༄༅། །ཀརྨ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༡༢

       ཡང་ཡེ་ཤེས་ཀྱི་ལྷ་སྒྲུབ་པ་ལ་ཡང་སྔོན་བསགས་ཀྱི་ལས་འཕྲོ་ཡོད་པ། དབང་གིས་རྒྱུད་སྨིན་པ། བསྐྱེད་རིམ་ཕྲ་རགས་འབྱོངས་པ། བསྙེན་སོགས་དག་པར་བྱས་པ་ལ་སོགས་པ་རྒྱུ་རྐྱེན་རྟེན་འབྲེལ་མང་དུ་ཚོགས་དགོས་པར་གསུངས་པ་ལ། བར་དོར་རྒྱུ་མ་མཆིས་རྐྱེན་མ་མཆིས་པར་ཡེ་ཤེས་ཀྱི་ལྷ་དེ་ཙམ་ཞིག་གི་ཞལ་མཐོང་བར་གསུངས་པ་ཡང་ཅི་ལྟ་བུ་ཡིན་ཞེས་དྲི་ན་འདི་ལ་ཅི་སྨྲ། སྒྲུབ་ཐབས་ཟབ་མོ་གཅིག་ལ་བརྟེན་ནས་འབད་རྩོལ་གྱིས་བསྒྲུབས་པས། ལྷ་འགྲུབ་ཅིང་ཞལ་མཐོང་བའི་ཚེ་ཚེ་རབས་ཀྱི་སྒྲིབ་པ་འདག །རྒྱུད་ལ་བྱིན་རླབས་འཇུག །མཁའ་སྤྱོད་དུ་འདྲེན་པར་བཤད་པ་ལ། ཞི་ཁྲོའི་ལྷ་དེ་དག་མཐོང་བ་ལ་མཐོང་ཐོས་དྲན་རེག་གི་ཡོན་ཏན་མེད་པར། སླར་གཉིས་འཛིན་སྐྱེ་བའི་འོད་བཀྲག་ཅན་བཀྲག་མེད་ཐུགས་ཀ་ནས་འགྱེད་པར་མཛད་དེ་འཁྲུལ་ནས་འཁོར་བར་འཁྱམས་པར་བྱེད་པའི་ཡི་དམ་གྱི་ལྷ་དེ་འདྲ་ཅི་ལྟ་བུ་ཞེས་དྲི་ན་འདི་ལ་ཅི་སྨྲ། ཡང་ཞི་ཁྲོ་ཉམས་སུ་ལེན་པ་པོའི་གང་ཟག་གཅིག་ལ་འཆར་ན། དེས་ན་འགྲོ་བ་ཐམས་ཅད་ཀྱི་ཐོས་གྲོལ་ཉམས་སུ་མ་བླངས། དེས་ལྷ་མི་འཆར། མ་ཤར་བས་འགྲོ་བ་གཞན་ལ་ཐོས་གྲོལ་བཀླགས་པ་དོན་མེད་དེ་ངོ་འཕྲོད་པའི་རྟེན་མ་མཆིས་པས་སོ། །

