༄༅། །ཀརྨ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༡༣

ཡང་ཐོས་གྲོལ་ཉམས་སུ་ལེན་པ་ལ་ཞི་ཁྲོ་འཆར་ན་གཞན་ལའང་ཉམས་སུ་གང་བླངས་དེ་འཆར་བས། བདེ་མཆོག་པ་ལ་བདེ་མཆོག་དང་། དགྱེས་རྡོར་པ་ལ་དགྱེས་རྡོར་ལྷ་དགུ་སོགས་འཆར་དགོས་ཏེ། གསར་མའི་རྒྱུད་ལུང་ཕལ་ཆེ་བ་ལས། རང་ལུས་ལས་དེ་དག་ཐོན་ནས་འཆར་བའི་བཤད་པ་གཏན་ནས་མེད་ལ། བདེ་མཆོག་ལྟ་བུ་ཉམས་སུ་བླངས་པས། རབ་ཚེ་འདིར་ཕུང་ཁམས་འཁོར་ལོ་སྡོམ་པའི་ངོ་བོར་གྲོལ་ཏེ་ལྷག་མེད་འགྲུབ་པ་དང་། འབྲིང་འཆི་བ་ཆོས་སྐུ་མཁའ་ཁྱབ་ཀྱི་འོད་གསལ་བའི་རང་བཞིན་འཁྲུལ་ན་ཡིད་ལུས་སུ་ལྡང་རྒྱུ་དེ་འཁོར་ལོ་སྡོམ་པ་རྟེན་བརྟེན་པའི་དཀྱིལ་འཁོར་དུ་བཞེངས་ནས་སངས་རྒྱས་པར་འགྱུར་བའི་བཤད་པ་ཡོད་ན། དེ་དང་བར་དོའི་འཁྲུལ་ངོ་ལ་ཡི་དམ་གྱི་ལྷ་འཆར་བ་གཉིས་ཁྱད་ཤིན་ཏུ་ཆེ། དེས་ན་བར་དོར་ལས་སྣང་གི་གཤིན་རྗེའི་སྐྱེས་བུ་དང་། འབྱུང་བ་དགྲར་ལངས་ཀྱི་འཁྲུལ་སྣང་ངེས་པ་དང་མ་ངེས་པ་སྣ་ཚོགས་འཆར་བར་གསུངས་པ་ལས་ཞི་ཁྲོ་ཞལ་ཕྱག་ངེས་པ་ཅན་དེ་ཁོ་ན་འཆར་བ་ཚད་ལྡན་གྱི་གཞུང་ལུགས་ལས་མ་བཤད། འཁྲུལ་ངོའི་ལས་སྣང་ཡིན་པའི་རྟགས་སུ་སྡིག་ཅན་དང་སྐྱེ་བོ་ཕལ་བ་ལ་དབུགས་ཆད་ཁ་ཉིད་དུ་འཁྲུལ་སྣང་མགོ་རྩོམ། དེ་ནས་ཤིན་ཏུ་རགས་པར་འཆར་བས་སྔངས་སྐྲག་ཆེ། བསྒྲོད་དཀའ། ལམ་པ་ལ་ལས་སྣང་ཅུང་ཟད་ལས་མེད་པས་འཇིགས་སྐྲག་ཆུང་། བསྒྲོད་སླ། འཁྲུལ་སྣང་ཞིག་པའི་གང་ཟག་ལྟ་བས་ཐེབས་པ་རྣམས་ལ་བར་དོ་མི་འབྱུང་བར་གསུངས་སོ། །དེས་ན་ལས་སྣང་གི་འཁྲུལ་ངོར་ཡེ་ཤེས་ཀྱི་ལྷ་འཆར་བར་གསུངས་པ་ཡང་སྔགས་བཙུན་སྐྱེ་བོ་དག་གི་བློ་བཟོ་ཡིན་ནོ། །ཞེས་སྨྲ་ན་འདི་ལ་གཏན་ཚིག་སྨྲ་རྒྱུ་ཅི་ཡོད།

