༄༅། །རྒྱལ་བའི་དབང་པོ་ཀརྨ་པ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༡

ན་མོ་གུ་ར་ཝེ། གང་ཞིག་ཟག་མེད་ཡོན་ཏན་ཕུང་པོ་སྲིད་དང་ཞི་བའི་སྒྲོ་སྐུར་བྲལ་བ་ཆོས་ཀུན་མཉམ་པ་ཆེན་པོའི་ངང་། །སྤྲོས་པ་ཀུན་གྲོལ་ཅིར་ཡང་མི་དམིགས་རང་བབས་གཉུག་མ་མ་སྐྱེས་མི་གནས་འགགས་པ་མེད་པའི་བདག་ཉིད་ཅན། །སྣ་ཚོགས་སྒྱུ་མ་རང་སར་གྲོལ་བ་ཤེས་དང་ཤེས་བྱ་གཅིག་ཏུ་གྱུར་པ་བདེ་ཆེན་ཡེ་ཤེས་སྒྱུ་མའི་སྐུ། །རྒྱལ་བ་ཁྱབ་བདག་འཁོར་ལོའི་དབང་ཕྱུག་ཀུན་བཟང་མགོན་པོ་བླ་མའི་ཚོགས་ལ་རྟག་པར་དད་པས་ཕྱག་བགྱིའོ། །རང་བཞིན་དབྱིངས་སུ་ཐམས་ཅད་གདོད་ནས་ལྷུན་གྱིས་གྲུབ་པ་སྐྱེ་མེད་ངང་དུ་རོ་གཅིག་པ། །རང་བྱུང་ཡེ་ཤེས་རྟོགས་པའི་རྒྱུད་ལས་རབ་ཏུ་གྲོལ་བ་མི་འགྱུར་ཐིག་ལེའི་ངང་ཉིད་ལས། །སྐྱེ་བའི་ཆོ་འཕྲུལ་སྒྱུ་མའི་རོལ་པ་མཐའ་ཡས་སྤྲུལ་སྐུ་དཔལ་ལྡན་སངས་རྒྱས་པདྨ་སྐྱེས། །འཇའ་འོད་སྐུ་རུ་མངོན་པར་བྱང་ཆུབ་རྒྱལ་བ་ཀུན་དངོས་ཨོ་རྒྱན་བླ་མ་དེ་ལ་འདུད། །གང་གི་ཞིང་ཁམས་ཁ་བ་ཅན་དུ་བདེ་གཤེགས་བསྟན་པ་སྤེལ་སླད་དུ། །སྲིད་པའི་འཆིང་ལས་ངེས་པར་གྲོལ་ཡང་སྲིད་པར་འཇུག་པ་འདི་མཛད་དེ། །མཐའ་ཡས་སེམས་ཅན་ཕན་བདེའི་ལམ་དུ་རྟག་པར་གཞོལ་མཛད་ཐུགས་རྗེ་ཅན། །སྤྱན་རས་གཟིགས་དབང་སྲོང་བཙན་སྒམ་པོའི་ཞབས་ཀྱི་པདྨོར་ཕྱག་འཚལ་ལོ། །རྒྱ་ཆེན་རབ་འབྱམས་དཀྱིལ་འཁོར་ཀུན་གྱི་གཙོ་བོ་ཉིད་དེ་རྒྱལ་བ་མ་ལུས་བསྐྱེད་པའི་ཡབ། །ཡེ་ཤེས་སྒྱུ་མའི་རོལ་པ་མཐའ་ཡས་ཐབས་མཁས་སྙིང་རྗེའི་ཆོ་འཕྲུལ་བཀོད་པ་རྒྱ་ཆེན་པོས། །སྲིད་མཚོར་བྱིངས་པའི་ཉམ་ཐག་འགྲོ་ལ་མུ་མེད་དགེ་བའི་ལམ་མཆོག་བཟང་པོ་སྩོལ་མཛད་པ། །འཇམ་དབྱངས་གཞོན་ནུ་མི་ཡི་ཚུལ་འཆང་འཛམ་གླིང་རྒྱལ་པོ་ཁྲི་སྲོང་ལྡེའུ་བཙན་ལ་ཕྱག་འཚལ། །བོད་ཡུལ་མཐའ་འཁོབ་མི་ཤེས་མུན་པའི་སྨག་རུམ་འདིར། །ཆོས་ཀྱི་ཉི་མ་རབ་ཏུ་གསལ་བས་བདེ་གཤེགས་བསྟན་པ་སྣང་མཛད་ཅིང་། །ཕན་བདེའི་པད་ཚལ་ཀུན་ནས་རབ་ཏུ་རྒྱས་མཛད་པ། །སྐྱེས་མཆོག་མཚུངས་མེད་ལོ་པཎ་ཚོགས་ལ་བདག་ཕྱག་འཚལ། །རྣམ་དག་རྒྱལ་བའི་བསྟན་པ་རིན་པོ་ཆེ། །རྒྱ་བོད་གཉིས་སུ་བཤད་དང་སྒྲུབ་པའི་སྲོལ། །ཕན་བདེའི་རྒྱུན་བཟང་ད་ལྟའི་བར་དུ་ཡང་། །ལེགས་པར་སྣང་མོད་སུ་ཞིག་ལོག་པར་ལྟ། །དེ་ལྟའི་གསང་ཆེན་བླ་མེད་ཐེག་པའི་མཆོག །ཡེ་ཤེས་མངོན་སུམ་སྟོན་པའི་ཨ་ཏི་ལ། །སྔ་ཕྱི་བདུད་རིས་རྩོད་པ་མང་བྱུང་ཡང་། །མུན་པའི་སྣང་བ་ཇི་བཞིན་སྒྲིབ་མ་ནུས། །དེང་སང་རྒྱལ་བའི་དབང་པོ་ཀརྨ་པས། །ལྡེམ་དགོངས་དྲི་བའི་ཆབ་ཤོག་གནང་བ་ལ། །ལུགས་ངན་རྨོངས་པའི་གཉིད་ལས་སློང་བྱེད་པ། །དྲིས་ལན་ལུང་རིགས་འབྲུག་སྒྲ་འདིར་བརྗོད་བྱ། །

