༄༅། །བསྟན་འབྱུང་ལོ་རྒྱུས་བསྡུས་པ་བཞུགས་སོ། །

རྡོ་གྲུབ་འཇིགས་མེད་བསྟན་པའི་ཉི་མ།

སློབ་དཔོན་རིན་པོ་ཆེས་རྗེ་འབངས་རྣམས་ཀྱི་བརྗེད་བྱང་དུ་མན་ངག་ལྟ་ཕྲེང་མཛད་པར་གྲགས་ཤིང༌། དེ་དུས་ས་རྒྱན་གཉིས་དང་མདོ་བཏུས། ཕར་ཕྱིན་བསྡུས་པ་བསླབ་བཏུས། སྤྱོད་འཇུག་རིན་ཕྲེང་སོགས་བསྟན་རིམ་མང་པོ་དང༌། ཕལ་ཆེན་སོགས་ཤིན་ཏུ་རྒྱས་པའི་སྡེ་སྣོད་དུ་མ་ལ་བསྒྱུར་ཞུས་གཏན་ལ་ཕབ་པའི་ཁ་བྱང་ད་ལྟ་ཡང་གླེགས་བམ་ལ་འབྱར་བཞིན་པ་དང༌། དེ་དག་དང་མཐུན་པའི་བརྗེད་བྱང་སོགས་བསྟན་བཅོས་ཀྱང་མཛད་པ་མང་ལ། དཔལ་ལྡན་ཞི་བ་འཚོ་དང༌། དེའི་ལེགས་བཤད་དབུ་མ་རྒྱན་ལ་བརྟེན་ནས་བསྟན་པའི་སྒྲོམ་བཟུང་བར་གསལ་ལོ། །ཕྱིས་ཧཱ་ཤང་གིས་ཡིད་ལ་མི་བྱེད་པ་བསྟན་པ་ན་ཡང་བཻ་རོ་ལ་སོགས་པའི་སྔོན་གྱི་རྗེ་འབངས་ཆེན་པོ་རྣམས་ཀྱིས་ཐན་མཐོང་བ་ལྟར་མཛད་དེ། ཀཱ་མ་ལ་སྤྱན་དྲངས་ནས་བསྟན་པ་དག་ཐེར་མཛད་དུ་བཅུག་པའི་སྐབས་སུ། ཇོ་བོས་བོད་དུ་བསྟན་པ་ལ་བྱི་དོར་བྱ་བའི་སླད་དུ་ལམ་སྒྲོན་མཛད་པའི་དོན་ནི་སྒོམ་རིམ་གསུམ་དང་རྣམ་པར་མི་རྟོག་པའི་གཟུངས་འགྲེལ་སོགས་ཡིན་པས། ལྟ་ཕྲེང་གི་ཐུན་མོང་ལམ་རིམ་ཡང་དེ་དག་གི་འགྲོས་སུ་བཤད་པར་བྱའོ། །སྣ་ནམ་ཡེ་ཤེས་སྡེའི་ལྷག་མཐོང་གི་ཡི་གེ་སོགས་ན་ལྟ་བའི་འཇོག་མཚམས་ཞི་འཚོའི་ལུགས་ཁོ་ན་ལྟར་ཡོད་ཅིང༌། ཚིག་གསལ་དང་འཇུག་པ་རྩ་འགྲེལ་སོགས་དེ་དུས་བསྒྱུར་བ་མི་སྣང་བས། དེང་སང་ཐལ་འགྱུར་ལུགས་ལ་ཕྱོགས་མོས་བྱེད་པའི་དོད་པོ་ནི་རྣལ་འབྱོར་སྤྱོད་པའི་རང་རྒྱུད་ལ་མཛད་པར་ངེས་སོ། །གཏེར་ཆོས་ཟོལ་མེད་རྣམས་སུ་ཡང་ཐུན་མོང་ལ་ལམ་རིམ་སྤྱི་ལྟར་འབྱུང་ཞིང༌། ཕྱིས་ཀུན་མཁྱེན་ཀློང་ཆེན་པས་རྫོགས་ཆེན་གྱི་བསྟན་པ་གཞི་ནས་གསོ་སྐབས་ཀྱང་ཐུན་མོང་གི་བསྟན་རིམ་ལམ་སྒྲོན་ལྟར་མཛད་ནས། དེའི་བླ་བརྒྱུད་སེམས་ཉིད་ངལ་གསོའི་ཁྲིད་ཡིག་ཏུ་འདྲེན་པ་ན་ཡང་བཀའ་གདམས་བརྒྱུད་པ་བགྲངས་སྣང་བས། དེང་སང་བཀའ་གདམས་ལམ་རིམ་ནས་འབྱུང་བའི་ལམ་གྱི་འགྲོས་འདི་རྙིང་མ་པ་རྣམས་ཀྱི་ལུགས་ཆེར་མིན་ཞེས་སྨྲ་བ་ལ་ནི་བདག་མི་དད་དེ། སྔ་འགྱུར་པ་བྱེད་ན་དེའི་དང་པོའི་ཁུངས་རྙོག་མས་མ་བསླད་པ་དེ་རྩད་བཅད་ནས་དེ་དང་བསྟུན་ན་མཛེས་ཀྱི། ངན་རྟོག་བྱེ་བ་བརྒྱས་སྦགས་ནས་མགྲོན་པོ་ཕྱོགས་བསླད་ལྟ་བུར་སོང་བའི་དུས་ཕྱིས་ཀྱི་རྙིང་རློམ་ཕལ་དང་མི་བསྟུན་ཏེ། འདི་ནི་བདག་གི་བླ་མའི་མན་ངག་གོ། །དེ་བཞིན་དུ་རྒྱུད་སྡེའང་སངས་རྒྱས་གསང་བའི་བྱ་སྤྱོད་ཀྱི་སྐོར་རྒྱུད་དང་བཅས་པ་རྙིང་མ་ཡིན་པ་ཨ་བ་ཏ་ར་སོགས་དང༌། བླ་མེད་ཀྱི་གསང་འདུས་ཀྱང་འགྱུར་གསར་རྙིང་གཉིས་ཀ་ཡོད་པ་སོགས་ལྟར་གུང་སྒྲིག་ཤེས་དགོས་ཏེ། གསར་རྙིང་འདི་འགྱུར་གྱི་ཁྱད་ཁོ་ནས་ཕྱེ་བས། སྔགས་ཀྱི་རྒྱུད་སྡེ་ལ་གསར་རྙིང་གང་ཡང་མིན་པ་མཁའ་འགྲོ་མའི་འཇིག་རྟེན་ན་བཞུགས་པའི་སྔགས་རྒྱུད་ཕལ་ཆེར་ལྟ་བུ་སོགས་མུ་བཞིའང་བརྩི་བཏུབ་པར་གསལ། གུ་རུ་ཉིད་ཐུན་མོང་གི་སྣང་ངོར་ཡེ་ཤེས་ཞབས་ཀྱི་སློབ་མ་ཡིན་པས་ལྟ་བའི་བཞེད་པའང་དེ་ལྟར་མཛད་ཅིང༌། དེ་དུས་བོད་དུ་སྡེ་སྣོད་ཀྱི་སྲོག་ཤིང་མཛད་པའི་སློབ་དཔོན་ཞི་འཚོའི་བཞེད་པ་དང་སྒོ་བསྟུན་པ་སོགས་ཀྱི་དབང་གིས་ལྟ་ཕྲེང་འདི་དང༌། བདེ་འདུས་པདྨ་གསུང་གི་ཐ་རམ་སོགས་ལས་ཉན་རང་གིས་ཆོས་ཀྱི་བདག་མེད་མ་རྟོགས་པ་ལ་སོགས་པ་གསུངས་པ་ཡིན་ཏེ། གྲུབ་ཆེན་ལྭ་བ་པས་བདེ་མཆོག་གི་གཞུང་དུ། སེམས་ཙམ་ལུགས་ཀྱི་ཀུན་གཞིའི་རྣམ་ཤེས་ཞལ་གྱིས་བཞེས་པ་འདྲ་ཞེས་བོད་ཀྱི་ཤིང་རྟ་ཆེན་པོས་གསུངས་པ་དང༌། བདག་སྒྲུབ་པ་ལས་ཀྱང་རྣལ་འབྱོར་སྤྱོད་པའི་དབུ་མ་རང་རྒྱུད་པའི་གཞུང་བཟུང་བ་ལྟ་བུ་ཡིན་ནོ། །དེས་ན་ཁོ་བོ་ནི། དེ་དག་རྙིང་མ་པའི་ཐལ་འགྱུར་ལུགས་ཡིན་ཞེས་མི་སྨྲའོ། །འོན་ཀྱང་ཐལ་འགྱུར་པའི་ལྟ་བ་འཛིན་པ་དང༌། གསང་སྔགས་རྙིང་མ་པ་ཡིན་པ་ནི་ཅུང་ཟད་ཀྱང་མི་འགལ་ཏེ། གསང་སྔགས་རྙིང་མ་ནི་མདོ་སྒྱུ་སེམས་གསུམ་སོགས་ཡིན་ལ། དེ་དག་གི་ལམ་སྲོལ་འཛིན་པ་དང་ཐལ་འགྱུར་པ་ཡིན་པ་གཉིས་ལ་འགལ་བ་མེད་པའི་ཕྱིར་རོ། །གཞན་དུ་ན་འདུས་པ་ཡེ་ཤེས་ཞབས་ལུགས་པ་ལ་ཡང་རང་རྒྱུད་པས་ཁྱབ་པར་ཐལ་ལོ། །སྔ་འགྱུར་དང༌། གསང་སྔགས་སྔ་འགྱུར་ནི་མི་གཅིག་སྟེ། མདོ་སྡེ་དང༌། ཕར་ཕྱིན་གྱི་བསྟན་བཅོས་སྔ་འགྱུར་ཡོད་པའི་ཕྱིར་རོ། །བསྟན་པ་སྔ་དར་ཕྱི་དར་དང༌། གསར་རྙིང་ཡང་དོན་མི་གཅིག་སྟེ། སྔ་མ་ནི་འདུལ་བའི་བསྟན་པ་ལ་ལྟོས་ནས་འཇོག་ཅིང་ཕྱི་མ་གསང་སྔགས་ལ་ལྟོས་ཏེ་འཇོག་པའི་ཕྱིར་རོ། །དེ་དག་གང་ཡང་གླང་དར་མས་བསྟན་པ་ལ་རྐེད་ཉག་ཆེས་ཆེན་པོ་བཏོད་པའི་དབང་གིས་སོ་སོར་ཕྱེ་བ་བྱུང་ངོ༌། །རྒྱུད་སྡེ་སོ་སོའི་མན་ངག་རྣམས་ཕན་ཚུན་སྲེ་མི་རུང་ཡང༌། སྔ་འགྱུར་དང་ཕྱི་འགྱུར་བྱས་པ་ཙམ་གྱིས་ཚ་གྲང་ལྟར་འཛིན་དགོས་པར་གོ་བ་མང་བས་ཆོས་རྒྱུས་ཞིབ་པ་གལ་ཆེའོ། །འཕགས་ཡུལ་གྱི་པཎ་གྲུབ་བོད་དུ་བྱོན་པ་རྣམས་ཀྱིས་མཛད་པའི་བསྟན་བཅོས་ལ་ཡང༌། རྒྱ་གར་དུ་བཞུགས་དུས་དང༌། བོད་དུ་བརྩམས་པ་གཉིས་དང༌། ཕྱི་མ་ལའང༌། དང་པོར་ལེགས་སྦྱར་དུ་བརྩམས་ནས་གདོད་བསྒྱུར་བ་དང༌། དང་པོ་ནས་བོད་སྐད་དུ་བརྩམས་པ་གཉིས་ཡོད་དེ། ཕྱི་མ་འདི་གཉིས་རྩོམ་གྱི་རུས་ཚུགས་ཆེས་མི་འདྲ་བར་སྣང་ངོ༌། །༼ལྷག་པར་སྐད་གསར་བཅད་ཀྱིས་ཕོགས་མ་ཕོགས་གཉིས་ལ་གསེར་དངུལ་མདོག་འདོན་བྱས་མ་བྱས་ཀྱི་ཁྱད་ཙམ་གདའ་འོ། །མཆན།༽གླང་དར་མས་རྒྱལ་བསྟན་བསྣུབས་པའི་དབང་གིས་ད་ལྟ་སྒྱུ་འཕྲུལ་སོགས་སྔོན་དུས་བསྒྱུར་བའི་རྒྱུད་སྡེ་རྣམས་ཀྱི་མན་ངག་གཙང་མ་བཀའ་བརྒྱུད་བར་མ་ཆད་པ་ལས་འོང་བ་ཅི་ལ་ཡོད་སྙམ་ན། དེ་སྐབས་ཀྱང་ཁྱིམ་པ་གོས་དཀར་གྱི་རྟེན་ལ་གསང་སྔགས་སྒྲུབ་པའི་མཁས་གྲུབ་དག་ནི་ནང་གི་དེ་ཉིད་རྒྱལ་བློན་གྱིས་མ་རྟོགས་ཤིང༌། རབ་བྱུང་གི་རྟགས་མེད་པས་གནོད་པ་མ་བྱུང་བ་ཆེས་མང་སྟེ། འགོས་ལོ་ཆེན་པོས། དེ་ལྟར་འདུལ་བའི་བསྟན་པ་ལ་འཕེལ་འགྲིབ་བྱུང་མོད་ཀྱི་ཐེག་པ་ཆེན་པོ་གསང་སྔགས་ནི་དེང་སང་གི་བར་དུ་ནུབ་མ་མྱོང་ལ། ཞེས་གསུངས་པའང་དེ་ལ་དགོངས་སོ་ཞེས་ལྔ་པ་ཆེན་པོས་བཤད་དེ། འཐད་པ་ཆེའོ། །རིང་བརྒྱུད་བཀའ་མ་ཞེས་པའང་བླ་མའི་བཀའ་ལས་བླ་མའི་བཀར་བརྒྱུད་པ་ཞེས་བཤད་རྒྱུ་ཡིན་པར་གཏེར་གསར་དུ་གསུངས་ཏེ། མཐུན་སྣང་རགས་པ་དང་སྒྲིག་དགོས་སོ། །གཏེར་ཆོས་ཀྱི་ཁུངས་ནི་ད་ལྟར་གྱི་སངས་རྒྱས་མངོན་སུམ་པ་དང༌། བདེན་པ་པོ་དང༌། བསོད་ནམས་ཐམས་ཅད་བསྡུས་པ་དང༌། ཆོས་ཡང་དག་པར་བསྡུས་པ་ལ་སོགས་པའི་མདོ་སྡེའི་ཤེས་བྱེད་དང༌། དཔལ་མཆོག་སོགས་ཀྱང་བཞུགས་ཏེ་ཅུང་ཟད་སླ། དེ་ལ་ཉེ་བརྒྱུད་ཡོད་ཚུལ་ནི་གླེགས་བམ་རྙེད་པ་ཙམ་དང་དེ་རྙེད་རྗེས་ཀྱི་ཞལ་གཟིགས་ལུང་བསྟན་སོགས་ཙམ་༼འདི་ཙམ་ལ་འཇོག་ན་གཏེར་བརྒྱུད་དང་དག་སྣང་བརྒྱུད་པ་ལ་ཁྱད་གསལ་བར་འབྱེད་རྒྱུ་མེད་པར་འགྱུར་རོ། །༽ལ་མི་འཇོག་གོ། །འོ་ན་ཅི་ཞེ་ན། སྔོན་སློབ་དཔོན་རིན་པོ་ཆེ་སོགས་ལས་ཆོས་བཀའ་དེ་དང་དེ་སྣོད་རུང་གི་དབང་བསྐུར་མཚན་ཉིད་ཚང་བ་བཅས་ཐོབ་ནས་དམ་ཚིག་དག་པར་བསྲུང་བའི་རྒྱུ་མཐུན་གྱིས་སྐྱེ་བ་གཞན་དུའང་སྔགས་ཀྱི་ཚུལ་ཁྲིམས་མ་འཆལ་ཞིང་ཚུལ་ཁྲིམས་ལྡན་པའི་སྨོན་ལམ་ཆུད་མི་ཟ་བར་གསུངས་པ་ལྟར་གྱི་སྨོན་ལམ་སྔོན་སོང་ཡོད་པའི་གནད་ཀྱིས་ད་ལྟ་གསང་སྔགས་ཀྱི་ཆོས་གཏེར་དེ་དང་དེ་ལག་ཏུ་འོང་བ་ཡིན་ལ། དེའང་ཆོས་ཀྱི་ཤོག་སེར་མཐོང་མ་ཐག་ལ་སོགས་པར་དྲན་གསོའི་སྐུད་མདུད་སོགས་མཐོང་བ་ལྟར་སྔོན་དེ་དང་དེའི་དབང་གདམས་ངག་ཐོབ་པའི་བག་ཆགས་གསལ་པོར་སད་པར་འགྱུར་བ་ནི་རང་གི་ལས་འཕྲོ་དང༌། བླ་མ་མཁའ་འགྲོའི་བྱིན་རླབས་ཀྱི་ལག་རྗེས་ཡིན་ནོ། །འདི་ནི་བཀའ་བརྒྱད་གསང་རྫོགས་དང་རང་ཤར་གྱི་དབང་ཆུའི་བབས་ལུགས་ལོ་རྒྱུས་གཉིས་ཇི་བཞིན་དུ་མགྲིན་གཅིག་པར། དེ་ལྟར་དབང་གི་ཆུ་བོ་བྱེ་བྲག་མ་ལུས་པར་ཨོ་རྒྱན་པདྨ་བདག་ལ་བབས་ཤིང་༔ ཨོ་རྒྱན་བདག་གིས་ནི་བལ་ཡུལ་ཡང་ལེ་ཤོད་དུ་ཞི་བ་རྡོ་རྗེ་དབྱིངས་ཀྱི་དབང་སྒོ་བི་མ་མི་ཏྲ་ལ་ཕྱེ་ནས་བསྐུར་རོ༔ བོད་ཀྱི་སྒྲུབ་གནས་བརྒྱད་དུ་བཀའ་བརྒྱད་བྱེ་བྲག་གི་དབང་ལས་ཅན་བརྒྱད་ལ་སོ་སོར་བསྐུར་རོ༔ བསམ་ཡས་དབུ་རྩེར་རྗེ་འབངས་ཉེར་ལྔ་ལ་བདེ་གཤེགས་འདུས་པའི་དབང་མོ་ཆེ་བསྐུར་རོ༔ དེ་རྗེས་རྗེ་འབངས་གྲོགས་གསུམ་ལ་སོགས་པ་སྙིང་གི་བུ་དགུ་ལ་གསང་བ་ཡོངས་རྫོགས་ཐམས་ཅད་ཀྱི་དབང་ཡོངས་སུ་རྫོགས་པར་བསྐུར་བའི་དུས་ན་ད་ལྟ་དབང་གི་ཆུ་བོ་བར་ཆད་མེད་པར་བབས་པའི་ཚུལ་བཤད་པ་ཡིན་ལ༔ ཕྱི་མའི་དུས་ན་ཡང་དབང་གི་ཆུ་བོ་བར་ཆད་མེད་པར་འབྱུང་བའི་ལུང་བསྟན་ནས༔ ང་ཡི་ཐུགས་སྲས་བྱང་ཆུབ་སེམས་དཔའི་གཏེར་སྟོན་ནི་ད་ལྟ་དུས་འདིར་དབང་གི་ཆུ་བོ་ཆེན་པོ་བབས་པའི་ལས་ཅན་ཁྱེད་རྣམས་ཀྱིས་བཀའ་བབས་སྤྱོད་དེ༔ དེའི་ཚེ་ལས་ཅན་གྱི་བུ་ཁྱོད་རྣམས་ང་ཡི་གཏེར་ཆོས་འདི་རྣམས་དང་འཕྲད་པའི་ཚེ༔ ད་ལྟ་ཨོ་རྒྱན་ང་ཡིས་དབང་ཆེན་ཡོངས་སུ་རྫོགས་པར་བསྐུར་བའི་བག་ཆགས་སད་པར་འགྱུར་རོ༔ ང་ཡི་གཏེར་འདི་དང་རྗེ་འབངས་གྲོགས་གསུམ་གྱི་མནོག་ཆོས་ལ་སོགས་པ་རྣམས་ཀྱི་གཏེར་སྒོ་ཡང་འབྱེད་པར་འགྱུར་གྱི༔ དབང་གི་ཆུ་བོ་བབས་སོ་ལ་ཕྱི་རབས་རྣམས་ཐེ་ཚོམ་མ་ཟ་བར་སྒྲུབས་ཤིག༔ ཅེས་ཤིན་ཏུ་གསལ་བར་གསུངས་སོ། །གཏེར་གསར་ལམ་རིམ་དུ༔ ད་ལྟའི་ངང་ཚུལ་ཐམས་ཅད་ཀུན༔ རྨི་ལམ་བཞིན་དུ་ཡད་ཡུད་དྲན༔སོགས་ཀྱང་དེ་ཁོ་ན་ལྟར་རོ། །རིམ་པ་དབང་གི་ཆུ་བོ་བསྐུར་ཐབས་ངོ་སྤྲོད་དང་བཅས་པ། དཀྱུས་བཤད་གཞུང་གི་ཆུ་བོ་འགྲེལ་ཊིཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནད་ཡིག་དམར་ཁྲིད་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་བཅས་པ་སྟེ་སྔ་འགྱུར་བཀའ་བབས་ཀྱི་ཆུ་བོ་བཞི་ཀ་ལ་བག་ཆགས་སོས་ལུགས་དེ་དང་འདྲ་བས་གཏེར་བརྒྱུད་ལ་རིང་བརྒྱུད་དང་འདྲ་བའི་ཁུངས་སུ་བྱེད་པ་ཡིན་ནོ། །གཏེར་ཆོས་ལ་བརྒྱུད་པ་དྲུག་ཚང་ཚུལ་ནི་གཏེར་བདག་གླིང་པའི་མཁའ་འགྲོ་སྙིང་ཏིག་གི་ཁྲིད་ཡིག་ལྟར་ན། སྐུ་ཚེ་སྔ་མ་ལ་དགོངས་བརྒྱུད་ནས་བརྡ་བརྒྱུད་དང༌། བརྡ་ནས་སྙན་ཁུང་དུ་བརྒྱུད་པའི་དབང་གདམས་ཀྱི་ཆུ་བོ་བརྙེས་པ་ནི་དང་པོ་གསུམ་ཚང་ཚུལ་ཞེས་འཆད་ཆོག་པ་འདྲ་ཡང༌། གཞན་མང་པོ་ལྟར་ན་དེ་གསུམ་ཡང་གཏེར་བརྒྱུད་ཁོ་ནའི་དགོས་ཆོས་ལྟར་བརྩིས་སྣང་བས་འདི་ལྟར་དགོངས་བརྒྱུད་ནི་གུ་རུ་རིན་པོ་ཆེས་ཆོས་དེ་གནས་སྐབས་དེར་སྤྱན་འདྲོང་བའི་ཆེད་དུ་སྐལ་ལྡན་ལ་དགོངས་པ་གཏད་ཡོད་པའི་གནད་ཀྱིས་དེས་གཏེར་ཡིག་ལ་དབང་སྒྱུར་ནུས་ཀྱི་སྔགས་ཀྱི་རྟོགས་པ་ཐོད་རྒལ་དུ་རྙེད་པ་སྟེ། དེ་ནི་གུ་རུའི་དགོངས་པ་རྒྱུད་ལ་བབས་པའམ་ཤར་བ་ཞེས་བྱའོ། །བརྡ་བརྒྱུད་ནི། བརྡ་ཡིག་ལྡེ་མིག་ཏུ་གྱུར་པའི་སྒོ་ནས་སྔགས་ཀྱི་ཟབ་དོན་མང་པོ་འབྱེད་ནུས་པའོ། །དེ་ལྟ་ན་དཔེ་བལྟས་ཀྱིས་ཆོས་ཤེས་ཚད་ལའང་བརྒྱུད་པ་དེ་ཅི་སྟེ་མི་རྩི་ཞེ་ན། སློབ་མཁན་མེད་པར་མཁའ་འགྲོ་གསང་བའི་བརྡ་རིས་རྣམས་གཏེར་སྟོན་གྱིས་ཀློག་ཤེས་པ་དང༌། བརྡ་རིས་ཡིག་འབྲུ་རེ་ལ་བརྟེན་ནས་ཀྱང་སྔགས་ཀྱི་ཆོས་མཛོད་མང་པོ་རང་ཁྲོལ་བ་དང༌། ཤོག་སེར་གཅིག་ལའང་བརྡ་བསྒྱུར་རྒྱས་འབྲིང་བསྡུས་པའི་རིམ་པ་མང་པོ་བྱར་ཡོད་པ་དང༌། གཏེར་ཤོག་མཐོང་བ་ཙམ་གྱིས་བདེ་བའི་ཏིང་ངེ་འཛིན་འཆར་བ་སོགས་ནི་གཏེར་ཡིག་གི་རྫུ་འཕྲུལ་ཡིན་ཏེ། མདོར་ན་ཤོག་སེར་དེ་ལ་སྙད་བཏགས་ནས་དཔའ་བོ་ཌཱ་ཀིའི་གསང་མཛོད་ལ་སྤོབས་པའི་གཏེར་མཛོད་གྲོལ་བའི་སངས་རྒྱས་ཀྱི་བྱིན་རླབས་མངོན་སུམ་དུ་ཞུགས་པ་ཡིན་པས་ག་ལ་མཚུངས། སྙན་བརྒྱུད་ནི། གཏེར་ཡིག་སྤྲུལ་སྐུར་གསུངས་པ་ལྟར་དུས་དེར་རིག་འཛིན་ཌཱ་ཀི་རྣམས་བརྡ་རིས་ལ་ཞུགས་ཤིང༌། གཏེར་སྟོན་གྱིས་ཀྱང་གཏེར་ཡིག་ལ་ཐ་མལ་པའི་སྣང་བ་ལོག་ནས་སངས་རྒྱས་སྤྲུལ་པའི་སྐུ་དངོས་ཀྱི་འདུ་ཤེས་སྐྱེས་ཏེ། བརྡ་དེ་ལས་ཚིག་དོན་གང་ཤར་ཐམས་ཅད་ཀྱང་སྤྲུལ་སྐུ་དངོས་ཀྱིས་གདམས་ངག་བསྩལ་བ་ཡིན་པར་ངེས་ཤེས་སྐྱེས་པའོ། །འདི་གཉིས་ཀ་ཤོག་སེར་ལས་བརྒྱུད་པ་རྩི་བར་འདྲ་ཡང་། རིག་འཛིན་ལ་བརྒྱུད་ལུགས་ལྟར་བརྡ་བརྒྱུད་དུ་འགྲོ་བ་དང༌། གང་ཟག་ལ་ལྟར་སྙན་བརྒྱུད་དུ་འགྲོ་བའི་ལྡོག་ཆ་ཐ་དད་པའོ། །བཀའ་བབས་ལུང་བསྟན་ནི། གཏེར་སྟོན་གྱི་སྐྱེ་བ་སྔོན་མའི་ཚེ་གུ་རུས་ཆོས་དེ་དང་དེའི་སྐལ་ལྡན་དུ་མཁྱེན་ནས་བཀའ་བབས་ཀྱི་བདག་པོར་དགོངས་པ་གཏད་པའི་བྱིན་རླབས་རྒྱུད་ལ་སྨིན་ནས་ཡེ་ཤེས་ཁྱད་པར་ཅན་སྐྱེས་སྟོབས་ཀྱིས། ཕྱི་མའི་དུས་སུའང་ཆོས་འདི་ཁྱོད་ཀྱི་ལོངས་སྤྱོད་དུ་འགྱུར་རོ་ཞེས་ལུང་བསྟན་བརྙེས་པ་སྟེ། འདི་ནི་སྔོན་དབང་གདམས་དེ་དང་དེ་བརྙེས་པའི་བག་ཆགས་སྐུ་ཚེ་འདིར་གསལ་བར་སད་ངེས་ཀྱི་ལས་འཕྲོ་མཐུ་ཆེན་ཡོད་ཚུལ་ལོ། །སྨོན་ལམ་དབང་སྐུར་ནི། བག་ཆགས་དེ་རྫོགས་པར་སད་པའི་ཆ་རྐྱེན་དུ་གཏེར་སྟོན་གྱི་སྐུ་ཚེ་སྔ་མ་དེ་ཉིད་ལ་གུ་རུ་རིན་པོ་ཆེས་མ་འོངས་པའི་དུས་སུ་གཏེར་ཡིག་དང་མཇལ་བར་བདེན་ཚིག་སྨོན་ལམ་གྱིས་དབང་སྐུར་ཞིང་དེའི་ཚེ་རང་ཉིད་ཀྱིས་ཀྱང༌། བདག་སླད་མའི་དུས་སུ་གཏེར་༼འདིར་གཏེར་ཡིག་ཅེས་མ་བརྗོད་པར་གཏེར་ཆོས་བྱས་པ་འདིས། མཚོ་རྒྱལ་གྱིས་གཏེར་ཞབས་བསྡམ་དུས་སོགས་དང་མི་འགྲིགས་པའི་དོགས་པའང་ཆོད་དོ། །༽ཆོས་འདི་དག་དང་འཕྲད་པར་གྱུར་ཅིག །ཕྲད་མ་ཐག་ཏུ་ད་ལྟ་དབང་དང་མན་ངག་འདི་ལྟར་ཐོབ་པའི་བག་ཆགས་གསལ་པོར་སད་པར་གྱུར་ཅིག་ཅེས་སྨོན་ལམ་བཏབ་པས་ཐེབས་པ་སྟེ། ཕྱི་མ་འདི་ནི་གཏེར་ཆོས་དེ་རང་རྒྱུད་ཀྱི་དགེ་རྩའི་དྲན་ཐོར་སྔོན་མཚན་མར་བཟུང་ཚུལ་ཡང་ཡིན་ནོ། །མཁའ་འགྲོའི་གཏད་རྒྱ་ནི། སྔོན་རབས་ཀྱི་དུས་དེར་རྡོ་རྗེའི་གནས་ཀྱི་མཁའ་འགྲོ་དང་མཁའ་འགྲོ་མ་ཏིང་ངེ་འཛིན་གྱི་རྩལ་འཆང་བ་རྣམས་ལ། གཏེར་དཔེ་འདི་གདུལ་བྱ་འདིའི་ཚེ་ཕྱི་མ་ལ་ལས་ཀྱི་འཕྲོ་མཐུད་པའི་ཆ་རྐྱེན་དུ་བྱིན་ཅིག་ཅེས་གུ་རུ་དང་མཁར་ཆེན་བཟའི་བཀས་གཏད་དེ། དེའི་དབང་གིས་སྐུ་ཚེ་འདིར་ཆོས་བདག་མཁའ་འགྲོ་རྣམས་ཀྱིས་ཤོག་སེར་དང་མཇལ་བའི་ཕྱི་ནང་གི་རྟེན་འབྲེལ་སྒོ་དུ་མ་ནས་བསྒྲིགས་ཏེ། གཏད་རྒྱ་སྩོལ་བ་ཡིན་ནོ། །འདི་དག་ནི་དགོངས་འདུས་སྙིང་གི་མེ་ལོང་དང༌། ཟབ་དོན་རྒྱ་མཚོ་སྤྲིན། དགོངས་འདུས་རྣམ་བཤད་སོགས་བལྟས་ནས་བཤད་དོ། །རྗེའི་ཞལ་རྒྱུན་དུ། བཀའ་མ་ལས་ཀྱང་བཀའ་བབས་ལུང་བསྟན་སོགས་བརྒྱུད་པའི་ཁྱད་པར་གསུམ་གྱིས་འཕགས་ཤིང་ཞེས་འབྱུང་སྟེ། འདི་བཤད་ལྟར་ན་དེའི་དགོངས་པའང་བརྒྱུད་པ་དང་པོ་གསུམ་པོའི་རང་ལྡོག་ཙམ་ནས་གཏེར་མའི་དགོས་ཁྱད་དུ་མི་འགྱུར་བ་ལ་བཤད་དགོས་སོ། །དགོངས་གཏེར་ལ་བརྒྱུད་པ་དྲུག་འདྲེན་ལུགས་ཀྱང༌། དང་པོ་གསུམ་དུ་ཤོག་སེར་གྱི་དོད་ལ་གཞོན་ནུ་མ་ལ་པྲ་ཕབ་པ་ལྟ་བུའི་ཏིང་ངེ་འཛིན་གྱི་རང་སྣང་གི་བརྡ་ཡིག་འཇོག་པའི་ཁྱད་ཙམ་མ་གཏོགས་འདྲ་ལ། བཞི་པའང་འདྲ། ཐ་མ་གཉིས་ལ། ཕྱིར་དགོངས་གཏེར་རྣམས་ཀྱང་དཔེ་རྒྱུད་བྲག་རི་ལྷུན་ཆགས་དང་གཡུ་མཚོ་གཏན་འཁྱིལ་སོགས་ན་བཞུགས་ཤིང༌། སྙན་བརྒྱུད་དགོངས་གཏེར་དུ་བྱོན་པའི་ཕྱི་ནང་གི་གཏེར་དཔེ་གཉིས་རེ་ཡོད་པར་མངོན་པས། སྔོན་སྐལ་ལྡན་ལས་འཕྲོ་ཅན་དང་འཕྲད་པར་ཤོགཿ ཅེས་སྨོན་ལམ་མཛད་པ་ལྟར་ད་ལྟ་གཏེར་ཆོས་དང་མཇལ་ཚུལ་ལ། གཏེར་དཔེ་དངོས་སུ་མཇལ་བ་དང༌། དེས་རྣམ་པ་གཏད་པའི་རང་སྣང་གི་གླེགས་བམ་དང་མཇལ་བ་གཉིས་ཏེ། གང་ལྟར་ཡང་སྨོན་ལམ་དེའི་ལག་རྗེས་སུ་འདྲ་བས་ལྔ་བ་དང༌། དེ་བཞིན་དུ་སྔོན་མཁའ་འགྲོ་རྣམས་ལ་བཀས་གཏད་ཚུལ་ལྟར། ཕྱིས་སུ་མཁའ་འགྲོས་གཏད་ལུགས་ལའང༌། གཏེར་དཔེ་དངོས་རང་གཏད་པ་དང༌། དེའི་གཟུགས་བརྙན་གྱི་རྣམ་པ་ལྟ་བུའི་སྣང་བ་ཁྱད་པར་ཅན་བསྟན་པ་གཉིས་ཏེ། གང་ཡང་བརྡ་ཡིག་ཏུ་བཞུགས་པའི་ཆོས་དེ་མཁའ་འགྲོ་མས་གཏད་པར་ཁྱད་མེད་པས་དྲུག་པའོ། །དགེའོ། ། ། །

རྩོམ་སྒྲིག་པ། གསང་སྔགས་ཐེག་མཆོག་རྡོ་རྗེ།

47.2K