༄༅། །ཀརྨ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༧

ཡང་རྒྱུད་དེ་དག་ལས་འབྱུང་བའི་སྨིན་བྱེད་དབང་གི་སྐབས་ན། སྤྱིར་དབང་གི་ལག་ལེན་འཁྲུལ་བར་བསྟན་པ། བྱེ་བྲག་ཏུ་སྒྲུབ་ཆེན་གྱི་ལག་ལེན་འཁྲུལ་བར་བསྟན་པ། སློབ་དཔོན་ལ་བདག་འཇུག་མེད་པས་ལག་ལེན་འཁྲུལ་བར་བསྟན་པ། དབང་བསྐུར་དངོས་ཀྱི་ལག་ལེན་འཁྲུལ་བར་བསྟན་པ། ཞར་ལ་བཟླས་པའི་སྔགས་སོགས་མ་དག་པར་བསྟན་པའོ། །དང་པོ་སྤྱིར་རྙིང་མའི་དབང་གི་ལག་ལེན་འཁྲུལ་ཏེ། གསང་སྔགས་གསར་མ་ལྟར་ན་སློབ་དཔོན་གྱི་མཚན་ཉིད་སྔགས་སོགས་དག་པ། སློབ་མའི་མཚན་ཉིད་སྣོད་དང་ལྡན་ཞིང་ལན་གསུམ་གསོལ་བ་བཏབ་པ། དེ་ཡང་གྲངས་ངེས་པ་ཅན། གནས་ཀྱི་མཚན་ཉིད་དབེན་ཞིང་གཙང་བ། ཆོ་གའི་མཚན་ཉིད་སྦྱོར་དངོས་རྗེས་གསུམ་ཚང་ཞིང་མ་འཁྲུལ་བ་ཞིག་དགོས་པར་གསུངས་པ་ལ། རྙིང་མ་འདིར་སློབ་དཔོན་གྱི་མཚན་ཉིད་བསྙེན་སོགས་དག་པར་བྱེད་པའི་ངེས་པའང་མི་འདུག་ཅིང་། དེ་བས་རང་གིས་མ་ཐོབ་པའི་དབང་གཞན་ལ་བསྐུར་བའང་འགའ་ཞིག་སྣང་། སློབ་མའི་སྐབས་སུ་མི་འདུ་ཚོགས་ཆེ་བ་གཙོ་བོར་འཛིན་པ་ལས་སྣོད་ལ་བརྟག་དཔྱད་མི་བྱེད་པས་སྣོད་མ་དག །དག་ཀྱང་སློབ་མས་གསོལ་བ་མི་འདེབས་ཏེ། བླ་མ་རང་གི་ངོས་བསྲུང་བར་བྱས་ཏེ་དབང་བསྐུར་ཅི་ཐུབ་བྱེད་པས་དཔོན་སློབ་ཀྱི་འབྲེལ་བ་མ་དག །གནས་ནི་སྐྱེ་བོ་གང་འདུའི་གནས་སུ་བསྐུར་བས་གནས་མ་དག །ཆོ་གའི་ངོ་བོ་མ་དག་པ་ནི་འོག་ཏུ་སྟོན་ཏེ། དེས་ན་སྤྱིར་གཞུང་ལུགས་དང་འགའ་བ་ལྟ་སྨོས་ཀྱང་ཅི་དགོས། རང་ལུགས་ཀྱི་ཕུན་སུམ་ཚོགས་པ་ལྔ་དགོས་པར་བཤད་པ་དང་ཡང་དངོས་སུ་འགལ་བས་སྤྱིར་དབང་གི་ལག་ལེན་འཁྲུལ་ལོ། །ཡང་དགོས་སྒྲུབ་ཆེན་གྱི་ལག་ལེན་འཁྲུལ་ཏེ། གསར་མ་ལྟར་ན་དཔལ་གསང་བ་འདུས་པ་ལས་བསྙེན་སྒྲུབ་ཡན་ལག་བཞི་བཤད་པ་དང་མཐུན་པར་མི་སྣང་ལ། དེ་དང་མཐུན་དགོས་ཀྱི་ངེས་པ་མེད་ནའང་། རྙིང་མ་རང་ལུགས་ཀྱི་བསྙེན་དབང་། ཉེ་བསྙེན། སྒྲུབ་དབང་། སྒྲུབ་ཆེན་བཞི་བཤད་འདུག་པའི་དེ་དག་གི་རྣམ་པར་དབྱེ་བ་ཨེ་དགོས་ཞེས་དྲི་ན་འདི་ལ་ཅི་སྨྲ། ཁོ་བོས་རྙིང་མ་རང་ལུགས་ཀྱི་གཞུང་ལུགས་ལ་བརྟགས་པ་ན། བསྙེན་དབང་མ་སོང་བར་སྒྲུབ་པ་ལ་མི་དབང་། སྒྲུབ་པ་མ་བྱས་པར་སྒྲུབ་ཆེན་ལ་མི་དབང་བར་བཤད་འདུག་པ་ལ། དེང་སང་བསྙེན་སྒྲུབ་གང་ཡང་མེད་པའི་སྐྱེ་བོ་རང་ག་ཞིག་དང་ལྷན་ཅིག་ཏུ་སྒྲུབ་ཆེན་བྱས་པས་སྒྲུབ་ཆེན་གྱི་ལག་ལེན་མ་དག །ཡང་རྙིང་མ་བ་རང་གི་བདག་འཇུག་མ་བྱས་པར་དབང་བསྐུར་བས་སློབ་དཔོན་གྱི་ལས་མ་དག་སྟེ་རྒྱུད་གཞན་དང་འགལ་བ་ལྟ་ཅི་སྨོས་ཏེ། ཁྱེད་རང་གི་རྟ་མཆོག་རོལ་ཆེན་དང་། སྒྱུ་འཕྲུལ་ལ་སོགས་གཞུང་ལུགས་ཕལ་ཆེ་བའི་ནང་ན་བདག་འཇུག་དགོས་པར་བསྟན་པ་འདུག་པས་སོ། །རིགས་པས་ཀྱང་འགྲུབ་སྟེ། ཆུ་སོགས་འདོད་པ་གང་ཞིག་ལ་ཆུ་སྟེར་འདོད་ན་རང་ལ་ཆུ་སོགས་ཡོད་པ་ཞིག་དགོས་ལ། ཡོད་པ་དེ་བླང་པ་ལ་ལྟོས་དགོས་པར་མཚུངས་པས་སོ། །ཡང་དཀྱིལ་འཁོར་སྒྲུབ་པའི་དུས་ན་རྡོ་རྗེ་རྒྱལ་ཚབ་ཀྱི་མིང་བཏགས་པ་ཞིག་ལ་གཞུང་ཕྲིན་གྱེར་བ་སོགས་བཅོས་ནས། སློབ་དཔོན་རང་དཀྱིལ་འཁོར་ལས་དབེན་པའི་ལྐོག་ཏུ་གྱུར་པ་ཞིག་ཏུ་གནས་ནས་དཀྱིལ་འཁོར་སྒྲུབ་བློ་བྱེད་པའི་ལག་ལེན་འཁྲུལ་བ་དང་། དབང་བསྐུར་དངོས་ཀྱི་སྐབས་སུ་དབང་རྫས་རྒྱལ་ཚབ་ཀྱིས་ཐོགས་ཏེ་དབང་བསྐུར་བ་ཡོད་འདུག་པས། དབང་དེ་སློབ་དཔོན་ལས་ཐོབ་པར་འགྱུར་རམ་རྒྱལ་ཚབ་ལས་ཐོབ་པར་འགྱུར་ཞེས་དྲི་ན་འདི་ལ་ཅི་སྨྲ། དེ་ལ་དབང་དངོས་སུ་ཐོབ་དགོས་ན་ནི་དབང་རྫས་ཀྱང་སློབ་དཔོན་གྱིས་གཏད་པ་ཞིག་ཅིས་ཀྱང་དགོས། བརྒྱུད་དེ་ཐོབ་པས་རུང་ན་ནི། སློབ་དཔོན་གྱི་རྒྱལ་ཚབ་དང་། རྒྱལ་ཚབ་ཀྱིས་རང་ལ་བརྒྱུད་པས་རྒྱལ་ཚབ་དེ་དབང་གི་བརྒྱུད་པ་ལ་ངེས་པར་གཞུག་དགོས། དེས་ན་དབང་གི་ལག་ལེན་རྒྱལ་ཚབ་ལ་བཅོལ་བའང་མ་དག་པ་ཆེན་པོ་སྟེ་རྩོད་མེད་ཀྱི་གཞུང་དང་མཁས་པའི་ལག་ལེན་ལས་མི་འབྱུང་བས་སོ། །ཡང་རྙིང་མ་གྱེར་བསྒོམ་གྱི་ཁྱད་པར་འཕགས་ཟེར་ནས་རང་རང་གི་ལས་བྱང་དུ་གྲགས་པ་དེ་ཚར་གཅིག་གྱེར། དབྱངས་དང་བཅས་ཏེ་གྲུབ་པ་ན་བདག་མདུན་བུམ་གསུམ་གྱི་སྒྲུབ་མཆོད་དུས་གཅིག་ལ་གྲུབ་ཟེར་བས། འདི་ཡང་ཐབས་བསྐྱེད་པའི་རིམ་པ་ལ་རྩིངས་པའི་གཏམ་སྟེ། དེ་ཙམ་གྱིས་བསྐྱེད་རིམ་འབྱོངས་པ་ལ་ཕྲ་མོའི་རྣལ་འབྱོར་འབྱོངས་དགོས་པར་གསུངས་ལ། དེ་ཡོད་པ་དཀའ། མེད་པས་ནི་བདག་ཉིད་དཀྱིལ་འཁོར་འཁོར་ལོ་གསལ་བའི་མངོན་རྟོགས་བསྒོམ་ཚེ་མདུན་བསྐྱེད་གཉིས་གསལ་བར་མི་འགྱུར་ལ། དེ་མ་གསལ་ན་དཀྱིལ་འཁོར་དང་བུམ་པ་སྒྲུབ་མཆོད་མཚན་ཉིད་པ་མི་འོང་བས། འདི་དག་ལས་བྱང་གཅིག་གི་ཐ་དད་དུ་སྒྲུབ་པའི་གནད་ཅི་ཡོད་ཅེས་དྲི་ན་འདི་ལ་ཅི་སྨྲ། ཡང་ལས་བྱང་གཅིག་གི་བཟླས་པར་སླེབ་པ་ན། མིང་འཛབ་ཏུ་གྲགས་པ་སྔར་དཀྱིལ་འཁོར་དུ་མ་ཞུགས་པའི་སྐྱེ་བོ་རྣམས་དང་ལྷན་ཅིག་ཏུ་སྙིང་པོ་འཛབ་དབྱངས་སུ་གྱེར་བ་ཞིག་འདུག་པ་འདི་པཎ་གྲུབ་ཀྱི་དགོངས་པ་ཡིན་ནམ་མ་ཡིན། ཁྱེད་རང་གི་ཐུགས་ཀྱི་དམ་ཚིག་བཅུ་བཤད་པའི་སྐབས་ན་ལྷ་དང་སྔགས་གསང་བར་བཤད་པས་གསང་སྒྲོགས་སུ་མི་འགྱུར་རམ། དེ་བཟླས་པ་བྱེད་པ་ལ་དབང་ཕྱིན་ཆད་སྔགས་དབང་ངག་ལ་བསྐུར་བ་དང་། གསང་དབང་ལ་དགོས་པ་ཅི་ཡོད་ཅེས་དྲི་ན་འདི་ལ་ཅི་སྨྲ། ཡང་བཟླས་པའི་སྐབས་ན་ཨུ་རྒྱན་གྱི་ཐུགས་སྔགས་ཡིན་ཟེར་བ་ཞིག་སྣང་བ། གཞན་རྣམས་ལེགས་སྦྱར་སཾ་སྐྲྀ་ཏའི་སྐད་དུ་འདུག་པ་ལ། ཐོད་ཕྲེང་རྩལ་ཞེས་པ། ཐོད་པའི་སྐད་དོད་ཀ་པཱ་ལ་དང་། ཕྲེང་བའི་སྐད་དོད་མཱ་ལ་ཞེས་ཐོབ་རྒྱུ་བོད་དུ་བཞག་པའི་དགོས་པ་ཅི། མཁས་པ་འགའ་ཞིག་གི་སྨྲ་མདོ་ན། བོད་ཡུལ་རྨོངས་པའི་ཆོས་ལུགས་འདི། །སྔགས་སྒྲ་རྒྱ་མིན་བོད་མིན་བཀླགས། །གསུངས་པ་འདི་ལྟ་བུ་ལ་གསུངས་པས་ངེས་པར་མ་དག་པ་ཆེན་པོ་ཡིན། རྩལ་རྩལ་མང་པོ་སྔགས་དང་གསང་མཚན་ལ་ཡོད་པ་འདི་བོན་ལུགས་ལ་གྲགས་ཤིང་། ཚད་ལྡན་གྱི་གཞུང་ལུགས་ན་མི་སྣང་བས་རྙིང་མ་བོན་དང་འདྲེས་ཞེས་པ་དེ་ཡང་བདེན་ངེས་ཀྱི་སྒྲུབ་བྱེད་དུ་མི་འགྱུར་རམ། དེས་ན་རྒྱ་སྐད་བོད་སྐད་འདྲེས་པའི་སྔགས་དེ་ལྟ་བུ་རྙིང་མ་ལ་ཤིན་ཏུ་མང་བར་འདུག་པས། སྐྱོན་མེད་ཀྱི་སྔགས་སུ་འགྲོ་བའི་འཐད་པ་གཏན་ཚིགས་ཅི་མཆིས།

ཞེས་གསུངས་པ་ལ་བརྗོད་པར་བྱའོ། །དེ་ལ་འདིར་རྒྱུད་གསང་བ་སྙིང་པོ་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་འདོད་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་སོགས་ཀྱི་དོན་གྱི་དང་། ཀུན་ཏུ་བཟང་པོ་ཐུགས་ཀྱི་མེ་ལོང་ལས། གསང་སྔགས་དབང་ལ་མ་བརྟེན་འགྲུབ་པར་ག་ལ་འགྱུར། །དཔེར་ན་མཉན་པ་ལག་སྐྱ་མེད་པ་བཞིན། །ཕ་རོལ་བསྒྲོད་པར་ག་ལ་འགྱུར། །ཞེས་པ་དང་། ཐག་ལྟ་བས་བཅད། ལ་སྤྱོད་པས་དོར། དོན་མན་ངག་གིས་སྒྲུབ། ཉམས་སུ་ཏིང་ངེ་འཛིན་གྱིས་བླངས། གོ་འཕངས་དབང་གིས་བསྒྲོད། དམ་ཚིག་ལ་གཞི་གནས་པ་དང་དྲུག་གི་ཆོས་ཀྱི་གནད་འགག་ཐམས་ཅད་བསྡུས་པ་ཡིན་པས་ངེས་པར་དུ་དབང་བསྐུར་བ་ཉིད་དགོས་ཤིང་། དེ་ལ་བསྙེན་སོགས་དག་པ་ལ་ཡང་། དྲང་དོན་དུ་བསྐྱེད་རིམ་པའི་བསྙེན་པ་དང་། ངེས་དོན་དུ་རྫོགས་རིམ་གྱི་བསྙེན་པ་གཉིས་ལས། དང་པོ་ནི་ལྷ་རང་རང་གི་གྲངས་དང་དུས་དང་རྟགས་ཀྱི་བསྙེན་པ་གསུམ་ཡིན་ལ། དབང་བསྐུར་བ་ལ་ནི་དེ་ཙམ་དགོས་པ་མ་བཤད་དེ། རྡོ་རྗེ་ཕྲེང་བ་ལས། ཐམས་ཅད་མཁྱེན་པའི་ལམ་ཤེས་པས། །སྔོན་དུ་བསྙེན་པའི་ཚོགས་བསག་ཅིང་། །བགེགས་ནི་རྣམ་པར་ཉམས་བྱེད་བྱ། །བསྙེན་པ་མེད་པས་དངོས་གྲུབ་མེད། །དེ་ཕྱིར་རིམ་གཉིས་དེ་ཉིད་རིགས། །དབེན་པར་ཡང་དག་གནས་ནས་ནི། །ལྷ་ཡི་འཁོར་ལོ་བསྒོམ་པར་བྱ། །སྐྱོ་ན་དེ་ཡི་གསང་སྔགས་བཟླས། །འཁོར་ལོའི་གཙོ་བོ་འབུམ་བཟླས་ཤིང་། །ཡང་ན་རང་གི་ལྷག་ལྷའི་འབུམ། །དཀྱིལ་འཁོར་པ་ཡི་ཁྲི་ཡིན་ཏེ། །འདི་ནི་སྔོན་དུ་བསྙེན་པར་བརྗོད། །ཅེས་ལུང་དྲངས་ནས། ཁོ་བོ་ཅག་གི་རྫོགས་པའི་རྣལ་འབྱོར་གྱི་ཕྲེང་བར་ནི་དབང་པོ་རྣོན་པོའི་བློ་ངོར་བྱས་ཏེ་དཀྱིལ་ལྷ་བསྒོམ་པའི་རིམ་པ་དང་། སྙིང་པོ་བསྡུས་པ་བརྗོད་པ་ནི་ངེས་པར་བསྒོམ་པར་བྱའོ། །ཞེས་གསུངས་ལ། རྫོགས་ཕྲེང་ལས་གསུངས་པའི་དོན་ནི་རྫོགས་རིམ་ལ་དྲིལ་བའི་རྟགས་བཅུ་རྫོགས་ཏེ་རྒྱུན་དུ་གོམས་པར་བྱས་ནས། འོད་གསལ་ལས་ཟུང་འཇུག་གི་སྐུར་བཞེངས་པའི་ཚུལ་གྱི་གང་བསྒོམ་པར་བྱ་བའི་རྟེན་དང་བརྟེན་པར་བཅས་པའི་དཀྱིལ་འཁོར་རིགས་བདག་དང་བཅས་པ་གསལ་བར་བསྒོམས་ནས་དཀྱིལ་འཁོར་སོ་སོའི་གཙོ་བོའི་སྙིང་པོ་དང་ལས་ཐམས་ཅད་པའི་སྔགས་ལས་མ་གསུངས་ཤིང་། སོ་སོའི་གཙོ་བོའི་སྙིང་པོ་འབུམ་ཕྲག་རེ་དང་ལས་ཐམས་ཅད་པའི་ཁྲི་བཟླས་པས་རུང་བར་བཤད། ཡང་ན་རང་གི་ལྷག་ལྷའི་འབུམ་ཞེས་པའི་དོན། རང་གི་ཡི་དམ་གསང་འདུས་ཡིན་ན་དེའི་བསྙེན་པ་འབུམ་བཟླ། དེ་ནས་བདེ་མཆོག་སོགས་སུ་བསྒྱུར་ནས་དེ་དང་དེའི་གཙོ་བོའི་སྔགས་ཁྲི་ཕྲག་རེ་བཟླས་པས་བསྙེན་པ་འགྲོ་ཞིང་། དེ་ལྟར་བསྙེན་པ་བྱས་ནས་སྐད་ཅིག་གི་དཀྱིལ་འཁོར་གྱི་ལྷའི་རྣམ་པ་ཐམས་ཅད་རྫོགས་པར་སྤྲོ་བ་དང་བསྡུ་བ་བྱ་བར་ནུས་པས་སློབ་མ་བསྡུས་ཏེ་དབང་བསྐུར་བར་བྱ་བར་སློབ་དཔོན་ཨ་བྷ་ཡས་བཤད། ཇོ་བོ་ཆེན་པོ་རྗེས་རྒྱུད་སྡེ་ལམ་ཁྱེར་དུ་ནི། རང་དགྱེས་རྡོར་དུ་བསྒོམས་ནས་མདུན་དུ་གསང་བ་འདུས་པའི་དཀྱིལ་འཁོར་བྲིས་ནས་དབང་བསྐུར་བཏུབ། ཅེས་གསུངས་པ་དང་མཐུན་པར། རྙིང་མ་པ་དག་བདེ་གཤེགས་གཅིག