ནི་མཚན་ཉིད་རྣམས་ལེགས་པར་ཚང་བའི་ཕྱིར་རོ། །(མུ་འགོད།)

47.2K