༄༅། །ཀརྨ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༡༠

ཡང་ལ་ལ་དག་ནི་ཐོས་གྲོལ་བྱ་བ་ཡིན་ཟེར། ཚེ་འདས་དང་རོའི་རྣ་བར་དཔེ་ཀློག་པ་དང་། དེ་འབྲི་བ་ལ་གཙོ་བོར་འཛིན་ལ་དེས་གྲོལ་བར་རློམ། དེས་ན་དེ་དག་གི་ཚིག་རྣ་བར་ཐོས་པ་ཙམ་གྱིས་དོན་རྒྱུད་ལ་མ་སྐྱེས་ཀྱང་གྲོལ་བའམ། དོན་རྒྱུད་ལ་སྐྱེ་དགོས། ཐོས་ཙམ་གྱིས་མི་གྲོལ་བར་འདུག་པ་ནི་དངོས་སུ་གྲུབ་ལ། དོན་རྒྱུད་ལ་སྐྱེས་ན་ནི་གཞན་གྱིས་ཀྱང་གྲོལ་བར་འགྱུར་བས་ཐོས་གྲོལ་གྱི་གདགས་གཞི་མ་གྲུབ་ལ། དེའི་དོན་རྒྱུད་ལ་སྐྱེ་བ་ལ་གོ་དགོས་སོ། །གོ་བ་ལ་རྟོགས་དགོས་སོ། །རྟོགས་པ་ལ་དེ་དག་གི་ཚིག་དོན་ལ་གོ་བ་རྐང་ཚུགས་པ་ཞིག་སྐྱེས་པ། དེ་རྗེས་ཉམས་སུ་བླངས་པ་ཞིག་དགོས་ན། ལམ་གཞན་ནས་ཀྱང་དེ་ཀ་ལྟར་བགྱི་བར་བསྟན་ཏེ་ཐོས་པས་མི་གྲོལ་བའོ། །ཞེས་གླེང་ན་ཐོས་པས་གྲོལ་བའི་སྒྲུབ་བྱེད་སྨྲ་རྒྱུ་ཅི་ཡོད།

ཅེས་གསུངས་པ་ལ། དེ་ནི་ཚིག་ཐོས་པས་དོན་རྒྱུད་ལ་སྐྱེས་ཏེ་གྲོལ་བ་ཡིན་ཏེ། མདོ་སྡེ་དག་ལས་ཀྱང་། བཅོམ་ལྡན་འདས་ཀྱི་ཆོས་ཀྱི་རྣམ་གྲངས་འདི་བཤད་པ་ན་ལྷའི་བུ་གང་དག་སྟོང་ཕྲག་གཅིག་མཆིས་པ་དེ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཐོབ་སྟེ་ཞེས་པ་དང་། བྱང་ཆུབ་སེམས་དཔའ་དྲུག་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་སྟེ། ཞེས་ཐོས་པ་དང་དོན་རྒྱུད་ལ་སྐྱེས་ཏེ་གྲོལ་བར་གསུངས་པ་རྣམས་དང་ཚུལ་མཚུངས་པ་ཡིན་ནོ། །དེ་ཡང་སྔགས་གསར་མའི་བསམ་གྱིས་མི་ཁྱབ་པའི་རྒྱུད་ལས། རྟོགས་དང་གོམས་པ་མཐར་ཕྱིན་པ། །འདི་ལ་ཡོད་པ་མ་ཡིན་ཏེ། །རྟོགས་པའི་སྐད་ཅིག་དེ་ཉིད་ལ། །བཅུ་པའི་ས་ལ་ངེས་པར་གནས། །ཞེས་གསུངས་པས་ན། འདིར་གདམས་ངག་གི་དོན་བསྒྲགས་པ་དེ་ཐོས་པ་ཙམ་གྱིས་རྒྱུད་ལ་ངོ་འཕྲོད་ནས་བདེ་བླག་ཏུ་རྟོགས་པ་ཡིན་ཞིང་། ཇི་སྐད་དུ། གོ་བ་དང་ནི་རྟོགས་པ་གཉིས། །དོན་གཅིག་མིང་གི་རྣམ་གྲངས་ཡིན། །ཞེས་པ་དང་། སཾ་སྐྲྀ་ཏ་ལ་སྐད་དོད་ཀྱང་གཅིག་ཡིན་པས། གོ་བ་དང་རྟོགས་པ་དོན་གཅིག།།དེ་ལྟར་རྟོགས་པ་དེ་ཉིད་མི་བརྟན་པོ་ལ་ཕྲིན་བསྐུར་བ་ལྟར་མ་བརྗེད་པར་བྱས་པས། བར་དོའི་སྣང་བ་སྒྲ་འོད་ཟེར་གསུམ་ལ་སོགས་པ་རང་སྣང་དུ་ངོ་ཤེས་པས། འོད་གསལ་མ་བུ་འཕྲོད་པའམ། ཟུང་དུ་འཇུག་པའི་ཚུལ་གྱིས་སྐད་ཅིག་དེ་ཉིད་ལ་འཚང་རྒྱ་བ། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་གསུངས་པ་ལྟར་གྲོལ་བའོ། །འདི་ནི་རྟོགས་པ་དང་གྲོལ་བ་དུས་མཉམ་པའམ། ཤར་གྲོལ་དུས་མཉམ་གྱི་སྐབས་དང་འདྲ་བས་གདམས་པ་བཏབ་པ་མ་བརྗེད་པ་ཁོ་ནས་རང་གྲོལ་བ་ཡིན་པས་ན་ལམ་གཞན་ལྟར་འབད་པས་ཉམས་སུ་བླང་དགོས་པ་མ་ཡིན་ཏེ། སློབ་དཔོན་དགའ་རབ་རྡོ་རྗེས། ཡིན་པ་གྲུབ་པ་མེད་པའི་རིག་པ་འདི། །རང་སྣང་འཆར་ཚུལ་ཅིར་ཡང་མ་འགག་པས། །སྣང་སྲིད་ཀུན་ཀྱང་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཐོག་ཏུ་གྲོལ། །ཞེས་པ་དང་། ངོ་རང་ཐོག་ཏུ་སྤྲད། ཐག་གཅིག་ཐོག་ཏུ་བཅད། གདེངས་གྲོལ་ཐོག་ཏུ་བཅའ་བའོ། །ཞེས་པའི་དགོངས་པ་ལགས། དེ་ལྟར་བླ་མའི་གདམས་ངག་གི་འོད་གསལ་ངོས་ཟིན་ནས་སངས་རྒྱས་ཉིད་དུ་གྲོལ་བ་དེའི་ངང་ལས་གཟུགས་སྐུ་རྣམ་པ་གཉིས་ལ་སོགས་པས་གདུལ་བྱའི་དོན་དཔག་ཏུ་མེད་པ་མཛད་པའི་ཚུལ་ནི། གཉིས་མེད་རྣམ་རྒྱལ་གྱི་རྒྱུད་ལས། འོད་གསལ་ཟིན་པའི་གང་ཟག་ལ། །བར་དོའི་གྲོང་ཁྱེར་དེས་མི་མཐོང་། །གཞན་དོན་གཟུགས་སྐུའི་སྣང་བ་འཆར། །དཔེར་ན་ཡིད་བཞིན་ནོར་བུ་བཞིན། །ཞེས་གསུངས་སོ། །

47.2K