༄༅། །རྒྱལ་བའི་དབང་པོ་ཀརྨ་པ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༢

ཡང་། རྙིང་མའི་རྒྱུད་ཀྱི་སྐབས་ན། སྤྱིར་གསར་མའི་རྒྱུད་མཐའ་དག་ནི་རྒྱུད་ཀྱི་དངོས་པོ་བཅུ་ཚང་བ་འཕགས་ཡུལ་ཀུན་ཏུ་ཆེར་གྲགས་ཤིང་དེང་སང་གི་བར་དུ་གནས་པ། བོད་ཡུལ་འདིར་སྔར་ཡང་འགྱུར་ཞིང་ཕྱིས་ཀྱང་འགྱུར་བ། སྐད་གསར་བཅད་དང་བརྡ་རྙིང་གི་ཁྱད་པར་ཙམ་གྱིས་འགྱུར་ཟུར་ཕྲན་ཚེགས་ཞིག་མི་གཅིག་པ་ལས་ཕལ་ཆེར་གཅིག་ཐོག་ཏུ་གཅིག་འབབ་པ་ཞིག་འགྱུར་འདུག་པ་ལ། རྙིང་མའི་རྒྱུད་འདི་དག་གླེང་གཞི་གླེང་བསླངས་ནས་རྒྱུད་རྫོགས་པར་བསྟན་པའི་བར་གྱི་དངོས་པོ་བཅུ་ཚང་བར་བསྟན་པ་ཉུང་བར་འདུག་པས། རྒྱུད་མཚན་ཉིད་པ་ཡིན་ན་རྒྱུད་ཀྱི་དངོས་པོ་བཅུ་ཚང་དགོས་པ་ལ། འདི་དག་མ་ཚང་ན་ཡང་རྒྱུད་དུ་འགྲོ་བའི་ཤེས་བྱེད་རྣམ་དག་སྨྲ་རྒྱུ་ཅི་ཡོད།

ཅེས་གསུངས་པ་ལ། སྤྱིར་གསང་སྔགས་ཀྱི་རྒྱུད་སྡེ་སེམས་ཅན་རྣམས་ཀྱི་བློའི་རིམ་པ་དང་ཆོས་ཀྱི་དབྱིངས་ཀྱི་རྗེས་སུ་བྱེད་པས་མཐའ་དང་གྲངས་དང་ཚད་གཟུང་བར་དཀའ་མོད་ཀྱི། མདོ་ཙམ་སྨོས་ན། རྡོ་རྗེ་རྩེ་མོ་ལས། རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བ་རྒྱུད་དུ་འདོད་པ་ཡིན། །རྒྱུ་རྒྱུད་འཇག་མའི་སྲིན་བུ་ནས་སངས་རྒྱས་ཀྱི་བར་དུ་རྒྱུན་ཆགས་སུ་གནས་པ་ཡིན་ལ། གསང་བ་འདུས་པ་ཕྱི་མ་ལས། རང་བཞིན་རྣམ་དག་རྒྱུ་ཡིན་ཏེ། །གཞི་ནི་ཐབས་ཞེས་བྱ་བ་ཡིན། །དེ་བཞིན་མི་འཕྲོག་འབྲས་བུ་སྟེ། །གསུམ་གྱིས་རྒྱུད་དོན་བསྡུས་པའོ། །ཞེས་པ་ལྟར་ན། རྒྱུའི་རྒྱུད་སེམས་ཅན་ཐམས་ཅད་ཀྱི་རྒྱུད་ལ་དཀར་པོའི་ས་བོན་དང་ལྡན་པ་དང་། ཐབས་ཀྱི་རྒྱུད་ཉམས་སུ་ལེན་པའི་ལམ་དང་། འབྲས་བུའི་རྒྱུད་སྐུ་གསུམ་ཡེ་ཤེས་ལྔ་དང་ལྡན་པའི་བདག་ཉིད་མངོན་དུ་གྱུར་པ་སྟེ་གསུམ་དང་། མངོན་བརྗོད་བླ་མའི་འགྲེལ་བ་ལས། རྒྱུད་ནི་གཉིས་ཏེ་རྩ་བ་དང་ཡན་ལག་གིའོ། །ཞེས་པས་གཉིས་དང་། སློབ་དཔོན་ཨཱརྱ་དེ་བས། བརྗོད་བྱ་དོན་གྱི་རྒྱུད་ཀྱི་ངོ་བོ་ནི་གང་ལ་གཉིས་མེད་ཀྱི་ཡེ་ཤེས་སྣང་བར་ནུས་པ་ཡིན་ལ། རྗོད་བྱེད་ཚིག་གི་རྒྱུད་ཀྱི་ངོ་བོ་ནི་གང་ལ་གཉིས་མེད་ཀྱི་ཡེ་ཤེས་སྣང་བར་ནུས་པའི་མན་ངག་ཡིན་ནོ། །ཞེས་པ་ལྟར་ན་ཡང་གཉིས་དང་། སློབ་དཔོན་སངས་རྒྱས་གསང་བས་ཀྱང་གཉིས་སུ་ཕྱེ་ལ། མདོར་ན་རྒྱུའི་རྒྱུད་ལ་ཡུལ་ཡུལ་ཅན་དང་རྒྱུ་འབྲས་གཉིས་ཡོད་པས། དེའི་དྲི་མ་སྦྱོང་བྱེད་དུ་བསྐྱེད་རྫོགས་གཉིས་སྟོན་པའི་ཐབས་ལ་རྗོད་བྱེད་ཚིག་གི་རྒྱུད་དུ་བཏགས་པ་ཡིན་མོད། ཞི་རྒྱས་ལ་སོགས་པའི་ལས་རབ་འབྱམས་སྒྲུབ་པ་གཙོ་བོར་བཏོན་པའི་རྒྱུད་རྣམས་ལ་ནི་དངོས་པོ་བཅུ་ཚང་དགོས་པ་ཡང་མ་ཡིན་ཞིང་། བསྐྱེད་རྫོགས་ཀྱི་ལམ་ཕྱིན་ཅི་མ་ལོག་པར་སྟོན་པའི་རྒྱུད་རྣམས་ལ་དངོས་པོ་བཅུ་དང་ལྡན་དགོས་ཏེ། ལྟ་བ་དང་དཀྱིལ་འཁོར་དང་དབང་དང་དམ་ཚིག་དང་སྒྲུབ་པ་དང་ཕྲིན་ལས་དང་སྔགས་དང་ཕྱག་རྒྱ་དང་ཏིང་ངེ་འཛིན་དང་མཆོད་པ་སྟེ་བཅུའམ། གཞན་ནས་བཤད་པ་ཡང་རུང་སྟེ་འདིའི་རྒྱུད་རྣམས་ལ་ཡོད་ཅིང་། འགའ་ཞིག་ལ་མེད་ཀྱང་སྐྱོན་མེད་པ་ཡིན་ཏེ། སྔགས་གསར་མ་ལ་ཡང་། རྡོ་རྗེ་རྣམ་འཇོམས། རྣམ་རྒྱལ། གདུགས་དཀར། སྔགས་བཏུའི་རྒྱུད་ལ་སོགས་པ་བྱ་སྤྱོད་ཕལ་ཆེར་ལ་མ་ཚང་། ཆོས་སྤྱོད་མངོན་པར་རྟོགས་པའི་རྒྱུད་དང་། འཇིག་རྟེན་གསུམ་རྒྱལ་གྱི་རྟོག་པ་ལ་སོགས་པ་ཡོ་ག་འགའ་ཞིག་ལ་མ་ཚང་ལ། བླ་མེད་ཀྱི་རྒྱུད་ཀྱི་དུམ་བུ་ཕལ་ཆེར་ལ་མེད་དོ། །དེ་ལྟ་བས་ན་གསར་མ་པའི་རྒྱུད་རྣམས་ལ་ཡང་དངོས་པོ་བཅུ་ཚང་བ་དང་མ་ཚང་བ་མང་དུ་ཡོད་པས། རྒྱུད་གཅིག་ལ་དངོས་པོ་བཅུ་ཀ་ཚང་དགོས་པའི་ངེས་པ་མེད་དོ། །                      (མུ་འགོད།)

47.2K