       ཞེས་དྲི་བ་གསུམ་གསུངས་པའི་དང་པོ་གཉིས་ནི་གང་ཟག་རིམ་གྱིས་པ་བསྐྱེད་རིམ་ལ་བརྟེན་ནས་ལུས་ཀྱི་བག་ཆགས་སྦྱོང་། བཟླས་པ་ལ་རྟེན་ནས་ངག་གི་བག་ཆགས་སྦྱོང་། རྫོགས་རིམ་ལ་རྟེན་ནས་ཡིད་ཀྱི་བག་ཆགས་སྦྱངས་པས་ལྷག་པའི་ལྷའི་ཞལ་མཐོང་སྟེ་བསྐྱེད་རིམ་གྱི་སྒོ་ནས་ལྷ་གྲུབ་པ་ཡིན་ལ་དེ་དང་འདི་མི་མཚུངས་ཏེ་འདི་ནི་གོང་དུ་སྨྲས་པ་བཞིན་དུ་ཡེ་ནས་གནས་པའི་ལྷ་རང་གི་ལུས་ལས་ཐོན་པའི་སྣང་བ་ཡིན་ནོ། །འོ་ན་འདི་དག་ཡེ་ཤེས་ཀྱི་ལྷ་ཡིན་ནམ་མ་ཡིན་ཅེ་ན། ཡིན་ཏེ་འདི་ལས་གཞན་པའི་ཡེ་ཤེས་ཀྱི་ལྷ་གང་ཡང་མེད་དེ། གཉིས་མེད་རྣམ་རྒྱལ་ལས། རང་འོད་ཡེ་ཤེས་ལྡན་པའི་སྐུ། །འཇའ་ཚོན་བཞིན་དུ་གསལ་བའི་བདག །སྟོང་པ་གསུམ་ལས་འདས་པ་པོ། །ཐོགས་པ་མེད་པའི་ཡེ་ཤེས་འཕྲོ། །ཞེས་གསུངས་པ་ཡིན་ནོ། །སེམས་ཅན་འཁོར་བར་འཁྱམས་པར་བྱ་བའི་སླད་དུ་ཐུགས་ཀ་ནས་འོད་བཀྲག་ཅན་བཀྲག་མེད་འགྱེད་པར་མཛད་པ་ག་ལ་ཞིག་སྟེ། སེམས་ཅན་རྣམས་ཀྱི་ནི་རང་མ་རིག་པ་ཁོ་ནའི་སྐྱོན་ཡིན་པ་དེའི་ཕྱིར་བཅོམ་ལྡན་འདས་ཀྱིས། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེ་བོ་དག་གིས་ང་མི་མཐོང་། །སངས་རྒྱས་རྣམས་ནི་ཆོས་ཉིད་ལྟ། །འདྲེན་པ་རྣམས་ནི་ཆོས་ཀྱི་སྐུ། །ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། །ཞེས་པས་སངས་རྒྱས་རྣམས་ནི་ཡང་དག་པའི་ཆོས་ཉིད་དམིགས་སུ་མེད་པ་ནམ་མཁའ་ལྟ་བུ་རྟོག་པ་ཐམས་ཅད་ལས་རྣམ་པར་གྲོལ་བ་དྲི་མ་མེད་པའི་ཆོས་ཀྱི་སྐུ་ཅན་ཡིན་པ་དེའི་ཕྱིར། བྱིས་པའི་སྐྱེ་བོ་བདག་དང་གཞན་དུ་སྨྲ་བ་གཟུགས་དང་མཚན་མར་འཛིན་པ་རྣམས་ཀྱིས་དེ་ལྟ་བུའི་ཆོས་ཉིད་དེ་ནི་ཤེས་པར་བྱ་བའི་ཡུལ་མ་ཡིན་པས་འཁོར་བར་འཁོར་བ་ཉིད་དུ་གསུངས་སོ། །དྲི་བ་གསུམ་པའི་དོན་ནི། སེམས་ཅན་ཐམས་ཅད་ལ་ཞི་ཁྲོ་འཆར་བར་ཁས་བླངས་པས་ཁེགས་པ་ཡིན་མོད། གལ་ཏེ་ལྷ་མ་ཤར་ཀྱང་ཐོས་གྲོལ་བཀླགས་པ་དོན་མེད་པ་དང་ངོ་འཕྲོད་པའི་རྟེན་མ་མཆིས་པ་མ་ཡིན་ཏེ། ཞི་ཁྲོའི་ལྷ་དེ་དག་གི་མཚན་ལན་གཅིག་ཐོས་པས་ཀྱང་ན་རག་ཆེན་པོར་མི་ལྷུང་བའི་དགོས་པ་ཆེན་པོ་ཡོད་པར་བཤད་ལ། དེའི་སེམས་རྒྱུད་དེ་ཀ་ངོ་སྤྲོད་པའི་རྟེན་ཡིན་པས་ངོ་སྤྲོད་ འཁོར་འདས་རང་གྲོལ་ལྟར་དུ་ཕྱག་རྒྱ་ཆེན་པོའི་གདམས་པ་བཏབ་པས་གྲོལ་བར་འགྱུར་བས་སོ།  །(མུ་འགོད།)

47.2K