དེ་ལ་དྲི་བ་དང་པོ། སྤྱིར་བསྟན་པ་རིན་པོ་ཆེ་འདི་ལ་ཐེག་དམན་ཉན་རང་གཉིས། ཐེག་ཆེན་བྱང་སེམས། ཁྱད་པར་རྣལ་འབྱོར་གྱི་ཐེག་པ་དང་བཅས་པས། ཐུབ་པའི་གཙུག་ལག་མཐའ་དག་བསྡུས་པར་བསྟན་ལ། འདི་དག་ཏུ་མ་འདུས་པའི་རྒྱལ་བའི་བསྟན་པ་གཞན་འགའ་ཡང་མ་མཆིས་ཤིང་། ཐུབ་པའི་དབང་པོས་སྐྱེས་རབས་ཕལ་ཆེར་བསྟན་པ་འདུལ་བ་ལུང་དང་། ཐུགས་བསྐྱེད་ཚུལ་སྟོན་པ་བསྐལ་པ་བཟང་པོ་དང་། མཛད་པ་བཅུ་གཉིས་བྱེ་བྲག་ཏུ་སྟོན་པ་མངོན་འབྱུང་གི་མདོ་ལ་སོགས་པ་མདོ་སྡེ་དང་རྒྱུད་སྡེ་མཐའ་དག་ལས་ཀྱང་ཐུབ་པའི་རྫོགས་ཆེན་ཐེག་པའི་ཆོས་འཁོར་བསྐོར་ཅེས་ཅུང་ཟད་ཙམ་ཡང་མི་སྣང་བ་དང་། ཁྱད་པར་འཕགས་པའི་ཡུལ་ན་རྫོགས་ཆེན་མི་སྣང་ཞེས་ལོ་ཆེན་རིན་བཟང་དང་། འགོས་ལོ། རྔོག་ལོ་སོགས་ཕལ་མོ་ཆེའི་བསྟན་བཅོས་ལས་བྱུང་བས་དེང་སང་བོད་ན་གསང་སྔགས་སྔ་འགྱུར་དུ་གྲགས་པའི་བཀའ་མ་མང་པོ་ཞིག་དང་། གཏེར་སྟོན་གྱིས་བཏོན་པར་གྲགས་པའི་ཆོས་ལུགས་གྲངས་ཀྱིས་མི་ལང་བ་ཤིན་ཏུ་མང་བ་ཞིག་འདུག་པས། རྙིང་མ་རྒྱ་གར་ན་ཡོད་པའི་གཏན་ཚིགས་ངེས་པ་ཅན་སྨྲ་རྒྱུ་ཅི་ཡོད།

ཅེས་གསུངས་པ་ལ། ཐུབ་པས་དངོས་སུ་མ་གསུངས་པས་ཆོས་མ་ཡིན་པ་དང་། རྒྱ་གར་ན་མེད་པར་འདོད་པ་དེ་ལྟར་ན། བརྟག་པ་གཉིས་པ་ལ་སོགས་པ་དགྱེས་པ་རྡོ་རྗེའི་རྒྱུད་རྣམས་ཀྱེ་རྡོ་རྗེས་གསུངས་ཏེ། བདག་མེད་མས། བདག་གི་འཁོར་ལོ་ཁྱོད་བཤད་ན། །ཁྱོད་ཀྱི་འཁོར་ལོ་ཇི་ལྟར་ལེགས། །ཞེས་སོགས་རྒྱས་པར་གསུངས་ཤིང་། དེ་བཞིན་དུ་བདེ་མཆོག་གི་རྒྱུད་རྣམས་འཁོར་ལོ་སྡོམ་པས་གསུངས་ཏེ། བདེ་མཆོག་སྟོད་འགྲེལ་ལས། ཕག་མོས་གསོལ་བཏབ་རྡོ་རྗེ་ཅན། །ཉུང་ངུའི་རྒྱུད་ནི་གསལ་བར་མཛད། །ཅེས་འབྱུང་བ། གསང་བ་འདུས་པ། སྟོན་པས་སྤྲུལ་སྐུའི་སྣང་བ་བསྡུས་ཏེ། དཔལ་གསང་བ་འདུས་པའི་དཀྱིལ་འཁོར་སྤྲུལ་ནས་གསུངས་པ་དང་། ལྷ་མོ་བཞིས་ཞུས་པའི་རྒྱུད་རྡོ་རྗེ་སེམས་དཔས་གསུངས་པ་དང་། རྣམ་སྣང་སྒྱུ་འཕྲུལ་དྲྭ་བ་རྣམ་སྣང་གིས་གསུངས་པ་དང་། རྟོག་པ་བདུན་པ་དང་གསུམ་པ་འཇིགས་བྱེད་ཀྱིས་གསུངས་པ་དང་། བདེ་མཆོག་གི་རྒྱུད་འགའ་ཞིག་ཕག་མོས་གསུངས་པ་དང་། དེ་སོགས་བླ་མེད་ཀྱི་རྒྱུད་ཕལ་ཆེར་རང་རང་གི་དཀྱིལ་འཁོར་གྱི་གཙོ་བོས་གསུངས་ཤིང་ཐུབ་པས་དངོས་སུ་མ་གསུང་ན། དེ་དག་ཀྱང་ཆོས་མ་ཡིན་པ་དང་རྒྱ་གར་ན་མེད་པར་འགྱུར་རམ་ཅི། དེ་དག་སྟོན་པའི་དངོས་སུ་མ་གསུངས་ཀྱང་སྟོན་པ་ཉིད་དཀྱིལ་འཁོར་གཙོ་བོ་ཉིད་དུ་བཞེངས་ནས་གསུངས་པའི་ཕྱིར་དོན་ལ་མི་འགལ་ལོ་སྙམ་ན། འདིར་ཡང་མཚུངས་ཏེ། སྟོན་པ་ཉིད་གདུལ་བྱ་དབང་པོ་རྣོན་པོ་དོན་གྱི་རྗེས་སུ་འབྲངས་པ་རྣམས་ཀྱི་ཕྱིར་བཅོམ་ལྡན་འདས་ཀུན་ཏུ་བཟང་པོ་དང་། གཞོན་ནུ་དཔའ་བོ་སྟོབས་ལྡན་དང་། སྟོན་པ་བཅུ་གཉིས་ལ་སོགས་པར་བཞེངས་ཏེ་གསུངས་པས་ན་མི་འགལ་བ་ཡིན་ཏེ། དཔལ་ཆོག་ལས། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོ་མཆོག །བཅོམ་ལྡན་འདས་དཔལ་མཆོག་གི་དང་པོའི་སྐྱེས་བུའོ། །ཞེས་གསུངས་པའི་ཚུལ་ལྟར་རོ། །དེ་ལྟ་བས་ན་རྙིང་མ་པ་དག་སྤྲུལ་སྐུའི་བསྟན་པ་སྡེ་སྣོད་གསུམ། ལོགས་སྐུའི་བསྟན་པ་ཀྲི་ཡོག་གསུམ། ཆོས་སྐུའི་བསྟན་པ་ཡོ་ག་གསུམ་ཞེས་འདོད་པ་ཡིན་ནོ། །ཡང་སེམས་ཅན་རྣམས་ཀྱི་ཇི་སྲིད་དུ་འཇུག་པའི་འདུ་ཤེས་མ་ཟད་ཀྱི་བར་དུ་འདུལ་བྱེད་ཐེག་པའི་རྣམ་གྲངས་བསམ་གྱིས་མི་ཁྱབ་པ་དེའི་ཕྱིར་ཐུབ་པས་དངོས་སུ་རྫོགས་ཆེན་ཐེག་པ་གསུངས་པ་ཡང་འགྲུབ་པ་ཡིན་ཏེ། ལང་ཀར་གཤེགས་པ་ལས། ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །སེམས་ནི་ཞིག་པར་གྱུར་པ་ན། །ཐེག་པ་མེད་ཅིང་འགྲོ་བའང་མེད། །ཅེས་པ་དང་། མདོ་སྡེ་པདྨ་དཀར་པོ་ལས། ང་ཡི་བསྟན་པའི་ཐེག་པ་དགུ་པོ་དག །སེམས་ཅན་རྣམས་ཀྱི་མཐུ་དང་མོས་པར་བཤད། །འདི་ལྟར་ཐབས་ཀྱི་མཆོག་གི་ཡེ་ཤེས་ལ། །རབ་ཏུ་བཟུང་བའི་ཕྱིར་ན་ངས་བཤད་དོ། །ཞེས་པ་དང་། མྱ་ངན་ལས་འདས་པའི་མདོ་ལས། བསྟན་བཅོས་སམ་རིགས་སྔགས་སམ་གསང་སྔགས་གང་ཅི་ཡང་རུང་བ་དེ་དག་ཐམས་ཅད་ནི་རྫོགས་པའི་སངས་རྒྱས་ཀྱི་གསུངས་པ་ཡིན་པར་ཤེས་པར་གྱིས་ཤིག །ཅེས་གསུངས་ཤིང་། བདེ་མཆོག་གསང་བ་བསམ་གྱིས་མི་ཁྱབ་པའི་རྒྱུད་ལས། ཐེག་པ་གསུམ་དང་བཅོ་བརྒྱད་དེ། །ཇི་སྲིད་འདུ་ཤེས་ཡོད་ཀྱི་བར། །ཐེག་པའི་མཐའ་ལ་ཐུག་པ་མེད། །ཅེས་པའི་ཚུལ་མདོ་རྒྱུད་དུ་མར་གསུངས་ཤིང་། དུས་ཀྱི་འཁོར་ལོ་དང་མཚན་ཡང་དག་པར་བརྗོད་པ་ལ་སོགས་པ་གཉིས་སུ་མེད་པའི་རྒྱུད་སྡེ་རྣམས་ནི་རྫོགས་པ་ཆེན་པོ་དང་གྲུབ་མཐའ་ཁྱད་པར་ཅི་ཡང་མེད་ལ། དེའི་ཚུལ་རྒྱས་པར་སློབ་དཔོན་པདྨ་དང་། བི་མཱ་ལ་གཉིས་ཀྱི་མཚན་བརྗོད་ཀྱི་འགྲེལ་བ་དང་། སློབ་དཔོན་པདྨས་མཛད་པའི་སྦྱོར་དྲུག་དང་། བདག་གིས་བྱས་པའི་ལམ་རིམ་ཐར་པའི་སྒོ་གཅིག་རྣམས་སུ་གསལ་ལོ། །ལོ་ཙཱ་བ་རིན་ཆེན་བཟང་པོས་སྔགས་ལོག་སུམ་འབྱིན་དུ་གསང་སྔགས་སྒྲ་ཇི་བཞིན་པར་སྤྱོད་པ་རྣམས་བཀག་པ་ལས། རྙིང་མ་ལ་དགག་པ་མཛད་པ་མེད་དོ། །འགོས་ལོ་ཆེན་པོ་ལྷ་བཙས་ཀྱི་འབྱམས་ཡིག་ཆེ་ཆུང་དུ་རྙིང་མ་བཀག་ཀྱང་། ཆོས་རྣམས་བསྒྱུར་བར་མཛད་པའི་ལོ་ཙཱ་བ་སོ་སོས་བྱས་སོ་ཞེས་པ་ཙམ་ལས། ཁུངས་ཐུབ་པའི་རྒྱུ་མཚན་འགོད་རྒྱུ་བྱུང་མི་སྣང་ལ། རྗེ་ཉིད་སྐུ་གཞོན་ནུའི་དུས་སུ་ཟུར་ལ་ཆོས་གསན་པར་བྱོན་པས། ཆོས་མ་བསླབ་པར་མནར་པོ་བཏང་བས་དེའི་ལན་དུ་མཛད་པའི་ལོ་རྒྱུས་སྔ་རབས་ཀྱི་བླ་མ་རྣམས་ཀྱིས་གསུངས་ཤིང་། འགོས་ལོ་ཐམས་ཅད་མཁྱེན་པ་གཞོན་ནུ་དཔལ་གྱི་དེབ་སྔོན་དུ་ཡང་ལོ་རྒྱུས་དེ་བཤད་དོ། །སྤྱིར་ན་རྗེ་འགོས་འབྲོག་མི་ལོ་ཙཱ་བའི་གམ་དུ་བྱོན་དུས་སུའང་ཆོས་འགའ་མ་གནང་བས་ཐུགས་མུག་སྟེ་རྒྱ་གར་དུ་གསུངས་པ་ནའང་། སློབ་གཉེར་ཕུལ་ཕྱིན་ཅིག་མ་བྱས་ན་འབྲོག་ལྡོམ་དེ་ལ་ངོ་ཚ་བ་ཡོད་ཅེས་སོགས་རང་གི་བླ་མ་ལ་སྐུར་བ་གསུངས་ན་དེ་ལ་ཡིད་བརྟན་དུ་བཟུང་བས་ཅི་ཞིག་འཚལ། རྔོག་ལོ་ཙཱ་བ་ལེགས་པའི་ཤེས་རབ་ནི་རྙིང་མའི་རྒྱུད་འགྲེལ་རྣམས་འཆད་བཞིན་པ་སྟེ། ཇོ་བོ་ཆེན་པོ་རྗེས་ཀྱང་། ཁྱོད་ཀྱི་དེ་ཁྲོམ་དུ་བསྒྲགས་ན་གསང་སྒྲོགས་སུ་འགྱུར་བས་གསང་ནས་བཤད་པར་རིགས་པ་ཡིན་ཞེས་པ་བསྩལ། དེའི་དབོན་པོ་ལོ་ཙཱ་བ་ཆེན་པོ་བློ་ལྡན་ཤེས་རབ་ཀྱིས་ནི། བཻ་རོ་ཙ་ན་ནམ་མཁའ་དག་དང་མཉམ། །ཀ་ཅོག་རྣམ་གཉིས་ཉི་ཟླ་ཟུང་གཅིག་ལ། །རིན་ཆེན་བཟང་པོ་ཐོ་རངས་སྐར་ཆེན་ཙམ། །ཁོ་བོ་དེ་དྲུང་སྲིན་བུ་མེ་ཁྱེར་བཞིན། །ཞེས་སྔ་འགྱུར་གྱི་ལོ་ཙཱ་བ་ལ་སྔགས་པ་ཆེར་མཛད་མོད་ཀྱི། རྙིང་མ་དགག་པ་མེད་དོ། །རྙིང་མ་རྒྱ་གར་དུ་ཇི་ལྟར་ཡོད་པ་ཡང་། སློབ་དཔོན་བརྒྱ་བྱིན་སྡོང་པོས་སངས་རྒྱས་མཉམ་སྦྱོར་གྱི་འགྲེལ་བ་རྒྱུད་དོན་རྣམ་བཤད་ལས། གསང་སྔགས་ཀྱི་རྒྱུད་མཐའ་དག་བསྡུ་ན། མཚོན་བྱ་གཞིའི་རྒྱུད་དང་། མཚོན་བྱེད་ཡི་གེའི་རྒྱུད་དོ། །མཚོན་བྱེད་ཡི་གེའི་རྒྱུད་ལ། བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་ཆེན་པོའི་རྒྱུད་དོ། །དེ་ལ་ བསྐྱེད་རྫོགས་རྣམ་པ་གསུམ་༼བསྐྱེད་པ་མ་ཧཱ་ཡོ་ག། རྫོགས་པ་ཨ་ནུ་ཡོ་ག། རྫོགས་པ་ཆེན་པོ་ཨ་ཏི་ཡོ་ག་གསུམ་མོ། །༽དུ་ཕྱེ་སྟེ། དང་པོ་རྒྱུད་ཀྱི་རྣམ་གྲངས་བཅོ་བརྒྱད་དུ་གསུངས་པ་ལས། ཞེས་གསུངས་པ་བཞིན། ཏནྟྲ་ཆེན་པོ་སྡེ་བཅོ་བརྒྱད་ཀྱི་ཐོག་མ་གསུམ་ནི། གསང་བ་འདུས་པ། ཟླ་གསང་ཐིག་ལེ། སངས་རྒྱས་མཉམ་སྦྱོར་རྣམས་ལ་ཐུགས་གསུང་སྐུའི་རྒྱུད་ཟེར། མཉམ་སྦྱོར་གྱི་ཧེ་རུ་ཀའི་དཀྱིལ་འཁོར་ཡང་དག་ཡིན་ལ། དེ་དག་གི་བཤད་སྲོལ་ཀྱང་ད་ལྟའི་བར་དུ་མ་ནུབ་ཅིང་། པཎ་ཆེན་ཐམས་ཅད་མཁྱེན་པ་བུ་སྟོན་གྱི་རྒྱུད་སྡེ་སྤྱིའི་རྣམ་གཞག་ཏུ། རྡོ་རྗེ་བཞད་པའི་སྐོར་གྱི་ལེའུ་ཞེས་ཚན་པ་གཅིག་ཏུ་མཛད་པའི། རྡོ་རྗེ་བཞད་པའི་གསང་བ་འདུས་པའི་འགྲེལ་བར། གསང་བ་སྙིང་པོའི་རྒྱུད་ཀྱི་ལུང་མང་དུ་དྲངས། འདུས་པ་ཕྱི་མའི་འགྲེལ་བ་སློབ་དཔོན་བི་ཤྭ་མི་ཏྲས་མཛད་པ་དང་། སློབ་དཔོན་བརྒྱ་བྱིན་སྡོང་པོས་མཉམ་སྦྱོར་གྱི་འགྲེལ་བར་ཡང་གསང་སྙིང་གི་ལུང་མང་དུ་དྲངས། འགྲེལ་བ་འདི་རྣམས་པཎ་ཆེན་ཐམས་ཅད་མཁྱེན་པ་བུ་སྟོན་གྱི་བསྟན་འགྱུར་དཀར་ཆག་ཏུ་ཡང་ཚད་མར་མཛད། ཇོ་བོ་རྗེས་ལམ་སྒྲོན་གྱི་རང་འགྲེལ་དུ། གལ་ཏེ་བྱ་བའི་རྒྱུད་ལ་སོགས་པའི་གསང་སྔགས་ཀྱི་ཐེག་པ་ལ་སྤྱོད་པར་འདོད་པ་ཡིན་ན་སློབ་དཔོན་གྱི་དབང་བསྐུར་བ་བྱ་བ་བུམ་པའི་དབང་ཐོབ་པར་མ་བྱས་པར་སྨོན་པ་དང་འཇུག་པའི་སེམས་བསྐྱེད་པ་ཙམ་ལ་ལྟོས་པར་མི་བྱ་སྟེ། གསང་སྔགས་རང་ཉིད་ལེན་པར་འགྱུར་བའི་ཕྱིར་རོ། །དེ་ཡང་རྒྱུད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་བརྩོན་པ་ཡང་། །འབྲས་བུ་མེད་པ་ཉིད་དུ་འགྱུར། །ཞེས་པ་དང་། ཡང་རྒྱུད་ལས། དབང་བསྐུར་རྗེས་གནང་མེད་པར་ཡང་། །གསང་སྔགས་རང་ཉིད་ལེན་པར་བྱེད། །ཅེས་གསུངས་ཏེ། ཞེས་ལུང་འདྲེན་མཛད་པའི་ཚིག་འདི་གཉིས་གསང་བ་སྙིང་པོའི་རྒྱུད་ཚིག་ཡིན་ནོ། །ཐར་པ་ལོ་ཙཱ་བས་གསང་སྙིང་རྒྱུད་ཕྱི་མ་ལ་འགྱུར་མཛད། བསམ་ཡས་སུ་གསང་བ་སྙིང་པོའི་རྒྱ་དཔེ་ཁ་ཆེ་པཎ་ཆེན་གྱི་ཕྱག་ཏུ་བྱུང་བ་རྟ་སྟོན་གཟི་བརྗིད་ལ་བབས། དེ་ནས་ཤ་གད་ལོ་ཙཱ་བ་ལ་བྱུང་བ་བཅོམ་ལྡན་རལ་གྲིས་བླངས་ཏེ་འགྱུར་བཅོས་མཛད། གསང་སྙིང་སྒྲུབ་པ་རྒྱན་གྱི་མེ་ཏོག་ཅེས་པའི་བསྟན་བཅོས་མཛད། དེ་དུས་ཤ་གད་ལོ་ཙཱ་བས་བཅོམ་ལྡན་རལ་གྲི་ལ་བསྐུར་བའི་ཡི་གེ་ནི། བསིལ་ལྡན་འདི་ན་སྡེ་སྣོད་འཛིན་རྣམས་ཀྱིས། །ནང་ན་རྒྱུ་སྐར་རྒྱལ་པོ་གང་བ་ལྟར། །ཀུན་ནས་ཀུན་ཏུ་རབ་ཏུ་མཛེས་གྱུར་པ། །མཁས་ཆེན་བཅོམ་ལྡན་རལ་གྲི་རྒྱལ་གྱུར་ཅིག །སྤྱན་སྔར་ཞུ་བ། གསང་བ་སྙིང་པོའི་རྒྱ་དཔེ་བྲིས་ལ་བསྐུར་གསུང་བ། དཔེ་དེ་ཏ་ལའི་ལོ་མ་ལ་ཡི་གེ་ཝརྟུ་ཤིན་ཏུ་ལེགས་པར་བྲིས་པ། སྔ་དུས་སུ་བྱོན་པས་ཡི་གེ་ལ་ལ་སུབས། ལེའུ་དགུ་པ་ནས་ཏ་ལའི་བྱང་བུ་གཅིག་ཀྱང་ཆད། མཇུག་ཀྱང་མ་རྫོགས་པ་ཞིག་གདའ། འོན་ཀྱང་ལེའུ་ཉེར་གཉིས་པ་རྫོགས་ནས་མ་འགྱུར་བའི་ལེའུ་གཉིས་རྫོགས་སུ་ཉེ་བ་ཞིག་གདའ། དེས་ཀྱང་ཇི་ཙམ་རྫོགས་མ་འཚལ། གཉིས་པོ་འདི་ལ་འབྲུ་ཐུག་བགྱིས་ན་ཅུང་ཟད་གོའམ་སྙམ་སྟེ་མ་བགྱིས། འགའ་ཞིག་ལ་ཅུང་ཟད་བགྱིས་པ་འདི་དག་ལའང་ནོར་བ་མཆིས་པས་དེ་རྣམས་ལེགས་པར་འཆོས་པ་དང་། འདི་གཉིས་ལེགས་པར་བསྒྱུར་བར་ཡང་ཞུ། གཞན་མཚམས་སྦྱོར་མ་བྱས་པ་དང་། ཚིགས་བཅད་ལ་ཤད་མ་བྲིས་པ་རྣམས་རྒྱ་དཔེ་ལ་ཇི་ལྟར་འདུག་པ་བཞིན་བྲིས་པ་ལགས་སོ། །དག་ཞུས་ཀྱང་བགྱིས་སོ། །རྒྱུད་ཀུན་སྙིང་པོ་དཔལ་ལྡན་འདུས་པ་དང་། །དབྱེར་མེད་རྒྱུད་ཆེན་འདི་ལྟ་བུ་དང་གཞན། །ཟབ་མོའི་རྒྱུད་དང་ཐེག་ཆེན་ཆོས་རྣམས་དང་། །མཇལ་ནས་ཚུལ་བཞིན་སྒྲུབ་པ་བྱེད་པར་ཤོག །ཅེས་དང་། བཅོམ་ལྡན་རལ་གྲིས། གནས་གཙང་སྟེང་གི་འོག་མིན་ཉམས་དགའ་བར། །ཀུན་བཟང་རྡོ་རྗེ་སེམས་དཔས་གསུངས་པའི་བཀའ། །རྒྱུད་རྒྱལ་གསང་སྙིང་རྒྱ་དཔེ་མ་རྙེད་པས། །བོད་ཀྱིས་བྱས་ཞེས་གངས་རིའི་ཁྲོད་འདིར་གྲགས། །བཅོམ་ལྡན་རལ་གྲིས་རྒྱ་དཔེ་ལེགས་བཙལ་ནས། །གཞུང་འདི་འཛིན་པའི་སྔགས་འཆང་རྣམས་ལ་བསྟན། །པཎ་ཆེན་བི་ཤྭ་མི་ཏྲ་ལ་སོགས་པའི། །གཞུང་གི་སྒྲུབ་བྱེད་གསང་སྙིང་སྒྲུབ་པར་ལྟོས། །རྒྱ་བོད་གཉིས་སུ་མཁས་པར་ལེགས་སྦྱངས་པས། །དཔེ་འདི་མ་རྙེད་ཡིད་བཞིན་རིན་ཆེན་འདྲ། །སངས་རྒྱས་གསང་བ་བི་ཤྭ་མི་ཏྲ་ཡི། །གསང་སྙིང་རྒྱུད་དང་མཐུན་པའི་འགྲེལ་བ་མཛད། །འདི་གཉིས་སྤངས་ནས་རང་གར་འཆད་པ་རྣམས། །ཤེས་རབ་འཆལ་བའི་རང་བཞིན་བསླུས་པ་ཡིན། །རྨ་རིན་འཕྱོང་དྲུག་དཔྱད་གཞུང་མ་མཐོང་བས། །འཕྱོང་དྲུག་གཞུང་མཚམས་ཤེས་པ་མེད་ཅེས་གྲགས། །འཕྱོང་དྲུག་ཤེས་པར་འདོད་པའི་སྔགས་འཆང་རྣམས། །གཟུར་གནས་བློ་ཡི་ཁོ་བོའི་དྲུང་དུ་བྱོན། །ཞེས་གསུངས་ཤིང་དར་བར་མཛད། ཇོ་བོ་ཆེན་པོ་རྗེས་བསམ་ཡས་སུ་རྒྱ་དཔེ་རྣམས་གཟིགས་པས། ཇོ་བོས་སྔར་གཟིགས་མ་མྱོང་བ་རྒྱ་དཔེ་མང་པོ་འདུག་པས། གསང་སྔགས་འདི་ལ་མིས་ཤེས་པ་མེད་པའི། མཁའ་འགྲོ་མ་རྣམས་ཀྱིས་ཀྱང་ནམ་མཁར་གཞལ་ཡས་ཁང་དཔག་ཏུ་མེད་པའི་སྒོ་ཕྱེ་ནས་རྒྱུད་སྡེ་མང་པོ་བསྟན་པ་ལའང་འདི་རྣམས་མི་གདའ། ཐེག་པ་ཆེན་པོ་གསང་སྔགས་འདི་ལ་མཐའ་མངོན་རྒྱུ་རང་ཡོད་ཡོད་མི་འདྲ་གསུངས་ནས་ཐུགས་རྒྱལ་ཆག  བོད་ཀྱི་རྒྱལ་པོ་ལ་རྗེས་སུ་ཡི་རངས་པ་མཛད་ནས། བོད་ཀྱི་བསྟན་པ་དར་དུས་དེ་འདྲ་རྒྱ་གར་དུ་ཡང་མ་བྱུང་ངམ་གསུངས་ཤིང་། རྒྱ་གར་དུ་མེའི་དགྲ་ལན་གསུམ་བྱུང་བས་ཚིག་པ་འདྲ། རྒྱ་གར་ན་མེད་པའི་དཔེ་མང་པོ་འདི་ན་སྣང་གསུངས་ནས་བཙལ། ཞལ་བཤུས་ནས་རྒྱ་གར་ལ་བསྐུར་བྱ་བ་དང་། སློབ་དཔོན་པདྨས་ནམ་མཁའ་ལ་བྱོན་ནས་ལྷ་དང་ཀླུ་དང་། དཔལ་ཤྲཱི་ལེནྟྲ་ནས་རྒྱུད་སྡེ་ཐམས་ཅད་བསམ་ཡས་སུ་སྤྱན་དྲངས་པས་རྒྱ་གར་པས་བོད་མང་པ་ཡིན་གསུངས་པ་རྣམས་ཇོ་བོའི་རྣམ་ཐར་ཆེན་མོར་སྣང་ངོ་། །དེ་ལྟ་བུའི་རྒྱུད་རྣམས་ཇི་ལྟར་དར་བ་ཡང་། མདོ་སྡེ་གདམས་ངག་འབོགས་པའི་རྒྱལ་པོ་ལས། རྒྱུ་ལ་མོས་པ་རྒྱུའི་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པ་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་དང་། རྙིང་མའི་མདོ་དགོངས་པ་ལུང་སྟོན་ལས། འཛམ་གླིང་ཤར་ལྷོའི་ཕྱོགས་མཚམས་སུ། །མི་ལས་སྐལ་ལྡན་གྲགས་པ་ཆེ། །རྒྱལ་པོ་ཛ་ཞེས་བྱ་བ་ལ། །ལག་ན་རྡོ་རྗེས་སྟོན་པར་འགྱུར། །ཞེས་དང་། སྔགས་གསར་མར་ཡང་། དཔལ་སྡོམ་པའི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་ཉི་ཤུ་རྩ་བརྒྱད་ན། །བསྟན་པའི་སྙིང་པོ་དམ་པ་ཞིག །ལྷ་གནས་གསུམ་དུ་གྲགས་པ་སྟེ། །འཛམ་གླིང་ཤར་ལྷོའི་ཕྱོགས་མཚམས་ན། །དཔལ་ཞེས་བྱ་བའི་རི་བོ་ལ། །ཐུགས་རྗེ་མཐུན་པའི་བྱིན་རླབས་ཀྱི། །རྒྱལ་པོ་ཙ་༼རྒྱལ་པོ་ཙ་ཡིན་ན་ཛའི་བཤད་པ་མི་རུང་ངོ་སྙམ་ན། ཙ་དང་ཛ་གཉིས་སྒྲའི་བྱིངས་གཅིག་སྟེ་ཛ་ཌི་རལ་པའི་དོན་ལ། ཀ་ལ་པ་ལས། ཙ་ཊཱུ་ན་རལ་པ་ལའི་ཞེས་སོ། །༽ཞེས་བྱ་བ་ལ། །ལག་ན་རྡོ་རྗེས་སྣང་བར་བྱེད། །མི་ལས་སྐལ་ལྡན་དམ་པ་རྣམས། །བྱང་ཆུབ་མཆོག་ཏུ་གྲུབ་འགྱུར་བ། །དེ་ལ་རྟག་ཏུ་གུས་པར་བྱོས། །ཞེས་མཐུན་པར་གསུངས་པ་ལྟར། རྒྱལ་པོ་ཛ་ལ་བབས་ནས་རིམ་པར་དར་བ་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ཚུལ་བརྒྱ་ལྔ་བཅུ་པའི་འགྲེལ་བ་ལས། གསུང་རབ་འདིའི་ལོ་རྒྱུས་བཤད་ན། སྔོན་སངས་རྒྱས་མི་ཡུལ་ན་ལོ་བརྒྱད་ཅུ་བཞུགས་པའི་ཚེ། སརྦ་བུདྡྷ་ས་མ་ཡོ་ག་དང་། གུ་ཧྱ་ས་མ་ཛ་ལ་སོགས་པས་འདུལ་ཞིང་ཐེག་པ་དེ་དག་གི་སྣོད་དུ་གྱུར་པ་འཛམ་བུའི་གླིང་གི་མི་ཡུལ་ན་མེད་པས། རྒྱལ་ཆེན་རིགས་བཞི་དང་སུམ་ཅུ་རྩ་གསུམ་དང་། དགའ་ལྡན་ལ་སོགས་པའི་གནས་རྣམས་ན་ལྷ་རྣམས་དང་བསྐལ་པ་བཟང་པོའི་བྱང་ཆུབ་སེམས་དཔལ་ལ་སོགས་པ་སྣོད་དུ་གྱུར་ནས་དེའི་ཚེ་མདོ་སྡེ་དེ་ན་བཞུགས་སོ། །སླད་ཀྱི་སངས་རྒྱས་མྱ་ངན་ལས་འདས་པའི་འོག་ཏུ་ཟ་ཧོར་གྱི་རྒྱལ་པོ་འཁོར་དང་བཅས་པ་ངོ་མཚར་དུ་ཆོས་ལ་དད་པ་དག་ཅིག་འདུག་པ་ཐེག་པ་དེའི་འདུལ་སྐལ་དུ་གྱུར་ཅིང་སྣོད་དུ་གྱུར་ནས་སརྦ་བུདྡྷ་ས་མ་ཡོ་ག་ལ་སོགས་པ་མདོ་སྡེ་ཆེན་པོ་བཅོ་བརྒྱད་ཕྱག་ན་རྡོ་རྗེའི་བྱིན་གྱིས་བརླབས་ཀྱི་ཟ་ཧོར་གྱི་ཡུལ་དུ་གཤེགས་པ་དང་། ཟ་ཧོར་གྱི་རྒྱལ་པོ་ཨིནྡྲ་བྷཱུ་ཏིས་མདོ་སྡེ་དག་བལྟས་པ་ན་བརྡའ་མ་འཕྲོད་ནས། སྔོན་གྱི་ལས་ཀྱི་དབང་གི་མངོན་པར་ཤེས་པ་ཐོབ་པས་བལྟས་པ་ན། ཡུལ་གྱི་དབུས་ཡུལ་མ་ལ་བ་ན་ཨཱ་ཙརྱ་ཀུ་ཀུ་རཱ་ཛ་ཉིན་བཞིན་ཁྱི་སྟོང་ལ་ཆོས་འཆད། མཚན་བཞིན་ཁྱི་དེ་དག་ལ་དམ་ཚིག་གི་ལོངས་སྤྱོད་མཛད་པ། ཁྱིའི་སློབ་དཔོན་མཛད་པ་ཞིག་བཞུགས་པ་དེ་ཐེག་པའི་སྣོད་དུ་གྱུར་ལ། བདག་གི་འདུལ་སྐལ་དུ་གྱུར་པ་ཡང་འདྲ་ནས། རྒྱལ་པོས་ཕོ་ཉ་བཏང་ནས་སློབ་དཔོན་གཤེགས་སུ་གསོལ་བ་དང་། སློབ་དཔོན་དེ་ཡང་སྔོན་གྱི་ལས་ཀྱི་དབང་གི་མངོན་པར་ཤེས་པ་ལྔ་དང་ལྡན་ནས། རྒྱལ་པོ་དེ་བདག་གི་འདུལ་སྐལ་དུ་འབབ་བམ་མི་འབབ། མདོ་སྡེ་དེ་དག་གི་སྣོད་དུ་གྱུར་རམ་མ་གྱུར་བརྟགས་པ་ན། བདག་གི་འདུལ་སྐལ་དུ་ཡང་འབབ། བདག་ཀྱང་མདོ་སྡེའི་སྣོད་དུ་ཡང་གྱུར། རྒྱལ་པོའི་ཐེ་ཚོམ་ཡང་སེལ་བར་འགྱུར་མོད་ཀྱི། འོན་ཀྱང་