ཅེས་གསུངས་པ་ལ། གསང་སྔགས་གསར་མའི་རྒྱུད་ལུང་རྣམས་ནས། བདེ་མཆོག་ལ་སོགས་པའི་ལྷ་རྣམས་ལུས་ལས་ཐོན་ཏེ་འཆར་བར་མ་གསུང་བ་དེ་བཞིན་དུ། འདིར་ཡང་ཉམས་སུ་གང་བླངས་པའི་ལྷ་དེ་དག་འཆར་བར་བཤད་པ་མེད་མོད། བདེ་མཆོག་པ་དག་གི་གྲོལ་ལུགས་རབ་འབྲིང་གི་རྣམ་དབྱེ་གསུངས་པ་ནི་ཇི་སྐད་བཀའ་སྩལ་པ་ལྟར་ལགས་མོད་ཀྱང་། འདིར་ནི་ཐེག་པའི་གོ་རིམ་གྱི་དབྱེ་བས་དེ་དག་དང་མཐུན་དགོས་པའི་ངེས་པ་མེད་པས། དེ་བས་ན་འདིར་གསུངས་པའི་ཞི་ཁྲོའི་སྣང་བ་རྣམས་བར་དོའི་འཁྲུལ་ངོ་ཁོ་ན་ལ་ཤར་བ་མ་ཡིན། ལུས་ཅན་རྣམས་ལ་བར་དོ་དྲུག་ཏུ་ཕྱེ་བའི་འཆི་ཁའི་བར་དོ་ལ་སྡིག་པ་ཅན་གྱི་སྐྱེ་བོ་ལ་གནད་གཅོད་ཀྱི་སྡུག་བསྔལ་དང་འཁྲུལ་སྣང་མགོ་རྩོམ་ཞིང་། དེའི་ཚེ་འོད་ཁུག་པ་ལྔ་འཆར་མོད་ཀྱི། གདམས་ངག་དང་མི་ལྡན་པས་སམ། ལྡན་ཀྱང་རུང་སྟེ་ལས་ཀྱི་སྒྲིབ་པས་ངོ་མི་ཤེས། དེ་ནས་ཆོས་ཉིད་ཀྱི་བར་དོ་ཞི་ཁྲོ་དང་སྒྲ་འོད་ཟེར་གསུམ་ལ་སོགས་པའི་སྣང་བ་དེ་དག་འབྱུང་ཡང་བསམ་གཏན་གྱི་ཞག་ལྔ་ལས་ཡུན་རིང་བར་མི་གནས་པ་ཡིན། དེ་ལ་བསམ་གཏན་གྱི་ཞག་ཅེས་པ་ཏིང་ངེ་འཛིན་དང་མི་ལྡན་པའི་སྐྱེ་བོ་ཐ་མལ་པ་དག་ལ་སེ་གོལ་གཅིག་གི་ཡུན་ཚད་ཡིན་ཞིང་། རྣལ་འབྱོར་པ་རྣམས་ཀྱི་ཏིང་ངེ་འཛིན་ཡུན་ཇི་ཙམ་ཐུབ་པ་དེ་ཉིད་ཀྱི་ཡུན་ཚད་ཡིན་པས་མ་ངེས་སོ། །དེ་ནས་སྐྱེ་བོ་ཕལ་བ་དག་ལ་སྲིད་པ་བར་དོའི་སྣང་བ་རང་རང་གིས་བསགས་པ་དང་མཐུན་པའི་ལས་སྣང་ངེས་པ་དང་མ་ངེས་པ་སྣ་ཚོགས་འཆར་བ་ཡིན་གྱི། ཞི་ཁྲོ་སྒྲ་འོད་ཟེར་དང་བཅས་པའི་སྣང་བ་དེ་དག་གི་གོ་ཆོད་ནས་ལས་སྣང་གཞན་གཏན་ནས་མི་འཆར་བར་གསུངས་པ་མ་ཡིན། ལམ་པའི་རྣལ་འབྱོར་པ་ལ་ཡང་འཆི་ཁའི་བར་དོའི་ཐིམ་རིམ་དང་འོད་ཁུག་པ་ལྔ་དང་དེ་རྗེས་ཆོས་ཉིད་ཀྱི་བར་དོར་རང་སོ་མ་ཟིན་ན། བསགས་པ་དང་མཐུན་པའི་ལས་སྣང་ངེས་མ་ངེས་སྣ་ཚོགས་འཆར་བས། དེའི་དུས་སུ་ཡུར་བ་སྐོང་ཆག་པ་ལ་ཝ་འཛུགས་པ་ལྟ་བུའི་སྲིད་པ་བར་དོའི་གདམས་པ་བཤད་པ་ཡིན། ཞི་ཁྲོའི་སྣང་བ་དེ་དག་ཆོས་ཉིད་དོན་གྱི་རང་སྣང་ཡིན་པས་མིང་ཡང་ཆོས་ཉིད་ཀྱི་བར་དོ་ཞེས་བཏགས་པ་ཡིན། འདི་དག་སྦྱོར་དྲུག་པ་དང་། རིམ་ལྔ་པ་དག་གི་འཆི་ཁའི་འོད་གསལ་འཛིན་པ་དོན་གཅིག །དེ་དག་སྲིད་པ་བར་མ་དོའི་ལས་སྣང་གི་འཁྲུལ་ངོ་ཡིན་པར་མཛད་འདུག་པ་འདི་ནི་དགོངས་པ་ཅན་ལོས་ཡིན་མ་ཡིན་ན་ནན་ལྟར་མ་ངེས་པ་ཆེན་པོ་ཉིད་དོ། །(མུ་འགོད།)

47.2K