༄༅། །རྒྱལ་བའི་དབང་པོ་ཀརྨ་པ་མི་བསྐྱོད་རྡོ་རྗེས་གསང་སྔགས་རྙིང་མ་པ་རྣམས་ལ་དྲི་བའི་ཆབ་ཤོག་གནང་བའི་དྲིས་ལན་ལུང་དང་རིགས་པའི་འབྲུག་སྒྲ་ཞེས་བྱ་བ་བཞུགས་སོ། །༣

ཡང་། གསར་མའི་རྒྱུད་རྣམས་ནི་རྒྱ་གར་ཤར་ནུབ་ཨུ་རྒྱན་ལ་སོགས་འཕགས་ཡུལ་ཀུན་ན་དེང་སང་གི་བར་དུ་དར་རྒུད་མེད་པར་གནས་ལ། བོད་ཀྱི་ལོ་ཙཱ་བ་སྔ་ཕྱི་མང་དུ་བྱོན་པ་དག་གིས་འགྱུར་བཅོས་བྱས་ཤིང་། དཔེར་ན་ཀྱེ་རྡོར་གཅིག་པུ་ལ་ཡང་འགྱུར་བྱེད་སྔ་ཕྱི་བདུན་ཙམ་བྱུང་འདུག་པ་ལ། རྙིང་མའི་རྒྱུད་འདི་ལ་ཁྲི་སྲོང་ལྡེའུ་བཙན་གྱི་གོང་དུ་ཡང་མ་འགྱུར། དེ་དུས་ལས་ཕྱིས་ཀྱང་འགྱུར་བའི་ལོ་རྒྱུས་གཏན་ཚིགས་ཁུངས་ཐུབ་མི་སྣང་བས། ཚུལ་འདི་ལ་དཔག་ན་རྙིང་མ་རྒྱ་གར་ན་མེད་པ་ཡང་འཐད་པ་འདྲ་ཞིང་། རིགས་པ་དེས་ན་དེ་དུས་བོད་ནི་བོན་གྱི་དབང་བྱས་པས་བོན་གྱི་བསྟན་པ་ཤིན་ཏུ་དར་ལ། འགྲོ་བ་མཐའ་དག་ཀྱང་བོན་ལ་ངོ་མཚར་དུ་འཛིན་པ་གཟིགས། ལོ་ཙཱ་བ་རྣམས་ཀྱི་གསང་སྔགས་བོན་གྱི་ལུགས་སུ་བཤད་དེ། ཕྲིན་གཞུང་གྱེར་བ་དང་། མདོས་གཏོར་དང་། སྦྱོར་སྒྲོལ་གྱི་ལག་ལེན་མཛད་པ་ལ་མིང་རྫོགས་ཆེན་དང་རྙིང་མར་གྲགས་པ་ཙམ་ལས་རྒྱ་གར་ན་ཡང་མེད་ཅིང་། མཁས་པ་དག་གི་གསུང་ལས་ཀྱང་འཐད་ལ་འདི་ལ་ཅི་སྨྲ།

ཞེས་གསུངས་པ་ལ། གསར་མའི་རྒྱུད་རྣམས་འཕགས་ཡུལ་ཀུན་ན་དེང་སང་གི་བར་དུ་དར་རྒུད་མེད་པར་གནས་ཤེས་གསུངས་པ་ཡང་ཧ་ཅང་ཐལ་བ་ཡིན་ཏེ། དུས་འཁོར་རྩ་རྒྱུད་འགྲེལ་བ་སྟོང་ཕྲག་དྲུག་ཅུ་པ་དང་བཅས་པ་སློབ་དཔོན་ཙི་ལུ་པའི་སློབ་མས་ཀ་ཏ་ཀའི་རྒྱལ་པོའི་ཡུལ་དུ་དམག་བྱུང་བ་དང་དོང་དུ་སྦས་པ། ཕྱིས་བཏོན་པས་མ་ཚང་བ་དང་། ཙི་ལུ་བ་ལ་འབྲི་བར་ཞུས་པས། མཁའ་འགྲོ་མས་སྦས་པ་ཡིན་པས་མི་རུང་གསུངས་ནས་མ་གནང་། དཔེ་དེའི་དུམ་བུ་འཐོར་བ། རྩ་རྒྱུད་ཀྱི་དུམ་བུ་ཐར་ལོས་བསྒྱུར་བ་དང་། འགྲེལ་ཆེན་སྟོང་ཕྲག་དྲུག་ཅུ་རྩ་བཞི་པའི་དུམ་བུ་པཎ་ཆེན་བྷཱུ་མི་ཤྲཱིས་བསྣམས་པ་པཎ་ཆེན་ཐམས་ཅད་མཁྱེན་པ་བུའི་འགྱུར་ལས་མི་སྣང་བས། དུས་འཁོར་རྩ་རྒྱུད་འགྲེལ་བ་དང་བཅས་པ་ཡང་ནུབ་ནས་ད་ལྟ་དུམ་བུ་ལས་མེད་ཅིང་། དེ་བཞིན་དུ་རྒྱུད་སྡེ་རིན་པོ་ཆེ་རྣམས་ལ་དར་རྒུད་འཕེལ་འགྲིབ་བྱུང་ཚུལ་ཆོས་འབྱུང་རྣམས་ལས་བཤད་པས་སྨོས་མ་དགོས། ཆོས་རྒྱལ་ཁྲི་སྲོང་ལྡེའུ་བཙན་གྱི་དུས་སུ་ལོ་ཙཱ་བ་རྣམས་ཀྱི་གསང་སྔགས་བོན་གྱི་ལུགས་སུ་བསྒྱུར་ཞེས་པ་ཡང་། ཉིད་རང་གི་འདིར་གསུངས་མོད་གཞན་དུ་ལོ་རྒྱུས་ཁུངས་མ་གང་ན་ཡང་མ་བཤད། བོན་གྱི་ལོ་རྒྱུས་རྣམས་སུ་ཡང་། དེ་དུས་བོན་བསྣུབས་ནས་ཆོས་དར་བར་བྱས་སོ་ཞེས་པ་ཁོ་ན་འབྱུང་། དེའི་གོང་དུ་ལྷ་ཐོ་ཐོ་རིའི་རིང་ལ་ཆོས་ཀྱི་དབུ་བརྙེས་ཟེར་ཀྱང་། ནམ་མཁའ་ནས་སྤང་སྐོང་ཕྱག་རྒྱ་བ་སོགས་བབས་པ་ལ་ཆོས་དང་བོན་གང་ཡིན་ངོ་མ་ཤེས་པར་མཚན་གཉན་པོ་གསང་བར་བཏགས་ནས་མཆོད་པ་བྱེད་པ་ཙམ་ལས་མེད། དེ་ནས་གདུང་རབས་ལྔ་ནས་ཆོས་རྒྱལ་སྲོང་བཙན་སྒམ་པོ་བྱོན། འདི་སྤྱན་རས་གཟིགས་དངོས་ཡིན་པས། སྙིང་རྗེ་པདྨ་དཀར་པོ་དང་། ཟ་མ་ཏོག་བཀོད་པ་ལ་སོགས་པ་ཐུགས་རྗེ་ཆེན་པོའི་མདོའི་སྐོར་དང་། སྒྲུབ་ཐབས་ཀྱི་སྐོར། ཞལ་གདམས་ཀྱི་སྐོར་ལ་སོགས་པ་མང་དུ་གསུངས། གཤིན་རྗེ་གཤེད་དང་། ཞི་ཁྲོ་དང་། ཆོས་སྐྱོང་ལྷ་མགོན་གྱི་སྒྲུབ་སྐོར་སོགས་གསང་སྔགས་མང་དུ་གསུངས་པས་ཡེར་བའི་བྲག་གཅིག་པུ་ལ་འོད་ལུས་གྲུབ་པའི་གྲུབ་ཐོབ་བརྒྱད་ཅུ་བྱུང་། མཐའ་འདུལ་ཡང་འདུལ་ལ་སོགས་པའི་གཙུག་ལག་ཁང་མང་དུ་བཞེངས། ཐོན་མིས་ཡི་གེ་བླངས་ནས་མདོ་སྡེ་དཀོན་མཆོག་སྤྲིན་བསྒྱུར། གླང་ཁམས་པ་གོ་ཆས་ཡུམ་རྒྱས་པ་བསྒྱུར། དེ་ནས་མེས་ཨག་ཚོམ་གྱི་བར་དུ་གསང་སྔགས་ཀྱི་སྒྲུབ་པ་གསང་སྟེ་སྤྱོད་པ་མང་པོ་བྱུང་། བྱིས་པ་ཡན་ཆད་ཀྱིས་ཡི་གེ་དྲུག་པ་འདོན་ཞིང་ཐུགས་རྗེ་ཆེན་པོ་ལ་ཡི་དམ་དུ་བྱེད། ཞི་ཁྲོའི་སྒྲུབ་ཐབས་དང་། གཤིན་རྗེ་གཤེད་ཀྱི་སྒྲུབ་ཐབས་ཆོས་རྒྱལ་གྱིས་མཛད་པ་དེང་སང་ཡང་སྣང་བས་གསང་སྔགས་རྙིང་མ་ནི་ཆོས་རྒྱལ་ཁྲི་སྲོང་ལྡེའུ་བཙན་གྱི་གོང་དུ་ཡང་དར་བ་ཡིན་ལ། ཕྱིས་སུ་ཡང་མ་འགྱུར་བ་མ་ཡིན་ཏེ། འབྲོག་མི་ལོ་ཙཱ་བས་དབང་ཕྱུག་མ་ཉི་ཤུ་རྩ་བརྒྱད་ཀྱི་ཟོར་མདོས་བསྒྱུར། འགོས་ལོ་ཙཱ་བ་ཁུག་པ་ལྷ་བཙས་ཀྱིས་རྒྱལ་པོ་སྤྲིན་གྱི་ཤུགས་ཅན་ལ་གསན་ཏེ་གཤིན་རྗེ་གཤེད་འཇོམས་བྱེད་དང་འཆར་ཀའི་སྐོར་ལ། རྒྱུད་བདུན། དེ་དག་གི་འགྲེལ་བ་སྒྲུབ་ཐབས། མན་ངག། པཎྜི་ཏ་ག་ཡ་དྷ་རིའི་ཞལ་ཁྲིགས་སོགས་ཚང་བར་བསྒྱུར། གཞན་ཡང་གཤིན་རྗེ་ཁ་ཐུན་རྒྱུད་སྒྲུབ་སྐོར་ལས་ཚོགས་དང་བཅས་པ་འགོས་ཀྱིས་བསྒྱུར་ནས་རང་གི་སློབ་མ་རྔོག་ལྦ་བ་ཅན་ལ་སོགས་པ་ནས་བརྒྱུད་པ་དེང་སང་དུ་ཡོད་ཅིང་། སློབ་དཔོན་པདྨ་ནས་བརྒྱུད་པའི་ཕྱག་ན་རྡོ་རྗེ་གོས་སྔོན་ཅན་གྱི་རྒྱུད་སྒྲུབ་ཐབས་རྒྱ་གར་ཕྱོགས་ནས་བསྒྱུར་བ་དང་། ཡང་དག་མེ་གཅིག་ཐོད་གཅིག་གི་སྐོར་པཎ་ཆེན་ཤཱཀྱ་ཤྲི་དང་ཁྲོ་བུ་ལོ་ཙཱ་བས་བསྒྱུར། ཐར་པ་ལོ་ཙཱ་བ་ཉི་མ་རྒྱལ་མཚན་གྱིས་ཕུར་པའི་སྒྲུབ་སྐོར་དང་མན་ངག་ཁ་ཡར་བསྒྱུར། གློ་བོ་ལོ་ཙཱ་བ་ཤེས་རབ་རིན་ཆེན་གྱིས་རྡོ་རྗེ་ཕུར་པའི་དྲག་པོ་སྒྲོལ་དབང་ཡོངས་སུ་རྫོགས་པར་བསྒྱུར། ས་སྐྱ་པཎྜི་ཏས་ཕུར་པ་རྩ་དུམ་གྱི་རྒྱུད་ལ་བསྒྱུར་བཅོས་མཛད། བཅོམ་ལྡན་རལ་གྲིས་གསང་སྙིང་ལ་འགྱུར་བཅོས་དང