་སྒྲུབ་རྒྱལ་བ་ཀུན་གྱི་ངང་། །ཞེས་པས། རྒྱལ་བ་ཐམས་ཅད་དགོངས་པ་གཅིག་པའི་ངོས་ནས་ལྷ་གཅིག་གི་བསྙེན་ཚད་སོང་ན་ལྷ་ཐམས་ཅད་ཀྱི་བསྙེན་ཚད་སོང་བར་དོན་གྱིས་ཐོབ་པ་ཡིན་ཞིང་། དེ་ལྟར་མ་ཡིན་ན། འདིར་འདུས་པ་མདོ་དང་། ཞི་ཁྲོ་བཀའ་བརྒྱད་ལ་སོགས་པ་རྣམས་ཀྱི་བསྙེན་ཚད་མི་ཚེ་གཅིག་ལ་འགྲོ་བར་དཀའ་བས་ན། སློབ་དཔོན་ཆེན་པོས་ཀྱང་དེས་གོ་ཆོད་པར་གསུངས་སོ། །གཉིས་པ་ངེས་དོན་དུ་རྫོགས་རིམ་གྱི་བསྙེན་པ་ནི། སོར་བསམ་གྱི་སྟོང་གཟུགས་དང་རྫོགས་ཆེན་གྱི་འོད་གསལ་དོན་གཅིག་པས་དེ་ལ་ངེས་པའི་དོན་གྱི་ལྷ་དང་དཀྱིལ་འཁོར་ཟེར་ཞིང་། སངས་རྒྱས་ཐམས་ཅད་པའི་བསྙེན་པ་ཡང་འདི་ཡིན། དེ་ནས་སྲོག་རྩོལ་གྱི་སྲོག་གཟུགས་དབུ་མའི་ནང་དུ་འགྲོ་འོང་བྱེད་པའི་རྡོ་རྗེའི་བཟླས་པ་ཟླ་བ་གཅིག་ལ་དྲུག་འབུམ་རྫོགས་ན་དཀྱིལ་འཁོར་གྱི་ལྷ་ཡོད་དོ་ཅོག་གི་གྲངས་བསྙེན་ཐམས་ཅད་ཐེམས་པ་ཡིན་ཏེ། གཉིས་མེད་རྣམ་རྒྱལ་གྱི་ལུང་རིམ་ལྔར་དྲངས་པ་ལས། འབུམ་ཕྲག་དྲུག་ཀྱང་བཟླས་ནས་སུ། །རྡོ་རྗེ་སེམས་དཔར་ཕྱག་བྱས་ན། །ཟླ་བ་ཉ་ལ་དེ་འགྲུབ་འགྱུར། །ཞེས་པས་དེས་ལས་ཆེན་བརྒྱད་སོགས་སྒྲུབ་པ་དང་རྡོ་རྗེ་སློབ་དཔོན་ལ་དབང་བའི་བསྙེན་པ་ཐེམས་པ་ཡིན་ཞེས་ཆག་ལོས་བཤད་ལ། དྲི་མེད་འོད་ལས་ཀྱང་། འདིར་སྔགས་ཀྱི་བཟླས་པ་ཞེས་པ་ནི་སྲོག་སྡོམ་པ་སྟེ། སོགས་པའི་སྒྲས་དབྱུང་བ་དང་དགང་བ་དང་བུམ་པ་ཅན་གྱི་སྦྱོར་བ་ནི་རྟག་ཏུ་བསྙེན་པའོ། །དེ་ཡི་ལྷ་མཆོག་སྟོང་བར་འགྱུར་ཏེ། སྲོག་མ་སྡོམ་པར་ངག་ཏུ་བརྗོད་པས་ནི་མ་ཡིན་ནོ། །ཞེས་གསུངས་ཤིང་། འཛིན་པས་སྐྱེ་ཤིའི་ལས་ཟད་རྗེས་དྲན་གྱི་སྒྲུབ་པ་པོ་སྟོང་། གཟུགས་ཀྱི་ལྷར་སོང་བ་ལ་རྫོགས་རིམ་གྱི་ལྷ་གྲུབ་པ་ཟེར། དེ་ནས་ཏིང་ངེ་འཛིན་གྱི་ལས་ལ་སྦྱར་བས་ཚེ་འདི་ཉིད་ལ་མཆོག་གི་དངོས་གྲུབ་བརྙེས་པ་ཡིན། འདི་དང་རྙིང་མའི་ཆོས་ཉིད་ཟད་པའི་སྣང་བ་གཅིག །དེས་ན་ཨཱརྱ་དེ་ཝཱས། དངོས་གཅིག་དངོས་པོ་ཀུན་གྱི་རང་བཞིན་ཏེ། །དངོས་ཀུན་དངོས་པོ་གཅིག་གི་རང་བཞིན་ཉིད། །གང་གི་དངོས་གཅིག་དེ་བཞིན་ཉིད་མཐོང་བ། །དེ་ཡི་དངོས་པོ་ཀུན་གྱི་དེ་ཉིད་མཐོང་། །ཞེས་དང་། འཇམ་དཔལ་གྱི་མཚན་ཡང་དག་པར་བརྗོད་པ་ལས། སྤྲུལ་པའི་འཁོར་ལོ་སྣ་ཚོགས་འཆང་། །དངོས་པོ་ཀུན་གྱི་རང་བཞིན་མཆོག །དངོས་པོ་ཀུན་གྱི་རང་བཞིན་འཛིན། །སྐྱེ་མེད་ཆོས་ཏེ་སྣ་ཚོགས་དོན། །ཅེས་པས་སངས་རྒྱས་ཐམས་ཅད་དགོངས་པ་དང་། དབྱངས་གཅིག་པ་དང་། གོ་འཕངས་གཅིག་པ་དང་། ངོ་བོ་གཅིག་ཅེས་བྱ་བའི་ངེས་དོན་གྱི་དཀྱིལ་འཁོར་གྲུབ་པ་འདི་ལ་ཟེར། དེ་བས་ན་རྟོག་པས་བཏགས་པའི་ལྷ་བསྒོམ་བཟླས་ལ་མི་ལྟོས་ཏེ། འཁོར་འདས་ཐམས་ཅད་སྐུ་གསུམ་གྱི་རོལ་པར་ཤར་བའི་ཕྱིར་རོ། །དེ་ལྟར་ཡང་དཔལ་བརྟག་པ་གཉིས་པ་ལས། སྤྲོས་པ་མེད་པའི་རང་བཞིན་ལ། །ལྷ་དང་སྔགས་ནི་ཡང་དག་གནས། །ཞེས་པས་སོ། །དེ་ནི་ལས་དང་པོ་པས་མ་ཡིན་ནོ་སྙམ་ན། དཀྱིལ་ཆོག་རྡོ་རྗེ་ཕྲེང་བ་ལས། བྲི་བའི་ཆོ་ག་འདི་ཡང་ཡིད་ཀྱི་སྒྲུབ་པས་ཆོ་ག་ཉིད་ཀྱི་འབྲས་བུ་དང་ལྡན་ནོ། །ཞེས་བྱ་བ་ལ་སོགས་པས་ཡིད་ཀྱི་ཆོ་ག་ཁོ་ན་མཆོག་ཏུ་གསུངས་པས། དེ་ཉིད་ཀྱི་ཕྱིར་དཀྱིལ་འཁོར་གྱི་བདག་པོའི་གཟུགས་ཀྱིས་བཟུང་བ་ལ་སོགས་པ་དང་། སྐུ་གཟུགས་ལ་སོགས་པའི་རབ་གནས་དང་། སློབ་མ་ལ་ཡང་དབང་བསྐུར་བ་དང་། གཤེགས་སུ་གསོལ་བ་དང་། ཞི་བའི་སྦྱིན་སྲེག་གི་མཐར་ཐུག་པ་ཐམས་ཅད་ཡིད་ཀྱིས་བྱའོ། །ཞེས་པ་ནས། དེའི་ཕྱིར་ལས་དང་པོ་པས་ཀྱང་སེམས་བརྟན་པས་ཡིད་ཀྱི་སྤྲུལ་པའི་དཀྱིལ་འཁོར་དུ་སྔ་མ་བཞིན་གྱི་རབ་གནས་དང་། སྐལ་བ་དང་ལྡན་པ་ལ་དབང་བསྐུར་བར་བྱའོ། །ཞེས་གསུངས་པས་ན་སྐྱོན་མེད་ཅིང་ངེས་པར་རུང་བ་ཡིན་ལ། སློབ་མ་མཚན་ཉིད་དང་ལྡན་པའི་ཚུལ་དང་། དེས་གསོལ་བ་གདབ་པ་སོགས་འདིར་བཤད་པས་བསྙོན་དུ་མེད་ཅིང་། གྲངས་ངེས་པ་ཅན། གསང་བ་སྤྱི་རྒྱུད་ལས། བདུན་ནས་ཉི་ཤུ་རྩ་ལྔའི་བར། །ཟུང་དུ་མ་གྱུར་སློབ་མ་བཟུང་། །ཞེས་པ་དང་། རྣམ་སྣང་མངོན་བྱང་ལས། བཅུའམ་བརྒྱད་དམ་བདུན་ནམ་ལྔ། །གཅིག་གཉིས་བཞི་ལས་ལྷག་ཀྱང་རུང་། །དཔྱད་མི་དགོས་པར་བཟུང་བར་བྱ། །ཞེས་ཚད་བཟུང་མཛད་པ་གོང་མ་ནི་བྱ་རྒྱུད་པའི་རང་ལུགས་ཡིན་གྱི། རྒྱུད་སྡེ་གོང་མ་ལ་རྒྱས་འགེབས་དགོས་པ་ནི་མ་ཡིན་ལ། རྣམ་སྣང་མངོན་བྱང་གི་ལུང་དྲངས་མ་ཐག་པ་དེ་དང་འབྲེལ་ཆགས་སུ། འདི་སྐད་ཅེས་གསང་བའི་བདག་པོ་གང་དག་གིས་སྔོན་ཐེག་པ་ཆེན་པོ་གསང་སྔགས་སྤྱད་པའི་ཚུལ་སྒོ་མཐའ་ཡས་པ་སྒྲུབ་པ་ལ་གོམས་པར་བྱས་པ་དེ་དག་ནི་རྡོ་རྗེ་སེམས་དཔའ་ཡིན་ཏེ། དེ་རྣམས་ཉིད་ཀྱི་དོན་གྱི་ཕྱིར་གྲངས་ཀྱི་ཚད་འདི་བྱས་སོ། །འོན་ཀྱང་སློབ་དཔོན་སྙིང་རྗེ་ཆེན་པོ་དང་ལྡན་པས་སེམས་ཅན་གྱི་ཁམས་མ་ལུས་པ་བསྒྲལ་བར་ཡིད་དམ་བཅའ་བ་ཁོ་ན་བྱ་སྟེ་དེས་བྱང་ཆུབ་ཀྱི་སེམས་ཀྱི་རྒྱུར་འགྱུར་བའི་ཕྱིར། སེམས་ཅན་ཚད་མེད་པ་རྣམས་ཡོངས་སུ་བཟུང་བར་བྱའོ། །ཞེས་གསུངས་པས་སྤྱོད་རྒྱུད་དུ་ཡང་སློབ་མ་ལ་གྲངས་ངེས་མ་མཛད། དེ་ཉིད་བསྡུས་པའི་རྒྱུད་ལས། དཀྱིལ་འཁོར་ཆེན་པོ་འདིར་འཇུག་པ་ལ་སྣོད་དུ་གྱུར་པ་དང་མ་གྱུར་པ་བརྟག་མི་འཚལ་ལོ། །ཞེས་པས་རྣལ་འབྱོར་གྱི་རྒྱུད་དུ་ཡང་གྲངས་ངེས་མ་གསུང་ཞིང་། བླ་མེད་ཀྱི་རྒྱུད་རྣམས་སུ་གྲངས་ཅན་གྲངས་མེད་ཀྱི་ཁ་གསལ་བཤད་པ་མ་མཐོང་ཡང་། དོན་ལ་གྲངས་མེད་གཟུང་ཆོག་པ་ཉིད་ཡིན་ཏེ། རིགས་ལྡན་གྱི་རྒྱལ་པོ་འཇམ་དཔལ་གྲགས་པས། དྲང་སྲོང་ཉི་མའི་ཤིང་རྟ་ལ་སོགས་པ་བྱེ་བ་ཕྲག་དགུ་བཅུ། དུས་གཅིག་ཏུ་དཔལ་དུས་ཀྱི་འཁོར་ལོའི་དཀྱིལ་འཁོར་དུ་དབང་བསྐུར་བ་དང་། སློབ་དཔོན་ཨ་བྷ་ཡས། དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བར། སྐལ་བ་དང་ལྡན་ན་སྟོང་གི་བར་དུ་ཡང་བཟུང་བར་བྱའོ། །ཞེས་གསུངས་པས་དབང་བསྐུར་བའི་སློབ་མ་ལ་གྲངས་ངེས་པར་དགོས་པ་ཡང་མ་ཡིན་ནོ། །གནས་ཀྱི་མཚན་ཉིད་དབེན་པ་དགོས་པ་ཡང་མ་ངེས་ཏེ། རྡོ་རྗེ་གུར་ལས། དུར་ཁྲོད་དང་ནི་ཆུ་འགྲམ་དང་། །ནགས་ཚལ་འབབ་ཆུ་གྲོང་ཁྱེར་དུ། །ཞེས་པས་འདུ་འཛིན་ཅན་གྱི་སྐྱེ་བོའི་གྲོང་ཁྱེར་དུ་ཡང་རུང་བར་བཤད་ཅིང་། སློབ་མའི་སྐབས་སུ་མིའི་འདུ་ཚོགས་གཙོ་བོར་བཟུང་ནས་སྣོད་ལ་བརྟག་དཔྱད་མི་བྱེད་པས་སྣོད་མ་དག་གསུངས་པ་ཡང་། དེ་ཉིད་བསྡུས་པར། དཀྱིལ་འཁོར་ཆེན་པོ་འདིར་འཇུག་པ་ལ་སྣོད་དུ་གྱུར་པ་དང་མ་གྱུར་པ་བརྟག་མི་འཚལ་ལོ། །དེ་ཅིའི་ཕྱིར་ཞེ་ན། དཀྱིལ་འཁོར་མཐོང་བ་ཙམ་གྱིས་སྡིག་པ་འདག་པའི་ཕྱིར་རོ། །ཞེས་གསུངས་པ་ཉིད་ཀྱིས་གསལ་བ་ཡིན་ལ། རྒྱུ་མཚན་དེ་དག་གིས་ནི་སྤྱིར་རྙིང་མ་པ་དག་གི་དབང་གི་ལག་ལེན་མ་འཁྲུལ་བ་བསྟན་པ་ཡིན་ནོ། །ད་ནི་ཡང་དགོས་སྒྲུབ་ཆེན་གྱི་ལག་ལེན་འཁྲུལ་ཞེས་གསུངས་པ་ལ་བརྗོད་པར་བྱ་སྟེ། དེ་ལ་སྒྲུབ་ཆེན་ཞེས་པ། སྔགས་གསར་མ་ལས། བསྙེན་སྒྲུབ་ཡན་ལག་བཞི་རྡོ་རྗེ་གསུམ་དང་སྦྱོར་བ་ཡན་ལག་དྲུག་དང་སྦྱར་ཏེ། ཐོག་མར་དགེ་བ་སྐུ་རྡོ་རྗེ་བསྙེན་པའི་ཡན་ལག །བར་དུ་དགེ་བ་གསུང་རྡོ་རྗེ་ཉེར་སྒྲུབ་ཀྱི་ཡན་ལག །ཐ་མར་དགེ་བ་ཐུགས་དང་ཡེ་ཤེས་རྡོ་རྗེ་སྒྲུབ་པ་དང་སྒྲུབ་ཆེན་གྱི་ཡན་ལག་ཅེས་གསུངས་པ་དང་། འདིར་གསང་བ་སྙིང་པོ་ལས། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །ཞེས་ཚིག་ཏུ་མི་འདྲ་ཡང་དོན་ལ་ཁྱད་པར་མེད་པ་ཉིད་དུ་ཡོད་ལ། དཔལ་ཡེ་ཤེས་སྙིང་པོའི་རྒྱུད་ལས། ལྟ་བ་རང་རིག་ཡེ་ཤེས་ཏེ། །ངོ་སྤྲོད་རྣམ་བཞིས་གཏན་ལ་ཕབ། །རང་རིག་མཚན་ཉིད་ཉམས་སུ་མྱོང་། །དེ་ནི་བསྙེན་པའི་དོན་དུ་བཤད། །ཅེས་སོར་བདུད་བསྟན། ལམ་ལ་གནས་པ་ཉེ་བསྙེན་ཡིན། །སྲོག་འཛིན་བསྟན། ལམ་གྲོལ་གྲུབ་པ་སྒྲུབ་པ་ཡིན། །རྗེས་དྲན་བསྟན། ལམ་གྱི་འབྲས་བུ་མཐར་ཕྱིན་པ། །སྒྲུབ་པ་ཆེན་པོར་བསྟན་པའོ། །ཏིང་ངེ་འཛིན་བསྟན། རྟོགས་པ་རྣམ་བཞི་བསྙེན་སྒྲུབ་བཞི། །གསང་སྔགས་མི་བཟླས་དོན་ལ་བཞག །ཕྱག་རྒྱ་མི་བསྒོམ་མི་བསྐྱེད་པར། །ལྷུན་གྱིས་རྫོགས་ཏེ་འདུ་འབྲལ་མེད། །ཅེས་པས་གསང་བ་འདུས་པ་དང་གུར་དང་བརྟག་པ་གཉིས་པ་དང་རི་གི་ཨ་ར་ལི་དང་དཔལ་དུས་ཀྱི་འཁོར་ལོ་ནས་བཤད་པའི་བསྙེན་བསྒྲུབ་བཞི་དང་ཚུལ་ཁྱད་པར་མེད་པར་ཡོད་དོ། །ད་ལྟར་གྲགས་པའི་སྒྲུབ་ཆེན་ཞེས་བྱ་བ་འདི་ནི་རྙིང་མ་རང་ལུགས་ཀྱི་དཀྱིལ་འཁོར་གྱི་སྒྲུབ་མཆོད་ཆེན་པོ་ཞེས་པ་ཡིན་ནོ། །དེ་ལ་སྤྱིར་བཏང་དུ་ཕུན་སུམ་ཚོགས་པ་ལྔ་སྔོན་དུ་འགྲོ་དགོས་པར་བཤད་དེ། གནས་ཕུན་སུམ་ཚོགས་པ་ནི། དུས་འཁོར་རྩ་རྒྱུད་ལས། གང་ན་ས་སྐྱོང་ཆོས་ལྡན་ཞིང་། །གང་ཞིག་ཁོ་ནར་སྐྱེ་དགུ་རྣམས། །བདེར་གནས་ས་འཛིན་རྩོད་མེད་པ། །དེར་ནི་རྣལ་འབྱོར་བརྩམས་པར་བྱ། །ཞེས་པའི་གནས་ལ་བྱ། སྟོན་པ་ཕུན་སུམ་ཚོགས་པ་རྡོ་རྗེ་སློབ་དཔོན་ལ་བྱ་སྟེ། རབ་ཆོས་ཉིད་ཀྱི་བདེན་པ་མཐོང་བ། འབྲིང་ཡི་དམ་ལྷའི་གནང་བ་ཐོབ་པ། ཐ་མ་ཆོ་ག་ལག་ལེན་ལ་མཁས་ཤིང་བྱིན་རླབས་ཀྱི་བརྒྱུད་པ་སེལ་མེད་ཅིང་བར་མ་ཆད་པ་ཞིག་ལ་བྱ། དུས་ཕུན་སུམ་ཚོགས་པ་ཕྱི་ནང་གི་འབྱུང་བ་ཆ་སྙོམས་ཤིང་། དུས་ཀྱི་འཁྲུག་པ་དང་ནད་དང་མུ་གེ་ལ་སོགས་མི་བདེ་བ་མེད་པའི་དུས་སུ་བྱ། ཡོ་བྱད་ཕུན་སུམ་ཚོགས་པ་རང་རང་གི་གཞུང་ནས་འབྱུང་བའི་གང་དགོས་ཚང་བ་ལ་བྱ། གྲོགས་ཕུན་སུམ་ཚོགས་པ་དབང་རྟེན་ཐབས་ཤེས། རྒྱལ་ཚབ། རྒྱས་འདེབས། མངོན་ཤེས་སྤྲ་བརྟག། ཉུལ་བསྐྲོད། ཐུན་མཚམས་པ། ཚང་བསྐུལ་བ། ཕྲིན་ལས་པ། རྡུལ་ཕྱགས་པ། བྱན་ཕོ། བྱན་མོ། ཕྱི་ནང་བརྡའ་སྦྱོར་བ། ལས་ཀྱི་རྡོ་རྗེ་སྟེ་མེད་དུ་མི་རུང་བ་དང་དེར་འདུས་པ་དག་ལ་གོ། དེ་ནས་དཀྱིལ་འཁོར་གྱི་གཙོ་བོ་གང་ཡིན་པ་དེའི་དོན་དབང་ངམ་སྐུ་གསུང་ཐུགས་ཀྱི་བྱིན་རླབས་བསྩལ་པས། སྔར་སྔགས་ཀྱི་སྒོར་མ་ཞུགས་པ་དེར་འདུས་པ་རྣམས་ཀྱི་རྒྱུད་གསང་སྔགས་ཀྱི་སྣོད་རུང་དུ་བྱེད་པས། འདི་ལ་གསང་སྔགས་བཀའ་མ་པ་དག་བསྙེན་དབང་ཟེར། བཀའ་བརྒྱད་བདེ་གཤེགས་འདུས་པ་ལ་སོགས་པའི་གཏེར་མ་རྣམས་སུ་སྙིང་པོ་རྒྱུད་དབང་དུ་བཏགས། དེ་ནས་བསྒོམ་བཟླས་ཀྱི་ལུང་ཕོག་ནས་སྒྲུབ་པ་ལ་ཞུགས་པས་གསང་སྒྲོག་ཏུ་ག་ལ་འགྱུར་ཏེ་དབང་དང་ལུང་སྦྱིན་གྲུབ་པས་སོ། །དེ་ནས་གྲུབ་པ་རྟགས་དང་མཚན་མ་མཐོང་གི་བར་སྒྲུབ་པ་ལ་སྒྲུབ་པ་ཟེར། དེ་ལྟར་གྲུབ་ནས་ཐོག་མར་རྡོ་རྗེ་སློབ་དཔོན་གྱི་དབང་དང་དངོས་གྲུབ་བླངས། དེ་ནས་རིམ་གྱིས་སློབ་མ་ལ་དབང་བསྐུར་བ་ཡིན་ཏེ། རྒྱས་པར་ཞི་ཁྲོ་དང་ཕུར་པ་དང་། མ་གཤིན་གཉིས་དང་། བཀའ་བརྒྱད་དང་། བདུད་རྩི་སྒྲུབ་པ་དང་། ཤ་རིམ་སྒྲུབ་པ་རྣམས་སུ་ལྟའོ། །དེ་ལྟར་སྒྲུབ་པའི་སྔོན་དུ་དོན་དབང་དང་བཟླས་ལུང་ཕོག་པས་བསྙེན་དབང་། དེ་ནས་བསྒོམ་བཟླས་གཞུང་བཞིན་བྱ་བ་ཉེ་བསྙེན། ཐུན་མཚམས་སུ་དབང་དང་དངོས་གྲུབ་ལེན་པ་ནི་སྒྲུབ་དབང་། དངོས་ཀྱི་མཚན་མ་མཐོང་བ་ནི་སྒྲུབ་ཆེན་ཞེས་སྤྱིར་གྲགས་ལ། ཐོད་གར་ནམ་མཁའི་་ཡི་གེར་ནི། ཉེ་བསྙེན་ཡན་གོང་ལྟར་ལ། དངོས་གྲུབ་ཀྱི་མཚན་མ་མཐོང་ནས་སློབ་དཔོན་གྱི་དབང་བསྐུར་ཏེ་སྒྲུབ་དབང་། དེ་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་བསྒྲུབ་པ་སྒྲུབ་པ་ཆེན་པོ་ཞེས་འདོད་དོ། །ལུགས་འདི་ལ་སློབ་དཔོན་སྔ་མ་དག་གི་བཞེད་པ་མང་དུ་ཡོད་པར་གྲགས་ན་ཡང་། བདག་གིས་ནི་གཉིས་པོ་འདི་ལ་་མ་མཐོང་ངོ་། །སློབ་དཔོན་གྱིས་དབང་བསྐུར་བའི་སྔོན་དུ་བདག་འཇུག་བླངས་པ་ནི་ངེས་པར་བཤད་ཅིང་ཕྱག་སྲོལ་ལ་ཡང་ཡོད་མོད་ཀྱི། འོན་ཀྱང་བླ་མ་དེ་རྫོགས་པ་ཆེན་པོའི་དོན་རྒྱུད་ལ་འཕྲོད་པ་ཞིག་ཡིན་ན་སློབ་མ་ལ་ཇི་ལྟར་བསྐུར་བའི་ཚུལ་དུ་དབང་རྫས་ཕྲ་མོ་ཡན་ཆད་ནས་བླངས་དགོས་པ་མ་ཡིན་ཏེ། ཡེ་ཤེས་ཏིང་ངེ་འཛིན་གྱི་དབང་བླངས་པ་ཉིད་མཆོག་ཡིན་པས་སོ། །དེ་ལ་འཇམ་དཔལ་སྒྱུ་འཕྲུལ་དྲ་བ་ལས། ཡེ་ཤེས་དབང་བསྐུར་ཅོད་པན་ཅན། །རྫོགས་པའི་སངས་རྒྱས་རྒྱན་དུ་མཐོང་། །སྡུག་བསྔལ་གསུམ་གྱི་སྡུག་བསྔལ་ཞི། །གསུམ་སེལ་མཐའ་ཡས་གྲོལ་གསུམ་ཐོབ། །ཅེས་གསུངས་པ་དང་། ཡེ་ཤེས་རྔམས་པ་གློག་གི་འཁོར་ལོ་ལས། སེམས་ཀྱི་ཆོས་ལ་དབང་ཐོབ་ན། །རྫས་ཚིག་མཚན་མའི་དབང་རྣམས་ཀུན། །མ་བསྐུར་པར་ཡང་ཐོབ་པར་འགྱུར། །ཞེས་པས་དེ་ཐོབ་ནས་དེ་བཞིན་གཤེགས་པའི་ལས་རབ་འབྱམས་ལ་དབང་ཐོབ་པ་ཡིན་ནོ། །དེ་ལྟར་མ་ཐོབ་ན། དབང་ཆོག་ཇི་ལྟ་བའི་ཚུལ་གྱི་བདག་འཇུག་ལེན་པ་ལེགས་མོད་ཀྱི། དབང་ཆོག་གི་ཤར་བྱང་ཙམ་ཡིན་ནམ་སྙམ་མོ། །འོན་ཀྱང་དབང་ཐོབ་ལ་མ་ཉམས་པ་དེས་བདག་ཉིད་འཇུག་ཅིང་དབང་ལེན་པ་མི་འགོགས་ཏེ། བདག་ཉིད་ཞུགས་ཤིང་དབང་བླངས་པས་དབང་གི་ཆུ་བོ་མ་ཉམས་པ་དེ་གོང་འཕེལ་དུ་སོང་ནས་དངོས་གྲུབ་མྱུར་དུ་ཐོབ་པའི་རྒྱུ་བྱེད་པ་ཡིན་ནོ། །དོན་དུ་ན་དབང་བསྐུར་བའི་སྔོན་དུ་བདག་འཇུག་ལེན་པ་བླ་མ་རང་གིས་མ་ཚོར་བར་དམ་ཚིག་ཉམས་པ་སྲིད་པས་དེ་གསོ་བའི་ཆེད་དུ་ཡིན་གྱི། དེ་ལྟ་བུའི་སྐྱོན་མེད་ན་གསར་དུ་བདག་འཇུག་ལེན་དགོས་པའང་མ་ཡིན་ཏེ། བླ་མ་རང་ཉིད་དབང་ཐོབ་ལ་མ་ཉམས་པར་ཡོད་བཞིན་པ་ཡིན་པས་སླར་གཞན་ནས་བླང་མི་དགོས་པ་ཉིད་ཡིན་ལ། བྲན་མོ་ཆུ་ལེན་པ་ལྟར་གཅིག་ནས་བླངས་ཏེ་གཅིག་ཏུ་འཇོ་བ་ལྟ་བུ་མ་ཡིན་ནོ། །སློབ་དཔོན་དཀྱིལ་འཁོར་གྱི་ལྐོག་ཏུ་འདུག་ནས་སྒྲུབ་པའི་ལག་ལེན་ཀྱང་མ་འཁྲུལ་བ་ཡིན་ཏེ། འདི་ལྟར་སྣང་གྲགས་ཀྱིས་བསྡུས་པའི། །སྣོད་ཀྱི་འཇིག་རྟེན་གཞལ་ཡས་ཁང་། །བཅུད་རྣམས་ལྷ་ལ་གྲགས་པ་སྔགས། །དྲན་རྟོགས་ཆོས་ཉིད་དུ་ཤེས་ན། །གསང་སྔགས་པ་ཞེས་དེ་ལ་བྱ། །ཞེས་པ་འདི་གསང་སྔགས་ཀྱི་དོན་མཐར་ཐུག་ཡིན་པས། དེ་ལྟ་བུའི་དོན་ལས་མི་འབྲལ་བའི་སྐྱེས་བུ་དེ་གང་དུ་གནས་ཀྱང་བསྐྱེད་རྫོགས་ཀྱི་རོལ་པ་ལས་མ་འདས་པས་ན་གང་དུ་འདུག་ཀྱང་རུང་སྟེ། དཀྱིལ་འཁོར་གྱི་དྲུང་ཁོ་ནར་གནས་དགོས་པ་ཡང་མ་ཡིན་ནོ། །དབང་རྫས་རྒྱལ་ཚབ་ཀྱིས་ཐོགས་ཀྱང་དབང་སློབ་དཔོན་ལས་ཐོབ་པ་ཡིན་ཏེ། དཔེར་ན་ཕོ་ཉས་རྒྱལ་པོའི་ལུང་དང་བཀའ་རྟགས་ཁྱེར་ཏེ་འབངས་ཀྱི་ཚོགས་ལ་བསྒྲགས་པ་ན། ཕོ་ཉ་བའི་ངག་དེ་རྒྱལ་པོའི་ངག་ཏུ་འཛིན་པ་དང་མཚུངས་པ་ཉིད་དོ། །དེ་ཙམ་གྱི་རྒྱལ་ཚབ་དབང་བརྒྱུད་ལ་འཇུག་དགོས་ན། བདེ་བ་མྱུ་གུའི་རྒྱུད་ལས། ཕྱོགས་བཅུའི་རྒྱལ་བ་སྲས་བཅས་ཀྱི། །མཁའ་མཉམ་ཡེ་ཤེས་བདུད་རྩི་ནི། །རྡོ་རྗེའི་ལམ་ནས་རབ་བསྡུས་ནས། །བདེ་བ་བསྐྱེད་བྱེད་རིགས་ཀྱི་ཡུམ། །སྲས་རྣམས་གསང་བའི་དབང་བསྐུར་བས། །རྡོ་རྗེའི་བླ་མ་གཉིས་པའོ། །ཞེས་པ་དང་། ཡེ་ཤེས་འབྱུང་བ་ལས། ལྷན་ཅིག་སྐྱེས་པ་དཔེ་བྲལ་བ། །ནམ་མཁའ་དང་ནི་མཉམ་པར་སྦྱོར། །རིགས་མཉམ་དཔེ་མེད་བདེ་སྟེར་མ། །སྲིང་མོ་དེ་ཉིད་བླ་མར་བསྔགས། །ཞེས་པས་གསང་བའི་དབང་དང་ཤེས་རབ་ཡེ་ཤེས་ཀྱི་དབང་གཉིས་རིག་མ་ལ་བརྟེན་ནས་ཐོབ་དགོས་པར་གསུངས་ན། རིག་མ་དེ་དབང་བརྒྱུད་ལ་འཇུག་གམ་ཅི། ལས་བྱང་ཚར་གཅིག་གི་བདག་མདུན་བུམ་གསུམ་ཅིག་ཆར་དུ་སྒྲུབ་པའི་ཚུལ་ཡང་། སྔགས་བླ་ན་མེད་པའི་རྣལ་འབྱོར་པ་དེའི་བསམ་དོན་ནི། ཇི་ལྟར་སྣང་བ་འདི་ཐམས་ཅད་ཡེ་ཤེས་ཀྱི་ངོ་བོར་དུས་རྟག་ཏུ་ལོངས་སྤྱོད་པ་ཡིན་ལ། དེའི་རྒྱུ་མཚན་ཡང་། སྣང་གྲགས་ཀྱི་ཆོས་ཇི་སྙེད་པ་ཐམས་ཅད་ཡེ་གདོད་མ་ནས་ཡོད་མ་མྱོང་བས་གཉིས་དང་གསུམ་དུ་འཛིན་པ་ལ་སོགས་པ་སྤྲོས་པའི་མཐའ་ཐམས་ཅད་དང་བྲལ་བ་འདི་ཉིད་ལ་མི་འདྲ་བའི་དབྱེ་བ་ཅི་ཡང་ཡོད་པ་མ་ཡིན་པས་རང་བཞིན་ཆོས་ཀྱི་སྐུ་དང་། མཆོག་གི་དང་པོའི་སྐྱེས་བུ་དང་། ཐུགས་རྡོ་རྗེ་དང་། སྒྱུ་འཕྲུལ་དྲ་བ་ལ་སོགས་པའི་མིང་གིས་གདགས་སོ། །དེའི་ལྟ་བུའི་ཆོས་ཉིད་བསམ་དུ་མེད་པ་དེའི་རང་རྩལ་ལས། ཆུ་ལས་ཉ་ལྡང་བ་ལྟར་དུ་བདག་མདུན་བུམ་གསུམ་སྐད་ཅིག་ལ་ལྷའི་འཁོར་ལོ་ཇི་ལྟ་བ་བཞིན་དུ་བསྐྱེད་ནས་གཞན་ནས་འབྱུང་བ་མེད་པའི་ཚུལ་གྱིས་སྤྱན་དྲངས་པ་དང་། རང་གི་རིག་རྩལ་མ་འགགས་པ་ལས་བྱུང་བའི་མཆོད་པའི་སྤྲིན་སྤུངས་ཀྱིས་དམིགས་པ་མེད་པའི་ཚུལ་དུ་རང་ལ་མཆོད་པ་དང་། སངས་རྒྱས་རྣམས་ཀྱི་ཡོན་ཏན་ལྷུན་གྱིས་གྲུབ་ཅིང་སྤྲོས་པ་མཐའ་དག་ལས་གྲོལ་བའི་ཚུལ་གྱིས་བསྟོད་པ་དང་། ཟག་པ་མེད་པའི་བདེ་བ་ཆེན་པོའི་རང་བཞིན་རྣམ་པར་རྟོག་པའི་རྒྱུན་ལས་འདས་པའི་ཚོགས་ཀྱི་འཁོར་ལོའི་མཆོད་པ་འབུལ་བ་ལ་སོགས་པ། སོ་སོའི་ལས་བྱང་གི་ཚིག་གིས་གསལ་བཏབ་ནས་ཁྱེར་ཏེ། སྔགས་ཀྱི་བཟླས་པ་ལས་སོ་སོའི་གོ་རིམ་ལྟར་གསལ་ལ་རྟོག་པ་མེད་པར་འཛབ་དགོངས་དང་མ་བྲལ་བར་བཟླས་པས་བདག་མདུན་བུམ་གསུམ་ཅིག་ཆར་དུ་སྒྲུབ་ཟིན་པར་མ་ཟད། རྒྱུད་སྡེ་རྒྱ་མཚོའི་དཀྱིལ་འཁོར་གྱི་ལྷ་ཐམས་ཅད་གདན་ཐོག་གཅིག་ཏུ་སྒྲུབ་ཟིན་པ་ཡིན་ཏེ། རིགས་བརྒྱ་ལ་སོགས་པའི་ལྷ་ཐམས་ཅད་ཀྱང་རང་གི་སེམས་རྣམ་པར་དག་པའི་རོལ་པ་ཡིན་པས་སོ། །དེ་ལྟ་བུའི་ཆོས་ཉིད་ཀྱི་རོལ་པ་དེ་ལ་བདག་བསྐྱེད་པ་དང་། མདུན་བསྐྱེད་པ་དང་། བུམ་པ་བསྐྱེད་པ་ལ་སོགས་པའི་འཛིན་རྟོག་གང་ཡང་མེད་པ་ནི་དཀྱིལ་འཁོར་སྒྲུབ་པའི་མཆོག་སྟེ། སྤྲོས་པ་མེད་པའི་རང་བཞིན་ལ། །ལྷ་དང་སྔགས་ནི་ཡང་དག་གནས། །ཞེས་སོ། །དེ་དག་གི་ལུང་མང་པོ་གོ་རིམ་བཞིན་དུ། ཇི་ལྟར་དྭངས་པའི་ཆུ་ཀླུངསལས། །ཉ་དག་མྱུར་དུ་འཕར་བ་ལྟར། །དེ་བཞིན་སྟོང་པའི་འོད་གསལ་ལས། །སྒྱུ་འཕྲུལ་དྲ་བ་བཞེངས་པར་འགྱུར། །ཞེས་པ་དང་། དྲིལ་བུ་པའི་གཞུང་ལས། སེམས་ཅན་རྫུས་ཏེ་སྐྱེ་བ་ལྟར། །ས་བོན་མེད་པར་བསྐྱེད་པར་བྱ། །ཞེས་པ་དང་། བརྟག་པ་གཉིས་པ་ལས། ལྷ་ཉིད་རང་ལ་རང་ཉིད་ལྷ། །རང་དང་ལྷན་ཅིག་སྐྱེས་པ་ལ། །སྤྱན་འདྲེན་བཞུགས་གསོལ་འདིར་མི་དགོས། །རང་སེམས་བླ་མ་ལྷ་རུ་གནས། །ཞེས་པ་དང་། རྟ་མགྲིན་བདུད་རྩིའི་་ཐིག་པ་ལས། ཕྱི་ནང་གསང་བའི་མཆོད་ཆེན་པོ། །རང་ལས་སྤྲོས་ཤིང་རང་ལ་མཆོད། །མ་འགག་ཡེ་ཤེས་རོལ་པའི་རྒྱན། །རང་བྱུང་ལྷུན་གྲུབ་གཞན་ནས་མིན། །ཞེས་དང་། མཆོད་པ་ཆེན་པོ་ཆགས་པ་ཆེ། །ཆགས་པ་ཐམས་ཅད་སེལ་བར་བྱེད། །ཅེས་པ་དང་། སྤྱོད་འཇུག་ལས། ཡིད་བཞིན་ནོར་བུ་དཔག་བསམ་ཤིང་། །ཇི་ལྟར་རེ་བ་ཡོངས་བསྐོང་བ། །དེ་བཞིན་གདུལ་བྱའི་སྨོན་ལམ་གྱིས། །དབང་གི་རྒྱལ་བའི་སྐུར་སྣང་ངོ་། །ཞེས་པ་དང་། རྟོག་པ་བདུན་པ་ལས། མི་འཛིན་སྒྱུ་མ་ལྟ་བུ་ལ། །དགོས་པའི་ཚུལ་གྱིས་རོལ་པར་མཛད། །ཅེས་པ་དང་། ཐུགས་སྲོག་སྔགས་ཀྱི་འོད་ཟེར་སྤྲོ། །བསྡུས་ཏེ་སྣང་སེམས་གཉིས་མེད་བསྲེ། །རྟག་ཏུ་བཟླས་བརྗོད་བརྩོན་གྱུར་ན། །ལོངས་སྐུ་པདྨའི་སེམས་དཔའ་འགྲུབ། །ཅེས་རྟ་མགྲིན་སྒྲུབ་ཐབས་སུ་བཤད་པ་ལྟར་རོ། །དེ་ལྟ་བུའི་རྣལ་འབྱོར་པ་ལ་སྣང་སྲིད་ཐམས་ཅད་ཡེ་ཤེས་ཀྱི་དཀྱིལ་འཁོར་དུ་ཤར་བ་ཡིན་ནོ། །འཛབ་ཅེས། ཛ་པ་ཞེས་པའི་ཟུར་ཆག་པ་ཡིན་ལ། བོད་སྐད་དུ་བཟླས་པ་ཞེས་བྱ་སྟེ། གོང་དུ་སྨོས་པ་ལྟར་བཟླས་པའི་ལུང་སྦྱིན་པ་ཡིན་པས་གསང་སྒྲོག་ཏུ་མི་འགྱུར་ཞིང་། འཛབ་དབྱངས་སུ་གྱེར་བ་འདི་ཡང་། བུང་བ་ཚང་ཚོལ་བ་ལྟ་བུའི་བཟླས་པ་ཞེས་དང་། རྡོ་རྗེ་སྲིན་པོའི་ངུར་སྒྲ་ཞེས་རང་ལུགས་ཀྱི་གཞུང་ནས་བཤད་པས་པཎ་གྲུབ་ཀྱི་དགོངས་པ་ཡང་ཡིན་ནོ། །སྔགས་དབང་ངག་ལ་བསྐུར་བ་ནི་རང་རྐང་གི་སྐབས་ཐོབ་ཡིན་ལ། གསང་དབང་ལ་ཡང་། དབང་རིན་ཆེན་འཁོར་ལོ་ལས། དང་པོ་ཐབས་མཆོག་ཡབ་ལས་ཏེ། །གཉིས་པ་ཤེས་རབ་ཡུམ་ལས་སོ། །ཞེས་པས་བླ་མ་ནི་སློབ་དཔོན་གྱི་རིག་མ་ཡིན་ལ། སློབ་མ་ནི་བུམ་དབང་སྔོན་དུ་སོང་བ། དབང་གོང་མ་ལ་མོས་པ། གཙང་རྨེའི་རྟོག་པ་ཆུང་བའོ། །དཀྱིལ་འཁོར་ནི་རིག་མ་དེའི་བྷ་ག་སྟེ། དབང་རིན་འཁོར་ལས། དཀྱིལ་འཁོར་ལུས་སུ་གསུང་པ་སྟེ། །དེ་ནི་བྷ་གར་བསྟན་པའོ། །ཞེས་པའོ། །བསྐུར་བའི་གནས་ནི་སློབ་མའི་ལྕེ་ལ་སྟེ། འདུས་པ་ལས། རྡོ་རྗེའི་ལམ་ནས་བྱུང་ནས་ནི། །སློབ་མའི་ཁར་ནི་དབབ་པར་བྱ། །འདི་ནི་གསང་སྔགས་དེ་ཀུན་གྱི། །དབང་བསྐུར་བ་ཡི་གོ་འཕང་མཆོག །ཅེས་སོ། །སྒྲིབ་པ་ངག་གི་འདག་པ་སྟེ། རིན་འཁོར་ལས། ངག་གི་སྒྲིབ་པ་དེས་སྦྱངས་ནས། །ཞེས་སོ། །ནུས་པ་ནི། ཐབས་དང་ཤེས་རབ་གཉིས་སུ་མེད་པ་སྟོང་པའི་ངང་དུ་རོ་གཅིག་པ་སྟེ། ཤེས་རབ་ཐབས་ཀྱི་ང་རྒྱལ་བྱེད། །ཆོས་ཀུན་རོ་གཅིག་ཤེས་རབ་འགྱུར། །སངས་རྒྱས་ས་ནི་མངོན་སུམ་ཐོབ། །ཅེས་སོ། །འབྲས་བུ་ནི་ཤེས་རབ་དྲི་མ་མེད་པ་ལ་སོགས་ལ་ཐོབ་པ་ཡིན་ཏེ། ཤེས་རབ་དྲི་མེད་འབྲས་བུར་བཤད། །རྒྱུ་མཐུན་ཁུ་བའི་ངོ་བོ་ཡིན། །ཞེས་དབང་རིན་ཆེན་འཁོར་ལོ་ནས་གསུངས་སོ། །དེ་ལྟར་གསང་དབང་གི་དགོས་པ་ནི། དེ་རྣམས་ཡིན་གྱི། སྔགས་བཟླ་བ་ཁོ་ན་ལ་གསང་དབང་ངེས་པར་བསྐུར་དགོས་པ་མ་ཡིན། དེ་དག་གིས་ནི་སྒྲུབ་ཆེན་གྱི་ལག་ལེན་མ་འཁྲུལ་བའི་ཚུལ་རྒྱས་པར་བསྟན་པ་ཡིན་ནོ། །ཨུ་རྒྱན་གྱི་ཐུགས་སྔགས་སུ་རྒྱ་སྐད་བོད་སྐད་འདྲེས་པ་ལ་ཡང་སྐྱོན་མ་མཆིས་ཏེ། འདི་དག་སཾ་སྐྲྀ་ཏའི་སྐད་མ་ཤེས་པས་བོད་སྐད་དུ་བཞག་པ་མ་ཡིན། ནུས་པ་མྱུར་དུ་འབྱུང་བའི་ཕྱིར་བསྡེབས་པ་ཡིན་ཏེ། ཇོ་བོ་ཆེན་པོ་རྗེའི་རྟ་མགྲིན་གྱི་སྔགས་ཀྱང་གཞན་རྣམས་ལེགས་སྦྱར་དུ་ཡོད་པ་ལ། རྒྱལ་འགོང་རྒྱལ་ཚེ་ལ་ཤ་ལ་ངོམ། རོ་ལ་ཁྲག་འཐུང་། ཞེས་བོད་སྐད་སོར་བཞག་མང་པོ་དང་། གཞན་ཡང་སྔགས་གསར་མར། རྡོ་རྗེ་ལྕེ་དབབ་པའི་རྒྱུད་ལས། ས་གདོན་ནག་པོ་སོད་སོད། ཕྱུག་རྩི་ཕཊ། ཅེས་སོགས་མང་པོ་དང་། རྡོ་རྗེ་བདེ་ཁྲོས་ཀྱི་རྒྱུད་ལས། མ་ར་ན་མྱོས་བྱིངས་ཐུམས་རིལ་ཛ། །ཞེས་སོགས་མང་པོ་དང་། ཕྱག་རྡོར་གསང་བ་མངོན་བསྟན་གྱི་རྒྱུད་ལས། མ་ར་ཡ་རཀྟ་རྔུབས་རྔུབས། མ་ར་ཡ་ཀེམ་ཆོམས་ཆོམས། མ་ཧཱ་མ་ནུ་མ་ར་ཡ་གཏུབས་གཏུབས། སོགས་དང་། ཧ་ཀྲི་ཁུག་ཧ་ཀྲི་ཁུག །ཚལ་པ་ཚལ་པ། རྦད་ལིང་རྦད་ལིང་། སྲོག་ཚིག་ནན་རྦད། ལུས་དུལ་མ་ར་ཡ་རྦད། ཅེས་སོགས་མང་པོ་དང་། གཏུམ་པོ་རྒྱུད་ཕྱི་མར། རམ་ནཱ་ག་ཤིག །ནཱ་ག་བཟློག །ནཱ་ག་བྱེར། ཞེས་སོགས་དང་། ཚུབ་ཚུབ་ཏུ་ཤ་རྦུད། སརྦ་ཙིཏྟ་གཟེར་ཐུམས། ངག་གྲམ་ཏི་ཏིག་ཏིག་གྲ་ཐ་བྲག་ཤིག །དང་། ཨཱོཾ་ཉི་མ་ས་ལ་ནན། གུ་ནི་ཞི། ར་ཙ་ཙིཏྟ་རྦད་ནན་ཧུར་ཐུམས་ཛཿདང་། གཏུམ་པོ་རྒྱུད་ཕྱི་མའི་ཕྱི་མར། ཁ་རག་ནག་པོ་ཁྲག་མ་ར་ཡ་ནྲྀ་མ་ར་ཛ་ཁུག །ཅེས་སོགས་མང་པོ་དང་། མགོན་པོ་གསང་བ་དངོས་གྲུབ་འབྱུང་བའི་རྒྱུད་ཀྱི་ལྷ་མོའི་སྔགས་ལ། རག་མོ་ཙིཏྟ་ཁ་རག་མ་ཧཱུྃ་བྷྱོ། ཞེས་པ་ནས། ཚལ་པ་ཚལ་པ་ནི་ཤ་ཀུ་རུ་ས་མ་ཡ་གཏུབས་གཏུབས་ཛཿཞེས་སོགས་མང་པོ་དང་། ཕྱག་ན་རྡོ་རྗེ་ཨུ་ཙརྱའི་སྔགས་ལ་ཡང་། པུ་པུ་དན་དུ་ནག་པོ་བམ་ཙི་ཙི་རྒྱས་དྲག་ཐུར་སྙིང་ལ་ཐུར་ཉམས་རྩ་བཞི་སྐུམས་ཤན་ཤན་སྲོག་ལ་ཤན་སོགས་མང་པོ་དང་། དཔལ་ས་སྐྱ་པའི་བསྟན་བསྲུང་པུ་ཏྲ་མིང་སྲིང་གི་སྔགས་ལ་ཡང་ཡང་། ཨ་ལི་ཨ་ལི་མ། ཛ་ཛ་ཤམ་ཤམ། ལི་ཤིག་སྟེ་རྨུགས་རྨུགས་སྤུ་གྲི་ཨ་ལི་མ། ཞེས་སོགས་མང་པོ་སྣང་ངོ་། །འདི་དག་ལས་ཁ་ཅིག་ནི་མ་འོངས་པའི་དུས་སུ་སྔགས་ཀྱི་ནུས་པ་མི་འབྱུང་བས། སྔགས་འགྲོ་བ་གཞན་གྱི་སྐད་དུ་བསྒྱུར་ནས་བཟླས་ན་ནུས་པ་འབྱུང་བ་ལ་དགོངས་ནས་རྡོ་རྗེ་འཆང་ཉིད་ཀྱིས་གསུངས་པ་ཡང་ཡོད་ལ། ཁ་ཅིག་ནི་སྡུད་པ་་པོ་རྣམས་ཀྱིས་དེ་ལྟར་བསྡུས་ཤིང་། འགའ་ཞིག་ནི་ལོ་པཎ་གྲུབ་པ་བརྙེས་པ་རྣམས་ཀྱིས་མ་འོངས་པ་ལ་ཕན་པར་དགོངས་ནས་དེ་ལྟར་དུ་བསྒྱུར་བ་ཡང་ཡོད་དེ། པུ་ཏྲའི་སྔགས་འདི་ལོ་ཆེན་རིན་བཟང་བོན་པོ་དང་འགྲས་པའི་དུས་སུ་པུ་ཏྲ་འགྲོ་མ་འདོད་པ་ལ་སྔགས་ཞང་ཞུང་གི་སྐད་དུ་བསྒྱུར་བས་ནུས་པ་ཐོན་ཞེས་པ་ལོ་རྒྱུས་སུ་འབྱུང་ཞིང་། སློབ་དཔོན་པདྨས་གཏེར་དུ་སྦས་པ་རྒྱ་སྟོན་པདྨ་དབང་ཕྱུག་གིས་ཕྱུང་བ་ལ་ཡང་དེ་ལྟར་ཡོད་པ་ཡིན་ནོ། །གཞན་ཡང་རྙིང་མའི་རྒྱུད་རྣམས་ན། འ་དང་ཅ་ཆ་ཇ་ཞ་ས་སོགས་རྒྱ་གར་ལ་མ་གྲགས་པ་ཡོད་དེ། དེ་དག་ཀྱང་འགྲོ་བ་མཐའ་ཡས་པའི་སྐད་དུ་གསུངས་པའི་དོན་ཡིན་པས་ན་ཡི་གེ་དེ་དག་མཁའ་འགྲོ་མ་