མདོ་སྡེ་དེ་དག་སྔར་མ་བལྟས་ན། རྒྱལ་པོའི་ཐེ་ཚོམ་དག་མ་སོལ་བར་གྱུར་ན་ཤིན་ཏུ་མ་ལེགས་པས་ཕོ་ཉ་ལ་སླར་སྤྲིངས་པ། མདོ་སྡེ་དེ་དག་ཁོ་བོས་སྔར་བལྟར་འཚལ་གྱི་ཚུར་སྐུར་ཅིག་ཅེས་སྤྲིངས་པ་དང་། མདོ་སྡེ་དེ་དག་ཚུར་གཤེགས་ཏེ་བལྟས་པ་ན། མགོ་མཇུག་གར་ལྟའི་ཆ་མ་མཆིས་ཏེ། དེ་ཉིད་དུ་ལུས་བརྡབས་ཏེ་མགོན་མེད་དོ། །སྐྱབས་མེད་དོ་ཞེས་བོས་པ་དང་། དཔལ་རྡོ་རྗེ་སེམས་དཔའ་མངོན་པར་གཤེགས་ཏེ་ཁྱོད་ཅི་འདོད་ཅེས་དྲིས་པ་དང་། བདག་མདོ་སྡེ་ཟབ་མོ་འདི་བལྟས་པ་ཙམ་གྱིས་ཤེས་པར་འདོད་ཅེས་གསོལ་བ་དང་། དེ་བཞིན་གནང་ངོ་གསུངས་ནས། དེ་ནས་སརྦ་བུདྡྷ་ས་མ་ཡོ་ག་ལ་སོགས་པའི་གླེགས་བམ་རྣམས་མ་ཕྱེ་བར་དེ་དག་གི་དོན་མངོན་སུམ་དུ་ཡིད་ལ་གསལ་བར་གྱུར་ཏོ། །དེ་ནས་སློབ་དཔོན་དེ་ཟ་ཧོར་གྱི་ཡུལ་དུ་གཤེགས་ཏེ་རྒྱལ་པོ་འཁོར་དང་བཅས་པ་ལ་ཆོས་དེ་དག་བཤད་དེ། དཔལ་རྡོ་རྗེ་སེམས་དཔས་ལུང་བསྟན་ཏེ་རྒྱལ་པོ་འཁོར་དང་བཅས་པ་རྣམས་རྡོ་རྗེ་དབྱིངས་ཀྱི་དཀྱིལ་འཁོར་ལྟར་བསྒོམ་དུ་སྩལ་ཏེ། དབུས་སུ་རྒྱལ་པོ་ཉིད། བཙུན་མོ་དམ་པ་བཞི་ཡུམ་གྱི་སར་བཀོད། བློན་པོ་བཞི་རིགས་བཞིའི་སར་བཀོད། སྲས་མོ་རྣམས་ནང་གི་ལྷ་མོའི་སར་བཀོད། བཙུན་མོ་ཕལ་པ་རྣམས་ཕྱིའི་ལྷ་མོའི་སར་བཀོད། བློན་པོ་ཕལ་པ་རྣམས་སྒོ་སྲུང་བཞི་དང་བསྐལ་པ་བཟང་པོའི་བྱང་ཆུབ་སེམས་དཔའ་ལྟར་བཀོད་པ་དང་། རྒྱལ་པོས་བསམ་པ། བདག་ཅག་འཁོར་དང་བཅས་པ་རིག་འཛིན་གྱི་གནས་སུ་གྲུབ་པའི་ཕྱིར་ན། དམ་པའི་ཆོས་འདི་མི་ནུབ་པར་བྱ་བའི་ཕྱིར་སྲས་ཤ་ཀྲ་པུ་ཏི་རྒྱལ་ཚབ་ཏུ་དབང་བསྐུར་ནས། ཨཱ་ཙརྱ་ཀུ་ཀུ་རས་ལུང་དང་མན་ངག་བསྟན་པ་རྒྱལ་བུ་དེ་ལ་བསྟན་ནས་བཞག་སྟེ་བསྒོམ་པ་དང་། རྒྱལ་པོ་འཁོར་དང་བཅས་པ་སྟོང་ས་ལ་གནས་པའི་བྱང་ཆུབ་སེམས་དཔའི་རིག་འཛིན་དུ་གྲུབ་བོ། །དེའི་སྲས་ཤ་ཀྲ་པུ་ཏིས་དེ་བཞིན་དུ་བསྒོམ་པ་དང་འཁོར་བདུན་བརྒྱ་དང་བཅས་པ་ཡང་རིག་འཛིན་གྱི་གནས་སུ་གྲུབ་བོ། །ཡང་རྒྱལ་པོ་ཤ་ཀྲ་པུ་ཏིས། སྲས་ནི་ཆུང་སྟེ། སྲས་མོ་གོ་མ་དེ་བཱི་ལ་དཔལ་དམ་པའི་ནང་ནས་ཚུལ་ལྔ་བརྒྱ་ལྔ་བཅུ་པ་བཀོད་དེ་བཤམས་ནས་ཨིནྡྲ་བྷཱུ་ཏིའི་ལུགས་དེ་སྲས་མོ་ཡུལ་དང་ས་འཛིན་དུ་སྩལ་བ་དེ་ལ་བསྟན་པས་སྲས་མོ་དེ་འཁོར་དང་བཅས་པ་བརྒྱ་དང་ཡང་རིག་འཛིན་དུ་གྲུབ་བོ། །དེ་ནས་སྲས་མོ་དེས་རྒྱལ་བུ་ལ་ལུང་དང་མན་ངག་བཞག་པ་ལས་འཕེལ་བ་ནི་དེང་སང་དུ་ཡང་འདི་ལགས་ཏེ། ཞེས་པ་ལྟར་རིམ་གྱིས་དར་བ་ཡིན་ལ། སློབ་དཔོན་སངས་རྒྱས་གསང་བས་ལམ་རྣམ་པར་བཀོད་པར་ཡང་། དེ་ནས་རྡོ་རྗེ་གདན་སྟེང་གི། །འཛམ་གླིང་ཤར་ལྷོའི་ཕྱོགས་མཚམས་སུ། །ཕོ་བྲང་དམ་པ་རིན་ཆེན་ནང་། །བཀྲ་ཤིས་དམ་པའི་ཁང་པ་རུ། །ཀུ་ཀུ་རཱ་ཛ་ཨིནྡྲ་བྷཱུ་ཏི་དང་། །སིང་ཧ་ཨུ་པ་ར་ཛ་དང་། །སྲས་མོ་གོ་མ་པ་ལ་སོགས། །སྒྱུ་འཕྲུལ་དྲ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །ཞེས་པ་དང་། སངས་རྒྱས་མཉམ་སྦྱོར་གྱི་འགྲེལ་བ་ལས་ཀྱང་། རྒྱལ་བའི་དགོངས་དོན་ཡུན་རིང་གནས་པའི་ཐབས། །སྤྲུལ་སྐུའི་ཉི་མས་འཛམ་གླིང་གསལ་མཛད་ནས། །སྡེ་སྣོད་གསུམ་གྱི་འཇིག་རྟེན་འདུལ་བའི་དུས། །བློ་དམན་འཕགས་པའི་ལམ་ལ་བཀོད་བྱས་ཀྱང་། །རང་གི་དེ་ཉིད་ངེས་དོན་གནས་མ་མཐོང་། །མ་འོངས་བློ་མཆོག་གྲོལ་བར་བྱ་བའི་ཕྱིར། །སྤྲུལ་པའི་བྱང་ཆུབ་སེམས་དཔའ་བློ་གྲོས་མཆོག །དགོངས་པའི་དབང་གིས་རྨོངས་པ་འདུལ་བའི་ཚུལ། །དཀྱིལ་འཁོར་སྤྲུལ་པའི་འཁོར་ལོ་རབ་སྣང་མཛད། །མགོན་པོ་རྣམས་ཀྱི་རྗེས་སུ་བསླབས་བྱས་ཏེ། །དཔལ་ལྡན་སངས་རྒྱས་ཐམས་ཅད་མཉམ་སྦྱོར་གཞུང་། །གསང་བའི་དཀྱིལ་འཁོར་རིམ་གྱིས་སྒྲུབ་དོན་གསལ། །གདུལ་བྱ་དག་པའི་ཚོགས་རྣམས་གྲོལ་བར་མཛད། །ཡུན་རིང་གསང་བའི་ཐེག་པ་གནས་བྱའི་ཕྱིར། །སྤྲུལ་པའི་བྱང་སེམས་སྨེ་ཁྲོད་རྒྱལ་པོ་ལ། །གསང་བ་དམ་པའི་གདམས་ངག་རབ་བཀྲོལ་ཞིང་། །རྣལ་འབྱོར་དོན་ཕྱིར་རབ་ཏུ་གདམས་པར་མཛད། །སྤྲུལ་པའི་སྐུ་འདས་ཕྱི་མའི་དུས་ཤིག་ཚེ། །རྒྱལ་བའི་བཀའ་གསང་འཛམ་གླིང་གནས་སུ་ཤར། །རྒྱལ་པོའི་ཁབ་ཏུ་སྤྱན་དྲངས་མཆོད་བྱས་ཤིང་། །དགའ་ཞིང་གུས་བསྟོད་ལེགས་བལྟས་བརྡ་མ་མཇལ། །ཐུགས་རྗེའི་འབྲེལ་ཤུགས་གསང་སྔགས་འཛིན་པར་གྲགས། །དམ་པར་བཟུང་སྟེ་གླེགས་བམ་འཛིན་པར་ཞུས། །སྒྱུ་འཕྲུལ་ཐིག་ལེ་སྟོང་པའི་དཀྱིལ་འཁོར་གཞུང་། །གྲུབ་ཐོབ་ལྷག་པའི་ལྷ་ཡིས་ལུང་བསྟན་མཛད། །ཅེས་འབྱུང་ཞིང་རྒྱས་པར་མཛད་པ་ཡིན་ལ། སྤྲུལ་པའི་སྐུ་དགའ་རབ་རྡོ་རྗེས། རྡོ་རྗེ་སེམས་དཔའ་ལ་དངོས་སུ་གསན་ནས། སློབ་དཔོན་འཇམ་དཔལ་བཤེས་གཉེན། ཤྲཱི་སིང་ཧ། སློབ་དཔོན་པདྨ་འབྱུང་གནས། པཎྜི་ཏ་ཛྙཱ་ན་སཱུ་ཏྲ། པཎ་ཆེན་བི་མཱ་ལ་མི་ཏྲ་རྣམས་ཀྱི་སེམས་ཀློང་མན་ངག་གི་སྡེ་གསུམ་རྒྱས་པར་མཛད་ཅིང་། སྒྱུ་འཕྲུལ་གསང་བ་སྙིང་པོའི་སྐོར་རྣམས་ནི་སློབ་དཔོན་སངས་རྒྱས་གསང་བས་དར་བར་མཛད། གསང་བ་སྙིང་པོའི་འགྲེལ་བ་དང་། སྒྱུ་འཕྲུལ་ལམ་རིམ་ལ་སོགས་པའི་བསྟན་བཅོས་ཀྱང་མང་དུ་བརྩམས་སོ། །ཡང་ཛེ་ཏ་རིའི་སློབ་མ། འཇམ་པའི་དབྱངས་ཀྱི་རྗེས་སུ་བཟུང་བའི་སློབ་དཔོན་སྒེག་པའི་རྡོ་རྗེས་གསང་བ་སྙིང་པོ་ལ་ཊིཀྐ་མཛད་ཅིང་དར་བར་མཛད་དོ། །ཡང་ཀརྨ་པ་རང་ཉིད་ཀྱི་ལུགས་ལ་ཡང་རྫོགས་ཆེན་རྒྱ་གར་དུ་ཡོད་པ་འགྲུབ་སྟེ། ཀརྨ་པཀྵིས། རྡོ་རྗེ་སེམས་དཔའི་སྤྲུལ་པ་དགའ་རབ་རྡོ་རྗེ་ལ་རྫོགས་པ་ཆེན་པོ་ཀློང་ཆེན་རབ་འབྱམས་སོགས་ཉན་པའི་ཚེ་རང་བྱུང་རྡོ་རྗེ་བདག་ཀྱང་ཏོག་ཙེ་རྣལ་འབྱོར་དབང་ཕྱུག་བྱ་བར་གྱུར་ནས་རྫོགས་པ་ཆེན་པོའི་སྒྲ་དོན་ཐམས་ཅད་རྟོགས་པ་ཞིག་ཡིན་ཞེས་གསུངས་ཤིང་། ཡང་གསུང་ལས། རྒྱལ་པོ་ཛའི་རྗེས་སློབ་དཔོན་པདྨ་བོད་དུ་མ་བྱོན་པའི་སྔ་རོལ་ཙམ་ན། རྒྱ་གར་དུ་བདག་ཀྱང་གསང་སྔགས་རྙིང་མ་ཐམས་ཅད་སྟོན་ཤེས་པའི་སྔགས་ཀྱི་རྣལ་འབྱོར་པ་ཞིག་ཏུ་གྱུར་ནས་མཚན་ཡང་ཡེ་ཤེས་རྡོ་རྗེ་འབར་བྱ་བ་ཡིན། ཞེས་གསུངས། དེ་དག་གིས་ནི་སྔགས་ཀྱི་རྒྱུད་རྣམས་སྤྲུལ་པའི་སྐུས་དངོས་སུ་གསུང་དགོས་པའི་ངེས་པ་མེད་པའི་ཚུལ་དང་། ཐུབ་པས་རྫོགས་པ་ཆེན་པོ་ལ་སོགས་པ་ཐེག་པ་རིམ་པ་དགུ་ཡང་གསུངས་པའི་ཚུལ་དང་། རྙིང་མ་རྒྱ་གར་དུ་ཇི་ལྟར་བྱུང་ཞིང་དར་བའི་ཚུལ་བསྟན་པ་ཡིན་ནོ། །   (མུ་འགོད་བྱ་རྒྱུ།)

47.2K