་སྔར་མ་འགྱུར་བའི་ལེའུ་གཉིས་བསྒྱུར། གསང་སྙིང་རྒྱུད་ཕྱི་མ་ཐར་པ་ལོ་ཙཱ་བས་བསྒྱུར། སློབ་དཔོན་པདྨས་པཎ་ཆེན་ནགས་རིན་ལ་གནང་བའི་ཚེ་སྒྲུབ་པཎ་ཆེན་དེ་ཉིད་དང་ཆོས་འཁོར་ལོ་ཙཱ་བས་བསྒྱུར། ལྷ་མོ་སྤུ་གྲིའི་རྒྱུད་དང་རག་ཤའི་རྒྱུད་ཛོ་གི་ཀན་ཙི་ནཱ་ཐའི་དཔེ་ལས་མཁྱེན་བརྩེ་ལོ་ཙཱ་བས་བསྒྱུར་བ་སོགས་མང་ཞིང་། གྲུབ་ཆེན་ཨུ་རྒྱན་པའི་གསུང་ལས་ཀྱང་། བལ་པོ་ན་རྙིང་མའི་རྒྱ་དཔེ་མང་དུ་འདུག་པ་ལ། ངས་བོད་ཀྱི་སྔགས་པ་རྣམས་ལ་ཁྱེད་རང་ཚོ་མང་ཡུལ་དུ་འདེང་། ངས་རྙིང་མའི་པཎྜི་ཏ་དང་རྒྱ་དཔེ་ཚུར་དགུག །ལོ་ཙཱ་བ་ངས་བྱས་ཏེ་བསྒྱུར་བྱས་པ་ལ། བོད་ཀྱི་སྔགས་པ་རྣམས་བུ་སྨད་གསོ་བས་གཡེངས་ཏེ་མ་འགྲུབ། ད་དུང་འགྱུར་མང་དུ་བྱ་རྒྱུ་འདུག་པ་ལ། ཞེས་གསུངས་པས་ན། རྙིང་མ་པ་དག་གིས་གསར་མའི་སྐྱེས་བུ་དམ་པ་རྣམས་ཀྱི་ཕྱག་སྲོལ་ལྟར་རྒྱ་བལ་དུ་བགྲོད་ནས་ཐོས་བསམ་གྱི་རྒྱུད་སྦྱངས་ཏེ་རྒྱུད་རྣམས་གསར་དུ་བསྒྱུར་བ་དང་། འགྱུར་བཅོས་སོགས་བྱས་ན་བྱེད་རྒྱུ་མེད་པ་མ་ཡིན་མོད་ཀྱང་། སྔགས་འཆང་གོང་མ་རྣམས་རང་རང་གི་ཕ་ཆོས་གཙོ་བོར་བཏོན་ནས་བཤད་པ་དང་སྒྲུབ་པ་ཁོ་ན་ལ་ནན་ཏན་མཛད་པས་ལོ་ཙཱ་བར་གྲགས་པ་ཆེར་མ་བྱུང་བ་ཡིན་གྱི་རྒྱ་གར་ནས་ཆོས་ཀྱི་དཔེ་མ་རྙེད་པ་མ་ཡིན་ནོ། །མདོས་གཏོར་ལ་སོགས་པ་འདི་དག་བོན་དང་འདྲེས་སྙམ་པར་ཡང་མི་བསམ་སྟེ། སློབ་དཔོན་དྷི་རི་ཝརྨས་མཛད་པའི་གཙུག་ཏོར་གདུགས་དཀར་གྱི་མདོས་དང་། བྲམ་ཟེ་མཆོག་སྲེད་ཀྱིས་མཛད་པའི་ལྷ་མོ་དང་མགོན་པོའི་མདོས་དང་། འགྲོ་བཟང་སྙིང་པོ་དང་སྤྱོད་མཛད་ཆོས་ཀྱི་རྡོ་རྗེས་མཛད་པའི་རྣམ་ཐོས་སྲས་ཀྱི་མདོས་ལ་སོགས་པ་སྔགས་གསར་མ་ལ་ཡང་མང་དུ་ཡོད་པས་ཁྱད་པར་མེད་དོ། །

47.2K