དང་འགྲོ་བ་གཞན་གྱི་སྐད་ལ་ཡོད་དོ། །ཡང་དེ་བཞིན་གཤེགས་པའི་གསུང་གཅིག་ལ་སོ་སོའི་སྐད་དང་དབང་པོ་དང་བསམ་པ་ཇི་ལྟ་བ་བཞིན་དུ་སོ་སོར་གོ་བ་ཡིན་ཏེ། སངས་རྒྱས་ཕལ་པོ་ཆེའི་མདོ་ལས། རྒྱལ་བའི་གསུང་དབྱངས་གཅིག་ལ་མཐའ་ཡས་པའི། །ཆོས་ཀྱི་སྒོ་མོ་སྣ་ཚོགས་ཀུན་ཀྱང་འབྱུང་། །ཞེས་པ་དང་། ཡང་། འཇིག་རྟེན་ཀུན་གྱི་མོས་པ་སྣ་ཚོགས་དང་། །བསམ་པ་ཇི་བཞིན་སྦྱོར་བ་རྣམ་དཔྱོད་པ། །དེ་དག་ཇི་བཞིན་རྒྱལ་བའི་ཆོས་སྟོན་ཏེ། །རང་བྱུང་མོས་པ་མཁྱེན་པའི་སྟོབས་སྟོན་ཏོ། །ཞེས་པ་དང་། ཡང་། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པ། །ཐམས་ཅད་སྐད་དུ་བདག་གིས་ཆོས་བསྟན་ཏོ། །ཞེས་པ་དང་། བདེ་མཆོག་སྡོམ་འབྱུང་ལ་སོགས་པ་ནི་ཀླ་ཀློའི་སྐད་དུ་གསུངས་པ་ལ་སོགས་པ་མཐའ་ཡས་ཤིང་། དྲི་མེད་འོད་ལས། འདིར་མ་འོངས་པའི་དུས་ན་བྱིས་པའི་སྐྱེ་བོ་མིང་ཚིག་ཡི་གེ་ལ་བརྟེན་པ་དེ་དག་གིས་རྒྱུད་ཐམས་ཅད་དུ་འདི་སྐད་བདག་གི་ཞེས་སོགས་སངས་རྒྱས་ཀྱི་བཞུགས་གནས་ངེས་པར་བསྟན་པར་དེ་བཞིན་གཤེགས་པས་གསུངས་པར་གང་བརྗོད་པ་དེ་ནི་མ་ཡིན་ཏེ། གང་གི་ཕྱིར་ཆོས་སྟོན་པ་པོའི་སངས་རྒྱས་དོན་ལ་བརྟེན་པ་ཉིད་ཀྱི་ཕྱིར་དང་། སྡུད་པར་བྱེད་པ་པོ་རྣམས་ཀྱིས་ཀྱང་ཡུལ་སྣ་ཚོགས་ཀྱི་སྐད་ཀྱིས་ཡང་དག་པར་འབྱེད་པའི་ཕྱིར་རོ། །ཞེས་པས། སྟོན་པ་སངས་རྒྱས་ཀྱིས་འགྲོ་བ་མཐའ་ཡས་པའི་སྐད་དུ་གསུངས་པ། སྡུད་པ་པོ་རྣམས་ཀྱིས་ཀྱང་ཡུལ་སོ་སོའི་སྐད་ཀྱིས་བསྡུས་པར་གསུངས་ཤིང་། ཡང་དེ་ཉིད་ལས། རེ་ཞིག་ཡུལ་གྱི་ཁྱད་པར་གཞན་ལྟ་ཞོག་གི། དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པ། འཕགས་ཡུལ་འདིར་བཅོམ་ལྡན་འདས་ཡོངས་སུ་མྱ་ངན་ལས་འདས་པར་གྱུར་པ་ན། སྡུད་པར་བྱེད་པ་པོ་དག་གི་ཐེག་པ་གསུམ་གླེགས་བམ་ལ་བྲིས་ཏེ། དེ་བཞིན་གཤེགས་པའི་ངེས་པའི་སྡེ་སྣོད་གསུམ་མ་ག་ཏའི་སྐད་ཀྱིས་སོ། །མདོ་སྡེ་ནི་སིན་དྷུའི་སྐད་ཀྱིས་སོ། །ཕ་རོལ་ཏུ་ཕྱིན་པའི་ཚུལ་དང་སྔགས་ཀྱི་ཚུལ་ནི་ལེགས་སྦྱར་གྱི་སྐད་ཀྱིས་སོ། །རྒྱུད་དང་རྒྱུད་གཞན་ནི་ལེགས་སྦྱར་དང་ཐ་མལ་གྱི་སྐད་དང་། ཟུར་ཆག་དང་། ལེགས་སྦྱར་མ་ཡིན་པ་རི་ཁྲོད་པ་ལ་སོགས་པ་ཀླ་ཀློའི་སྐད་ཀྱིས་ཏེ། དེ་ལྟ་བུ་ལ་སོགས་པ་ཐམས་ཅད་མཁྱེན་པས་བསྟན་པའི་ཆོས་རྣམས་སྡུད་པར་བྱེད་པ་པོས་བྲིས་སོ། །དེ་བཞིན་དུ་ཐེག་པ་གསུམ་བོད་ཀྱི་ཡུལ་དུ་བོད་ཀྱི་སྐད་ཀྱིས་བྲིས་ཏེ། རྒྱ་ནག་ཏུ་རྒྱ་ནག་གི་སྐད་ཀྱིས་སོ། །དེ་བཞིན་དུ་རྒྱ་ནག་ཆེན་པོ། ས་ར་སི་ཀ།།ཙམ་པ་ཀ །སྤྲེའུའི་ཡུལ། གསེར་ཞེས་བྱ་བ། རུག་མ་སུ་རམ་མའི་སྐད་ཀྱིས་སོ། །དེ་ལྟར་གྲོང་བྱེ་བའི་བདག་ཉིད་ཡུལ་དགུ་བཅུ་རྩ་དྲུག་རྣམས་སུ་དགུ་བཅུ་རྩ་དྲུག་གི་སྐད་ཀྱིས་སོ། །དེ་བཞིན་དུ་དུམ་བུ་བཅུ་གཉིས་དང་། མཐོ་རིས་དང་། མིའི་ཡུལ་དང་ས་འོག་རྣམས་སུ་སེམས་ཅན་སྣ་ཚོགས་ཀྱི་སྐད་ཀྱིས་སྡུད་པར་བྱེད་པ་པོ་དག་གིས་ཐེག་པ་གསུམ་བྲིས་ཏེ། ཉན་ཐོས་རྣམས་ཀྱིས་ཉན་ཐོས་ཀྱི་ཐེག་པ་དང་། རང་སངས་རྒྱས་རྣམས་ཀྱིས་རང་སངས་རྒྱས་ཀྱི་ཐེག་པ་དང་། བྱང་སེམས་རྣམས་ཀྱིས་ཐེག་པ་ཆེན་པོ་ཕར་ཕྱིན་དང་། ཐེག་པ་ཆེན་པོ་གསང་སྔགས་རྒྱུ་དང་འབྲས་བུའི་བདག་ཉིད་དེ། སྡུད་པར་བྱེད་པ་པོ་སྣ་ཚོགས་ཀྱིས་སེམས་ཅན་རྣམས་འདུལ་བར་བྱེད་པའི་དོན་དུའོ། །སྡུད་པར་བྱེད་པ་པོ་སྣ་ཚོགས་ཀྱིས་ཡུལ་སྣ་ཚོགས་ཀྱི་སྐད་ཀྱིས་བྲིས་པའི་ལུང་དང་རིགས་པ་འདིས་རྣམ་པར་དཔྱད་པས་ན། སངས་རྒྱས་བཅོམ་ལྡན་འདས་ཐམས་ཅད་མཁྱེན་པ། ཐམས་ཅད་མཁྱེན་པའི་སྐད་ཀྱིས་ཆོས་སྟོན་པ་པོ་ཡིན་གྱི། ཁྱབ་འཇུག་དང་དྲག་པོ་ལ་སོགས་པ་གཞན་ནི་མ་ཡིན་ནོ། །ཅི་སྟེ་ཁྱབ་འཇུག་དང་དྲག་པོ་ལ་སོགས་པ་རྣམས་ཀྱི་ནང་ན་ཡོན་ཏན་འདི་དག་རྫོགས་པ་འགའ་ཞིག་ཡོད་ན། དེ་ཡང་བདག་ཅག་གིས་རྣམ་པ་ཐམས་ཅད་དུ་ཕྱག་བྱ་བ་དང་། མཆོད་པ་དང་། བཀུར་སྟིར་བྱ་བ་ཡིན་ནོ། །ཞེས་གསུངས་པ་ན། མདོ་རྒྱུད་རྣམས་ཀྱི་ཚིག་དང་། སྔགས་ཀྱི་སྒྲ་རྣམས་སཾ་སྐྲྀ་ཏའི་སྐད་ཁོ་ནར་ངེས་པ་མ་ཡིན་པའི་ཚུལ་གསལ་བར་བསྟན་ཟིན་ཏོ། །རྩལ་རྩལ་མང་པོ་སྔགས་དང་གསང་མཚན་ལ་ཡོད་པས་རྙིང་མ་བོན་དང་འདྲེས་པ་ཡང་མི་འགྲུབ་སྟེ། ཆོས་ཀྱི་སྒོ་བརྒྱད་ཁྲི་བཞི་སྟོང་གི་ཆ་འདྲ་བ་ཙམ་རེ། བོན་བརྒྱད་ཁྲི་བཞི་སྟོང་ལ་ཡང་ཡོད་པས། མཐར་ཐུག་གི་སྐྱེལ་སོ་མི་གཅིག་ཀྱང་། གནས་སྐབས་སུ་འདྲ་བ་མང་པོ་སྣང་བས་མ་ངེས་པ་ཡིན་ནོ། །སྔགས་སྒྲ་རྒྱ་མིན་བོད་མིན་བཀླག །ཅེས་འབྱུང་བ་ཡང་། རྒྱ་སྐད་མ་དག་པར་འདོན་པ་རྣམས་ལ་གསུངས་པ་ཡིན་ལ། ཐོད་ཕྲེང་རྩལ་ཞེས་བོད་སྐད་སོར་བཞག་རྒྱ་མིན་བོད་མིན་དུ་མི་འགྲུབ་པོ། །

47.2K